作者：王周生
沪语改写：周红缨
讲述：金丽萍
文字、语音审核：丁迪蒙
编辑：王乙其
往期回顾：礼拜四，覅来寻我麻烦（一）
“哪能会呢？我姆妈也老矮个。伊日天，我姨妈刚刚搭我送来姆妈拨我个书、信，要晓得，伊已经一年多勿来信了，我真个老想伊个。所以看见侬个伊双鞋子，我自家也勿晓得哪能会个，从铅笔盒子里拿尺去量。同学后来侪笑我有毛病，我也邪气后悔个。我想，伊个辰光我个脑子一定是出问题了。”“勿是个，侬没问题。”我肯定个讲。“真个？”“真个。”王一鸣笑了。
王一鸣弯下身，拿伊双鞋子摆回到床底角落里个辰光，我勒搭伊铺床。我拿堆勒床浪个被头猛个抖了一记，突然，奇迹出现了——又黑又龌蹉个伊只书包、就睏勒枕头旁边。“咦，书包勿是勒此地嘛！”我叫起来了。
伊吓了一跳，直起身一看，“哈哈哈哈！”伊笑了，“书包寻到唻！书包寻到唻！”伊拿书包抱勒胸口头，“我寻侬寻煞脱唻！”“侬哪能没拿书包带出去呢？”我觉着奇怪。“想起来了，早浪向爸爸一上班，我就捧起书看起来了，看发看发我就出门了，拿书包忘记脱了！”“侬真是糊涂啊！”“哈哈哈、哈哈哈哈！”阿拉两家头一道笑，笑得眼泪水也流出来了。好勿容易笑停了，我讲：“任务完成了，乘侬爸爸还没回来，我要快点离开。”“葛，面哪能办呢？”伊指指台子浪个面，里向个汤已经涨干了。“侬一家头吃伐，今朝够辛苦个了。”我讲。“郦老师，侬要是今朝勿陪我回来，我大概会得象霍尔顿伊能，勒外头过一夜。”送我出门个辰光，伊讲，“上趟爸爸打我，我一夜天没回来，伊吓煞脱了，后来反而对我好眼了，我发现关键辰光用迭个办法蛮好个。”“搿勿可以个！”我严肃个讲：“迭能做忒危险，答应我，以后勿准再勒马路浪过夜。”伊点点头：“好个，其实，勒外头过夜味道真个勿好，老想睏觉个，又勿好睏。”经过楼下头个邮箱，王一鸣拿夜报拿出来，突然拍了一记头，叫一声“乃末要死唻！”“哪能啦？”我吓了一大跳。“今朝礼拜四呀，郦老师，我又搭侬寻麻烦了！”
“礼拜四？真个，是礼拜四呶，哪能介巧呢？我竟然也忘记脱了！”我看看手表，八点多了，约会时间过了两个钟头了，今朝应该勒我屋里碰头个。
“搿哪能办呢？”王一鸣急煞了，“侪是我勿好，侬勿晓得，我姆妈从前搭爸爸吵相骂，常庄提起爸爸有趟失约，让伊等了半个多钟头，淋着雨，后来生了场肺炎……”
我快点安慰伊：“放心，没事体个，伊理解我个。”走到马路浪，我伸手招差头，要赶回去。“侪是我勿好，”伊跟勒后头，老歉疚个，“我专门勒礼拜四惹事体！”
“看来，我要改改约会时间了。”我笑了。
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
