来源：夜光杯
作者：沈嘉禄
改写：朱枫
讲述：王维杰
文字、语音审核：丁迪蒙
编辑：王乙其
鲁迅是1927年10月3号到上海个，1936年10月19号去世，勒搿九年零半个号头个辰光里，平均每个号头到饭店去吃两三趟。到了上海，终于有仔一个温暖个家，迓进小楼做宅男，已经呒啥必要一家头“醉眼朦胧上酒楼”，所以朋友请伊，伊请朋友，一半为工作，一半为社交。我从鲁迅日记里晓得，伊拔过草个饭店有得七十多家。
讲几家留下了大先生脚印个名店伐：陶乐春、中有天、味雅、冠珍酒家、陶陶居、冠生园、杏花楼、大三元、东亚饭店、新亚饭店、新雅茶室、新雅饭店、大雅楼、都益处、消闲别墅、美丽川菜馆、古益轩、新半斋、知味观、梁园豫菜馆、会宾楼、宴宾楼、东兴楼、鸿运楼、功德林、觉林素食处、麦瑞饭店、乍孙诺夫店、六三园、新月亭、川久料理店等等，勿排除有些店名因称呼个繁简而重叠。但是，假使加上日记里朆记下来个饭店，应该超过八十家了。
从风味浪来讲，涵括了天津菜、北京菜、河南菜、广东菜、四川菜、宁波菜、杭州菜、淮扬菜、镇江菜、素菜、西菜、日料店、消夜馆以及大先生勒《孔乙己》里描写个旧式酒馆。像“北冰洋店饮刨冰”“陆羽居吃面”“青莲阁饮茗”等还没算进去唻。 奇怪，就是呒没本帮菜。
近年来，吃货朋友穷讲八讲本帮菜，像煞是勒表达一种乡愁，大概呒没想过鲁迅先生搭本帮菜是否有过交集。
大先生是绍兴人，重口味，霉干菜、海菜股、霉千张、臭豆腐干之类从小吃到大，就搿草头圈子、糟钵斗能吓退伊吗？
我伲只好搿能猜了：鲁迅住勒虹口，而当时本帮馆子大都集中勒老城厢，勿勒伊个生活圈子里。
勿对伐，比老城厢更加靠近虹口个、坐落勒西藏路浪个同泰祥也是本帮馆子呀，糟货特别赞，能吃绍兴酒个大先生对糟货应该是爱屋及乌伐。但是，勒伊个日记里寻勿着同泰祥三个字。开勒九江路大陆商场里个老正兴，搭老半斋、杏花楼、新雅、梁园同勒一只“包邮区”，菜式是“刮刮叫”个，一直拨模仿，从来没拨超越，为啥大先生也没去一享口福呢？
1935年出版个《人生旬刊》第一卷第2期浪，有篇署名“使者”个文章——《上海的吃》，其中提着“本地菜”：
本帮馆子大概侪是蜕化于宁波馆子，规模侪老小，所谓‘家常便饭’者。南京路抛球场西首，俗称饭店弄堂，像老正兴、正兴馆、仝兴馆，彼此鳞次栉比……炖蹄髈、烂糊肉丝、炒圈子（即猪肠）、红烧羊肉、四喜肉炒卷菜等，而且一律小洋，邪气便宜，普通个菜每客只三四角……迭个几家馆子个装潢呢，却是十分个破旧，但汽车阶级到伊面去个也蛮多，普通行号个职员，更乐于光顾，因为到伊面去实惠而且便宜。
据餐饮界老前辈回忆，像人和馆、德兴馆一类个本帮馆子，八仙桌加长条凳，墙头用石灰一刷，决勿会像广帮馆子伊能雕梁画栋，描金嵌银，到处有名人字画，葛咾拨人谑称为“赤膊台子毛竹筷”。一般个格局是，二楼是雅座，实在呒没几只包房，一楼是底层人个地盘，行令划拳，哇啦哇啦，高兴起来赤脚踏勒凳子浪。比方讲，郁达夫请鲁迅，或者鲁迅请曹靖华，即使老想尝尝走油拆燉个，也勿大想去伊面了伐。
埃歇辰光个知识分子，著书立说，但平常搭劳动阶层个亲密接触却邪气有限。城隍庙，市民阶层个精神原乡，许广平抱仔海婴勒保姆陪同下去过一趟，鲁迅呒没去，环龙桥堍个旧书摊对伊也呒啥吸引力，就因为埃面是乱哄哄、龌里龌龊个场化，搭今朝花团锦簇、霓虹照眼个场景完全勿一样。乃末城隍庙附近个伊眼本帮馆子，就搭伊浑身勿搭界了。
1922年，严独鹤先生勒《沪上酒食肆之比较：社会调查录之一》里写着了海上时行个粤、闽、川等诸帮饭馆，也写着了弄堂饭店正兴馆个青鱼秃肺，但全文呒没“本帮”两字，也足以说明问题了。历史学家兼资深吃货唐振常先生勒伊个《品吃》里邪气明白个讲：
上海饮食之可贵，首要一条，就勒帮派众多，菜系比较齐全，全国菜系之较著名者，昔日集中于上海。所谓本帮，勒上海从创立到发展，是晚之又晚个事体。
记牢，是晚之又晚呀！
明明已经有得人和馆、一家春、德兴馆、同泰祥、老饭店、老正兴等标杆式个老字号，为啥讲“晚之又晚”呢？先纠正一下，老正兴开始辰光是苏锡帮，后来再拨本帮收编个。而人和馆、德兴馆等，虽然有些资历，但总体实力还勿足搭其他帮派馆子拗手劲。
我认为，勒十里洋场，要形成一只帮派，板定要有一批名店，一批名厨，加上“弹眼落睛”个四时名宴。埃歇辰光个本帮馆子显然还没准备好，就算有得“弯道超车”个想法，真要实施，又谈何容易，假使能小打小闹个研发几款“仿制药”就相当勿错啦！所以勿足以获得文人墨客个垂注搭嘉许。
真像新闻界老前辈曹聚仁所讲个：“本帮菜哪能，连上海人也讲勿出来。”所以，鲁迅搭伊个饭搭子根本就勿晓得本帮菜是啥等样个物事，也呒没人告诉伊拉糟钵斗搭草头圈子能够加深作者搭编辑个感情。 直到鲁迅先生去世，抗战爆发，上海沦为孤岛，本帮馆子莫名个勒租界、华界流行起来。搿是另一只话题，等我以后再搭大家讲。
前几年，勒只饭局浪，鲁迅个孙子周令飞从皮包里拿出份菜单勒我面前晃了两晃。伊想寻爿饭店合作推出“鲁迅家宴”，遗憾个是，伊也没办法从上海鲁迅纪念馆里借出个、曾经留下伊祖母芳泽个“鲁迅家宴菜单”。即使借出来照搬照抄，像芹菜云耳炒牛肉、津菜炖鱼丸、蚝豉松、及第草菇汤等菜式，也勿能保证今朝个食客会得买侬个账。铁定个是，鲁迅家宴勿会得有本帮菜个。
讲讲本帮菜，倒拿鲁迅先生扯进来了。得罪得罪，多多包涵！
作者：沈嘉禄
讲述：王维杰
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
