ཆུ་དམར་རྩོམ་རིག་སྤྱི་སྟེགས་སུ་ཕེབས་པར་ལེགས།
སེམས་ཀྱི་ཟེགས་མ་དཀར་པོ།
ཁམས་འབྲི་སྲས། ༼ ཆུ་དམར། ༽
ཤ་རུས་རྒྱུད་གཅིག་པའི་ཕུ་ནུ་ཕན་ཚུན་གྱི་བར་ལ།།
དོན་ངོ་ཚ་ཁྲེལ་མེད་ལྐོག་ཁ་བརླ་བརྩགས་རེ་མ་བྱེད།།
ལས་དྲང་བདེན་ངང་ནས་མཐུན་པའི་བརྩེ་སེམས་དེ་སྐྱོང་སྟེ།།
ལུས་ལན་ཅིག་ཤ་ཁྲག་ཆུད་གཟོན་མ་གཏང་ན་མ་འཆུག།
ཕ་མེས་པོའི་བརླ་རྐང་དབྱངས་གསལ་སོ་བཞི་ཡི་ང་རོ།།
རིགས་རྙོག་འཛིང་ཅན་གྱི་ཁོར་ཡུག་རྫུན་མའི་གསེབ་ཐིམ་ན།།
བོད་བྱམས་ལྡན་ཚང་གི་ཐ་སྙད་བོར་ཉེན་ལ་ཐུག་པས།།
སྐད་ཡི་གེ་གཉིས་ལ་ལྷད་མེད་བརྩོན་སེམས་དེ་མ་འཆུག།
སེམས་རྣམ་གཡེང་འདུ་འཛི་ཆང་དང་ཤོ་བག་ལ་འཁོར་ནས།།
ལུས་ལན་གཅིག་མི་ཚེ་བ་ལྟོ་རྩྭ་ཟན་བཞིན་འདས་ན།།
དོན་མི་ལུས་ཐོབ་ཀྱང་འབྲས་མེད་སྡོང་སྐམ་དང་མཚུངས་པས།།
ཡིད་དྲན་ཤེས་ལྡན་པའི་བརྩོན་འགྲུས་རྟ་ཕོ་དེ་མ་འཆུག།
སེམས་རང་ཚུགས་མེད་པ་གྱང་ཁའི་རྩྭ་སྐྱ་ཡི་རང་བཞིན།།
སུ་ངོ་སོ་མཐོ་ན་དེ་ཡི་རྗེས་ཕྱོགས་སུ་རྒྱུག་ནས།།
ཁ་ངོ་བསྟོད་ཙམ་གྱིས་རྐང་པའི་ཕྱི་ངོས་ལ་ལྡག་པའི།།
ལས་གྲངས་བདེན་མིན་པའི་བྱ་སྤྱོད་བསྐྱུར་རྒྱུ་དེ་མ་འཆུག།
དོན་གནས་ལུགས་ཟབ་མོའི་ནང་ཆོས་ལྟ་བ་དེ་མ་ཤེས།།
བློ་དྲན་ཤེས་རྨོངས་པས་མཆོག་གསུམ་ངོ་རྒོལ་རེ་བྱས་ན།།
ཚེ་འདི་ཕྱི་གཉིས་ཀྱི་ལམ་དེ་བོར་ཉན་ལ་བསམ་ནས།།
གཞི་ཚད་ཐིག་ལྡན་པའི་བསམ་བློའི་ལྟ་གྲུབ་དེ་མ་འཆུག།
མདུན་ལམ་དོགས་པོ།
གཞན་ཕན་ལྷག་བསམ་མེད་པའི་དགེ་རྒན་མཚར།།
བསམ་བློ་བག་ལ་འཁུམ་པའི་ཁྱིམ་བདག་མཚར།།
དམངས་ལ་བྱམས་བརྩེ་མེད་པའི་དཔོན་པོ་མཚར།།
མཚར་པོ་གསུམ་གྱི་ཁྲོད་ནས་མདུན་ལམ་དོགས།།
དུས་བཞི་འགྱུར་བག་དབང་གིས་སེར་བུ་རྒོད།།
ལྷག་རླུང་གྲང་མེད་ཁྲོད་ཀྱི་ཁ་བ་རྒོད།།
རྫུན་མའི་ཁོར་ཡུག་ཁྲོད་ཀྱི་སེམས་པ་རྒོད།།
རྒོད་པོ་གསུམ་གྱི་ཁྲོད་ནས་མདུན་ལམ་དོགས།།
གྲང་ལྷག་བུ་ཡུག་འཚུབས་པས་ནམ་ཟླ་འཁྱག།
གྱོན་པའི་ལྭ་བ་སྲབ་པའི་ལུས་ཕུང་འཁྱག།
མི་སེམས་གཡོ་སྒྱུ་རྒོད་པའི་སེམས་པ་འཁྱག།།
འཁྱག་པ་གསུམ་གྱི་ཁྲོད་ནས་མདུན་ལམ་དོགས།།
བཞི་ཤད་ནག་པོ།
བདག་འཛིན་གཞན་ནོར་སྟེང་དུ་རྐུ་ལག་བསྲིང་།།
ཁྱིམ་ཚེས་ཕན་ཚུན་བར་ལ་མཁོན་ཁ་བཤད།།
སེམས་གྱི་སྦྲོམ་ཆུང་རྫུན་དང་གཡོ་སྒྱུས་ཁེངས།།
རང་ཉིད་ལམ་ལ་བཞི་ཤད་འབུར་དུ་བཀོད།།
གདོང་དམར་འགྲོ་བའི་འཚོ་བརྟེན་ཁྲག་ལ་སྦྱར།།
