སྲུང་མའི་རང་མོས་སྙན་ངག་བདམས་བཀོད།

             སྲུང་མ།  （ཆུ་དམར།）

ཆང་འཐུང་རྗེས་ཀྱི་ཚོར་བ་དེ

སེམས་སྐྱོ་བའི་ངང་ཚུལ་ལས་བཟི་སོང་བའི་རྣམ་པ་གང་ན་ཡིན

ངས་ཁྱོད་རང་དྲན་སའི་འཁོར་ཡུག་དེ་ནི

དོན་དུ་ཕྱིར་མིག་གི་ནང་ན་ཁྱོད་ཡོད་པའི་དོན་སྤྱི་དེ་ཡིན་

ཁ་སང་

ཆང་ལས་འཕྲོས་པའི་ལས་དབང་གི་གྲིབ་གཟུགས་དེ་ནི

དར་རྒྱས་ཀྱི་ཉིས་ཐོག་ལ་ཆང་འཐུང་དུ་ཡོང་བ་མིན་ལ

ཁྱོད་ཀློག་པའི་ཆེད་དང

ཁྱོད་དྲན་པའི་ཁ་གསབ་ལ་གདུང་སེམས་སློག་ཆེད་གཅིག་པུ་དེ་ཡིན་པས

ངས་ཆང་འཐུང་བ་ལ་དོན་དུ་ལྡན

གང་ལྟར་མྱི་སེམས་ནི་རྟ་ཁ་དང་འདྲ་སྟེ

གསེར་སྲབ་ཀྱིས་སྒྱུར་སོང་བས་ན

ཁྱོད་ཀྱི་གམ་དུ་ལོག་པ་ནི་མིག་ཆུ་དང་ཕྱིར་མིག་གི་འཇིག་རྟེན་དེ་ཡིན

ངས་་་་་་་སེམས་པ་རྡོག་གཅིག་ལ་སྐད་ཆ་འཕྲོས་པ་ནི

ཡིད་འོང་གི་འཛུམ་དཀར་ལས་སྙི་སོང་བའི་ང་རང་ལ་འོ་ཞིག་བྱས་པ་དེས་ཡིན

དེའི་རྗེས་༼ ཆ་མེད་རྒྱུས་མེད་ཀྱི་འཛུམ་ཀོང་ལས་མེ་ཏོག་འཕོས་པ་ནི ༽ 

ནམ་དུས་མ་ངེས་པར

སེམས་པ་ནི་སྐྱོ་ལ་མི་སྐྱོ་བའི་བར་གསེང་ཞིག་ནས

བཤད་མི་ཤེས་པའི་ཚོར་བས་བརླན་པའི་ང་རང

ཅི་ཆ་མེད་ལ

རི་སྒང་གི་མེ་ཏོག་གཅིག་ལ་ཅེར་ཏེ

སྙི་སེམས་ལ་ཁ་བརྡ་ཐེངས་གཅིག་གི་སྣང་བ་རོལ

སེམས་སུ་གསལ་བའི་སྒྲོན་མེ་ལྟར་དུ

རང་སེམས་ལ་ཁ་བ་ཇི་ལྟར་འབབ་ཀྱང་སྣང་མེད་དུ་བྱས

སྐབས་ཐོགས་དེར

ཆང་ཕོར་བ་གང་ལའང་ཚོར་བ་བརྒྱ་ཕྲག་གི་རིམ་པ་འགོག་མེད་དུ་འཆར་ཡོང

ང་ནི

སྣང་སེམས་གཞན་དུ་ཁུག་པའི་གཞོན་པ་དེ་མ་ཡིན་ལ

རང་སེམས་དབང་དུ་བསྡུད་པའི་སྙན་ངག་པ་ཞིག་གིས

ཉམས་དོད་པོས་མཚན་གཅིག་གི་འཚོ་བ་དེ་ལྷོད་ཀྱིས་སྐྱེལ་མཁན་དེ་ཡིན་འདུག

རོགས་ཆུང་ལོ་ཞེས་པའི་ཐ་སྙད་དང

སྐད་གསེང་སྙི་མོར་མཚོན་པའི་ཁ་བཏགས་དེས

སེམས་ཀྱི་ཀུན་དགའ་དེའང་ཡ་མེད་རྦབ་ཆུ་ཞིག་མཚུངས་བར

མིག་གིས་འཚོས་སའི་ས་ཕྱོགས་དེ་རུ་ཤག་ཤག་ཏུ་འབེབས་པར་བྱས

སྙིང་ཉེ་བའི་ཨ་འགྲུག་དེའང་གོ་ས་གཞན་དུ་སྤོར་བའི་སྣང་བ་རུ་འཆར་ཡོང

གཞན་དུ

ཁེར་རྐྱང་གི་དོ་ནུབ

