ئازاپ كوچىسىدىكى ئايال 71-قىسىم

تۇيۇقسىز تېلىفونۇم سايرىدى. ئېلىپ بۇرۇنقى ئۆي خىزمەتچىسى ئايالنىڭ نومۇرىنى كۆردۈم. تېلىفوننى ئېلىشىم بىلەن ئايال توختىماي يىغلاشقا باشلىدى.

_ ھەدە، نېمىش بولدى. ئۆزىڭىزنى تۇتىۋېلىپ دەڭە..

_ ماڭا ياردەم قىلسىڭىز...

_ نېمىش بولدى؟ ئۆزىڭىزنى تۇتىۋېلىپ تەپسىلى دەڭە..

_ مەن ھازىر دوختۇرخانىدا، قىزىم دوختۇرخانىدا يېتىپ قالدى..

ئورنۇمدىن تۇرۇشقا ئۇرۇنۇپ يولدىشىمنىڭ تۇتىۋېلىشى بىلەن توختاپ قالدىم.

_ ھەدە، مەن ئەتە باراي...

_ كەلمىسىڭىزمۇ ھېچقىسى يوق.. ماڭا بىر ئاز پۇل بېرىپ تۇرسىڭىز، قىزىم داۋالانماقچى ئىدى، يېنىمدىكىسى تولۇق تۈگىدى..

_ قىزىڭىزغا نېمىش بولدى؟ قانچە پۇل لازىم؟

_ كېسىلى تۇتۇپ قېلىپ يىقىلىپ بېشى يارىلاندى. ھازىرچە 30مىڭ بولسا يېتىدۇ..

_ بولىدۇ، مەن ھازىرلا ئۇرۇپ بېرەي..

تېلىفوننى قويۇشۇم بىلەن يولدىشىم ماڭا قارىدى.

_ سەن نېمىش قىلماقچى؟

_ پۇلنى ئۇرۇپ بېرەي..

_ نېمىشقا؟ نېمىشقا باشقىلار نېمىلا دېسە ئىشىنىسەن..

_ قىزىنىڭ بېشى يارىلىنىپتۇ...

_ سەن بىر قېتىم ياردەم قىلدىڭ، مېنىڭچە شۇ يېتەرلىك..ھازىر بويۇڭدا بار، بىزمۇ پۇل يىغىشىمىز كېرەك..ئالدىراقسانلىق قىلما..

_ لېكىن ئۇ ئايالنىڭ راستىنلا كۆپ پۇلى يوق.. شۇ قىزىدىن باشقا ھېچنەرسىسى يوق..

_ قىزى ئاپىسىنىڭ ئۆزىدىن باشقا نەرسىسى يوقلىقىنى بىلىدۇ، سەن ھېلىقى كۈنى نەسىھەت قىلدىڭ..ئۇ ئاڭلىمىدى، نېمىشقا ئۇنىڭ دەردىنى سەن بىللە تارتىشىڭ كېرەك..

_ لېكىن ئازىراق بولسىمۇ ياردەم قىلمىساق بولمايدۇ، مەن قاراپ تۇرۇشنى خالىمايمەن..

_ گېپىمنى ئاڭلاپ بۈگۈن ئۇخلا، ئەتە سەھەردە بېرىپ نېمە ئىش بولغانلىقىنى بىلىپ باقايلى..

_ ئۇنىڭغا راست جىددىي لازىم بولمىسا، بۇ كېچىدە تېلىفون قىلماس بولغۇيتتى..

_ ئەگەر بەك ياردەم قىلغۇڭ بولسا، 5000 بېرىپ تۇر، بۇ بىر كېچىگە يېتىدۇ، قالغىنىنى ئەتە كۆرۈپ مۇقىملاشتۇرايلى بولامدۇ؟! ئاقكۆڭۈللۈكنىڭمۇ چېكى بولىدۇ..

يولدىشىمنىڭ دېگىنى بويىچە ئايالغا 5000 يۈەن يوللاپ قويغاندىن كېيىن ياستۇققا بېشىمنى قويدۇم.ئۇيان ئۆرۈلۈپ بۇيان ئۆرۈلۈپ ئۇخلىيالمايۋاتاتتىم. يەنە نېمىلەرگىدۇر ئەنسىرەۋاتاتتىم.

