作者：王周生
沪语改写：周红缨
讲述：Amy
文字、语音审核：丁迪蒙
编辑：王乙其
往期回顾：礼拜四，覅来寻我麻烦（一）
书包还是呒没影踪。
天色暗下来个辰光，我搭王一鸣走进市郊个一幢六层楼公房。楼道里杂七杂八个物事堆得拍拍满，墙壁浪向灰蒙蒙个，斑驳脱落。此地，是王一鸣个屋里。刚好是吃夜饭辰光，每家人家个厨房间里有得忙碌个响声，楼道里充满了油烟个味道。虽然王一鸣坚持勿让我来，但是勒阿拉一道上楼梯个辰光，伊轻轻叫讲：“有侬勒海，爸爸就勿会得光火了。其实，拨伊骂两声倒没啥个，我是怕伊一光火，血压就要升高。”伊还讲，伊个爷看起来邪气严肃，但是心底特别好；工作特别顶真，还常庄帮左邻右舍搭仔朋友个忙个，“其实，我老想搭爸爸做朋友，但是，搿比登天还要难！”
“爸爸！”王一鸣开门，小心个叫了一声。房间里一片寂静，伊个爷勿勒海。“爸爸平常迭个辰光应该回来了。”跟牢仔伊从门厅里走进房间，一脚绊勒横勒房间门口头个一只球鞋浪。“郦老师，当心噢！”伊拿电灯开开来，房间里个景象是惨不忍睹。灰蒙蒙个家具，吃饭台子搭写字台浪堆满了各种各样个杂物：书、饭镬子、菜碗、热水瓶、淘篓。东西两面个墙边浪各摆了一大一小两只床，小床浪个被头呒没叠，搭枕头堆作一团，几件衣裳散乱个掼勒床浪向。
王一鸣勿好意思捋捋头，讲：“早浪起来晏了，来勿及铺床。”我笑笑，讲：“没关系个，我来帮侬整理。”“勿用勿用，”伊急了，“爸爸勿晓得啥辰光回来，侬还是先回去伐，我自家会得理个。”我讲：“来也来了，我想等等伊。”
王一鸣讲：“侬肚皮一定饿了，我去烧方便面，阿拉一道吃。”我没阻止伊。乘伊勒厨房间里忙，我帮伊理房间。先拿吃饭台子理清爽。王一鸣从厨房间里探出头讲：“郦老师，我老吓人家拾着书包，拿伊厾到垃圾筒里去了。”伊仍旧牵记伊个书包。“哪能会呢？总归要看看是啥个再厾咾。”我讲。“书包老龌蹉个，用了三年了，从来呒没汏过。”“搿就勿对了。”我弯腰拿起横勒房间门口个一双球鞋摆回到伊睏个小床底下，“侬应该学会汏自家个物事，覅老是让爸爸汏，伊够忙个了，侬讲是伐？”一边讲，我一边顺手拿床底下伊眼积满灰尘个旅游鞋、拖鞋拍拍，再拿张旧报纸盖勒上头。
突然，我个目光拨角落里个一双奶白色女式皮鞋吸引，勿像其它鞋子又旧又龌蹉，侪是灰尘。搿双鞋子一尘不染，有得幽幽个光勒勒闪。勒迭个两个男人个世界里，哪能会得有迭能漂亮个女式皮鞋呢？我拿起来朝伊看了一歇，难道，是伊个爷……“郦老师，面好了！”王一鸣走进来，看到我对牢仔皮鞋看，快点讲：“哦，搿是我姆妈个。”
伊拿两碗面摆勒台子浪，从我手里接过鞋子，轻轻叫个摸了摸，讲“暑假里，我勒屋里没事体做，拿小辰光个玩具箱搬出来整理，发现里向有双姆妈个鞋子，我真个老开心个。姆妈个物事阿拉屋里侪没了，爸爸勿许我提姆妈。所以我就悄悄叫拿搿双鞋子摆勒床底下，爸爸勿勒海个辰光拿出来看看，我觉着上头好象有姆妈个味道。侬发现了伐，搿双鞋子搭侬脚浪个伊双老像个，只不过，侬个后跟比姆妈个搿双高……”“噢，搿就是侬量我鞋跟个原因啊？”伊点点头，勿大好意思。
我恍然大悟，“当时我当是侬嘲笑我长得矮唻！”
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
