ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢༠ ༽

ཁ་སྐད་སྙན་ངག་གི་འོད་ཐིག་ཞིག་གཟིམས་པ།

“སྙན་ངག་པ་བོང་སྟག་རི་ལུའི་གདུང་མཆོད་དུ་ཕུལ་བ།”

ཁྱོད་ལ་ལས་ཀྱིས་གནང་བའི་སྙན་ངག་ཡོད། །

འཕྲལ་རྐྱེན་བདེ་བས་སྦྱར་བའི་ཁྱིམ་ཚང་ཡོད། །

དགུན་ཁའི་ཁ་བ་ཇི་བཞིན་འབབ་གྱུར་པས། །

ཁྱོད་ནི་སྙན་ངག་ནང་གི་སྙན་ངག་ཡིན། །

འདི་ལྟར་སྙན་ངག་འབྲི་འཕྲོ་བསྐྱུར་ཞོར་དུ། །

ཆུང་མའི་ངོ་གདོང་ཙམ་ལའང་མ་ཆགས་པར། །

འཕྲུལ་ཆས་གཡུལ་འགྱེད་འཐབ་པའི་བར་གླགས་ནས། །

ཁྱོད་རང་འདི་ལྟར་བཞུད་པར་ཡིད་རེ་ཕངས། །

ཁྱོད་རང་བཞུད་པས་ང་ནི་སྡུག་བསྔལ་གྱིས། །

“སྙན་ངག་སྒྱེ་གང་”དེ་ལ་འོ་ཞིག་བྱས། །

ཕྱི་མའི་ལམ་ཆེན་སྒྲོན་མེས་གསལ་བར་ཤོག །

སེམས་ཀྱི་སྒྲོན་མེ་ཞིག་ཀྱང་ཁྱོད་ལ་གཏེགས། །

ཚིག་གི་གཡུ་རལ་རྔམས་པའི་བུ་ག་ནས། །

ཁྱེད་རང་སླར་ཡང་བོད་ལ་ཕེབས་གྱུར་ཤོག །

                       ༢༠༢༣ ༡༢ ༡༦ ཉིན།

—

ང་འུ་ཐུག་དུས།

སེམས་ཀྱི་སྡུག་བསྔལ་རང་ལ་བཤད་དགོས།

ང་འུ་ཐུག་དུས།

གྲོགས་པོ་མང་པོ་ཞིག་རྒྱང་རིང་ལ་ཡོད།

ང་འུ་ཐུག་དུས།

ངའི་ཉེ་འགྲམ་དུ་རང་གི་གྲིབ་གཟུགས་མིན་མེད།

ཐ་ན།

ཉེ་ས་དེ་དག་ཀྱང་ཐག་རིང་ཐག་རིང་ཞིག་ཏུ་གནས།

ངས་དེ་དག་འབོད་མི་ཕོད་འདུག

རྒྱུ་མཚན།

ཁྱེད་ཅག་ལ་བཤད་མི་ཚར་བའི་གནས་ལུགས་ཡོད།

ང་འུ་ཐུག་དུས།

ངའི་ཉེ་འགྲམ་དུ་སུ་ཞིག་ཀྱང་མེད།

ང་འུ་ཐུག་དུས།

ཕ་མ་དང་བཟའ་ཚང་དག་གི་བཀའ་དྲིན་ཡང་ཡང་དྲན་བྱུང་།

ང་འུ་ཐུག་དུས།

མིག་ཆུ་དྲོད་མོ་ས་ལ་འཐོར་པ་མང་།

  མཛེས་སྡུག་གིས་གཙེས་པའི་རྒྱ་སེ།

རྒྱུ་འབྲས་དང་ཆོས་ཉིད་ཀྱི་ཞིང་ཚིགས་དེར།

གློད་དཀའ་ལ་བློས་མི་ཐོངས་བའི་གཡར་བའི་འདོད་ཡོན།།

བསམ་མི་་ཤེས་པའི་མཚན་སྨག་གི་ཀློང་དུ།

