དུས་ཚོད།
དུས་ཚོད་རིང་བོ་མི་འདུག
མི་ཚེ་ཕྱེད་ཀ་ཚར་ཐལ།།
སྒུག་པའི་ཁོམ་ལོང་མི་འདུག
ཉི་མ་སྲོད་ལ་བབ་ཐལ།།
—གླུ་ཚིག
ང་ནི་ནམ་རྒྱུན་དུས་ཚོད་ལ་སེར་སྣ་ཧ་ཅང་ཆེ་བའི་མི་ཞིག་ཡིན།ངས་རྣམ་ཀུན་མི་རྣམམ་ལ་ང་ནི་དུས་ཚོད་ལ་སེར་སྣ་ཧ་ཅང་ཆེ་བའི་མི་ཞིག་ཡིན། ཁྱོད་ཚོས་ཀྱང་དུས་ཚོད་ལ་སེར་སྣ་བྱེད་ཐུབ་པར་སྨོན་ཞེས་བཤད་བཞིན་ཡོད། ཐེངས་འདིར་དུས་ཚོད་ཅེས་གླེངས་དུས་མཛེས་སྡུག་གི་ཕྱིར་དྲན་ཞིག་གི་ཕྱི་ནང་བསྔོགས་དགོས་ཀྱི་ཡོད། དོན་དུ་མཛེས་སྡུག་གི་བུ་མོ་ཞིག་ཡང་བསྐྱར་གླེང་དགོས་ཀྱི་ཡོད། སྔོན་ཆད་དུས་ཚོད་ལ་གཅེས་འཛིན་ཡག་པོ་བྱེད་མི་ཤེས་ཀྱང། 2019ལོར་རིན་ཆེན་མཚོ་ཟེར་བའི་བུ་མོ་ཞིག་ངོ་ཤེས་ཤིང་གནས་སྐབས་རིང་ཆེས་བཟང་བའི་གྲོགས་མོར་ཆགས། དེ་ཡང་ཅུང་རྗེན་པར་བཤད་ན་མི་ཚེ་འདིར་ཁ་ཞེ་གཉིས་མེད་སྒོས་དགའ་མྱོངས་སའི་བུ་མོ་དེའང་ཡིན། ནམ་རྒྱུན་ཁོ་མོ་དང་མཉམ་དུ་འགྲོགས་པ་དང་ཁོ་མོ་དང་མཉམ་དུ་ཁ་བརྡ་བྱེད་དུས་མོས“དུས་ཚོད།”ཅེས་མང་པོ་ལབ་ཡོང་ཞིང་། དུས་ཚོད་ཀྱིས་མ་འདང་ནས་ཁ་ངོའང་གཙང་དག་ཏུ་མ་བཀྲུས་པར་སྲང་ལ་ཡོང་བའི་སྐབས་ཀྱང་ཡོད། དེ་ལས་གཞན་ཞལ་འཛུམ་ཤིག་གེར་“དུས་ཚོད་ལ་སེར་སྣ་དགོས།”ཞེས་པའི་སྟོབས་ཤུགས་ཆེ་བའི་སྐད་ཆ་འདིའང་ཁོ་མོའི་ཁ་ནས་ཐལ་བའང་ཉུང་ཉུང་མིན། དེ་ནས་བཟུང་ང་ལའང་དུས་ཚོད་ལ་སེར་སྣ་ཆེ་བའི་འདུ་ཤེས་ཤིག་འཚབ་འཚུབ་སྒོས་སད་འགོ་ཚུགས། དུས་ཚོད་དང་འབྲེལ་བའི་སྙན་ངག་མང་པོ་བཀླགས་རྗེས་སུ་དུས་ཚོད་དང་འབྲེལ་བའི་སྙན་ངག་ཀྱང་མང་དུ་བྲིས་ཤིང་རང་གིས་རང་ལ་སྙིང་ཕུར་བརྡབས། ན་ནིང་ལོར་《ཧ་ཝར་ཊི་གཙུག་ལག་སློབ་ཆེན་གྱི་ཐོ་རེངས་ཆུ་ཚོད་བཞི་དང་ཕྱེད་ཀ། 