作者：陆勇
沪语改写：丁一军
讲述：朱友好
文字、语音审核：丁迪蒙
编辑：王乙其
往期回顾：乱世佳人（1）
我毕竟是刚刚认得伊拉。伊拉大我一辈还多了。我晓得讲闲话个分寸。第一趟认得，能够让侬到房间里去坐坐，已经是老客气个了，问东问西是勿识相、勿礼貌个。
埃日天个其他细节我记勿大清爽了，印象最深个，是搿对夫妻从讲闲话样子到面部表情侪是邪气像个。尤其是讲闲话辰光，伊拉会得笑眯眯个看牢对方，几十年来个默契。有人讲，夫妻辰光长了就会得越来越像。
半年之后,勒万航渡路兆丰别墅弄堂口个一爿新开个鸡粥店门口，我碰着了黄阿姨,伊还主动搭我打招呼,“小陆先生”。“黄阿姨，买三黄鸡啊？”
“老严欢喜吃三黄鸡，吃仔一辈子了”伊讲。伊拿手里向个塑料袋抬了抬，里向有只泡沫盒子。“想吃就是身体好呀。”“侬讲得好。侬有空来坐坐白相相，老严有辰光讲起侬个。”
我有本解放之前个旅行画报，里向有几张老上海名媛个广告照片。第二天我拿伊带得去，搿能就有得话题了。
两位老仔细个翻看，当中有得几位黄阿姨好像老熟悉个。“搿是谭雪卿。”伊戴仔老光眼，指牢一张“搿辰光伊只有21岁。”
“听侬讲起过个，伊个叫阿褚个小开，每个号头到永安公司去买支自来水笔，就想看看皇后，结果买仔几盒头水笔。”严先生笑了：“寿头寿脑个，人也没追到。”黄阿姨也笑了，没讲啥，只是摇摇头。
“侬是勿是搭伊有张合影个？”老先生抬头讲，“拿来拨小陆看看呀。”黄阿姨想了想，从隔壁房间里拿来本旧个英文书，老厚老重个。伊坐下来慢慢叫翻，到寻一页，拿出张已经泛黄个照片。照片浪有两个年轻有为，风采动人个女性，侪是柳叶眉毛，眼睛老亮，邪气神气，笑咪咪个，嘴唇皮偏深，像煞搨了嘴唇膏，发型是弯曲个，披勒肩胛浪。照片浪个黄阿姨面孔更加饱满，也多了份艳丽。“黄阿姨，侬老早老时髦个。”
伊有眼难为情，淡淡叫笑了：“伊叫我阿姐。伊后来一直老好个。”黄阿姨讲闲话跳来跳去个。
我当时心里想，谭雪卿虽然讲是康克令皇后，后首来竟然成为上海滩响当当个交际花。葛末，搿位黄阿姨是否是也是交际场浪个皇后呢？我无意当中翻过照片，背后头有两个名字：黄姬、谭雪卿，我一直记牢了搿两个名字。
跟上趟一样，凡是讲到我想晓得个地方，两位老人却是邪气自然个讲到其他人或者事体浪去了。风轻云淡，蜻蜓点水，一只话题伊拉勿拨讲到底。虽然我对伊拉充满了好奇，希望可以听到更加多个故事，结果却总归是失望。
搿种个轻描淡写，反而拨勒我一种经历了沧桑、大起大落之后，回归平常个感觉。
讲述：朱友好
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