སེམས་པ་ཡངས་རུང་ཞེན་ཆགས་རྙི།

དོན་ཆ་མེད་ཀྱི་བྱ་དངོས་རེ་རེས།

ལས་ཆ་མེད་ཀྱི་ཐམ་ག་གཞན་ཞིག་བཀོད་ཡོང་།

འཇིག་རྟེན་ནི་ཁོད་ཡངས་ཞིག་མོད།

ནང་སེམས་སྟོང་བའི་གནས་མལ་ད་དུང་མ་རྙེད།

བརྗེད་དུ་ཕངས་བའི་གཏམ་རྒྱུད་ལ་ཆང་རག་གི་ཚོན་རྩི་བྱུག

ཡིད་ལ་བརྣག་པའི་ཁྱོད་རང་ཨུ་ཚུགས་ཀྱིས་ཐུར་ལ་འཕངས།

དུས་ཚོད་ཀྱི་གཙའ་ཆགས་པའི་

རྒྱ་སེ་ཡི་ཚེར་ལམ་དང་ཚེར་ཏོག་ལས་ལག་ཟུང་རྨས།

རྡོ་བ་ལ་དཔེ་འཇོག རྨ་ཁ་ལ་དཔེ་འཇོག  

སྒྱུ་མའི་ཤིང་རྟ་ལ་དཔེ་འཇོག སྒྱུ་འཕྲུལ་གྱི་བུམ་ཆུ་ལ་དཔེ་འཇོག

                              2023:11:9 ཀ་རོང་།

       ཁྲུང་ཁྲུང་།

ཁྲུང་ཁྲུང་ལགས

སྐྱོ་བ་འདི་ཁྱོད་ཀྱིས་བཞེས་དང

སྐྱོ་བའི་སེམས་པ་འདི་སྐབས་རེར་དུང་བ་ཡིན་པས

ཕྱིར་མིག་གི་སེམས་པ་འཁྲུངས་ཟིན་པ་ན

འཇིག་རྟེན་ནི་ཁྱོད་ཀྱི་རང་ཁྱིམ་ཡང་དག་པ་ཡིན་སྲིད

ཁྲུང་ཁྲུང་ལགས

སེམས་པ་གཞན་ལ་ཤོར་ན

འཁོར་བ་ནི་ལས་དབང་གི་སྐྱོ་གར་ཞིག་ཡིན་སྲིད་པས

གར་སྟབས་ཀྱིས་འགྱིང་བའི་འཚོ་བ་ནི

སླར་ཡང་འཚོལ་བའི་རྨི་ལམ་གྱི་འཁོར་ཡུག་དེ་ཡིན་འོས

ཁྲུང་ཁྲུང་ལགས

འཇིག་རྟེན་འདི་ལས་སླ་མོའི་ཚོར་བ་ཞིག

ཁྱོད་ཀྱི་གམ་ན་ཡོད་པ་ནི་སྣང་བའི་ལོ་གཞོན་དེ་ག་ལ་ཡིན་ཏེ

སེམས་ཁམས་སུ་རྟག་ཏུ་འབབ་པ་དེའང་སྣང་བརྙན་གྱི་སྒོ་མོ་རུང་ཡིན་པས

མི་ཡི་སེམས་ཁམས་སུ་རོལ་མྱོང་ཐེངས་གཅིག་བྱོས་དང

སྐྱོ་སྡུག་གི་འཁོར་བ་དེའང་རང་བཞིན་གྱི་བརྙེད་ཡོང

ཁྲུང་ཁྲུང་ལགས

མི་ཡུལ་གྱི་མེ་ཏོག་ལ་མཛེས་སྡུག་ལྡན་ཡང

སྣང་ཡུལ་གྱི་པདྨ་དེ་ནི་མཛེས་ལྡན་ཙམ་ཞིག་ག་ལ་ཡིན་ཏེ

མི་ཡི་འཇིག་རྟེན་ལ་འཁྲུངས་བའི་མཛེས་སྙིང་གི་རང་བྱུང་ཞིག

བདག་གི་སྙིང་རིམ་དུ་ཟུག་པའི་རི་བོ་ལས་ལྕི་བ་ལགས་སོ

