ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༢༢༽

     ལས་ཀྱི་ཁ་བ།  【LJ】

                   ཟིལ་སྙུག་སྲས། 

སྟོད་ཀྱི་ཀོང་པོའི་བུ་མོ། །

ལས་ཀྱི་ཉི་འོད་འཕྲོ་ས། །

གཞོན་པའི་སྣང་བ་སྟེར་ས། །

མི་ཚོགས་ཁྲོད་ཀྱི་ཏོག་རེད། །

རི་བོའི་རྩེ་ནས་བཞུར་བའི། །

གཙང་བོའི་མཐིལ་ན་འབབ་པའི། །

ཆུ་དེ་ཡར་ཀླུང་གཙང་བོ། །

ལྷ་ལ་ལན་གསུམ་མཆོད་ཡོད། །

སེམས་འདིས་འཁྲུལ་སྣང་མིན་ན། །

དམ་ཚིག་མཐའ་རུ་འཁྱོལ་འདོད། །

རྟ་བརྒྱའི་ནང་གི་འདོ་བ། །

རང་གིས་ཞོན་ན་འདོད་ཀི །

སྣང་བ་དགྲ་རུ་ལངས་ཚེ། །

སེམས་ཀྱི་བདུད་རྩི་ཟད་འགྲོ །

དངོས་འགྲུབ་འཇོ་བའི་སྙིང་གཏམ། །

ཆུང་འདྲིས་ཁྱོད་ལ་བཤད་ཡོང་། །

ཡུན་རིང་སྙིང་ལ་གཅུས་པའི། །

རེ་བའི་རྨི་ལམ་ཐུན་གཅིག །

ཚེ་སྟོད་སྨིན་རྒྱུ་མ་བྱུང་། །

ཚེ་སྨད་རྨིས་ན་བསམ་བྱུང་། །

སེམས་ཀྱི་དྲན་པ་དགུ་བསྐོར། །

ཇོ་ཁང་ནང་ནས་ལུས་སོང་།།

ཇོ་བོ་སྐུ་ཚེ་བརྟན་ན། །

ཞེ་བློ་དེ་ཡིས་ཚིམས་སོ། །

སྙིང་གི་གའུའི་ནང་ལ། །

ལས་ཀྱི་ལྷ་མཆོག་བསྒོམས་ཡོད། །

བསྒོམས་པའི་མཐུ་ལ་བརྟེན་ནས། །

ལུས་སེམས་བདེ་སྐྱིད་སྩོལད་རོགས། །

                    ༢༠༢༤/༤/༡

       ཟླ་ནག

              གཟེབ། 

དྲན་པ་ཡང་རྙེད་མ་བྱས་པའི་ལོ་ཟླ་དེ་

འཆི་བའི་ངོ་གདོང་དུ་ཡིབས།

ཁོ་ཚོ་རང་གི་བཟོ་ལྟ་ལ་བསྒྱུར་བཅོས་བྱང་མྱོང་མེད།

མྱོང་བ་མེ་ཡིས་སྲེག་

རྡུལ་གྱི་ཕུང་པོ་ལ་དྲི་ནག་བསྐྱར་སྦྱར་བྱས།

ད་ལྟ་གཅིག་ཡོད་པ་ནི་

རྐང་ལག་མེད་པའི་ཁ་ཤོབ་མཁན་དག་རེད།

འཇིག་རྟེན་འདི་དང་ཤིན་ཏུ་ཉེ་བའི་མྱི་དེ་དག་

དེ་དག་ད་ལྟ་ཡོལ་བ་ཞིག་གི་ཕྱི་ནང་དུ་མཆིས།

མགོ་མཇུག་མེད་པའི་ལས་དེ་

ཁྲམ་པ་སྐོར་ཞིག་གི་རྩེད་ཆས་སུ་གྱུར།

དོན་ངོ་མར་

ཅི་ཡང་མིན་པ་ནི་རྨི་ལམ་ཡིན་ཏེ།

གར་ཡང་འགྲོ་མི་ཐུབ་མཁན་ཡང་ང་ཚོ་ཡིན་ནོ།།

      བར་ནས།

                 དབང་བཀྲ། 

                 ༡

ཁྱེད་བོར།  ངས་འཚོལ།

བོར་དང་འཚོལ་གྱི་བར་ནས་སྐྱིད་སྡུག་རེས་མོས་ཤིག་གི་ལོ་ཟླ་འདས།