سەھەردە قىزىمنى مەكتەپكە ئاپىرىپ قويغاندىن كېيىن دوختۇرخانىغا يۈرۈپ كەتتۇق.

كېسەلخانا ئىچىگە كىرىپ بېشى تېڭىلغان قىز بىلەن يېنىدا ئولتۇرغان ئايالنى كۆردۈم.

قىزنىڭ بېشىدىكى لاتىمۇ قان بولۇپ كەتكەن بولۇپ، يۈزىمۇ يارا بولۇپ كەتكەنىدى.

_ كەلدىڭىزمۇ سىڭلىم،_ ئايال ماڭا ئېسىلىپ يىغلاشقا باشلىدى،_ قىزىم مۇشۇنداق ھالغا چۈشۈپ قالدى.. مېنىڭ جېنىم قىزىم..

_ يىغلىماڭ ھەدە، مەن بۇنچە ئېغىرلىقىنى بىلمەپتىمەن..زادى نېمىش بولدى؟

_ تۈنۈگۈن كېسىلى تۇتۇپ يىقىلىپ چۈشۈپتۇ، دوستى تېلىفون قىپتىكەن، بولغان ئەھۋال مۇشۇ..بىچارە قىزىم، قانداق قىلار ئەمدى..

ھۇشسىز ياتقان قىزغا قاراپ قويغاندىن كېيىن ئۆرۈلۈپ يولدىشىمغا قارىدىم. يولدىشىمنىڭمۇ يۈرىكى ئېچىشقاندەك قىلاتتى. ئارقىدىنلا ئاپامنىڭ قىزى دوختۇر قەغىزىنى كۆتۈرۈپ كىردى.

_ مانا ھامما، رەسمىيەتلەرنى بېجىرىپ قويدۇم..

ئۇ ماڭا قاراپ تۇرۇپ كەتكەندىن كېيىن زالغا چىقىپ كەتتى.

_ بۈگۈن مېڭىسىنى ئوپراتسىيە قىلماقچى، قۇتقۇزۇش ئۈنۈم بەرمەي قالسا قانداق قىلارمەن.. مېنىڭ مۇشۇ قىزىمنىڭ باشقا ھېچنېمەم يوق..

_ ئۇنداق دېمەڭ ھەدە، قىزىڭىز تېخى ياش.. ئۇنداق بولمايدۇ.. چوقۇم ساقىيىپ كېتىدۇ..

ئايالغا تەسەللىي بېرىپ قويغاندىن كېيىن زالغا چىقتىم.

_ مېنىڭچە پۇلنىڭ قالغىنىنى بېرىپ تۇرايلى. مېنىڭ يېنىمدا ئازىراق پۇل بار، ھازىر جىددىي ئىشلىتىدىغان يەرمۇ يوق..

_ مەن بىر ئىشتىن گۇمان قىلىپ قالدىم..

_ نېمىدىن؟

_ ئادەتتە كېسىلى تۇتقان ئادەم ئارقىچىلاپ يىقىلىدۇ، لېكىن قىزنىڭ يارىسى بېشىنىڭ ئالدى تەرەپتىكەن..يەنە كېلىپ يۈزىمۇ ئىششىپتۇ.. ئۇ راستىنلا يىقىلىپ چۈشكەنمىدۇ..

_ يەنە قانداق ئېھتىماللىق بار..

_ مەن بىلمەيمەن، سىلەر پاراڭلاشقاندا ئۇنىڭغا تەپسىلى قاراپ باقتىم، ئۇ يىقىلىپ چۈشكەندەك ئەمەس، تاياق يېگەندەك تۇرىدۇ..

_ تاياق يېگەن بولسا بەكلا ئۇۋال بولغان بولىدۇ..

_ ئەگەر تاياق يېگەن بولسا تۆلەم تەلەپ قىلىش ھوقۇقى بار.. بۇنداق ئوپراتسىيەنىڭ ھەققى يۇقىرى، ئەگەر سالامەت ئويغىنالماي قالسا، ئۆسۈملۈك ئادەمگە ئايلىنىپ قېلىشى مۇمكىن..

يولدىشىمنىڭ سۆزى ئورۇنلۇق ئىدى. قىزنىڭ بېشى يۆگەلگەن لاتىدىكى قاننىڭ ئورنىدىن قارىغاندا ئۇنىڭ بېشىنىڭ ئالدى تەرەپ يارىلانغاندەك قىلاتتى.

