作者：马尚龙
来源：新民晚报
沪语改写、诵读：倪云华
文字、语音审核：丁迪蒙
编辑：王乙其
写淮海中路，写霞飞路，尤其是写最东段、曾经叫做西江路个搿一段，电视剧《上海滩》是绝佳视角。
香港无线1980年拍摄个《上海滩》，直到现在还拨大家津津乐道，称伊为华人电视剧经典，毫不为过。
《上海滩》勒内地首播是1985年。一方面是万人空巷个收视率，一方面也受到文化学者严重个指责——电视剧拍上海，呒没一眼眼上海实景，侪是摄影棚里搭出来个，根本呒没旧上海个样子。
学者个批评是有道理个，但是《上海滩》还是蛮有老底子上海个细节搭仔做派个，现在网浪向还经常有帖子评论。比方有段许文强搭阿力第一趟认得辰光个对话——
阿力：住勒上海啥地方？
许文强：霞飞路5号。
阿力：搿是有铜钿人住个地方。
阿力是住勒闸北个，听到许文强住霞飞路，充满了下只角对上只角个仰望。
霞飞路5号？勿就是现在个淮海中路么？虽然霞飞路搭淮海中路个门牌号头有差异，但是5号，搿个老明确而且数字老小个门牌号头，只可能勒现在淮海中路个东首。
网浪向比较相同个意见，是认同阿力个说法个，霞飞路5号，确实是有铜钿人住个地方，但是许文强究竟是勒阿里一幢别墅走出来个公子呢，莫衷一是。
淮海中路起始于西藏南路，西向个第一条交叉路是柳林路，柳林路以东个淮海中路，最后一只门牌号是97号。由此可以推断，霞飞路5号应该勒西藏南路搭柳林路之间。根据南侧单号北侧双号个历史沿革，霞飞路5号是现在柳林大厦个位置。
没听说过搿一段霞飞路有过别墅，也没听说搿搭有啥有铜钿个人。我查找了交关史料，呒没“霞飞路5号”个特别记载。
《上海滩》里个霞飞路5号，是编剧个随意，就像当时拨学者批评个胡编乱造？还是有所指，只是编剧王顾左右而言他，卖只破绽，让观众有充分个想象空间？
我倾向于后者。
勒真实个霞飞路地图浪，霞飞路5号个西侧斜对面，间距只有150米，也就是麦高包禄路（今龙门路）霞飞路口，有一条后来老有名气个弄堂钧培里。钧培里1号个主人，是旧上海三大亨之首黄金荣。钧培里搿一带，是现在个上海广场。
同只思路，调只方向，从霞飞路5号向北两百多米，三五分钟就到上海音乐厅个草坪了。搿搭原来有条路：宁海西路，是另外两位旧上海大亨杜月笙搭张啸林个行宫。
“霞飞路5号”是编剧虚构个，但是上海滩三大亨，就生活勒搿个区域。《上海滩》是借了霞飞路5号，虚掩了大亨个门户。大亨个居所当然是大户人家个气派，但是霞飞路5号未必是。
现在个柳林大厦，是原来卢湾区个最东面，过脱西藏南路，就是黄浦区了。
作为两只区个区界个西藏南路，曾经有只老有名个地标——西藏南路公共厕所。直到柳林大厦建成之前，伊就隐藏勒西藏南路个绿化带里，搿是法租界时代个遗留。进搿只厕所个，勿仅有过路人，更加多个是附近居民。搿搭个老房子，没煤气，没抽水马桶。顺带便也好推测一下，许文强假使住勒霞飞路5号，搿只厕所伊也是去过个。
许文强年代，搿段霞飞路两旁边，有好几家西装店、算命店，因为靠近坟墓地，还有香烛店，冥器店……呒没饭店、食品店。假使许文强真个是住勒霞飞路5号，应该是住勒霞飞路1号球兴织造厂隔壁个弄堂里。虽然披仔“霞飞路”个风衣，却勿大像是“有铜钿人住个地方”。霞飞路浪，越朝西越有好房子，也越有铜钿。
到上世纪八九十年代，搿段淮海中路浪向开了勿少新店，比方康福羊毛衫厂门市部。砖木结构沿马路二楼住人家，推开窗门晾衣裳，水就滴滴答答个落到了买衣裳人个头浪。
1996年，柳林大厦造好了，拨称为淮海中路个龙头，以柳林路命名，柳林路呢，则是以1980年开设个“柳林路小商品市场”闻名个。
柳林大厦建成之后，普安路以东个淮海中路，新楼宇相继耸立。伊拉是：力宝广场、上海广场、金钟大厦、大上海时代广场、兰生大厦。除脱仔嵩山消防中队搭仔淮海公园，所有个旧建筑、旧弄堂以及一百多年个过往，侪留勒20世纪个记忆里了。
就像许文强住过个霞飞路5号，留勒了《上海滩》里一样。
作者：马尚龙；
诵读：倪云华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