ཁྱེད་ཕེབས། ངས་དྲན།

ཕེབས་དང་དྲན་གྱི་བར་ནས་གཞོན་ནུ་ཞིག་གི་འཛུལ་མདངས་ཡལ།

ཁྱེད་བརྗེད། ངས་བརྗེད།

བརྗེད་དང་བརྗེད་ཀྱི་བར་ནས་ཁྱེད་དང་ང་ཡི་མེས་པོ་བརྗེད།

ཁྱེད་གླེང་། ངས་བརྗོད།

གླེང་དང་བརྗོད་ཀྱི་བར་ནས་ཁྱེད་དང་ང་ཡི་མེས་པོ་དྲན།

ངས་བཙའ། ངས་རྙེད།

བཙའ་དང་རྙེད་ཀྱི་བར་ནས་མི་རྟག་སྒྱུ་མའི་རང་མདོག་གསལ་གྱི་ལེར།

ངས་བཟོད། ངས་རྩོད།

བཟོད་དང་རྩོད་ཀྱི་བར་ནས་རྟོག་དཀའ་ཆེ་བའི་མྱི་སེམས་ཁྲ་གྱི་ལེར།

ཁྱེད་ཀྱིས་འོ་བྱས  ངས་སྐེ་འཇུ་བྱེད།

འོ་དང་སྐེ་འཇུ་ཡི་བར་ནས་ཡོད་ཚད་ཀྱི་ཡོད་ཚད་ར་སྤྲོད་བྱས།

                   ༢

ཁྱེད་ཅག་གཟིམས་ཀྱང་། ངས་ད་དུང་གཟིམས་མེད་པར་སྣང་།

གཟིམས་དང་མ་གཟིམས་གྱི་བར་ནས་ང་རང་ཁེར་རྐྱང་ལུས་སོང་།

ཁྱེད་རྒས  ང་ནར་སོན།

རྒས་དང་ནར་སོན་གྱི་ལོ་ཟླ་བར་ནས་རེ་སྒུག་ཁྲི་ཕྲག་གི་ཨ་ལོང་སྦྲེམ།

ཁྱེད་སྐྱོང་།  ངས་དོར།

སྐྱོང་དང་དོར་གྱི་བར་ནས་དབྱངས་གསལ་གྱི་གཤོག་རླབས་ཇི་ལྟར་རྒྱས།

ཁྱེད་རྒྱང་རིང་ན་སོང་ཀྱང་། ངའི་ཐག་ཉེ་ན་ཡོད།

རྒྱང་རིང་དང་ཐག་ཉེ་ཡི་བར་ནས་ཐ་སྙད་སྟོང་ཕྲག་གི་སྙན་གཏམ་བརྫངས་ཡོད།

                   ༣

སེམས་ངལ་དང་བསམ་གཞིགས་བར་ནས།

སྙིང་ནད་ཅིག་བསྙལ་བྱུང་།

དྲན་གདུན་དང་སུན་སྣང་བར་ནས།

སེམས་ཆུང་ཞིག་སྦྲུམ་བྱུང་།

ཀྱི་ཧུད། སྙན་ངག་ཟེར་བ་འདི་རྩེད་ཆས་སྐྱིད་པོ་ཞིག་རེད་འདུག་ཨང་།

   རང་སེམས་བཀླགས་པ། 

           རྣོ་འོད། 

དངོས་ཡོད་དག་ཆུ་རེད་

སྐམ་ཚད་དང་འདོད་རྔམ་སོད་པས་སོ།

ཐོབ་ཤོར་དག་བྱེ་མ་རེད་

བཙིར་མ་བཙིར་གཉིས་ཀྱི་བར་ནས་ཟགས་འགྲོ་བས་སོ།

སེམས་ལ་ཉན་དུས་སུ་

ཉིན་ལ་བྲེལ་ཚུབ་དང་འདུ་འཛིའི་བར་ནས་ཉན།

མཚན་ལ་ཞི་འཇགས་དང་སྨྲེང་སྐྱོའི་གཏིང་ནས་ཉན།

སྐྱེ་རྒ་གཉིས་ཀྱི་སྔ་ཕྱི་ནས་ཀྱང་རེས་མོས་ཉན།

འུ་ཐུག་དུས་སུ་

ཞོད་འཇགས་ལ་མགོ་བོ་སྙེས་ནས་བདེ་འཇམ་གྱི་གཏི་མུག་རོ་ཉལ་བྱེད།

འདུ་ཤེས་དག་གཏིང་ནས་འགག་ཕྱིར་

ནང་སེམས་ཀྱི་འཆར་སྒོ་དང་

