来源：夜光杯
作者：西坡
沪语改写：郭莉
讲述：顾卫芳
文字、语音审核：丁迪蒙
编辑：王乙其
美国有个教授，勒本叫《鹅肝》个书里向写：“一种专门增大个鹅或者鸭子个‘肥厚肝脏’，是法国菜里向大受欢迎个食品，也是动物权利支持者认为，从道德角度难以接受个食品。为了让肝脏变大、变肥，饲养员要用一只专门个管子喂拨鹅或者鸭子吃饲料，大约摸勒12天到20天左右辰光，家禽个肝脏会得一记头增大6到10倍，脂肪含量也会从18%左右增加到60%。鸭子个肝脏平均每只重1.5磅到2磅，而正常个鸭肝分量只有4盎司”。
一方面，动物权利支持者勒鹅肝生产公司领导个屋里，或者鹅肝产销场所搨满了红漆口号：像“鹅肝＝死亡”“停止折磨动物”咾啥，另一方面，鹅肝又是法国文化宝库里个濒危财产，拥有欧盟授予个“受保护地理标志”个标签。
其实，搿桩事体动物权利活动人士从来呒没占过上风。全球吃鹅肝个人有增无减，就算是三十多年前对鹅肝还邪气陌生个中国，现在也已经勿会有人大惊小怪了。
西方人对鹅肝个态度分歧，好像并呒没影响到中国人拿鹅肝引入自家食谱个步伐。中国人看来，鹅肝制作工艺，跟烤鸭异曲同工，并勿值得过分计较；更何况绝大多数西方人吃起烤鸭来，要比中国人自家感觉“惊艳”得多，呒没一眼勿适应或者勿适意。
真是奇怪，古代中国人吃猪肝、羊肝咾啥，花样十足，但是对鸡肝、鸭肝、鹅肝倒是呒啥兴趣。大概是因为中国人呒没寻到让家禽肝脏变大个技巧，赛过西方人对中国“填鸭”感到莫名其妙一样。所以，虽然“云林鹅”“烧鹅”“盐水鹅”大行其道，但是“鹅肝”倒好像是“异己”分子，是舶来品了。
我记得二三十年前，要是酒水台子浪出现鹅肝，绝对是一桩奢侈华贵个事体，主人邪气有面子个，客人受宠若惊。到仔今朝，单开间门面个夫妻老婆店，掼出一本菜单，上头印有“鹅肝”，侬既勿要奇怪，也勿必怀疑伊质量推板，只要记牢一个数字——目前，中国鹅肝个产量占全球45%！而实现“零的突破”个时间节点，大约摸是1987或1988年。
公开数据显示，安徽霍邱、山东临朐，侪是从引进法国朗德鹅起步，现在鹅肝年产量侪超过5000吨唻！
鹅肝“吓退”家庭主妇个主要因素，主要是烹饪技巧。
外国大师傅认为：鹅肝是“感官愉悦个同义词”。作为一道菜品，鹅肝可以通过快速煎烤趁热吃；但是更为传统个做法，是用低温慢慢叫熬，然后作为鹅肝酱，或者鹅肝糜，冷吃。
大家勒饭店里吃到个作为冷盆个鹅肝，做成弹子、樱桃、葫芦、夹心饼干、巧克力蛋糕个各色造型，好像是鹅肝酱个华丽转身。现在要特别告诉大家一声，交关饭店侪是拿零碎鹅肝打成酱，再拿鸡肉末、猪肉末和进去，迭个是一种人家勿晓得个骚操作。
当然，传统法国鹅肝酱，也有一路是拿一块鹅肝，经过腌渍、烘烤、压平、冷却、切片，做成赛过像中国“糕”或者“冻”一样个物事。两路鹅肝酱，“同名同姓勿同肝”，邪气容易混淆，吃货要多生只心眼噢。
真正能够做成一道大菜，还要拨大家认可个，是香煎法式鹅肝、清酒鹅肝、爆炒鹅肝之类，而香煎法式鹅肝，又是鹅肝里首屈一指个好物事。迭个关系到食材、佐料、火候、手势……要煎得恰到好处，实在蛮难把握个。
我本人欢喜个是口感丝滑幼嫩，表面凝结成“焦糖”样个香煎鹅肝。我勿晓得搿能算高尚级别，还是恶俗趣味。
其实，大家也勿好必忒迷信，去过鹅肝个故乡法国，品尝过正宗鹅肝，有几化荣耀。我大概可以做只小小个提示：法国人吃个鹅肝，大部分含糊勿清，标举肥肝——95%以上个肥肝，其实呢，侪是鸭肝啦！
作者：西坡
讲述：顾卫芳
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
