作者：陆勇
沪语改写：丁一军
讲述：赵群社
文字、语音审核：丁迪蒙
编辑：王乙其
头一趟走进搿条弄堂,还是勒勒廿几年前头。当时勒附近办事体，想起来穿弄堂回屋里向可以少走交关路，上海人叫“抄近路”。弄堂邪气隐蔽，就是住勒周围个人，也常庄会有疑问：搿条弄堂通伐？从搿头穿到埃头，眼门前豁然开朗，一条阔个大弄堂或者马路突然出现，会得有种恍然个感觉，勿由自主个叫：到啥地方了？
搿是上海个老弄堂。弄堂里七转八转，每个小转弯侪会有只小弄堂，假使走错几步，就会得搞到小弄堂里向去，到底再发现走勿通，是条“死弄堂”。
埃天下半日，我走到一只转弯口，看到两旁边沿牢墙根头有整排个水杉。老高个，直穿云霄。勒上海，看惯体积宽大个梧桐打字矮墩墩个冬青，搿能介又瘦又高树老少看得到。沿牢整排水杉，走进条小弄堂。弄堂勿长，有得围墙，墙里向也是水杉。每隔廿几步，就有一扇铁门，门关勒海。到弄堂底，还有扇铁门，半开勒海，走进铁门，里向是只花园，花园直直里向，有幢三层楼个小洋房，四周围邪气安静。假使勿走进来，根本勿晓得搿搭竟然有人家。虽然讲，我勒上海生活有五十多年了，弄堂房子邪气熟悉，但是搿能隐蔽个花园房子，还是头一趟碰到。
铁门里向墙根花草个前头，一位老先生坐勒小矮凳浪，低仔头拿把小个铲子勒翻烂泥，拨弄花草。
“老先生，问一下，”我勒伊身边蹲下来：“搿搭个房子有多少年数了？”
老先生停下来，直起身体，稍微想了想，讲：“应该有得八十年了。”
我算了算，八十年，葛末是20世纪20年代造个。走进弄堂个两旁边我注意过，有得将近十扇铁门，大概有十幢花园洋房。
“葛真个是称得上老房子了，比我住个房子还要早十年。”我开始搭闲话。
“哦，侬住勒附近啊？”我指指南面：“静园。”“晓得个。”一满头白发，看上去邪气温和，年纪大概七八十岁。先生个一句“我晓得。”我晓得伊应该是“老土地”了。因为静园个讲法，至少勒五十年前头，小辈或者新搬进来个，根本勿晓得。
我蹲下来搭老先生东搭西搭讲起来了。讲东面个百乐门舞厅、百乐门理发厅，北面曹家渡个奥菲姆电影院。老先生如数家珍，一口正宗个、带有老式个上海闲话。我讲到我是从武定西路穿进来个，还讲武定西路以前叫开纳路个辰光，老先生个兴致就更加高了。
“哈哈，现在呒没人晓得搿条马路个老名字了。不过，搿条路还叫过开源路，晓得个人就更加少了。”“搿名字我真个是第一趟听到。”我想，眼门前搿位先生肯定是老上海，是有来头个。
“老先生，侬住勒搿地方肯定辰光老长了。”
伊立起来，拍拍脚馒头：“1946年开始我就住勒搿搭了。”
讲述：赵群社
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
