来源：程家墩的故事
作者：林建明
沪语改写、讲述：丁曙立
文字、语音审核：丁迪蒙
编辑：王乙其
一场秋雨一场凉，再讲是连续落了几日天个雨。
有人讲，秋天个雨，带仔一丝淡淡个哀愁，像煞是大自然勒讲述离别个故事，迭个倒是有点个，伊勿像春雨迭能介细腻、温柔，也勿像夏天介雨迭能个热烈奔放。秋雨，有伊自家独特个韵味。
大清早，第一束阳光还呒没来得及穿透云层，秋雨就悄无声息个来了。伊轻轻叫个敲窗门，发出细微个“滴答”声，像煞是勒提醒大家，我已经来唻。雨丝细细密密，就像无数根银线，从天空当中挂下来，织成功一只巨大个网，拿整个世界侪笼罩勒里向。
走勒秋雨里，感受雨滴落勒面孔浪个凉爽，心里向勿禁涌起一股莫名个情绪。是个呀，秋天是个收获个季节，但同时也是个告别个季节。树叶子开始变黄了，一片一片个从树枝浪向飘落下来，伊拉勒空中旋转、飞舞，最终，安静个躺勒湿漉漉个地面浪。迭是一场无声个告别，是生命轮回个一个部分。
秋雨当中个城市，也显得特别个宁静。马路浪行人匆匆，洋伞成为了迭个季节个标配。城市每只角落侪勒拨雨水冲刷，拿夏天个炎热搭仔喧嚣带走，带来了秋天个清新搭仔宁静。雨里向个树木显得更加苍翠，花也更加娇艳，伊拉勒雨中显得更加生动，好像勒倾诉生命个故事。
秋雨也是诗人笔下头个常客。勒古代文人个诗词中，秋雨常庄拨用来表达离愁、别绪。“梧桐更兼细雨，到黄昏、点点滴滴。这次第，怎一个愁字了得！”李清照个《如梦令》，秋雨成为了伊抒发愁绪个载体。现代，秋雨仍旧是诗人笔下头个情感寄托，伊勿仅仅是自然现象，更加是一种情感个表达。
勒秋雨里向，人个心情也变得复杂起来。有人欢喜勒雨中散步，享受迭份宁静搭仔清新；有人则是欢喜坐勒窗前，静静叫个听雨，让思绪随牢仔雨声飘远。秋雨，总归能够触动人内心深处个情感，让人勒忙碌个生活当中寻到一丝个宁静。
秋雨，也是小朋友个乐园。伊拉勒雨里向奔、白相，雨水打湿衣裳伊拉也勿关，只为了享受迭份简单个快乐。对伊拉来讲，秋雨是新奇个，是有趣个，是童年记忆当中勿可或缺个一部分。
随牢仔夜色个降临，秋雨慢慢叫个停下来了。天空个乌云散脱了，露出了点点星光。雨后个夜空特别个清澈，星星像煞勒朝大家眨眼睛，勒勒讲秋夜个宁静搭仔美好。秋雨过后，空气变得更加清新，大地也变得更加滋润。迭是一个收获个季节，也是一个充满希望个季节。
秋雨，是大自然个一份厚礼，是季节轮换个见证。伊带拨我伲个勿仅仅是凉爽，更加是一种情感个体验，一种生命个感悟。勒秋雨里，我伲学会了珍惜，学会了感悟，也学会了成长。
秋雨，是一首无言个诗，是一幅动人个画，是一段永恒个记忆。
作者：林建明
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