རྨི་ལམ་ལའང་སྒོ་ཟྭ་ལྕགས་ནག་གི་མདུད་པ་དགུ་སྒྲིལ་བསླས།

    འགྱུར་མེད་སྙིང་ལ་བརྐོས། 

            ཁམས་ཁྲག་སྨྱུག

 སེམས་བསམ་པ་མཐུན་པའི་མཛའ་མོ་ལ།།

 ཡིད་དགའ་བའི་སྙིང་གཏམ་མཉམ་དུ་བརྗོད།།

 ཞེ་གཙང་བའི་བརྩེ་གདུང་དག་མ་ཅན།།

 བརྗེད་མི་སྲིད་ཁ་ཞེ་གཉིས་མེད་ཚིག །

  སེམས་བསམ་པ་གཏིང་གི་སྙིང་གཏམ་འདི།།

  གཏམ་འདི་ནི་མི་བའི་སྐུ་ཚབ་ཡིན།།

  ཡིད་འདང་བརྩེ་རིན་ཆེན་གསེར་ལས་དཀོན།།

  འགྱུར་མི་སྲིད་མི་སེམས་དམ་ཚིག་ཡིན།།

  བོད་གངས་ཅན་ཁ་བའི་ཡུལ་ལྗོངས་ལ།།

  རོགས་འུ་གཉིས་འཛོམས་སའི་ཞིང་ཁམས་ཡིན།།

  ཚེ་སྔོན་མས་བར་ཆད་མ་བྱུང་ན།།

  བློ་མི་འགྱུར་བརྩེ་སེམས་སྙིང་ལ་བརྐོས།།

        ཚངས་འགུར། 

                དབྱངས་ཅན་སྲས་པོ།  

སྦུབས་སུ་བཅུགས་པའི་ཤེས་རབ་ཀྱི་དོ་ཤལ་ནི

སྟོང་ཆ་ལྡན་པའི་དོ་ནུབ་ཀྱི་བསིལ་འཇམ་བཞིན་ཡིན་ནམ ཀྱེ

དལ་ཅིང་ལྷོད་པའི་ཚིག་གི་འཇོ་སྒེག་ནི

མ་ཡུམ་གྱིས་ཕུལ་བའི་དབུས་ལམ་རིང་མོ་ཡིན་ནམ་ཅི

སྔོན་ཆད་དང་འདྲ་བར

དགུན་གཞུང་གི་གྲངས་ངར་དང་ཙག་རླུང་ནི

རང་དང་འཚམས་པའི་ཁྱོད་ཀྱི་སྙན་ངག་ཡིན་ནམ་ཅི

ཚངས་དབྱངས་རྒྱ་མཚོ།

ཚངས་ལྷའི་མལ་དུ་སྣང་བ་རང་ཡན་པ་ལ་ལག་པས་འཇུས་ཏེ

འཇིག་རྟེན་གྱི་ལྷ་ཚོགས་ལ་གསོལ་བ་གཏབས་ནས

ཁེར་རྐྱང་ལ་ཕུལ་བའི་ཚིག་གི་ལུག་ཁྱུ་ཞིག་དེད་བཞིན་ཡོད་དམ

དབྱངས་ཀྱི་སྟོང་བ་ཉིད་ལ་ལག་པ་སྲིང་ཏེ

སྦ་གསང་མེད་གཞས་ཚིག་ལ་མདུད་པའི་ཡོང་ལོང་འབྲི་བཞིན་ཡོད་དམ།

ཆབ་སྲིད་དང་བྲལ་བའི་ངེད་ཅག་གིས

ཁྱོད་རང་ལ་དབྱངས་ཀྱི་ལན་བུ་གཏབས་ཏེ་འགྱུར་ལྡོག་སྐྱོངས་བཞིན་ཡོད་དམ།

    སྐྱོ་ཀློང་ཁྲོད་ཀྱི་སེམས་པ། 

                ཁམས་གསེར་ཐིགས།  

གདུང་སེམས་ན་བུན་འཐིབས་པའི་ཡ་ཁོག་ན།།

སེམས་ཀྱི་ངལ་དུབ་སྨུག་ལོང་མི་སངས་པར།།

སྤྲིན་ནག་རླུང་ཤུགས་རྗེས་ཀྱི་དྲག་ཆར་དེས།།

གསེར་གྱི་སྙེ་མའི་སྤང་ཐང་བྱེ་མར་བསྒྱུར།།

བྱང་ཁོག་ཡངས་མོའི་གཞུང་གི་ཐང་ཆེན་དུ།།

དོག་པོའི་གད་རོང་འགག་འཕྲང་བྲག་གིས་བཟུང་།།

རྐང་གཉིས་འགྲུལ་བཞུད་འགྲོ་བའི་ལམ་ཁར་དུ།།

