«ཁྲུང་ཁྲུང»དང«བྲག་ནག་ལུང་པ»སྒོར་ཐོན་པ།
«ཁྲུང་ཁྲུང་»
རྩོམ་པ་པོ། སྨྲི་ཏི་མཚན་འབར། (ནག་ཆུ)
དེབ་ཆུང་འདི་ནི་ཉིས་སྟོང་ཉེར་གཅིག་ལོར་བྲིས་གྲུབ། སྐབས་དེར། ཁ་བྱང་ལ་གསེར་ཉ་གྲོང་ངམ་ཁྲུང་ཁྲུང་གང་ཞིག་གདགས་དགོས་པའི་ཐད་ལ་རང་གིས་མནོ་བསམ་མང་པོ་བྱས་པ་དང་རིགས་མཐུན་གྱི་སྨྱུག་གྲོགས་དག་ལའང་དྲིས་མཐར། གསེར་ཉ་གྲོང་དུ་བཏགས་ཏེ་ཉིས་སྟོང་ཉེར་གཉིས་ལོའི་ནག་ཆུའི་ཕུལ་བྱུང་བརྩམས་ཆོས་འདེམ་སྒྲུག་གྲས་སུ་བཞག་པ་ཡིན། དེབ་ཆུང་འདི་ཡིས་རང་ཉིད་ནི་རང་ཉིད་ཀྱི་ཀློག་པ་པོ་ཞིག་དང་། ནམ་ཡང་ཚིག་དང་ཐ་སྙད་ཀྱིས་ངོ་འཕྲོད་པར་དཀའ་པའི་ཆོས་ཉིད་ཀྱི་བརྡ་ཡིག་ཏུ་བརློམས་ནས་བརྩེ་བའི་མ་ཡུམ་ལ་ཕུལ་བ་ཙམ་ཡིན་མོད། དེའི་ཁྲོད་ཀྱི་བརྩམས་སྒྲུང་ཁ་ཤས་དུས་དེབ་ཁག་ཏུ་འཁོད་པ་དང་། བྱ་དགའ་དང་གཏང་རག་ཐར་ཐོར་འགའ་རེག་པར་བརྟེན། མཐར་འདི་ནི་རང་དང་འདྲ་བའི་ཡིག་འབྲུ་བཅུད་དུ་སྒོམ་མཁན་ཀློག་པ་པོ་དག་ལ་ཕུལ་བའི་དོད་དུ་གྱུར་འདུག དེབ་ཆུང་འདི་སྒོར་མ་བུད་པར་ལོ་ཤས་འགོར་སོང་ནའང་། ང་ལ་མཚོན་ན་རྐྱེན་ངན་གྲོགས་ཤར་དུ་གྱུར་པ་སྟེ། རང་ནུས་ཅི་ལྕོགས་ཀྱི་བཞུན་བརྡར་ཐུབ་པ་དང་། རང་ཉིད་དགའ་བའི་སྒྲུང་དག་བཅུག་པ། དགོས་མེད་དོར་བ་སོགས་སྙིགས་དོར་བཅུད་ལེན་གྱི་དུས་ཚོད་རྙེད་པ། རང་རྩོམ་རང་གིས་བཀླག་རྒྱུར་དགའ་ཤོས་སུ་གྱུར་ཏེ་མཐར་རང་ཉིད་ནི་རང་གི་ཀློག་པ་པོ་ཡག་ཤོས་སུ་གྱུར་པ་བཅས་རེད། ད་ལོར་དེབ་ཆུང་འདི་སྒོར་བུད་དུས། ངས་བཤད་འདོད་པ་ཐ་དག་དེབ་ཆུང་འདིས་བཤད་ཟིན་ཏེ། ང་ལ་ལྷག་མ་ཅི་ཡང་བཤད་རྒྱུ་མེད་པས། དེབ་ཆུང་འདི་ནི། ཡི་དམ་ཆོས་ཉིད་རྒྱལ་མོས་ཞལ་གཟིགས་སྣང་བའི་ཁྱུ་མཆོག་དག་གི་ཞལ་དུ་གསོལ་ལོ། །མཆོད་དོ། །འབུལ་ལོ། །ཆོས་ཉིད་ཀྱི་དཀྱིལ་འཁོར་དུ་བཞུགས་པའི་བརྩེ་བའི་མ་ཡུམ་དང་འབྲེལ་ཐོགས་དག་གི་ཞལ་དུ་གསོལ་ལོ། །མཆོད་དོ། །འབུལ་ལོ། །ཆོས་ཉིད་རྒྱལ་མོའི་འཁོར་དུ་གྱུར་པའི་མཆེད་དང་ལྕམ་དྲལ་དག་གི་ཞལ་དུ་གསོལ་ལོ། །མཆོད་དོ། །འབུལ་ལོ། །
རྩོམ་པ་པོས།
«བྲག་ནག་ལུང་པ»
བསྟན་འཛིན་ཆོས་འཕེལ་ལམ་སྨྲི་ཏི་མཚན་འབར་ནི། དགུ་བཅུའི་དཀྱིལ་དུ་བོད་ལྗོངས་ནག་ཆུ་ལྷ་རི་རྫོང་སྨྲི་ཏི་ཁར་སྐྱེས། ནུབ་བྱང་མི་རིགས་སློབ་ཆེན་བོད་སྐད་ཡིག་རྩོམ་རིག་སྡེ་ཁག་ནས་མཐར་ཕྱིན། བོད་ལྗོངས་རྩོམ་པ་པོ་མཐུན་ཚོགས་དང་ནག་ཆུ་གྲོང་ཁྱེར་རྩོམ་པ་པོ་མཐུན་ཚོགས་ཀྱི་ཁོངས་མི་ཡིན། སྔ་ཕྱིར«དམངས་ཁྲོད་གཏམ་རྒྱུད»དང་། «ལ་ཤགས་རྒྱལ་མོ་དངུལ་ཆུའི་བཞུར་སྒྲ»བཅས་ཕྱོགས་བསྒྲིགས་བྱས། དེ་བཞིན«སྦྲང་ཆར»«མི་རིགས་ཀྱི་རྩོམ་རིག»«བོད་ཀྱི་རྩོམ་རིག་སྒྱུ་རྩལ»«གངས་དཀར་རི་བོ»«མཚོ་སྔོན་བོད་ཡིག་གསར་འགྱུར»«ལྷོ་ཁའི་རྩོམ་རིག་སྒྱུ་རྩལ།»«ཤྭ་སྐྱ།»«བྱང་ཐང་»«ཁམས་པའི་རྩོམ་རིག་སྒྱུ་རྩལ»སོགས་སུ་བརྩམས་ཆོས་མང་དག་སྤེལ། རྒྱལ་ཡོངས་བོད་ཀྱི་སྒྲུང་ཐུང་འགྲན་སྡུར་སྐབས་ལྔ་པར་ཨང་དང་པོའི་བྱ་དགའ་ཐོབ།
རྩོམ་སྒྲིག་དོ་དམ་པ། རོང་པོ་རང་འཚོལ།