                ༢༠༢༣-༡༡-༨-༠༠-༤༦-ལ་བྲིས། 

               ཀཱ་ལི་དཱ་ས།

ནགས་ཀྱི་ཚལ་དུ་གྲིབ་མ་ཡལ་བའི་ཕོ་བྲང་དབུས་སུ་འགྲོ་ལམ་ན།།

སྒྱུ་མའི་ལང་ཚོ་ཚངས་པ་ལས་སྐྱེས་དབྱངས་ཅན་གཉིས་པ་རྟག་མཛུམ་ཅན།།

ཆར་བའི་རྒྱུན་གྱི་སྤྲིན་དཀར་གླང་པོ་རྨི་ལམ་མངོན་པའི་ནག་མོ་ཁོལ།།

སོར་མོ་འཕྲེང་བ་སྙིང་གར་བཀོད་དེ་ཡིད་ལ་རིང་དུ་གནས་པ་མཛོད།།

རྨོངས་པའི་དྲ་བ་ལྟུང་བའི་གནས།།

གཙང་བོ་འགྲམ་གྱི་རཱ་མའི་རི།།

སྨུག་སྤྲིན་ཡལ་བའི་གླིང་བུ་ཁྲོད།།

མཚོ་བྱུང་ལྷ་མོ་དབྱངས་ཅན་མ།།

ཟླ་འོད་བཟི་བའི་ལྗོན་ཤིང་རྩེར།།

བརྩེ་དུང་རོལ་བའི་སྙན་ངག་པ།།

སྙན་པའི་ཆུ་ཐིག་མག་མོག་ཁྲོད།།

དལ་བུ་ཕྱིན་པའི་འགྲོ་བ་མཐོང་།།

སྣང་བའི་སྤྲིན་གྱི་ཕ་རོལ་ན།

དབྱངས་ལ་ཐིམ་པའི་དཔྱིད་ལྡན་མ།།

རེ་དོགས་བྲལ་བའི་དབེན་པ་རུ།།

ཆུ་སྟོད་སྤྲིན་གྱི་ཕོ་ཉ་སྒུག།

རྗེ་བོ་གནོད་སྦྱིན་བཀའ་ལུང་གིས།།

ཟླ་བ་འགའ་ཡི་རི་བོ་ཕྱིན།།

འཚོ་བའི་ཁྲོད་ཀྱི་དཔྱིད་ལྡན་མ།།

ཕྱིར་དྲན་གླེང་བའི་གཏམ་རྒྱུད་ཀྱི་།།

པདྨའི་མཚེའུ་འགྲམ་དུ་ཕྱིན།།

མཚོ་ཡི་པདྨོ་འདར་རྐྱེན་གླེང་།།

ཌཱ་ཀི་འཛུམ་ཞལ་མེ་ཏོག་གི།།

འདབ་མ་གཟིགས་བཞིན་སྤྱན་ཆབ་བསིལ།།

དབེན་པའི་ན་བུན་གྱོན་པ་ཡི།།

གང་ཞིག་སྒྱུ་མའི་རི་དྭགས་ཀྱིས།།

གཟུགས་ཀྱི་སྐྱེ་མཆེད་མདངས་གྱུར་ཏེ།།

བས་མཐའི་ཚལ་དུ་འཁྱམས་བཞིན་དུ།།

ཆུ་སྟོད་ཟླ་བ་རྫོགས་པའི་ཉིད།།

བརྩེ་ལྡན་མི་མོ་སྲོག་འཆང་མ།།

སྤྲིན་གྱིས་དག་ལ་ང་བདེའོ།།

ལེགས་པར་འོངས་སམ་དགའ་བར་བརྗོད།།

ནམ་ཞིག་ཕྱིར་རུ་བྱུང་བ་ན།།

ལྗོན་པའི་འགྲམ་གྱི་རཱ་མའི་རི།།

བྱེའུ་ཆུང་ཙཱ་ཏ་ཀ་ཡིས་ཀྱང་།།

དགའ་བ་མིག་གི་བལྟ་ཕྱོགས་སུ།།

ཀཱ་ལི་དཱ་ས་ཕེབས་པ་ན།།

དཔྱིད་ལྡན་མ་ཡི་འཛུམ་ཆུང་གྲོལ།།