བཞུད་ལམ་མི་བདེའི་འགག་རོང་དོག་པོའི་འཕྲང་།།

ནང་སེམས་དམར་ཆུང་ཤེལ་གྱི་སྒོ་མོ་ལ།།

ལྕགས་མདེའུ་ངར་མས་གས་ག་བུ་ག་བཏང་།།

ཁྲག་རླུང་སྟོད་ལ་འཚངས་པའི་ཟུག་གཟེར་གྱིས།།

ཁྲག་ཐིགས་བཞུར་བས་རྨ་ཁ་སེམས་ལ་བཟོས།།

མཐོ་ཞིང་འདེགས་པའི་རི་བོའི་སྒང་ཁར་ན།།

རས་སྣ་དཀར་དམར་འགའ་ཡི་དར་ལྕོག་དེ།།

གྲང་ངར་རླུང་བུས་ཁ་ཆར་དྲུང་ནས་ཟད།།

སུན་པའི་མི་ཚེ་དར་ལྕོག་དེ་དང་མཚུངས།།

མི་ཚོགས་ཟང་ཟིང་འདུ་སའི་གྲོང་ཁྱེར་ནས།།

གདུང་སེམས་གཉོམ་པོ་ཁྱོད་དང་ང་རང་གཉིས།།

ཞེད་སྣང་ཆེ་ཡང་འཁོར་བའི་རྗེས་སུ་འབྲངས།།

རང་སེམས་རང་ལ་མི་དབང་ཀྱེ་མ་སྐྱོ།།

        ང་ཚོ་ཞོར་ལས་པ།  

                ཧོར་རུ་ཨ་ཇོ།  

འབད་འབུངས་ལས་ལ་བརྩོན་ཞིང་།།

དཀའ་ངལ་འཇིགས་སྣང་མེད་པའི།།

གཞིས་ཁྱིམ་དྲོད་མོའི་ཆེད་དུ།།

འབད་མཁན་ཞོར་ལས་པ་རེད།།

འབྲོག་ཐང་ཤུལ་ལ་གཡུགས་ནས།།

རྒྱ་གྲོང་ཁྲ་མོ་འགྲིམ་པའི།།

བུ་ཕྲུག་མདུན་ལམ་ཆེད་དུ།།

བརྩོན་མཁན་ཞོར་ལས་པ་རེད།།

སྒོ་ཕྱུགས་རྒྱབ་ཏུ་བསྐྱུར་ཏེ།།

གྲོང་ནས་ཞོར་ལས་འཚོལ་ཡང་།།

སྤྱི་ཚོགས་གསར་བའི་ཁྲོད་དུ།།

སྔོན་ཐོན་བྲལ་དུ་ཚུད་དགོས།།

ཕ་མས་བུ་ཕྲུག་ཆེད་དུ།།

ཡོད་ཚད་འབྲོག་ལ་བསྐྱུར་ཡོད།།

ཡིན་ཡང་གྲོང་ཁྱེར་འཚོ་བ།།

རྒྱུན་དུ་ལྷུར་བརྩོན་བྱེད་དགོས།།

འབྲོག་པའི་འཚོ་བ་སྐྱིད་པོ།།

འབྲོག་ཟས་རོལ་བཅུད་ཅན་པོ།།

འབྲོག་མི་བསོད་ནམས་ཅན་པོ།།

འབྲོག་པའི་ཡོད་ཚད་དྲན་གི།།

ཕྱུགས་ཟོག་འབྲོག་ན་ཡོད་རེད།།

ཞོར་ལས་གྲོང་ན་ཡོད་རེད།།

ཡོད་ཀྱང་བུ་ཕྲུག་ཆེད་དུ།།

གྲོང་ལ་མི་འགྲིམ་དཀའ་མེད།།

གཅེས་ཕྲུག་སྙིང་གི་ནོར་བུ།།

ཤེས་བྱ་ཡོན་ཏན་སྦྱོང་དང་།།

ཕ་མས་ཞོར་ལས་དགོས་རུང་།།

དཀའ་ངལ་སེམས་ལ་མི་འདུག།

གྲོང་ཁྱེར་འཚོ་བ་དཀའ་རུང་།།

འབད་འབུངས་ལས་ལ་བརྩོན་ན།།

ཞོར་ལས་ཟེར་བ་འདི་ཡང་།།

ཡོང་དགོ་ཅུང་ཙམ་ཡོད་ངེས།།

     ཅེས་པ་འབྲོག་ཕྲུག་བཅོས་མའི་ཞོར་ལས་པ་ཞིག་གིས་སེམས་ཀྱི་དྲན་ཚོར་ཙམ་ཞོར་ལས་བྱེད་སའི་གནས་ནས་བྲིས་པའོ།

