ངའི་ཡིད་ཀྱི་ལྷ་མཆོག་ཐུགས་རྗེ་ཅན་གྱི་འཁྲུངས་སྐར་བསུ།
![]()
འབྲོང་ནག་བརྩོན་འགྲུས། ཡུལ་ཤུལ།
རྒྱལ་ཀུན་སོར་རྟོགས་ཡེ་ཤེས་སྒྱུ་མའི་འཕྲུལ། །
རྒྱལ་བའི་སྲས་ཀྱི་རྣམ་པར་རོལ་བའི་མགོན། །
རྒྱལ་བ་ཀུན་ལས་ལྷག་པའི་བཀའ་དྲིན་ཅན། །
རྒྱལ་བའི་དབང་པོ་ཁྱེད་ཀྱི་འཁྲུངས་སྐར་བསུ། །
རྟོགས་ལྡན་བླ་མའི་དྲུང་ནས་གདམས་ངག་ནོད། །
ཉམས་དགའ་དབེན་པའི་རི་ནས་སྒྲུབ་པ་མཛད། །
གྲུབ་པའི་དབང་ཕྱུག་སྒྲུབ་བརྒྱུད་སྤྲུལ་བའི་སྐུ། །
མཚུངས་བྲལ་འགྲོ་བའི་མགོན་པོར་སྙིང་ནས་གུས།།
ཏཻ་ལོ་པ་ནས་རིམ་བཞིན་བརྒྱུད་པའི་བཀའ། །
བཀའ་སྲོལ་མ་ཉམས་ཕྱག་རྒྱ་ཆེན་པོའི་བཀའ། །
བཀའ་གདམས་གཞུང་དང་འདྲེས་པའི་མན་ངག་བཀའ། །
བཀའ་བབས་གྲུབ་པའི་འཁོར་ལོ་ངའི་བླ་མ། །
རྒྱུ་དང་འབྱོར་བའི་དཔལ་ལ་མ་ཆགས་ཤིང་། །
མཚན་དང་སྙན་པའི་གྲགས་པ་མི་དགོས་པའི། །
འདི་སྣང་རླུང་ལ་བསྐུར་བའི་རྣལ་འབྱོར་པ། །
ཁྱེད་ནི་རྗེ་བཙུན་མི་ལ་གཉིས་པ་ཡིན། །
སུ་ཡིས་མཐོང་ན་མི་མཐུན་མེད་པ་ཡི། །
མཐོང་གྲོལ་འཛུམ་པའི་ཞལ་རས་ཡང་ཡང་དྲན།།
འདི་སྣང་ཚེ་ཡི་འཕེན་པ་རྫོགས་པའི་དུས། །
ཐུགས་རྗེས་ལམ་སྣ་སྟོན་ཅིག་དྲིན་པོ་ཆེ། །
མཚན་དཔེའི་སྐུ་ཡི་དཀྱིལ་འཁོར་ལྟ་ན་སྡུག།
སྡེབ་ལེགས་སྙན་པའི་བཀའ་གསུང་དྲི་མ་མེད།།
ཐུགས་རྗེའི་རོལ་བ་སྙོམས་པ་རྒྱལ་བའི་སྲས། །
བདག་གཞན་འགྲོ་བའི་མགོན་དུ་བཞུགས་སུ་གསོལ།།
ཕྱི་ཡི་སྤྱོད་པ་ཞི་དུལ་བག་ཡོད་དང་། །
ནང་གི་རང་བཞིན་རིམ་གཉིས་རྣལ་འབྱོར་ལྡན། །
གསང་བའི་ཆོས་ཉིད་སྟོང་གསལ་འགགས་པ་མེད། །
སྐུ་ཚེ་ཡུན་དུ་བརྟན་པའི་འཁྲུངས་སྐར་བསུ།།
གྲུབ་དབང་སྒྲུབ་བརྒྱུད་གོང་མའི་སྐུ་ཡི་ཕྲེང་། །
དཔའ་བོ་སྟག་ཤམ་ཅན་གྱི་ཁྲི་འཛིན་དུ།།
སྐུ་ཚེ་མི་ཤིགས་རྡོ་རྗེའི་གཤིས་སུ་བརྟན། །
འཕྲིན་ལས་སྣང་བས་ས་གསུམ་ཁྱབ་གྱུར་ཅིག།
དད་གསུམ་རླུང་གིས་ཡང་ཡང་བསྐུལ་བ་ཡི། །
བསྟོད་ཚིག་སྐྱེ་བ་ལྔ་བའི་སྒྲ་དབྱངས་འདི། །
མདོ་ཁམས་སྟོད་ཀྱི་སློབ་བུ་གྱི་ན་བ། །
དཀོན་མཆོག་རིག་འཛིན་ཆོས་ཀྱི་གྲགས་པས་ཕུལ། །
༢༠༢༣ལོའི་ཟླ་༡༡ཚེས་༡༣དགེ་བར་འབྲོང་ནག་བརྩོན་འགྲུས་སམ་དཀོན་མཆོག་རིག་འཛིན་ཆོས་གྲགས་ནས་གུས་ཕུལ།