كېسەلخانىغا كىرىپ كېتىۋاتقان ئاپامنىڭ قىزىنىڭ بىلىكىدىن يانغا تارتتىم.

_ نەگىلا بارسام سەنمۇ؟ نېمە ئىشىڭ بار؟

_ ئۇ قىز راستىنلا يىقىلىپ يارىلاندىما؟

_ ھەئە، ئۇنىڭ كېسىلىنىڭ بارلىقىنى بىلىسەنغۇ..

_ نەدە يىقىلدى؟ نېمە سەۋەبتىن؟

_ سەن ساقچىما؟ نېمىگە بۇنچە ئىنچىكىلەپ سورايسەن..

_ ئۇ سېنىڭ دوستۇڭ، ئەگەر بىرەرسى قەستلىگەن بولسا تۆلەم تەلەپ قىلسا بولىدۇ، بۇنداق قىممەت دوختۇر ھەققىنى ئۇلار كۆتۈرەلمەيدۇ..

_ ئۇنىڭ داۋالىنىش كارتىسى بار..ئۆزىنىڭمۇ پۇلى بار ئەنسىرىمىسەڭمۇ بولىدۇ، ئۆزۈڭنى بەك ئالىيجاناپ چاغلامسەن نېمە..ھەممە ئىشقا ئارلىشىپ..

_ مەن دوستۇڭغا ياخشى بولسۇن دەۋاتىمەن..

_ ھەممە ئىشقا ئارلاشمىساڭمۇ بولىدۇ.. ئۇ ساقىيىپ كېتىدۇ.. ئادەتتىمۇ كېسىلى تۇتۇپ تۇرىدۇ، بۇ قېتىم يولدا يىقىلدى، بېشى قاتتىقراق تەگدى خالاس..

_ سەن بىرەر يىپ ئۇچىنى بىلسەڭ ئاپىسىغا دەپ بەرگىن..

_ ماڭا ئىش ئۆگەتمىسەڭمۇ بولىدۇ...

سىڭلىم شۇنداق دەپ قويۇپلا كېسەلخانىغا كىرىپ كەتتى. زالدا تۇرۇپ قالدىم. قىزغا پۇل ياردەم قىلغۇم بولسىمۇ بۇ ئىشنىڭ سەۋەبىنى ئېنىقلىغۇم كېلىۋاتاتتى.

ئاستا مېڭىپ كېسەلخانىغا كىردىم. ئايال يەنە قىزىغا قاراپ يىغلاۋاتاتتى.

_ بىچارە قىزىم، گۈلدەك چىرايلىق قىزىم.. ھەممە نەرسىنى بېرىپ، سالامەت بەدەننى بەرمىگىنى نېمىسى..نېمىشقا بۇنداق بولىدۇ..

ئۇنىڭ قولىنى تۇتتۇم.

_ ھەدە، كۆڭلىڭىزنى بۇزماڭ، ئۇ چوقۇم ساقىيىپ كېتىدۇ.. ئۇ تېخى ياش..

_ تۈنۈگۈن سىز بەرگەن پۇل بىلەن ئىككى كۈنلۈك داۋالىنىش ھەققىنى تاپشۇرىۋالدىم..كۆپ رەھمەت..

_ ئۇنداق دېمەڭ ھەدە..تۈنۈگۈن يېنىمدا پۇل ئازىراق بولۇپ قالدى، مەن ھېلى زالدىكى پۇل ئېلىش ماشىنىسىدىن قالغان پۇلنى چىقىرىپ سىزگە بېرەي..

_ كۆپ رەھمەت، ئۇنىڭ خىزمىتىگىمۇ سىز ياردەم قىلغانتىڭىز، داۋالىنىشىغىمۇ سىز ياردەم قىلىۋاتىسىز..ئۇ ئەسلىگە كەلسە چوقۇم پۇلىڭىزنى قايتۇرىمىز.. مەن ئۇنىڭ كارتا نومۇرىنى، ئۈندىدار مەخپىي نومۇرىنى بىلمەيدىكەنمەن، شۇڭا ئامال قىلالمىدىم..

_ ھېچقىسى يوق، جان قۇتقۇزۇش مۇھىم.. ئاۋال ئوپراتسىيەنى قىلدۇرىۋېلىپ، قالغىنىنى كېيىن بىر نەرسە دېيىشسەكمۇ بولىدۇ..