         2024/4/9ཉིན།  

 མེ་ཏོག་ཆ་གཅིག་ལ་འབུལ་བའི་ཤེས་ཚིག་སེམས་ཀྱི་རི་མོ།

                 འབྲོང་ནག

ཨོཾ་བདེ་ལེགས་སུ་འགྱུར་ཅིག

ལུས་ཁམས་བདེ་ཐང་ངང་ནས་འཚར་ལོངས་བྱུང་བ།།

ངག་གི་འགྱུར་ཁུག་བདེ་ཞིང་མྱུར་བས་བཀྲ་ཤིས།།

ཡིད་སེམས་དྭངས་མོ་ཆུ་བོ་བཞིན་དུ་འཁྱིལ་བ།།

བཀའ་དྲིན་གསུམ་ལྡན་རྩ་བས་བླ་མ་སྐྱོབས་ཤིག།

ཤེས་ཡོན་རིག་པའི་གནས་ལ་འབད་བརྩོན་གྱིས་ཤིག།

ཕ་བཟང་བུ་མོས་རུས་པ་གསེར་གྱིས་རྒྱན་ཡིན།།

བོད་པའི་སྐད་དང་རིག་གཞུང་སློབ་ལ་སྦྱོངས་དགོས།།

མ་བཟང་བུ་མོའི་ཨ་མ་རེ་བ་ཡིན་ནོ།།

ཤེས་རིག་འདབ་ལག་རྒྱས་པས་བཀྲ་ཤིས་སྨོན་དུན།།

རིག་པའི་གཤོག་རྩལ་ངོམ་ནས་སློབ་གླིང་རྒྱུ་བ།།

ཕ་ཡུལ་ལུང་པའི་སྲོལ་བཟང་མ་བརྗེད་གཅེས་ཕྲུག།

མེས་པོའི་རུས་པ་རྐང་ཡིན་མ་དོར་གཤིས་བཟང་།།

        སྤྱི་ལོ་ཟླ་ཚེས་བཟང་པོར་འབའ་དགོན་སློབ་ཆུང་ནས།

དྭངས་ཞིང་གསལ་བའི་མཚན་མོའི་ནོར་བུ།

                 རིག་པའི་ཅོང་བརྡ།

དཔྱིད་ཟླ་བའི་གྲང་ངར་ལྷོད་ཚིགས་ལ་འབབ་སྟེ་

སྡོང་བོ་སོགས་ཀྱི་ལོ་འདབ་རྒྱས་ནས་བྱ་ཁུ་བྱུག་གིས་

གསུང་སྐད་སྒྲོགས་ཏེ་ནགས་ཚལ་སོགས་ཀྱི་ལོ་མ་དག་མགོ་ལྕོག་

ལྡེམ་ལྡེམ་གྱིས་ལང་ཚོ་བཀྲལ་ནས་དཔྱིད་ཀྱི་རྒྱལ་མོ་གྲོང་ལ་འགྲིམ་པའི་དུས་

བདག་ནི་སྔ་ལས་ལྷག་པའི་ཚོར་བ་གསར་པ་ཞིག་གི་ལམ་སྣེ་བཟུང་སྟེ་

ཁྱེད་ཀྱི་གམ་དུ་གོམ་པ་གཅིག་སྤོ་གཉིས་སྤོ་བྱས་ནས་བྲེལ་གྱིས་

མ་འཚུབ་པ་དལ་མོར་ངང་ནས་ཡོང་།   

བཟང་ངན་གྱི་བཞུད་ལམ་མང་པོ་ཞིག་དང་དུ་བླངས་ནས་

དཀའ་སྡུག་གི་འཚོ་བ་ལ་རོལ་མྱོང་བྱས་དུས་

ཁྱེད་ནི་རྒྱང་རིང་རྒྱང་རིང་ཞིག་ནས་འཚེར་བའི་འོད་ཆེན་པོ་ཞིག་སྟེ་

ང་དང་རྒྱང་ཐག་ཡང་ཡུན་ཙམ་རིང་མོད།  

ས་སྲོད་དང་མུན་པའི་ལེ་བར་འཚམས་ན་ཁྱེད་ཀྱི་འོད་མདངས་

ནམ་ཡང་གསལ་ལམ་མེར་དུ་བཞུར་ཀྱིན་ཡོད། 

ངས་བློ་རྩེ་གཅིག་ཏུ་སྒྲིམ་སྟེ་བསམ་གཞིག་ཞིག་བཏང་ཚེ་

ཁྱེད་ནི་ཐོབ་པ་མེད་པའི་འཇའ་ཚོན་གྱི་ཁ་མདོག་ཞིག་དང་མཚུངས་ཏེ་

སྣང་བ་ལས་ཅི་ཡང་མ་མཆིས།     དགོང་མོར་ཞིག

མཚན་ལྗོངས་གི་མཛེས་པ་མངོན་པའི་ནུབ་མོར་དེ་སྐར་ཚོགས་མཁའ་ལམ་རྒྱུ་བ་དང་སྐར་འདབ་རྒྱུགས་པ་སོགས་མཁའ་ཡི་མཛེས་སྡུག་

