作者：吴翼民
沪语改写：朱枫
沪语讲述：徐蔚华
文字、语音审核：丁迪蒙
编辑：王乙其
我天生欢喜吃馒头，顶顶欢喜个是刚刚出笼个馒头。
对馒头个定义，中国南北方是完全勿一样个，南方人基本浪拿发酵个面食侪叫馒头，勿管有馅头没馅头，而且，就馒头两个字，就包括了有馅头个，肉个叫肉馒头，菜个叫菜馒头或者素馒头，以此类推像玫瑰馒头、豆沙馒头、芝麻馒头、叉烧馒头，还有小笼馒头、生煎馒头等等；呒没馅头个也叫馒头，并且冠以地方名称，比方讲高庄馒头、原产地山东临沂高庄镇，小辰光就晓得高庄馒头，因为做得特别高，拨误称为“高脚馒头”，还有种卷起来个、里向夹仔葱花个馒头叫花卷。北方就勿一样了，有馅头个一律叫包子，呒没馅头个再叫馒头，或者叫“馍”。
拨我印象最深个馒头，是小辰光吃个大肉馒头。家乡苏州所有个点心店几乎侪卖大肉馒头，面馆也有搿只点心个。因为面馆侪有焖肉面供应，搿焖肉浇头要求形状标致，方方正正，要末多层五花肉、要末硬膘大精头，总之，卖相要好，裁下来个肉是边角料，只好做肉馅头，店家个肉馅个点心五花八门：馄饨、汤包、汤团、小笼、烧卖，顶普遍个就是大肉馒头。通常，勒一进店门个地方摆只大蒸笼、卖大肉馒头，总归是热气腾腾、香气扑面过来个样子，搿是最好个活广告。大肉馒头有堂吃、也有外卖，以外售为主。记得每日天下半日爷娘侪关照我到勿远个新德源点心店去买只大肉馒头，算是阿奶下半日个点心。搿真是桩好差使，一是可以亲身感受刚刚出笼个馒头气氛，两是还有可能获得品尝馒头馅头个福利。
兴冲冲沿牢仔上街沿，过跨塘桥搭齐门路口，老远就看到新德源门口热气蒸腾个景象，总归有三五个顾客勒买馒头了，我也算老顾客了，店家个伙计看到我问也勿问，就拿过一片干荷叶，夹一只大肉馒头摆勒荷叶当中，我就拨伊五分洋钿，拿过馒头细细叫看，雪白粉嫩肉䏧䏧（读多）个，表皮浪还从里向渗透出个肉馅个卤汁，香喷喷，勾引起我丰富个联想搭食欲。我立仔一歇，望牢仔满蒸笼发得蓬松个馒头，长吸一口气，嘴巴里馋咾虫也要爬出来了，心里想，长大之后假使做个点心店卖馒头个师傅几化好啊。我勿再停留，托仔馒头豪燥转去，阿奶勒等点心吃呀。阿奶呢，老开心个接过馒头掰开来，露出只油光光个肉丸，伸到我面前，我一看，堂阿哥勿勒海，迓迓叫开心，就接过来一记头塞到嘴巴里，也顾勿上烫嘴巴了，三口两口，伊歇辰光最幸福个事体就完成了。原来，阿奶信佛，常庄吃素，馒头个肉馅拨叫做“千刀肉”，吃是罪过个，葛咾伊每趟吃大肉馒头，总归只吃馒头皮勿吃馅头个。乃末，有机会享受到个只有我搭堂阿哥，差勿多我伲是轮流享用。搿个日脚真个是幸福感爆棚呀。
还有一种情况，也是可以吃着刚刚出笼个大肉馒头，搿就是，掼一跤、头跌破脱了。搿勿单单是我屋里个规矩哦，可能也是所有老苏州人家个规矩，小囡假使跌破脱头，最好个抚慰搭仔补偿、就是马上吃只刚刚出笼个大肉馒头。讲起来也符合逻辑，跌破“搿头”，就用“埃头”来补偿嘛。七八岁辰光我最皮了，一日到夜野勒外头白相，特别欢喜勒隔壁头个一只大祠堂旧址没日没夜个奔，埃面几只大厅侪有舞台，还有长长个备弄，我欢喜勒舞台浪跳上跳下，勒备弄里向窜进窜出，常庄会跌得头破血流。是否是为仔吃大肉馒头而特为跌破头也难讲个，但事实浪吃大肉馒头个机会确实勿少。晚年个母亲曾经讲我是特为经常跌破脱头个，就是为了弄只大肉馒头吃吃，我也就顺势承认，让母亲觉着别样个情趣。
日脚过得真快，我现在也到古稀之年，回想小辰光享受大肉馒头个情景，特别感慨，现在条件好了，刚刚出笼个大肉馒头好双随便吃了，偏生胃口小了、兴趣也勿大了，但仍旧欢喜看店家馒头出笼辰光个热气腾腾个场景，充满仔生机搭活力啊，典型个人间烟火。
难板一趟，我跑步到小菜场去买小菜，一身个汗，头浪向热气蒸腾，一位熟悉个卖菜女看到了称赞：“老爷叔，侬真像一只刚刚出笼个馒头呀！”我听了老开心个，心里想，平常欢喜吃刚刚出笼个馒头，竟然自家也变成功刚刚出笼个馒头了，发噱个呀！
作者：吴翼民
讲述：徐蔚华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
