来源：程家墩的故事
作者：林建明
沪语改写：郭莉
讲述：刘引烽
文字、语音审核：丁迪蒙
编辑：王乙其
已经六点多钟了，太阳还挂勒西天，像只软沓沓个蛋黄，一勿当心就滑到地平线下头去了，围勒边浪向个乌云，也染得深深浅浅一片红。
我搭太太散步，走到东面个菜地，邻居还勒挥铁锹，拿烂泥铲到花生苗里，本来整齐清秀个花生苗，弄得像一只只翻毛鸡翅膀。太太觉着奇怪，走上去要想看看明白，烂泥地里，留下来两行歪七歪八个脚印凹塘。
我今年清明回老家，正好看见满地满垄个青苗，现在应该也要结果了伐。一切就像是昨日，一个人从少年“勒陌生头”就变成功了两鬓花白个中年人，光阴岁月就是搿能个静静叫个，又是邪气快个从侬个身边穿过，赛过做了场梦一样。
老家个花生，是小粒头个，勒沿江一带曾经蛮有名气，现在反倒是拨勒“老洲山药”“老洲土鸡”“老洲媒鸭”咾啥轧出排名前三了。想起来我心里就勿适意，觉着像自家个暗恋对象，拨别人家勒背后头点点戳戳，讲伊坏闲话一样，所以总归牵记勒海要为伊正名。
老家程家墩，适合种花生个土地并勿多，产量也勿高，收花生只要几日天就结束了，分到每家每户个辰光，花生壳浪搭了交关沙泥。迭眼分到个花生，要晒干留到年底再卖脱一眼，赚点钞票过年，自家呢，也要留点做年货，送人情。我姆妈邪气要强个，看勿得自家小囡眼痒嘴巴馋，去盯牢人家小囡手里个碗。所以，姆妈还是要煠眼新花生，让屋里个小囡尝尝鲜。包括屋里种个寒豆，分个珍珠米，时新货出来，姆妈侪是要为屋里小囡煠一眼个。
放仔学回来，看见灶镬间里个土灶浪，大灶镬子里一股股个热气，夹仔淡淡个花生香味，从四周捂好毛巾揩布个镬盖缝里钻出来，我立时三刻就涎唾水溚溚渧了。鼻头一缩一缩，手就熬勿牢伸过去，掀开镬盖，一股热气从我眼门前冲出来，等热气散尽，再发现花生其实并勿多，稀稀拉拉个散落勒一镬子个山芋浪向，红皮山芋拨热气闷得皮侪涨破了。吃夜饭个辰光，花生老早就拨阿拉几个小囡吃光了，听下来个侪是山芋。记得当时我爹爹胃勿好，吃好山芋总是打嗝，打嗝个声音一声比一声悠长，到现在我好像还听得见。
礼拜天勿读书，阿拉就背只空书包，手里拎了四齿小铁搭，几个小囡一道到三四里远个人家个生产队地里去“捞花生。”五四年长江破大圩个辰光，圩口水流翁进来，形成扇子形状，正对牢伊拉生产队个一大片土地，洪水退脱了，江里向个泥沙大量沉淀下来，覆盖了老早个良田。尽管经过土壤改良，还是勿来事，只好种点花生咾啥旱季经济作物，花生品种倒是好个，也是队里人家托人办事体啊，送人情待客啊拿得出手个好物事。
勒大人已经收过个花生地里，一帮小囡有个跪勒海，有个蹲勒海，有个索介坐下来，大家像淘金子一样，拿已经翻仔两遍个土地再翻一遍，眼睛随牢仔手浪个铁搭移动，每看到一粒花生就是一趟惊喜。要是勒雷雨过后，到田里去捞花生，收获最大还最省力。尽管“捞”勿出多少，大多数又是瘪个或者滂水个，但是好做点事体，增加屋里个收成，是每个小囡心里侪想个。
煠花生个味道，远远勿及炒花生介香，介挑战人个涎唾水。剥开煠成功浅灰色个花生壳，里向是粉红色个花生米，像只保养得粉粉嫩个面孔，吃到嘴巴里，糯酥酥，甜津津，但好像也称勿上啥个了勿起个美味，尤其是现在，人个味蕾侪已经拨形形色色个食品磨过了，搓平了，老早就呒没了原始个良知感觉了。
朴实个味道，其实是一种粘合剂，是拿远方个老家，搭我个日逐日个苍老个乡愁，粘勒一道，拉也拉勿脱，分也分勿开了。
作者：林建明
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