ཡིད་དུ་འོང་བ་དག་མཐོང་དུས་ངའི་དྲན་པ་ཡི་ཞེན་ཆགས་ཟབ་སའམ་

ཡིད་དུ་འཇགས་པའི་འོད་ཆེན་པོ་ཁྱེད་ནི་ཐོག་མའི་བློ་ཁོག་དྲོན་པོ་དེར་

ཡོད་པའི་ངའི་ཤ་གསེང་རུས་གསེང་དུ་ཞུན་པའི་སེམས་ཀྱི་

ཐིག་ལེ་རྣལ་མ་དེ་ཡིན།   

སྣང་བ་དང་འདྲ་བའི་འོད་ཆེན་པོ་ཁྱེད་ནི་ཅི་འདྲའི་གསལ་ལམ་མེར་ཞིག་སྟེ།  

རི་མཐོན་པོའི་རྩེ་ཡིས་མ་ཆོད་ལ་གངས་དཀར་པོའི་འོད་མདངས་མ་ཆོད།  ཁྱེད་ནི། 

ངའི་སྒེའུ་ཁུང་གི་དྲ་མིག་གསེང་ནས་རྟག་ཏུ་གསལ་ལམ་མེར་

ཤར་གྱིན་ཡོད་ལ་འཛུམ་མུལ་མུལ་གྱིས་ཞལ་རས་དྭངས་མ་དེ་རྟག་ཏུ་

ངས་མིག་ལམ་ནས་འཆར་གྱིན་འདུག །  

རི་ལུང་འགའ་ཡིས་བར་དུ་ཆོད་ཀྱང་ཁྱེད་ནི་དུས་རྟག་ཏུ་

ངའི་སེམས་དབུས་ན་གནས་པའི་འོད་ཀྱི་ཐིག་ལེ་དྭངས་མ་དེ་ཡིན།  

དམ་པའི་ལྷ་ཆོས་ལ་སྐྱབས་སུ་སོང་སྟེ་

རང་ཅག་རྣམས་ཀྱིས་ཡིད་ཆེས་རྩེ་གཅིག་ཏུ་བཞག་པ་ཡང་དག་པའི་

གཞུང་ལུགས་དང་བླ་མ་དཀོན་མཆོག་གསུམ་ལ་དད་པའི་མེ་ཏོག་ཕྲེང་བ་

ལྷ་ལམ་དུ་འཐོར་བའི་ཡིད་ཆེས་ཟབ་མོ་དེ་དག་ངས་ནམ་ཡང་དད་པའི་བཀུར་ཏེ་འུ་གཉིས་རྟག་ཏུ་འབྲལ་བ་མེད་པའི་སྨོན་ལམ་ཡང་

རྩེ་གཅིག་ཏུ་བཏབ་མྱོང་ལ་འདུན་པ་ཡང་དུས་རྟག་ཏུ་འབོར་མྱོང་མེད།  སེམས་ཀྱི་དཀྱིལ་ན་བཞད་པའི་འོད་ཆེན་པོ།

           ངའི་དྲན་པ་ཡི་བདག་པོ་ལགས། ། 