ངས་ང་གཅིག་པུར་བསྡད་དེ་སྙན་ངག་དུམ་གཅིག་ཁྱོད་ལ་བྲིས

ཀློག་ཀླད་ཆེན་མོ་ཞིག་སྔུན་ལ་བཞག་ཅིང

འཆང་བཟུང་རྩིས་འཕྲུལ་ཞིག་མདུན་དུ་དགྱེལ་ལ

པི་ཝང་ཆུང་ཆུང་ཞིག་འགྲམ་ལ་བཞག་ནས་དགོད་ཞོར་དུ

དོན་སྤྱི་ལས་འཁྲེངས་བའི་འཛུམ་ཀོང་ཞིག་ལ་འཕྲིན་ཞིག་འབུལ་བ་ནི

དོ་ནུབ་ང་རང་ཁེར་རྐྱང་གི་རྣམ་པ་དང་མཚན་ལམ་དེ་ཡིན་འདུག

ད་སྐབས་ཀྱི་ཁྱོད་རང་ནི

ངས་ཚོད་དཔག་བྱས་ན

སྣང་སེམས་ཆང་གིས་ཁུག་པའི་མགྲོན་པོ་དེ་དག་དང

ཆ་མེད་རྒྱུས་མེད་ཅན་གྱི་དགའ་དུང་དེ་དག་དང་ལྷན་དུ

གཡུལ་ས་ཆེན་མོ་དང་འདྲ་བའི་ཁོར་ཡུག་གཅིག་ནས

རང་ཉིད་གཅིག་པུར

འཛུམ་མེར་མེར་གྱི་ཚུགས་ཀ་དང

ཉམས་ལྡེམ་ལྡེམ་གྱིས་མྱོང་བ་ཞིག་སྐྱོང་ཞོར

བྲེལ་བྲེལ་གྱིས་ལས་ལ་ཞུགས་ཡོད་པ་ནི་ཐག་ཆོད་ཡིན

སྐབས་རེར

སྐྱོ་བས་སེམས་ཀྱི་འཁང་ར་བྱས་ཚེ

ཡར་ཀློང་གི་ཆུ་བོ་ལྟ་བུའི་སེམས་པ་ཞིག་བསྐྱེད་དང

མི་སེམས་ཀྱི་ཆར་པ་དག་རང་ཤུགས་ཀྱིས་འཐིམས་འགྲོ

         ༢༠༢༣-༡༠-༢༨-༠༡-༥༥-རང་ཁྱིམ་ནས་ཕྱིར་མིག་ཚོར་འདུ་ཤར་མར་བྲིས་པ། 

མཚན་མོ་དེའི་ཟླ་འོད་ནི་ཁྱེད་དང་འདྲ་ཆེ་བས

ང་རང་ཁྱེད་ཀྱི་གམ་དུ་འབྱོར་སོང

གནའ་དེང་མའི་ཁྱེད་རང་ཇི་ལྟར་ཡིན་པ་མ་རྟོགས་ཀྱང

ལས་སླ་མོའི་ཧེ་བག་ནི་ཁྱོད་དང་ཁྱོད་ཀྱི་ལས་དབང་གསེར་གྱི་སྒོ་མོ་དེའང་ཡིན་ཤེས་ཆེ་སྟེ

ངས་ལས་ཀྱིས་བཀོས་པ་ཡོད་ཚད་དང་དུ་བླངས་ནས་སྐད་ཆ་ཞིག་བཤད་ན

མཐར་ཐུག་ནི་མི་སེམས་ཀྱི་མཁའ་དབྱིངས་མཐོང་བའི་གོ་སྐབས་དེ་ཅི་ལ་མིན

ལམ་གྱི་མི་རྣམས་ནི་རང་བཞིན་དུ་འགྲོ་བའི་ལྷན་དུ

ཁྱོད་ཀྱི་སྒམ་ཚུགས་ནི་སྔར་བཞིན་གངས་རི་དང་རྫ་རི་ལ་འཐིམས་ཏེ

རྣམ་ཤེས་ཀྱི་གོས་པའི་རུས་པ་ལ་གསེར་ཕྲེང་སྟོང་གིས་བརྒྱན་པའི་ལོ་རྒྱུས་བཞེངས། 

སྐབས་དེ་ནི་ང་རང་ཆེས་ཚོར་ཤེས་ཀྱིས་གོས་པའི་རྨི་ལམ་གྱི་དག་ཞིང་དེ་ཡིན་འོས

དགའ་སྐྱོ་འདྲེས་མའི་གཏམ་རྒྱུད་དུ་དྲངས་བ་ནི་ལས་དབང་གིས་བགོ་སྐལ་གནོངས་བ་མ་ཡིན་ལ

སུ་ཞིག་གནའ་ཤུལ་དུ་གབ་པའི་མི་ཚེའི་དབྱངས་རྟ་དང་ལས་དབང་གིས་བཅད་པའི་འཁོར་བ་དེ་ཡིན་སྲིད་པས

