作者：梅子涵
来源：夜光杯
沪语改写：郭莉
讲述：王幼兰
文字、语音审核：丁迪蒙
编辑：王乙其
阿弟一直是搭姆妈生活勒一道个，进进出出侪是勒17室迭个屋里向。
姆妈的确是老了，只好住到护理院去，护理院就勒横马路个对过。姆妈个窗对牢仔17室屋里个窗，迭个是阿弟特为选个，立勒窗口头，就可以看到姆妈个窗口，姆妈整天睏勒海，勿可能立到窗口头去，但是，阿弟认为自家可以看见姆妈房间个灯光：“夜里向灯关脱了，我就晓得姆妈睏着了。”葛末，伊也就可以安心去睏觉了。
阿弟小辰光是个蛮好看个男小人，嘴角挑起笑容，可爱得简直是透明个。我倒是有眼木头木脑。拍照片个辰光，我也拉开嘴巴，真心想笑一笑，偏生结果就是一副滑稽相。
阿弟做过企业领导，伊拉销售个是誉满四面八方个上海牌手表。阿弟也到过交关地方，见过世面，伊理解眼前个事体，也了解从前历史，知识侪翁勒胡咙口，只要有机会，开口就来，伊其实是老欢喜讲个。
但是，阿弟只叙事，勿抒情，所以，每趟叙事到了可以抒情个辰光，伊就勒陌生个结束了。
中学毕业，我下乡去了，阿妹进了工厂，阿弟还老小个，就常庄跟牢外婆到乡下头去。伊比阿拉更家欢喜伊面，有得交关童年朋友，还有沾亲带故个表兄表姐，他是最小个“上海阿弟”。现在，外婆已经走了，再来来去去侪是阿弟一家头，伊还是老兴奋个，回来更加要跟人家讲啊讲啊，但是，到了可以抒情个辰光，伊就停下来了。
我搭阿妹讲起过：“阿星勿会得抒情个。”阿星，就是阿弟。
阿妹懂文学，欢喜读小说，老底子读书辰光，作文一直拨老师讲评个，勒班级里读阿妹个作文，是经常个事体，随便写写就好得到老师个好评了。但是，搿歇阿妹讲：“侬要伊抒情做啥？你一家头抒情还勿够啊？”
对于生活，对于人情，阿弟是有邪气细密、深切个领悟个，但是，伊勿抒情。
我个意思，勿是讲阿弟离文学还推板一步，而是觉着，伊叙事个辰光，勿要句号用得介坚决爽气，事体一讲好马上就结束。完全可以稍微有几丝缭绕飘散，有几记心理节拍，有几分情感延伸……做到搿能，就容易引起人心里个诗性。诗，一般并勿是勒故事个正当中，倒是勒勒结尾个辰光。
阿弟嘴巴个功夫是可以有搿种水平个，伊是老上台面个。有一趟伊立勒窗口头吃香烟，眼睛看牢仔天空，阿妹轻轻叫搭我讲：“侬讲阿星勿抒情个？我觉着伊现在正好就是勒勒抒情呀。”阿妹就是搿能，有常时讲正经闲话也像煞勒唱滑稽。
阿弟是个待人特别要捧出真心个人，手脚也有眼大，来个人客要吃饭，伊弄得像要过年一样。
姆妈吃得老少个，伊也要每顿弄交关小菜。伊鼓励保姆多吃眼，保姆坐勒台子前头吃饭，阿弟呢，勒边头忙忙碌碌：“吃呀，吃呀。”保姆讲：“哦，吃个，吃个。”感觉阿弟更加像是保姆。
姆妈现在个记性已经老老短，赛过完全呒没记性了，但是基本个感觉还像煞是“记忆犹新”，所以伊总归要问阿弟：“侬，哪能勿吃啊？”
阿弟做大师傅，身手矫捷，动作潇洒，大家侪讲伊烧个菜好吃，每到迭个辰光，伊既勿叙事，更加勿抒情，只是一个标标准准捧出真心个人，是姆妈个儿子，是阿哥阿姐个阿弟，也是保姆亲切个主人。每到迭个辰光，我跟阿妹只有互相交换一下眼神，只觉着温暖又自豪，勿晓得好讲点啥，更家呒没办法开口抒情了。
现在，阿弟每日天侪去买菜，老早就烧好，再拎点水果，送到对过去。
迭个是伊每日天个路程，有常时一日天要跑三趟，上半日，下半日，夜里向还要去，勒姆妈身边立脱一歇。
姆妈其实已经勿大认得伊了，也认勿出我搭阿妹，但是我伲就是想让伊认出阿拉，甚至常庄要自欺欺人个讲，姆妈认出来了，姆妈认出来了……只听见姆妈勒问：“侬是啥人啊？”
护理员阿姨侪要讲，侬迭个阿弟，到阿里搭去寻啊！
我迭个阿弟到阿里搭去寻呢？伊就勒勒阿拉屋里。伊立勒17室屋里个窗口偷。看牢仔姆妈窗口个灯关脱了，晓得姆妈睏着了，伊就放心了。
抒情，勿是只勒勒抒情个辰光，我现在是越来越听得见阿弟抒情个韵脚了。我搭阿弟相差十岁，见面或者打电话，我喊伊阿星，伊喊我阿哥，迭个其实也是最单纯个诗句，天生已经写好个，自家心里个起伏波浪，侪勿必格外抒发。抒情并勿是只好用勒台面浪个，抒情更是一个家庭个天空，阿拉侪立勒搿爿天空个下面头呀。
讲述：王幼兰
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