_ رەھمەت، سىزگە كۆپ رەھمەت، سىڭلىڭىز ئىككىڭلار بولمىغان بولساڭلار، بىز قانداق قىلار بولغۇيتتۇق..

ئايالغا تەسەللىي بېرىپ قويغاندىن كېيىن يولدىشىم بىلەن ماشىنىغا چىقىپ جىممىدە ئولتۇرۇپ قالدىم.

_ كەچۈر، پۇلنى يەنە بېرىپ سالدىم..

_ ھېچقىسى يوق، تۈنۈگۈن مەنمۇ بۇنچىلىك ئېغىر دەپ ئويلىماپتىكەنمەن..مۇشۇ پۇل بىلەن بىر جان قۇتۇلۇپ قالسا، ياخشىلىقى بالىمىزغا بولار...

يەنە يىغلاشقا باشلىدىم.

_ ئۆمۈچۈك مۇساپىرنى بېسىپتۇ، دۆ غېرىپنى دەپ.. نېمىشقا پالاكەتچىلىك بىچارە ئادەملەرگە كېلىدىغاندۇ.. بۇ ئايالنىڭ ئەسلىمۇ پۇلى يوق ئىدى، ئەمدى قىزىنىڭ يارىلانغىنى نېمىسى..

_ كۆڭلۈڭنى يېرىم قىلما، ھەممە ئىشنىڭ سەۋەبى بولىدۇ..

_ قىز ئوپراتسىيەدىن سالامەت ئۆتۈپ كەتسە بولاتتى..

_ سىڭلىڭ بىرەر نەرسە دېدىمۇ..

_ ياق، ئۇ دوستىنى كېسىلى تۇتۇپ يىقىلىپ چۈشتى دەيدۇ..

_ بۇ كېسەلنىڭ يامان يېرى مۇشۇكەن، قانداق يەردە تۇتۇپ قېلىشىنى بىلگىلى بولمايدۇ..

بېشىمنى ماشىنىنىڭ ئالدىغا قويدۇم.

_ بۇنداق چۈشكۈنلىشىپ كەتمە بولامدۇ، خوشال ئىشلارنى ئويلا، بالىمىزنى ئويلا..

_ بالىمىزنى ئويلىغاچقا قورقىۋاتىمەن، ئاتا ئانىلار بالىنى بىر ئۆمۈر پەپىلەپ بېقىپ ئاران چوڭ قىلغاندا مۇشۇنداق پىشكەلچىلىك ئۇچرىسا قانداق قىلغۇلۇق..

_ ئاغزىڭغا ئۇر، بىزنىڭ بالىمىز ساغلام بەختلىك چوڭ بولىدۇ..

_ كۈندىن كۈنگە سەۋرىم قالمايۋاتىدۇ..

_ ئۇنداق قىلما، قورسىقىڭدا بالا پەيدا بولا بولمايلا تەشۋىشىڭ باشلىنىپ كېتىۋاتىدۇ..

_ شۇنداق، مەن قورقىۋاتىمەن..بالا تۇغۇشتىن قورقىمەن، بالىنى ياخشى باقالماسلىق، ياخشى تەربىيلىيەلمەسلىكتىن قورقىمەن..

_ ھېچنېمىدىن قورقما بولامدۇ، مەن بار..،_ ئۇ بېشىمنى مۆرىسىگە قويدى،_ ھە راست تۈنۈگۈن دادام بىلەن نېمە دېيىشتىڭلار..

_ راستىمنى دېسەم داداڭ ماڭا گەپ قىلسا يۈرىكىم خاتىرجەم بولۇپ قالىدۇ..تۈنۈگۈن ماڭا گەپ قىلغاندا ئۇنى ئۆز دادامدەك ھېس قىلىپ كەتتىم..

_ بۇ قانداق گەپ، ئۇ شۇ ئۆز داداڭ، مېنىڭ دادام سېنىڭ داداڭ..

_ دادام بالىنى ئېپ قېلىشنى خالايدىكەن..

_ شۇ، دادام بالىمىز بولغاننى ئاڭلاپ مەندىنمۇ بەك خوش بوپ كەتتى..

_ لېكىن ئاپاڭ...

