来源：新民晚报
作者：周云海
沪语改写、讲述：知足常乐
文字、语音审核：丁迪蒙
编辑：王乙其
先勒农场广阔天地做知青，回城之后勒勒街道个里弄小厂上班，之后又辞职到外企私企去闯荡，几十年个风风雨雨，终于走完职场打拼个漫漫之路，退休并且步入了老年行列。
现在个日脚交关悠闲。空下来呒没事体，我整理文件资料，偶然翻出一张尘封已久个证件。封面浪向三水市 “临时居住证”几个字弹眼落睛，居住证信息栏填写个暂住原因是“工作”，雇请单位是三水市“强力联合容器厂”，有效期为“1995年9月6日至1995年12月31日”。
辰光倒回到上个世纪九十年代，伊些辰光我年纪还轻，欢喜像白领一样跳槽。当年报摊头个《人才市场报》销路勿错，坐勒路边矮凳浪个卖报大姐，有辰光看见，会得朝牢我叫“人才来了”，伊算是讲拨我听《人才市场报》到了，人家听伊迭能叫，是勿是会当是我搿个“人才”来了呢，蛮难为情个。我勿是像跳蚤一样欢喜跳槽个人才，不过是只像人才一样会得豁豁动个跳蚤呀。
1995年夏季我跳槽，拨一家台资企业总部派到广东佛山三水市个强力联合容器有限公司，担任财务部经理。算算嘛也已经过去仔29个春秋了！看看搿张已经泛黄个临时居住证，我陷入了深深个回忆之中……
为了小家庭生活得好一眼，我为五斗米折腰，依依勿舍告别了年轻个妻子搭仔年幼个儿子，决定离开上海迭个大都市，到三水市搿个遥远又陌生个地方去闯荡。我个职位是公司个财务管理，勿需要做具体个账务，工作是蛮轻松个，公司拨我个待遇也邪气优渥个。
工厂生产区搭生活区侪勒公司个围墙里向。三层筒子楼个员工宿舍，我一家头住一间，勒三楼，有独立个卫生间搭仔阳台，房间里有席梦思床、橱柜、方台子、写字台搭仔椅子，还配了座机电话，也有空调，淋浴器，洗衣机……生活配套设施邪气齐全。从阳台朝北看出去，一大片荒野草丛当中，弯弯曲曲嵌了一条流向远方个小河浜，有原野个感觉，极目远方，绵延起伏个山丘，一片黛色；我个房门外头，有条长长个宿舍走廊，立勒走廊浪望远看，微微隆起个远道浪，时勿时有火车开过，我常庄想，搿火车是勿是会途径我日思夜想个上海？
公司规模勿大，员工也勿多，总部对阿拉几个管理层领导，勒生活方面特别优待。每日天两顿正餐，阿拉侪是围桌吃酒席个，食堂阿姨拿菜送到阿拉专用个小餐厅，吃席勿散，阿姨勿走。夜里吃剩个饭菜，摆勒阿拉宿舍里，第二日早浪吃。搿眼待遇侪是免费个，包括勒宿舍里打长途电话。
不过，梁园虽好非久留之地。
有趟，我搭刚刚读小学个儿子通电话，问伊屋里个情况，儿子讲，姆妈每日天邪气忙，常庄要加班，现在屋里个地板也勿拖了……我听了，心里蛮难过个。
我要回上海，我要回转去！做了两个号头，我勿管领导哪能挽留，坚持要做逃兵。比起优厚个薪水、优渥个待遇，我更在乎千里之外个妻儿，对于我来讲，一家门勒一道就是我今生最大个追求。
今朝搿张临时居住证， 让我想起当年娇妻幼儿勒上海虹桥机场送我去闯荡个情形，也让我再次回味当年回到屋里个辰光，妻子搭我泡个香茗是几化个甘甜，儿子叫爸爸个声音是几化个捂心，搿眼场景，邪气遥远又像勒眼门前。搿张尘封已久个临时居住证，印证了一段过往个岁月，记载了一段刻骨铭心个职场往事。
作者：周云海；
讲述：知足常乐
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