ཚེ་སྲོག་གི་འཇིག་རྟེན་ལ་འོད་སྣང་གིས་སེམས་པ་ཁྱབ་པའི་རེ་བ་ནི་ནམ་ཡང་ཁྱོད་ཀྱི་གམ་དུ་བསྒྲེངས་ངེས

འཆི་བ་ནི་ནམ་ཡང་ངེས་མེད་ཀྱི་མགྲོན་པོ་ཞིག་ཡིན་པས

ཚེ་སྲོག་ལ་བརྩེ་དུང་གིས་གྲུབ་པའི་འཇིག་རྟེན་ཞིག་ཧ་ཅང་གལ་ཆེ་ན་བསམ

ཡ་ཆུང་ནས་ཤོད་པའི་སྐྱོ་གཏམ་ནི་ནམ་ཡང་མངར་སྐྱུར་གྱི་ཚོར་ཤེས་སུ་ལུས

དགུན་གྱི་ཁ་བ་ནི་ལྷབ་ལྷབ་དང་བབས་པའི་དབང་དུ་བཏང་ནའང

སེམས་ལ་ལྷིང་བའི་ཁ་བ་ནི་གཡོ་འགུལ་མེད་ཀྱང་གྲངས་མེད་ཀྱི་འཇིག་རྟེན་ཞིག་ཏུ་གབ་འདུག

དེ་བས

ཁྱོད་ཀྱི་སྒམ་ཚུགས་ཀྱི་མོ་གཤིས་ལ་ལས་དབང་གིས་འགྱུར་བ་མ་གཏོང

དེ་ནི་སྙིང་གི་རེ་བཞག་ཏུ་འཇོག་པའི་མི་སེམས་ཤིག་གི་དར་རྒུད་ཀྱི་མཆོད་སེམས་དྭངས་མ་དེ་ཡིན

དར་རྒྱས་ཀྱི་མཁའ་དབྱིངས་ནི་ནམ་ཡང་ཚོད་འཛིན་མི་ཐུབ་པའི་རུ་མ་ཞིག་གམ

ཡར་རླུང་དུ་ཆུ་ལ་བསྐུར་བའི་མི་སེམས་ཀྱི་སྒོ་མོ་དོག་པོ་སྟེ

འཇིག་རྟེན་ལ་ཞེ་སེམས་ཐོགས་པའི་གུ་དོག་གི་རྒྱལ་ཁམས་ཀྱི་མིང་དུ་འགེལ་བ་ཡིན་པས

ཁྱོད་རང་ཀྱི་སེམས་པ་ཡངས་ཤིང་ཆེ་བའི་ཞིང་ས་ཞིག་ཏུ་སྨོན་པ་ལེགས

ང་ནི་མགྲོན་པོ་ཞིག་སྟེ 

ནམ་ཡང་ངེས་མེད་ཀྱི་གཤོག་ཐོག་ཤིག་སྟེ

བརྩེ་སེམས་དང་ཕྱིར་དྲན་བསྐྱར་ཏེ་ཕྱོགས་བཞི་རུ་འཕུར་འགྲོ་སོང་ན

སླར་ཡང་མི་སླེབས་པའི་དམ་ཚིག་དེ་ནི་ལས་སླ་མོའི་ཐེངས་གཅིག་གི་ཟས་མགྲོན་ཡིན་ཕྱིར

རང་གི་ཁ་ཕོར་ལ་ཕྱིར་མིག་ཐེངས་གཅིག་གི་ལས་དབང་སྩོལད་ཤོག

༢༠༢༣–༡༠–༢༥-༠༡-༢༢ གཟའ་འཁོར་གསུམ་པའི་ནམ་གུང་ལ་སྲུང་མའི་ཚོར་ཤེས་ཀྱི་རྨི་ལམ་མཁའ་རུ་འཕུར་ཏེ་གནས་མལ་མི་ཚེ་ཞེ་ལ་ཐོགས་བཞིན་བྲིས།