_ ئاپامدىن ئەنسىرىمە، دادام ئىككىمىز چوقۇم ھەل قىلىمىز.. ئاپام ھازىر مۇنداقلا جاھىللىق قىلىۋاتىدۇ..بالا تۇغۇلۇپ باقسۇنچۇ، چوقۇم بەك ئامراق بوپ كېتىدۇ..

_ مەنمۇ شۇنداق بولىشىنى ئۈمىد قىلىمەن..

ئىشخانىغا كىرىپ يەنە كومپىيۇتېر ئېكرانىغا قاراپ خىيالغا پاتتىم. بىردەم قورسىقىمدىكى بالىنى ئويلىسام بىردەم دوختۇرخانىدىكى قىزنى ئويلايتتىم. ئۇنىڭ ئوپراتسىيەدىن خاتىرجەم چىقىشىنى ئۈمىد قىلاتتىم.

دېرىكتور يېنىمغا كىردى.

_ يېقىندىن بېرى سەل خىيالچان بوپ قالدىڭىزغۇ..

_ كەچۈرۈڭ،_ ئەتەي كۇنۇبكا تاختىسىنى باسقان قىياپەتكە كىرىۋالدىم.

_ بىر ئېلان چىقىپ قالدى، قېيىن ئاپىڭىزنى تەكلىپ قىلساق بولاتتى..

_ شۇنداقمۇ؟ قانداق ئېلان..

_ ئاياللار گىرىمىنىڭ ئېلانى، قېيىن ئاپىڭىزنى باش رولغا ھېلىقى ئوبراز ۋەكىلى قىزنى قوشۇمچە رولغا چىقىرايمىكى دەيمەن..

_ ئۇ قىز ئېغىر يارىلاندى، ھازىر دوختۇرخانىدا..

_ يارىلاندى؟ تۈنۈگۈن تېخى ساقتىغۇ..

دېرىكتورغا ھەيرانلىقتا قارىدىم.

_ تۈنۈگۈن؟ تۈنۈگۈن سىلەر بىللىمىتىڭلار؟

_ ھەئە، تۈنۈگۈن سىز ئىشتىن چۈشكەندە سىڭلىڭىز بىلەن كەپتىكەن....قانداق يارىلىنىپتۇ؟ يارىسى ئېغىرمۇ؟

_ كېسىلى تۇتۇپ يىقىلىپ چۈشۈپ بېشى يېرىلىپ كېتىپتۇ..ھازىر تېخى دوختۇرخانىدا، سەل تۇرۇپ ئوپراتسىيە قىلغۇدەك..

_ ھەي، كۆز تەگكەندەك ئىش بوپتۇ، شۇنداق چىرايلىق قىزنىڭ بۇ كېسەلگە گىرىپتار بولۇپ قالغىنىنى دەيمەن..

_ شۇ ئەمەسمۇ، ئۇ قىزنىڭ يالغۇز ئاپىسىلا بار ئىدى، ئەمدى قانداقمۇ قىلار..

_ چىقىپ كەتكەندە كەيپىياتى سەل ناچاردەك قىلغان.. دېمەك كەيپىياتى تەسىر قىپتۇدە..

_ نېمە ئىشلار بولغىنىنى ماڭا دەپ بېرەمسىز..

_ نېمىش بولدى؟ بۇنى سوراپ قالدىڭىزغۇ..

_ بىلىپ باققۇم كەلدى..تۈنۈگۈن ئۇنىڭ كەيپىياتى نېمىشقا ناچار بولغان؟

_ سىڭلىڭىز ئىككىسى ھەمكارلىقنىڭ گېپىنى قىلغان.. شۇنىڭ بىلەن گەپ تالىشىپ قالدى.. مەن باشقىنى بىلمەيمەن، ئىككىسى سەل تەتۈر قارىشىپ قالغان..

_ كەيپىياتىغا شۇ ئىش تەسىر قىلىپ قالغانمىدۇ..

_ شۇنداق بولىشى مۇمكىن، لېكىن بۇ ئىشنى بەك ئارتۇق ئويلاپ كەتمەڭ، بۇ كېسەل شۇنداق خالىغان جايدا تۇتىدۇ، يىقىلىپ چۈشۈش ئېھتىماللىقى بەك يۇقىرى..

_ ئۇلارنى ئۆيىگە ئاپىرىپ قويسىڭىز بوپتىكەن..

