作者：张爱玲
沪语改写、朗读：仝康民
文字、语音审核：丁迪蒙
编辑：王乙其
前言
作家贾平凹曾经讲：“搭张爱玲共同生勒一个世界浪也是幸运。”
2024年7月28日，勒张爱玲个故居，我伲举办了一场别开生面张爱玲作品沪语诵读会。
上海康定东路85号，原名叫麦根路别墅，是张爱玲个出生地，建造于张爱玲生出来个伊个一年，搿是一座一百多年个花园洋房，见证了上海个历史记忆。
现场共有三十多个沪语朗读爱好者，搿些老年、中年搭仔年轻人，勒勒大热天，顶勒火热踏踏滚个太阳，来到了故居，大家齐聚勒一堂，沉浸勒富有感染力个张爱玲个散文当中，阿拉采用个是用沪语，用沪语诵读，显得更加高雅，具有海派文化个风味。
从今朝开始，我伲陆续推出用沪语朗读个张爱玲个散文（节选），通过搿种方式，让大家晓得。沪语既来可以拉家常、聊天，也可以朗读典雅个文学作品。用沪语读文章，有普通话完全勿同个语音感受，音韵、节奏、语气侪是另具风采个。
往期回顾：沪语诵读张爱玲作品（一）：公寓生活记趣
苏青搭仔我，勿是像一般性个人所想个、埃能亲密个朋友，阿拉其实老少见面，也勿是像有眼人可以想象到个，相互勿怀好意个看勒海。同行嫉妒，好像是勿可避免个。何况侪是女人——所有个女人侪是同行。但是我想，搿搭有眼特殊情况。就算从纯粹自私个观点来看，我也情愿有苏青搿能个人存在，情愿伊多写，情愿有交关人晓得伊个好处。因为低估苏青文章个价值，就是低估本地个文化水准。假使一定要拿女作者分作一栏来评论个闲话，葛末，拿我搭仔冰心、白薇伊拉来比，我实在勿能引以为荣，只有搭苏青相提并论，再是心甘情愿个。
苏青
讲到私交，假使讲伊搭我不过是业务浪个关系，伊敷衍我是为了拉稿子，我敷衍伊是为了讨稿费，还有可能比较接近事实。但是，我总归觉着，也勿好讲一眼感情也呒没。我想，我欢喜伊、超过伊欢喜我，是因为我晓得伊比较深个关系。搿能介讲，并勿是伊比较容易懂。大家侪认为，伊个个性是邪气明朗个，伊闲话又多又直接，但是伊并勿是个肤浅到一眼就好看到底个人。
人，可以勿懂伊到底好勒啥地方，还仍旧欢喜搭伊做朋友，就像伊个书，可以有交关勿大懂伊好处个读者。交关人对文艺本来勿感兴趣，也要去买本《结婚十年》，看看里向是否有大段性生活个描写。我想，伊拉多多少少会得有眼失望，但仍旧也好寻着眼笑骂个资料。大众用搿能个态度来接受《结婚十年》，其实也损害勿了《结婚十年》个价值。老底子大众接受《红楼梦》，又有几个人勿是 因为勒对林妹妹或者宝哥哥单相思，或者是欢喜里向富贵个排场？就算是《红楼梦》，大家也恨勿得拿结局修改一下，再好称心如意。假使讲，要有种高等艺术完全贴近大众个心，像煞是从伊拉心里向长出来个，埃能个物事勿是呒没，比方讲有眼老戏，有眼民间故事，历史侪蛮长个；还有造型艺术方面个例子也特别多，但是，呒没办法拿搿个来做创作个标准。迎合大众末，或许好支配伊拉一时头浪个爱搭仔恨，但是勿能够长久下去个。一方面，假使有意去迎合，根本就写勿出苏青埃能有得真情实感个书。
张爱玲、苏青
再讲，勿管哪能，苏青个书好卖出去介许多，好赚到介许多钞票，文人可以救济自家，省得等牢人家来救济，搿勿是老好个事体嘛？
朗读：仝康民
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