》ཞེས་པའི་འགྱུར་དེབ་དེ་བཀླགས་པའི་རྗེས་སུ་དུས་ཚོད་ནི་ཚེ་སྲོག་དང་ཤེས་རིག་གི་གཏེར་རྫོང་མཐུག་པོ་ཞིག་དང་། དུས་ཚོད་ནི་རིན་ཐང་བླ་ན་མེད་པའི་ལོངས་སྤྱོད་གྱ་ནོམ་པ་ཞིག་ཡིན་པའི་གནས་ལུགས་རྙེད། ད་ཐེངས་དངོས་སུ་དུས་ཚོད་ལ་སེར་སྣ་བྱེད་པའི་ལམ་ན་ཡོད་ཅིང་། ད་རུང་ངས་ཨེ་ལུང·མཱ་སིའི་ཁི་ལྟར་ཉིན་མཚན་དབྱེར་མེད་ཀྱིས་དུས་ཚོད་བེད་སྤྱོད་གཏོང་ཐུབ་ཀྱི་མེད་པ་ལ་གདུང་སེམས་བསྐྱེད་བཞིན་དུ་དེའི་ཐད་དུ་ཚོད་ལྟའམ་འཐབ་རྩོད་ཀྱང་བྱེད་སྒང་ཡིན། ཨེ་ལུང·མཱ་སིའི་ཁིས“དུས་ཚོད་ཀྱིས་ནམ་ཡང་འདང་ངེས་མིན།”ཞེས་པའི་ལེགས་བཤད་དེ་ནམ་ཡང་ལག་ལེན་གྱི་སྔོན་འགྲོ་ཞིག་ཏུ་བཞག་ནས་དབུགས་ཧལ་ཧལ་གྱིས་དུས་ཚོད་ཀྱི་རྗེས་སུ་རྒྱུགས་ཀྱིན་ཡོད། ཁོང་གིས་འཛམ་གླིང་བསྒྱུར་བཅོས་གཏོང་ཐུབ་ན་ངས་ཉིན་མཚན་ལྟོས་མེད་ཀྱི་དུས་ཚོད་རིན་པོ་ཆེ་ལོངས་སུ་སྤྱོད་ལོས་ཐུབ་ཅེས་ཁེར་བཤད་བྱས་པའི་སྐབས་ཀྱང་མང། ང་ལ་དུས་ཚོད་ཅི་ཕྱིར་མཁོ་བ་ཡིན་ནམ་ཞེ་ན། དཔེ་ཀློག་དང་རྩོམ་འབྲིའི་ཆེད་དུ་མཁོ་བ་ཡིན་ལ། ང་ལ་དུས་ཚོད་ཇི་ལྟར་སྤྱོད་བཞིན་ཡོད་དམ་ཞེ་ན་དཔེ་ཀློག་དང་རྩོམ་འབྲིའི་དོན་དུ་སྤྱོད་བཞིན་ཡོད་ཅེ་ནའང་སྐྱོན་དུ་མི་ཆེ།དུས་རབས་ཀྱི་དབང་གིས་རྫུན་ཞིག་མ་གཏམ་ན། སྣོག་ཅིག་མ་ལས་ན། འཕྲུལ་ཞིག་མ་བརྒྱབ་ན་དུས་ཚོད་ཡོད་ཚད་དཔེ་ཀློག་དང་རྩོམ་འབྲིའི་ཐད་དུ་སྤྱོད་བཞིན་ཡོད་ཅེ་ན་རྣར་འགྲོ་དཀའ་མོད། དོན་དངོས་སུ་ངས་ནི་དཔེ་ཀློག་དང་རྩོམ་འབྲི་གཉིས་ལས་མི་འཇོན་པས་དེ་ལྟར་བེད་སྤྱོད་གཏོང་བཞིན་ཡོད། ཁོ་བོ་རང་ངོས་ནས་བསྙད་ན་དེ་ནི་དུས་ཚོད་ལ་སེར་སྣ་བྱེད་སྟངས་ཤིག་ཏེ་དུས་ཚོད་ལོངས་སུ་སྤྱོད་སྟངས་མཛེས་སྡུག་ལྡན་པ་ཞིག་ཡིན། ཁྱོད་ཚོས་ཀྱང་དུས་ཚོད་ལ་སེར་སྣ་བྱེད་སྟངས་དེ་ལྟར་ཡིན་དགོས་ཞེས་ཁ་ཚོད་མི་ཆོད་ཀྱང་ང་ལ་མཚོན་ན་མ་མཐར་ཡང་དེ་འདྲ་ཞིག་ཡིན། རྣམ་ཀུན་དུས་ཚོད་ཀྱིས་འདང་གི་མེད་པའི་སྣང་ཚོར་ཞིག་ཤ་དང་རུས་པ་བརྟོལ་ཏེ་སྙིང་གི་ནང་ལ་ལྷུང་ཡོང་གི་འདུག་པས་ངས་སོས་ཀ་ཞེས་པའི་དུས་ཚིགས་དེར་རེ་བསྒུག་བྱེད་བཞིན་ཡོད། སོས་ཀའི་ཉི་མ་ཅུང་རིང་བས་དུས་ཚོད་ཀྱི་སྤྱོད་སྒོ་ཆེ་ཞིང་ཡུན་རིང་བས་ངས་སོས་ཀ་ཞེས་པའི་དུས་ཚོས་ཀྱི་རྒྱ་མཚོ་ཆེན་པོ་དེར་ཁེར་རྐྱང་གི་ཀོ་གྲུ་བཏང་སྟེ་མདུན་ནས་མདུན་དུ་འགྲོ་བཞིན་ཡོད། མ་གཞི་དུས་ཚོད་ནི་ནམ་ཟླ་དཔྱིད་ཀྱི་དུས་སུ་ཁ་བའི་འདབ་མ་རེ་རེ་བཞིན་ཕྱིར་ས་གཞིའི་ངོས་སུ་ལྷུང་བ་དང་ཧ་ཅང་འདྲ་སྟེ། འདབ་མ་ས་རུ་ལྷུང་ཚར་རྗེས་སུ་སླར་ཡང་དབྱིངས་ནས་ཕྱིར་ལ་ལྷུང་མི་སྲིད་པ་ཇི་བཞིན་དུ་དུས་ཚོད་ཕར་ལ་ཤོར་ཚར་བ་ན་སླར་ཡང་ཚུར་ལ་ལྡོག་ཐབས་མི་དཔེ་བས། ངས་དུས་ཚོད་ནི་དུས་ཚོད་ཙམ་མ་ཡིན་པར་དུས་ཚོད་ནི་ཚེ་སྲོག་གི་འཕར་ལྡིང་ཞིག་གམ་ཁྲི་སྲོང་ལྡེ་བཙན་གྱི་ལྡོག་ཟླ་རུ་ངོས་འཛིན་བྱེད་བཞིན་ཡོད། སྐབས་ཐོག་འདིར་རང་གིས་བྲིས་པའི“དུས་ཚོད།”ཅེས་པའི་སྙན་ངག་ཅིག་ཀྱང་འདིར་གདན་འདྲེན་ཞུ་ན་འདོད་སོང།
“ དུས་ཚོད
ཨ་ཅེ དུས་ཚོད་ནི་འཆི་བདག་ཡིན
ང་ཚོ་མིའི་ཡུལ་གྱི་ནད་ཁྲི་ཐོག་ཏུ་བསྡད་དེ
སྲ་ཐོ་སེར་འཆི་རྒྱུར་བསྒུག་བསྡད་ན
ང་ཚོས་འཆི་བདག་ལ་མགོ་བོ་སྒུར་བ་ཡིན
ཕུ་བོ དུས་ཚོད་ནི་འཆི་བདག་ཡིན
