作者：辛旭光
沪语改写、播讲：杭岚（三）、陈韵华（四）
审核：郭莉
编辑整合：金和平
推荐：丁迪蒙
编辑：王乙其
往期回顾：两块银洋钿（一、二）
（三）
姓陈个同乡刚刚满廿岁，当然逃勿过去。只看见伊存心朝姆妈搿边过道里出去，身体突然摇晃一记，脚步勿稳，就拿只鞋子踏脱了，伊顺势拿鞋子踢到姆妈个方向，转身朝姆妈点点头，就拨人家带走了。
姆妈就拿搿只鞋子囥到身后头，伊想，一定是同乡要自家搭伊屋里人去报个信，姆妈拿鞋子插勒后腰带浪向。一歇歇，当兵个就赶老弱病残搭仔女人下船，就地拿大家放脱了，姆妈挺仔大肚皮，老艰难个拨人群轧下了码头。
姆妈晓得，上海人侪欢喜到普陀山去烧香，原来普陀山就勒沈家门。但是搿歇，姆妈对此地是人生地勿熟，听搿搭个人讲闲话，像煞侪是短促生硬个语气，空气当中充满海腥气味。哦呦喂，搿肚皮里个小囡是冤家还是孽种啊，真叫是“上天无路，入地无门”。自家拖仔八个号头个身孕，经过一夜天个惊吓，差眼要了半条命。摸摸腰浪向，几块银洋钿还勒海，搿是养小人个铜钿，勿到关键辰光是勿好动个。伊硬撑仔走了一里路，看到路边有家弹棉花个店铺，就扶牢门框讨口茶吃。看店个小姑娘舀来碗清水，催大肚皮快点吃好走。
“开口勿骂外乡人，抬手勿打无娘子。”门口个动静，惊动了屋里向一个老阿娘，伊马上就出来拿孙囡训了一顿。伊叫小姑娘端来只矮凳，让大肚皮坐下来，姆妈一包眼泪水就滚下来了。
老阿娘六十岁左右，盘好个发髻上头，插仔根竹簪子。簪子浪向穿了两串红珊瑚珠珠，青蓝颜色个阔脚裤子下头，是双白布袜套好仔个小脚。老阿娘听了姆妈个闲话，拼命摇头。讲：“舟山搿个一年，军队搭仔百姓，侪像潮水一样翁进翁出，上海方向来个轮船三日两头拨抢过来，平白无故害仔交关老百姓。真是阿弥陀佛，阿弥陀佛啊！”
（四）
姆妈毕竟勒上海滩做过十年生活，见过世面，人也老练。搿歇辰光，姆妈像煞回到从前伊刚刚到上海做童工辰光个腔势，“人生地勿熟，到处叫爷叔”，伊看见老阿娘插个是竹簪子，应该是吃素念佛个人家。姆妈用半碗冷开水啃了只大饼，透过一口气来，勉强弯腰，想代肚皮里个小囡跪下来，搭“现世观世音菩萨”磕只头。老阿娘搀牢伊勿许。
看见老阿娘慈眉善目，姆妈眼泪汪汪个讲：“实在是走投无路，请问现世菩萨，啥地方可以收留我伲母子落落脚啊。”“后山有只庙，里头做善事，可以收留难民，吃住侪免费个。”老阿娘指点伊讲仔好几遍，姆妈终于听懂了。搿真是天无绝人之路。
临走，老阿娘又让小姑娘盛了一碗冷饭头，连碗带筷送拨了姆妈。姆妈后首来再晓得，舟山人家中浪向一顿干饭，总归要留一份“冷饭头”，下一顿淘米辰光摆进去，就好增加出饭率。搿位老阿娘真个是有份菩萨心肠个。
姆妈老仔面皮寻到半山腰个一只庙门前投，伊也勿识字。看门个小和尚看见是个大肚皮，晓得外头个船又拨劫来了。就拿姆妈领到后院，指勒几间还算清爽个和尚住个房间，让姆妈自家拣，房间里侪是两排席子打地铺，坐了一筑堆愁眉苦脸个各地来个逃难客。姆妈会得轧苗头，本来路就走勿快，索介装出可怜相，寻只角落头坐下来，竖起仔耳朵听大家南腔北调个叹苦经。
晨钟暮鼓，每趟到饭点，总归有两个小师父抬过来一大桶个粥，让每个人自家去舀。姆妈有碗筷，排勒最后，“慢人慢福，吃碗厚粥”，桶底个粥总归比上头个厚一眼，姆妈第一顿吃了两碗。小菜呢，是一大盆腌得咸透咸透个海蜇头。
沈家门是有名个渔港，样样物事贵，就是海产品便宜，最便宜个就是海蜇头。吃、住有着落了，搿记姆妈总算是放下了半个心。穷人个命侪是带勒自家身浪个，只要有机会就逃到上海去。
就是搿搭一日三顿个粥，侪是咸得要死个海蜇头，吃得肚皮里小囡踢个勿停，估计也是咸得呛着了。
作者：辛旭光
播讲：杭岚（三）
播讲：陈韵华（四）
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