གཞིས་ཁྱིམ་དྲོད་མོ་གཏོར་ནས་གྲོང་ལ་སྤར།།
དུ་ཆང་སྟེགས་གྲུག་ཕྱོགས་ལ་མགོ་བོ་འཁོར།།
རང་གི་འཚོ་བའི་ཁྲོད་དུ་བཞི་ཤད་བྲིས།།
གྱོན་པའི་ལྭ་བ་རྒྱ་མ་བོད་ཀྱི་གཤིས།།
བཤད་པའི་སྐད་ཆ་ར་མ་ལུག་གི་སྤུན།།
བསམ་པའི་འདུ་ཤེས་ལུང་མ་བསྟན་གྱི་ངང་།།
བསོག་པའི་ནོར་ལ་རང་གིས་བཞི་ཤད་འཐེན།།
དཀའ་མོ།
མི་ཁའི་གྲང་ངར་རྒོད་པའི་འཇིག་རྟེན་ནས།།
མཐུན་སྒྲིལ་བསམ་བློ་མེད་པའི་ཡུལ་སྡེ་དང་།།
རང་ཚུགས་ལྟ་བ་མེད་པའི་འཁྱམ་པོ་དག།
ནམ་ཡང་ཤེས་རྟོག་ལྡན་པའི་བསམ་བློ་དབེན།།
ཤེས་རིག་ཆར་ལྟར་འབབ་པའི་སློབ་ཡུལ་ན།།
ལེ་ལོའི་རྙི་རུ་ཚུད་པའི་སློབ་བུ་དང་།།
མཐུན་སྒྲིལ་མི་གཤིས་ངན་པའི་མི་བུ་དག།
མདུན་སྐྱོད་ལམ་བཟང་རྙེད་པའི་གོ་སྐབས་ཕྲ།།
ཚན་རྩལ་ཤེས་རིག་དར་བའི་དུས་རབས་འདིར།།
མཐོང་ཐོས་ཤེས་རྒྱ་དབེན་པའི་དཔོན་ཆུང་དང་།།
ཀླད་ཆེན་ལྟོ་ལ་འཁོར་བའི་ཀླད་རྙིང་དག།
བསམ་བློ་བག་ལ་ཞ་བས་སྔོན་ཐོན་དཀའ།།
ཨ་ཕོའི་འབོད་སྒྲ།
ཕྱུགས་རིགས་རྨིག་རྗེས་འགྲིམ་པའི་བུ་ལོ་ཚོ།།
རིག་པའི་གནས་ལ་སྦྱང་བ་མ་བྱས་ན།།
མ་འོངས་མི་ཚེའི་ཁྲོད་ཀྱི་མདུན་ལམ་སྟེ།།
འབྲོག་པའི་འཚོ་བ་བོར་དུས་ཚར་རྒྱུ་རེད།།
ལྔ་ཟིང་གནས་ལ་སྦྱང་བ་ག་ལ་ཤེས།།
ཀ་ཁའི་ང་རོ་ཙམ་ཡང་རི་བོང་རྭ།།
དེ་འདྲའི་མི་ཚེའི་ཁྲོད་ཀྱི་ལག་སྟོང་བ།།
འདི་ཕྱི་གཉིས་ཀྱི་གྲོང་ནས་ཚར་རྒྱུ་རེད།།
སྨྲ་ཤེས་རྐང་གཉིས་ཅན་གྱི་མི་བུ་དག།
ཟ་ཉལ་ཙམ་ཞིག་དུད་འགྲོ་སུས་ཀྱང་ཤེས།།
འགྲོ་འདུག་ཙམ་ཞིག་སྲོག་ལྡན་ཀུན་ལ་ཡོད།།
དེས་ཕྱིར་དུད་འགྲོ་ལས་ཀྱང་ཆེད་འཕགས་རེམ།།
ནད་ཡམས།
བརྩེ་བ་རྫུན་མའི་ཁྲོད་ཀྱི་འཛུམ་མདངས་གཅིག།
དུང་བ་ངོ་གཉིས་བར་གྱི་རྙོག་འཛིང་གཉིས།།
མི་གཤིས་ལྷད་ཅན་ཞིག་གི་འཁྲབ་སྟོན་གསུམ།།
འཇིག་རྟེན་རྫུན་དུ་བཟོ་མཁན་ནད་ཡམས་ཤིག།
སེམས་མདུན་སྒོར་ལ་ཕྱོགས་པའི་དགེ་རྒན་གཅིག།
སེམས་རྒྱུད་རྣམ་གཡེང་ཅན་གྱི་སློབ་མ་གཉིས།
སེམས་ཁམས་གཡོ་སྒྱུས་ཁེངས་པའི་མི་བུ་གསུམ།།
སློབ་གསོའི་ཁོར་ཡུག་ཁྲོད་ཀྱི་ནད་ཡམས་ཤིག།
རྒྱུ་འབྱོར་ཕྱུག་ཀྱང་མཁོ་འདོན་མི་ཤེས་གཅིག།
མི་ལུས་ཐོབས་ཀྱང་རྒྱུ་གཡོག་གྱུར་དང་གཉིས།།
རྙོག་རྡུལ་ཡིན་ཡང་གསོག་མདོད་ཆེ་དང་གསུམ།།
མི་ཚེའི་དོན་འབྲས་རླག་པའི་ནད་ཡམས་ཤིག།
༼མྱུ་གུའི་སྟོབས༽ཚང་གི་སྙན་ངག་སྤེལ་ཐེངས་ལེའུ།
