作者：叶振环
沪语改写、诵读：高仁
文字、语音审核：丁迪蒙
后期制作：高仁达
编辑：王乙其
听众朋友们大家好！我是高仁，今朝个沪语诵读节目，我来读一篇文章，题目是：《灯下漫笔：烟》。
搿搭所讲个烟，是一宽泛个概念。伊是一个既熟悉又陌生个词汇，又是承载着许多人个情感搭记忆，常桩回忆侪会得感受到搿份独特个韵味。
幼小个辰光，我呒没办法辨别清爽‘烟’个正确含义，只晓得烟是大人抽个香烟搭烧饭辰光灶炉堂里燃烧柴爿辰光产生个烟雾，还经常拿烧饭辰光掀开锅盖窜出来个水蒸气误认为是烟，有辰光还指牢之野外浓浓个大雾会吃不准，问大人迭搿烟为啥嘎大呀等等，发生了勿少个笑话。
后来个后来，我长大了，去参军当兵了，勒部队里入党提干后领取月薪了，为了招待陆续来祝贺我当官个战友搭一道当兵个老乡们，我买了香烟逐一分发给拨勒会抽烟个朋友们，但有辰光也会碰到难办个尴尬，就是有个战友讲，发香烟个人自己不抽阿拉也勿抽，为了打破迭个僵局，我也就慢慢叫从陪抽香烟开始，一发难收，竟然抽了整整三十八年香烟，外加抽烟瘾头越来越大，勒机关里成了小有名气个“烟枪”之一。直到十几年前一趟生毛病，手术医生发出个严肃警告，我才下定决心彻底戒了烟，也因为十多年不碰一根香烟，从此会经常受到家人搭亲朋好友个表扬。尽管如此，有辰光我静下心来个辰光，总归对抽过个香烟、还有一眼家乡袅袅升起个炊烟怀有一种诗情画意个思念之情。
烟，轻盈而飘渺，如梦似幻，好比是大自然搭人类情感之间个桥梁。伊既能勾起人们对往事个回忆，又能激发对未来个展望。在安静个夜里相，一缕青烟缓缓升起，如同思绪一样蔓延开来，让人沉醉其中。
小辰光，我对香烟充满了好奇。每当看到大人们点燃一支烟，深深个吸一口，然后慢慢叫喷出来，迭搿优雅个烟雾像煞带有一种神秘个力量，让我忍勿牢想要尝试一番。然而，每当我想靠近时，总是被大人们制止，伊拉讲：“小人勿好吃香烟。”奈末，勒拉我心里留下了一个既向往又神秘个印象。
长大后，我开始理解香烟个含义。伊勿仅仅是一种物质，更加是一种情感个寄托。勒忙碌个生活当中，人们常桩需要寻找到一个发泄情感个出口，而香烟好比成为最佳个选择。伊伴随着人们个喜怒哀乐，见证着人生个起起落落。在烟个陪伴下，人们可以暂时忘记忒烦恼，沉浸勒拉自己个世界里。
奈么，香烟也有伊个另外一面。过度个依赖会让人陷入其中，无法自拔。我看到过叫关人因为抽烟而身体日渐消瘦，伊拉个眼里充满了无奈搭挣扎。香烟，简直成了伊拉生命中个一部分，却又勒勿断个侵蚀伊拉个健康。我退休前勒机关从事文字工作，总归手不离烟，一旦“断粮”，思路像煞马上出现“短路”，十分难熬。迭搿让我开始思考，烟究竟是一种慰藉还是一种束缚？
随着辰光个推移，我对烟个理解也勒不断深化。我开始明白，烟并不是生活个全部，伊只是一种情感个寄托方式。真正个生活应该充满阳光搭希望，阿拉应该学会放下烟个束缚，去追求更加美好个生活。勒迭个过程当中，烟或许会成为我们回忆个一部分，但伊绝勿应该成为阿拉生活个全部。
现在，当我再次看到香烟辰光，心里已经呒没了小辰光个向往与神秘，格外掐断了曾经有过个馋佬个烟瘾。我更加关注个是伊背后个情感搭故事。每一蓬烟侪好像是一个人个心声，诉说着伊拉个喜怒哀乐。而我，愿意成为一个倾听者，去感受迭份独特个韵味。同时，也会由香烟自然联系到家乡个炊烟。
从郊区调到城市里工作以后回乡所看到炊烟个感受，是一种深深个归属感搭温暖个情感体验。炊烟勿仅仅是一种景象，更是家乡、亲情搭温暖个象征。
勒郊区生活辰光，炊烟是每日傍晚个常见景象，伊代表着家个温暖搭亲情个味道。每当夕阳西下，夜幕降临之际，家家户户个屋顶浪会升腾起袅袅炊烟，散发出一股淡淡个香气。迭种味道深深个刻印勒我心中，成为我对家乡个记忆搭思念。
勒城市工作后，生活个节奏变得快速，高楼大厦搭车水马龙让生活变得陌生搭紧张。每当睏势梦咚、心灵空虚个辰光，总会想起家乡个炊烟。搿种淡淡个香气像煞是一缕温暖个阳光，照亮了内心深处个渴望搭向往。
每一趟回乡看到了炊烟，迭种熟悉个气息扑面而来。现在回忆起炊烟，又像煞回到了童年个辰光。家里仍旧是搿能温暖搭亲切，母亲勒厨房里忙碌着，父亲还坐勒客厅里看电视，面孔浪一派幸福个笑容。迭些简单而温馨个辰光虽然过去再也勿会出现，但是今朝想起来仍旧让人感受到当时家里个搿种温暖搭幸福，激动个辰光免勿了泪花盈满眼眶……
家乡个炊烟象征着母亲(母爱)搭家乡个温暖。伊提醒着远离家乡个人们，无论身在何处，家永远是一个避风个港湾。对于远离家乡个人来讲，炊烟可能代表着母亲个招呼、家人个牵挂搭熟悉个味道。
勒我看来，炊烟勿仅仅是个景象，更加是情感个寄托。伊象征着家乡、亲情搭温暖，无论身处何地，炊烟总能唤起人们对家个深深思念搭归属感。为此，我曾以炊烟为题发表了几篇表露乡愁心迹个散文，得到了不少家乡亲友个好评。
烟，依旧勒拉飘散着伊个韵味。而我，已经学会了从中汲取生活个智慧搭力量。尽管年逾古稀，勒拉余生我还将带着这份感悟继续前行，迎接美丽灿烂个夕阳晚霞，去寻找更加美好个晚年生活。
诵读：高仁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