མི་སྨྲའི་བརྟུལ་ཞུགས་མཆོང་བ་པོ།།

རབ་འབྱམས་ཞིང་གི་སྐྱེ་བོ་ལ།།

སྤྲིན་པ་ནང་གི་ཡིག་ཆུང་དག།

གཏན་དུ་མི་འབྲལ་ལྟ་བུ་སྣང་།།

ཨེ་མ་ག་བུར་སྙིང་ག་རུ།།

དབྱངས་ཅན་སྒེག་ལྡན་མཇལ་བར་གྱུར།།

མཆོད་པའི་གཙང་ཆབ་གཞན་མ་བསྐྱིལ།།

དབྱངས་ཅན་གཉིས་པ་རྟག་འཛུམ་ཕུལ།།

ཁྱེད་ལ་དགའ་བའི་ཡིད་འཆང་མཁན།།

བདག་དང་སྐྱེ་བོ་ཁ་ཤས་ཞིག།

གཙང་བོ་འགྲམ་གྱི་རྫི་བོ་བྱེད།།

མེ་ཏོག་རྐང་ཅིག་གི་ལས་དབང་།

མེ་ཏོག་འདིར། ཐོག་མ་མེ་ཏོག་སྟེ་གྲོགས་མེད་ཁེར་རྐྱང་དུ་འགྲོ་བའི་སྐབས་སུ།

རབ་རིབ་ཀྱི་ལམ་ཁར་ནས། 

ཁོ་ནི་ཉི་འོད་ཡིན་ཟེར་ནས་མེ་ཏོག་རྐང་ཅིག་དེ་ལ་དྲོ་སྣང་སྟེར།

ད་དུང་། མེ་ཏོག་སྟེ་སྐམ་ནས་སར་ལྷུང་ལ་ཉེ་བའི་སྐབས་སུ།

ཁོ་ནི་ཆར་བ་ཡིན་ཟེར་ནས་མེ་ཏོག་རྐང་ཅིག་དེ་ལ་འཇམ་མཉེན་གནང་།

སྐབས་ཅིག དེས་མེ་ཏོག་རྐང་ཅིག་སྟེ་བཞད་པས་གྲ་སྒྲིག་བྱེད་པའི་སྐབས་སུ།

ཁོ་རང་མེ་ཏོག་སྟེ་སར་འཐུ་ནས་ལྷ་ལ་མཆོད་འབུལ་བྱེད་དགོས་ཟེར།

འོན་ཀྱང་། ངའི་མ་ཤེས་སྔོན་ཆད་ཞི་འཇམ་གྱིས་འཁྱུད་མྱོང་བའི་རླུང་ཏེ།

ད་སྐབས་གདུག་རྩུབ་ཆེ་བའི་ངང་ནས་མེ་ཏོག་རྐང་ཅིག་སྟེ་བཅག་སྲིད།

སྔོན་ཆད་གསོ་སྐྱོང་བྱས་མྱོང་བའི་ཆར་བ་སྟེ།

དེ་སྙིང་རྗེ་གང་ཡང་མེད་པར་མེ་ཏོག་རྐང་ཅིག་ལ་རྡུང་རྡེག་གཏོང་།

འདི་ནི་མེ་ཏོག་རྐང་ཅིག་གི་ལས་དབང་རེད།

གཤིས་འཇམ་གྱིས་ཆར་རླུང་འགོག་མི་ཐུབ་ལ།

སྤྱོད་བཟང་ཡང་་གནོད་འཚེ་ལས་གཡོལ་མི་ཐུབ།

དཀའ་སྡུག་མང་པོ་བརྒྱུད་ན།

ད་དུང་ཆར་རླུང་གི་རྗེས་སུ་སྐྱེ་སྟོབས་ཀྱི་དཔལ་འབར་བའི་ངང་ནས་འཚར་ལོངས་བྱུང་ཐུབ་ལ།

དུས་དེ་ནས་བཟུང་མེ་ཏོག་རྐང་ཅིག་སྟེ་མི་སུ་ལའང་མི་བརྟེན་པར།

མི་རྐྱང་རྟ་རྐྱང་གི་རི་ཀླུང་རྒྱ་མཚོ་གང་མང་བརྒལ་བ་ནི།

མེ་ཏོག་རྐང་ཅིག་གི་འདུན་པ་ཡིན། 