ཆུ་དམར•མྱུ་གུ་སྟོབས་ཚང་གི་སྙན་ངག་སྤེལ་ཐེངས། ༼ ༡ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༣ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༤ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༥ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༦ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༧ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༨ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༩ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༠ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༡ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༢ ༽
ཆུ་དམར•མྱུ་གུའི་སྟོབསཚང་གི་སྙན་ངག་སྤེལ་ཐེངས། ༼༡༣༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༤༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༥༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༡༦ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༡༧ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༨༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༩༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢༠ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢༡ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༢༢༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢༣ ༽
སྙན་ངག •ལོ་རྒྱུས། •ཆོས་ལུགས། •དཔྱད་རྩོམ། •བསྒྱུར་རྩོམ། •སློབ་གསོ། •གླུ་གཞས།
ཆུ་དམར་རྩོམ་རིག་འཕྲིན་སྟེགས།
ཡིག་སྒམ། 1659774550@qq.com
扫码关注
能看到很多生活乐趣
▼ 点击下面语音，播放歌
འཕྲིན་སྟེགས་སུ་མི་སྒེར་རམ་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ་མྱུར་དུ་ང་ཚོར་འབྲེལ་གཏུག་བྱོས་དང་དྲ་ངོས་ནས་བསུབ་ངེས་ཡིན།
དེ་ནང་བཞིན་སྐུ་ཉིད་ཀྱི་སྙན་རྩོམ་དང་གླུ་གཞས་གསར་པ། པར་རིས་དང་རྩོམ་རིག་བརྩམས་ཆོས་སྤེལ་འདོད་ཚེ་རྩ་བའི་ཆ་རྐྱེན་ཆབ་སྲིད་དང་མི་འགལ་བའི་ཐོག་འོག་གི་འབྲེལ་ལམ་རྒྱུད་དེ་འབྲེལ་བ་བྱོས་དང་ཁྱེད་ཀྱི་འདོད་བློ་ལྟར་གང་ཐུབ་བྱ་ངེས།