                         2021/7/3 ཉིན་བྲིས།

 སྤྲིན་ནག་འཁྲུག་པ།

                ཁ་བའི་རྨི་ལམ།

ཁ་བ་བབ་པའི་ཞོགས་པར་འདི

ང་རང་སྒ་བདེ་ཐང་ལ་ཡོད

ཕ་མ་དག་གིས་འཚོ་བ་རོལ་མྱོང་པའི་སྒ་བདེ་ཐང

སྒ་བདེ་ཐང་ལ་ངའི་སྐྱིད་སྡུག་མང་པོ་ཞིག་ས་ལ་ཕབ་ཡོད

ཕ་མ་བྲལ་བའི་སྡུག་བསྔལ

བཟའ་ཚང་གྱེས་པའི་མིག་ཆུ

བུ་རྒྱུད་ཤུལ་ལ་ལྷག་པའི་སེམས་སྡུག

སྒ་བདེ་ཐང་ནས་མི་མང་པོ་ཞིག་དང་ཁ་བརྡ་ཆད་སོང

བརྩེ་དུང་ཡིན་ན་དེ་འདྲ་རེད

ཕ་མ་སྤུན་མཆེད་ཡིན་ན་དེ་འདྲ་རེད

འདང་ཆེན་པ་ནས་ཆུང་ངུ་འགྱུར

ཆུང་ངུ་ནས་མེད་པར་འགྱུར

རྒྱུས་ཡོད་པ་ནས་མེད་པ་གྱུར

ཁ་བ་བབ་པའི་དེ་རིང་སྔ་དྲོ་ལ

ནམ་རྒྱུན་བཞིན་སྐོར་ར་ལ་ཕྱིན

ལྷ་བླ་མ་མིན་སྐྱབས་ས་གཞན་མི་འདུག

ད་ནི་དུས་ཚོད་ཡོད་ཚད་དཔེ་ཀློག་ལ་འཐིམ་ན་བསམ

ད་ནི་མི་ཚེ་ལྷག་མ་དེ་གསར་རྩོམ་ལ་འཇུག་ན་བསམ

ང་རང་འགྱུར་སོང་བ་དེ་དངོས་གནས་བདེན་པ་རེད

ལས་ངན་དྭ་ཕྲུག་ཅིག་དར་ཞིང་རྒྱས་ན་

ཁྱེད་ཅག་ཅི་ཕྱིར་གཉིད་མི་ཟིན

ལས་ངན་དྭ་ཕྲུག་ང་རང་སྒ་བདེ་ཐང་ལ་ཡོད

སྐྱིད་སྡུག་ཅི་འདྲ་མང་པོ་བྱུང་རུང

སེམས་ཤུགས་ཆག་མ་མྱོང་པའི་མི་དེ

སྐྱེ་རབས་འདི་སེམས་ནས་མི་བརྗེད་

མི་དེ་སྙན་ངག་བཞིན་དྭངས་ཤིང་གཙང

མི་དེ་འོ་མ་བཞིན་དཀར་ཞིང་མཛེས