    གནས་མཆོག་ཉི་མ་ལྷ་ས།

དབུས་ཀྱི་ཉི་མ་ལྷ་ས

ཕོ་བྲང་པོ་ཏ་ལ་ཡི་གཟི་བརྗིད་འོད་སྣང་འཕྲོས་བཞིན་ཡོད

གནས་མཆོག་འདི་ནས་མི་རིགས་ཀྱི་ལོ་རྒྱུས་ལྡན་པའི་ཞིང་ཁམས

བོད་པས་བློ་གྲོས་དང་འཇོན་ཐང་མཚོན་པའི་རམི་རིགས་ཤིག

སྙན་གྲགས་འཛམ་གླིང་དུ་ཁྱབ་པའི་དབུས་ཀྱི་ཉི་མ་ལྷ་ས

དབུས་ཀྱིཉི་མ་ལྷ་ས

དད་ལྡན་མང་པོ་ཞིག་གི་ཡིན་རིང་དུ་རེ་སྒུག་གནང་བའི་ཇོ་བོ་རིན་པོ་ཆེ།

དད་པ་དབང་གིས་ས་ཐག་རིང་པོ་ལམ་ནས་དབུས་ལམ་ཕྱོགས་སུ་རྒྱུད་པ་ཡིན།

མི་ཚེ་གཅིག་གི་བདེ་སྡུག་ཆོས་ལ་བསྒྱུར་ནས་དབུས་སུ་ཕོ་བྲང་འཇལ་དུ་ཡོང་བ་ཡིན།

དབུས་ཀྱི་ཉི་མ་ལྷ་ས

བོད་མི་ཞིག་གི་སྙིང་ཁོང་དཀྱིལ་དུ་ཉལ་བའི་ཇོ་བོ་རིན་པོ་ཆེ།

གནས་མཆོག་ཉི་མ་ལྷ་ས་གླིང་གི་སྤུས་དྲི་ཁྱབ་པའི་ཞིང་ཁམས།

གནས་འདི་ན་མེས་པོ་གོང་མའི་སྲོལ་བཟང་བརྗེད་མེད་ཡིན།།

ང་ཡི་མགྲོན་སྐྱབས་མགོན་མཛད་འཕྲིན་བརྗེད་མེད་ཡིན།།   

       ༢༠༢༣ལོའི་ཟླ་བ་བརྒྱད་པའི་ཡར་ངོ་ཚེས་བཟང་ཉིན་ལ་ཉི་མ་ལྷ་ས་གླིང་ནས་བྲིས་པ་དགེའོ།།

     མིང་མེད།  

མུན་ནག་དང་འགྲོགས་ནས་ཁང་ཁྱིམ་དུ་ལོག་རྗེས

བསམ་གཞིག་གི་སྣེ་མོ་ན

མི་ཕོ་ཕལ་བ་ཞིག་གི་ཕུགས་བསམ་གྱི་རྨི་ལམ་དེ་ཡང

རྒྱང་རིང་དང་ཉེ་འགྲམ་དུ་ཡོད་ཡོད་འདྲ་བའི

སེམས་ཚོར་བྱུང

ལོ་ཟླ་མང་པོ་ཁེར་ཧྲེང་གི་བསམ་གཞིག་དེ་དག

སྐྱོ་ཤེས་ཀྱི་མིག་ཟུང་སྐྱོར་ནས

རང་ཉིད་ལ་བསམ་དུས

ཅི་ཞིག་འཇོན་ཡོད

ཕུགས་བསམ་དང་དགའ་ཕྱོགས་དེའི་དབང་གིས

བསླུ་བྲིད་སྣ་ཚོགས་ཀྱི་ངོ་སོ་ལ་བློས་གཏོང་ཁུལ་གྱིས

རང་སྣང་གི་འཇིག་རྟེན་ཕར་ངོགས་སུ

ཕམ་ཁ་དང་རྒྱལ་ཁ་ཟེར་བའི་ངེས་རྟོགས་དེ

གང་དུ་ཡོད་སྲིད

             ༢༠༢༣/༡༡/༡༤ཉིན།

༼མྱུ་གུའི་སྟོབས༽ཚང་གི་སྙན་ངག་སྤེལ་ཐེངས་ལེའུ།