来源：夜光杯
作者： 叶辛
沪语改写、讲述：牛美华
文字、语音审核：丁迪蒙
编辑：王乙其
上海街景个美，值得我伲每个人去品味告体会。用上海个口语、搿篇文章个题目可以搿能讲：上海马路浪漂亮个风景。
街景忒普通，也忒司空见惯了，真个漂亮伐？当然咾，漂亮得来邪气吸引人，甚至让人陶醉。外省市个人头一趟来上海，外国客人第一次踏进上海滩，总归要打听，上海啥地方最好白相，啥地方最值得去。假使我讲，阿里侪值得去走走看看，侪好白相个，客人一定会得认为我是勒敷衍伊。乃么，我就会得像所有个上海人一样，认真个介绍上海值得去走一走、观赏一番个地方。
首选个，当然是外滩，挨下来就是紧临外滩个南京路，特别是步行街一段，啥物事侪好买着，第三是代表上海历史文化个豫园，老上海人习惯个叫伊“老城隍庙”。假使客人还想多走一两只地方，葛么，“新天地”、淮海路风情街、离市区最近个七宝古镇，侪会拨一一介绍。搿些景搭马路，当然值得拨推荐介绍，但我搿篇小文讲到个街景，就是普普通通个上海弄堂，“转弯角子浪个风景”。
我从小生活勒永嘉路浪，附近个陕西南路、襄阳南路、岳阳路、太原路，还有东西向个建国西路、复兴中路咾啥，侪是我从小 尽情白相 度过青少年时代个地方。比我年纪大眼个朋友搭弄堂里上年纪个人，侪会有意无意个讲：我伲此地是“上只角”，告伊些“下只角”是勿一样个。我问，勿一样勒阿里，一个高中生立勒弄堂口讲：让阿哥来教教侬，侬顺牢我手指个方向望过去。我讲：勿就是天天要走过个老洋房嘛……告诉侬，高中生用老师训斥学生个语气讲，搿是欧洲西班牙式个老洋房，侬从斜角望过去，连牢洋房边头个梧桐树一道细细叫看，侬会得看出味道来个。伊个辰光我忒小，没高中生个审美水平，只好自家小声讲，啥个味道勿味道，我左看右看侪看勿出啥名堂。搿桩事体以高中生个一句“戆大”而结束。
多少年之后，勒上海作家协会大厅，参与接待英国作家代表团，座谈结束，陪伊拉走进作协个爱神花园，欣赏普绪赫女神个小喷水池个同时，几位英国作家勿约而同个发现了我伲搿座三层带阁楼个别墅，竟然是英国十九世纪个格调。一位诗人还感叹个讲，搿种式样个别墅，勒英国本土浪也老少看到了。没想着，远勒中国上海个市中心，还好看到搿能个房子。挨下来伊拉勿但勒台阶浪脱上海作家合影，还用相机以勿同角度，对牢我伲作协小楼拍了老多个照片。直到搿辰光，我再想起弄堂里个高中生，是有点欣赏水平个。
从伊个辰光之后，勿管是走勒小辰光居住个永嘉路浪，还是搭永嘉路交叉个乌鲁木齐路浪，还有勿远个武康路、湖南路、建国西路浪，透过梧桐树叶，我也总归会得发现上海搿座城市街景个美，公寓有公寓个风情，带铁门个小楼有小楼个滋味，门面房自有门面房个别致，还有我常庄看到有人举起仔照相机、手机，对牢上海个街景拍照片。更加有美术学院个学生搭绘画爱好者，寻块僻静个地方，支画架，面对仔街景专心致志个绘画。我走过路过，也会情勿自禁个往搿些人个画布或者速写本浪望望，有个人画个是素描，也有人画水彩画，还有人干脆直接用厚厚叫个颜料往画布上涂抹，勒创作油画作品。搿些人，一定也是发现了上海街景个漂亮伐。
事实浪，搿些年陆陆续续个，常庄有人出版了一本又一本搭上海街景有关个著作，有摄影册，有素描集子，也有文配画、文配照片个，光是彩色印刷个大型油画册，我就收到过好几本。厚厚个，沉甸甸个，空下来专心翻阅，确实也好从中感受到上海艺术家独到个眼光，上海街景个漂亮，是会随牢季节个变化而幻化出勿同个景致来个。大热天里浓荫密布个马路，大冷天里枝丫光秃秃地伸向阴冷个天空，完全是两道迥然勿同个风景。早春时节个白玉兰搭秋日里满马路满弄堂个桂花，拨人个视觉告嗅觉，侪是两种情调。落雨天里撑仔雨伞急匆匆个路人搭仔大太阳下头迓勒阴凉下头走个人，也是勿同个两种风景。无论是老上海人还是新上海人，侪愿意去兜兜或者去坐坐个新天地，形成了另一种上海街景个漂亮。
去年秋天个一个夜到，陪几个难得来上海白相个贵州人勒新天地里小坐，热闹搭轧个程度也只有勒上海再介吸引人。离新天地勿远个中共一大纪念馆，则是一道搭新天地迥然勿同个风景线。春、夏、秋、冬四季里个每只号头，侪有戴团徽搭红领巾个青少年，还有数勿清个成年人以及白发苍苍个耄耋老人，走进纪念馆，感受建党时期伊段历史，接受传统教育。搿些人当中有上海人，有苏浙两省从高速公路浪一早赶过来个参观者，更有来自全国各地个各族、各界人士形成了一道美景。
上海街景个美，是值得我伲每个人去品味搭体会个呀！
讲述：牛美华
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