ང་ཚོ་སྒྱིད་ལུག་གི་ནག་ཁུང་ཁྲོད་དུ་ཉལ་ཏེ
ཆོ་མེད་ཀྱི་འཚོ་བ་རོལ་བ་ནི
འཆི་བདག་ལ་ལག་གཡུག་བྱས་པ་དང་འདྲ
ནུ་མོ དུས་ཚོད་ནི་སྐྱབས་མགོན་ཡང་ཡིན
ང་ཚོས་དུས་ཚོད་ལ་གཅེས་སུ་འཛིན་ཏེ
སྐར་མ་རེའམ་སྐར་ཆ་རེ་རེ་བཞིན་ཚེ་སྲོག་གི་རྩ་ལག་གལ་ཆེན་ཞིག་ཏུ་མཐོང་སྟེ་འབད་འབུང་སྐྱེད་ནུས་ཚེ
ནམ་ཉི་མ་ཞིག་ལ
ང་ཚོའང་སྐྱབས་མགོན་ཞིག་ཏུ་འགྱུར་དུས་ཡོད
ནུ་བོ དུས་ཚོད་ནི་སྐྱབས་མགོན་ཡིན
ང་ཚོས་དུས་ཚོད་ཀྱི་ད་ལྟར་སེར་སྣ་བྱས་ཤིང
ཚེ་སྲོག་གི་འགྲུལ་བཞུད་ཁྲོད་དུ
གོམ་པ་རེ་རེས་དུས་ཚོད་ཀྱི་རྗེས་ཆོད་ན
ང་ཚོ་སྐྱབས་མགོན་ལས་སྔུན་དུ་བརྒྱུགས་ཐུབ་པ་ཡིན
སྙན་ངག་འདི་འདིར་དྲངས་དོན་ནི་གཞན་སུ་ཞིག་ལ་ངོ་སྤྲོད་བྱེད་འདོད་པས་མིན་ལ། དེ་ལས་གཞན་སུ་ཞིག་ལ་ཕན་ན་འདོད་པའི་རེ་བ་བཅངས་པའང་མིན། སྙན་ངག་འདིས་སླར་ཡང་ང་ལ་“ཝེ། དུག་ཆུ་ཁོལ་མ། སོས་ཀ་དངོས་སུ་སླེབས་འདུག ཁྱོད་ཀྱིས་དུས་ཚོད་ཀྱི་རྒྱ་མཚོ་ཆེན་པོ་འདིའི་རླབས་བཞག་ཁྲོད་ནས་ཁེར་རྐྱང་གི་ཀོ་གྲུར་གཏོང་ནས་མུ་རུ་མདུན་དུ་སྐྱོད་རོགས།”ཞེས་བྲག་ཅའི་ཚུལ་དུ་ཡང་ནས་ཡང་དུ་འབོད་སྐུལ་བྱེད་བཞིན་འདུག་པས་ན། ང་ལ་མཚོན་ན་སྙན་ངག་འདི་ནི་ས་པཎ་གྱི་ལེགས་བཤད་ཐམས་ཅད་ལས་ཀྱང་ནུས་བཅུད་ཆེ་བ་ཞིག་ཏུ་འདུག གང་ལྟར་དེ་རིང་རྩོམ་ཐུང་འདི་འབྲི་དོན་ཡང་ཡང་བསྐྱར་རང་གིས་རང་ལ་“དུས་ཚོད་ལ་སེར་སྣ་བྱེད་རོགས”ཞེས་སྙིང་ཕུར་ཞིག་བརྡབས་ཡག་བྱེད་པ་ཙམ་ལས་གཞན་ཅི་ཡང་མིན།
2024.5.5དགོང་མོར་བྲིས་ཤིང་དག་བཅོས་ཐེངས་མ་བཅུ་རུ་བྱས་ནས་དབྱར་ཟླ་བདུན་པའི་ཚེས་པ་བཅོ་ལྔར་དངོས་སུ་མཇུག་གྲུབ་པར་བྱས་སོ། ། 