_ ئۇلار كېتىپ يەنە بىر خېرىدارىم كەلدى..شۇڭا ئۈلگۈرمىدىم..

_ بۇ قىزدىن ئەنسىرەپ قېلىۋاتىمەن..

_ سىز ئەنسىرەيدىغان ئىش جىق بولۇپ كەتتى..مېنىڭچە ئۆزىڭىزدىن ئەنسىرەڭ. بۇ ئىشلارنى ئۇلار ئۆزى ئوڭشىيالايدۇ..

_ قاراپ تۇرۇپ بىر ياش قىز شۇنداق يېتىپ قالسا يۈرىكىم ئېچىشىدۇ..

_ ئۇ يېتىپ قالمايدۇ،ئوپراتسىيە ئوڭۇشلۇق بوپ قېلىشى مۇمكىن..

_ شۇنداق بولسىكەن، بولمىسا ئاپىسىغا بەك ئۇۋال بولىدۇ..داۋالىنىش پۇلىنى ئۇ نەدىن تاپىدۇ..

_ داۋالىنىشقا پۇلى يەتمەمدىكەن؟ ئۇ قىز سودا قىلاتتىغۇ...پۇلى بار بولغۇيتتى..

_ ئۇ ھۇشسىز ياتسا كارتىسىنىڭ مەخپىي نومۇرىنى ئاپىسى بىلمىسە..

_ ھەي، تازىمۇ ئىش بوپتۇ..مۇنداق قىلايلى، مەن سىزگە ئازىراق پۇل بېرەي. ئۇلارغا بېرىپ قويۇڭ بولامدۇ؟ ئازىراق ياردەم قىلغىنىم بولسۇن..

_ رەھمەت!..مەنمۇ ئازىراق بەردىم، لېكىن يەتمەيدىغاندەك تۇرىدۇ..

دېرىكتور تېلىفونۇمغا 10مىڭ يۈەن پۇل يوللىدى.

_ مۇشۇنى ئاۋال ئىشلىتىپ تۇرسۇن.. يەتمىسە يەنە ئامال قىلارمىز..

_ مەن بەرگەن پۇل بىلەن بەلكى بىر نەچچە كۈن داۋالىنالىشى مۇمكىن..

_ شۇنداق..ئاندىن قېيىن ئاپىڭىز بىلەن دېيىشىپ باقسىڭىز قانداق؟! ماڭا ئوبراز ۋەكىلى بولۇپ بەرسۇن..

_ بۇنى مەن دېيىشىپ باقاي، لېكىن قوشۇلامدۇ يوق بىلمەيمەن..

_ مەن قېيىن ئاپىڭىزنى تونۇتايمىكىن دەيمەن..ئۇنىڭ ئاۋازى راستىنلا ياخشىكەن، ئۆزىمۇ چىرايلىقكەن، بۇنداق بېسىلىپ قالسا بولمايدۇ..

_ مەنچىمۇ شۇنداق.. قېيىن ئاپام داڭ قازانسا مەنمۇ خۇش بولىمەن..

_ گېپىڭىزدىن قارىغاندا خېلى چىقىشىپ قالغاندەك تۇرىسىلەر..

_ شۇنداق، كۈندىن كۈنگە چىقىشىپ قېلىۋاتىمىز،_ ئادىتىم بويىچە زورىغا كۈلۈپ قويدۇم.

_ مۇبارەك بولسۇن، ئەمىسە ئىككى ئىشنى تاپشۇردۇم، بىرى پۇلنى ئاشۇ قىزنىڭ ئاپىسىغا يەتكۈزۈپ قويۇڭ، يەنە بىرى قېيىن ئاپىڭىزغا ئوبراز ۋەكىلى بولۇشنى مەسلىھەت سېلىڭ..

_ بولىدۇ، سىزگە رەھمەت، قىلغان ياخشىلىقلىرىڭىز ئۈچۈن بالىڭىز چوقۇم ساغلام ھەم ئەقىللىق بولۇپ تۇغۇلىدۇ..

_ بالىڭىز؟_ ئۇ ماڭا ھەيرانلىق بىلەن تىكىلدى،_ قايسى بالام؟

aziza

ئەڭ يېڭى ئاۋازلىق رومان، پوۋېست ھىكايىلەر يوللىنىدۇ قوشىۋېلىڭ