ཁ་བ་བས་རྗེས་ཀྱི་ཞོགས་པ།
རྩོམ་པ་པོ། ཉི་མ་ཚེ་རིང་།
ཕྱི་རོལ་ན་ཁ་བ་ད་དུང་ལྷབ་ལྷུབ་ཏུ་འབབ། ཞོགས་པའི་གྲང་རླུང་འུར་འུར་དུ་རྒྱུ་བའི་གླུ་སྒྲས། ངའི་ཁང་མིག་ཆུང་ཆུང་གི་བདེ་དྲོད་དང་ལྷིང་འཇགས་ཡོངས་སུ་བཅོམ། འོད་འཚེར་འཚེར་གྱི་ཁ་བའི་འདབ་མ་རེ་རེས་ངའི་དྲན་སྣང་དང་རེ་སྒུག་འཁུར་ནས་རྒྱང་རིང་དུ་འཕུར། ཁ་བའི་འདབ་མ་འཕུར་ཚུལ་གྱིས་ངའི་སེམས་ཀྱི་མཚོ་གཏིང་དུ་འཁྱིལ་བའི་རེ་སྨོན་ལྷོག་ལྷོག་ཏུ་གདུས་ཤིང་། རི་གསེབ་ལ་བཏབ་པའི་རླུང་རྟ་ལྷབ་ལྷུབ་ཏུ་གཡོས། ངས་མགོ་བོ་དལ་བུར་སྨད་དུས། རྒྱང་རིང་གི་ཚོ་ཁག་ཅིག་ཝ་ལེར་དྲན་བྱུང་། སྦྲ་གུར་དང་ལུག་ཁྱུ། ཨ་མ་དང་གཅུང་མོ། དེ་ན་ད་དུང་ངའི་ཚེ་གཅིག་གི་སེམས་ཁུར་དང་མནལ་མི་ཁུག་པའི་དུས་ཆེན་ཡང་ཡོད།
མདུན་ཕྱོགས་ཀྱི་གཙང་པོ་ཁྱགས་པས་བསྡམས་ཤིང་། སྲ་ཁྲེགས་ཀྱི་དར་ཁ་འགྲིག་པས། གསེར་མིག་ཉ་མོ་རྨི་ལམ་མེད་པར་གཉིད་དུ་ཡུར། ཁ་བས་བཀླུབས་པའི་ཞིང་གྲོང་གི་ཞོགས་པ་འཇམ་ཅག་གེར་ལོ་འདབ་མེད་པའི་མིག་ཆུ་འགྲམ་དར་ལས་དལ་བུར་ཉིལ། འགྱུར་མེད་ཀྱི་ཨ་མྱེས་རི་རྒན་ངའི་བློས་བསླངས་ཀྱི་མཆོད་རྟེན་ཇི་བཞིན་བསམ་གཞིགས་ཀྱི་མགོ་བོ་དུད་ནས་ལྷིང་འཇགས་ཀྱི་མཁའ་རླུང་རྔུབ། ཁ་བ་བབས་རྗེས་ཀྱི་ཞོགས་པ་འདི། བདག་གིས་བསམ་གཞིགས་དང་སྟོང་བསམ་མྱུལ་བའི་སེམས་པ་ཇི་བཞིན་འཇམ་ཐིང་ངེར། ཁེར་རྐྱང་གི་གོམ་སྒྲ་ལྗིད་པོས། ལྷིང་འཇགས་ཀྱི་ཞོགས་པ་བརྟོལ་ནས་དར་ཁ་འགྲིག་པའི་གཙང་འགྲམ་དེར་སྐྱོ་བསང་ལ་ཆས་དུས། སྐྱོ་གདུང་གི་སེམས་པ་སྡུག་གིས་ལྷག་པར་མནར།
ཁ་བ་ད་དུང་ལྷབ་ལྷུབ་ཏུ་འཕུར། ང་དང་ཁྱོད་དངོས་གནས་འགྲོ་རན་འདུག ཁ་བ་དང་མཉམ་དུ་་་་
ལྷོ་ཁའི་དེང་རབས་ཀྱི་རྩོམ་རིག་དཔེ་ཚོགས«དཔྱིད་ཀྱི་ཅོད་པན»ནས་དྲངས།
རྩོམ་སྒྲིག་པ། རོང་པོ་རང་འཚོལ། དོ་དམ་པ། རོང་པོ་རང་འཚོལ།
