ཆུ་དམར་རྩོམ་རིག་སྤྱི་སྟེགས་སུ་ཕེབས་པར་ལེགས།
འཁྲུངས་ཚེས་བསུ།
ཚིག ཁམས་སྨྱུག་དུང་། （ཆུ་དམར།）
དབྱངས། ཡེ་ཤེས་སེང་གེ
ལེན་མཁན། ཡེ་ཤེས་སེང་གེ ཟླ་བ་མཚོ།
སློབ་དཔོན་གསེར་གྱི་ཉི་མའི། །
སློབ་གསོ་འོད་ཀྱི་རང་མདངས། །
གླིང་བཞིའི་ཁྱོན་ལ་ཁྱབ་སོང་། །
འཛམ་གླིང་སྣང་བས་མཛེས་བྱུང་། །
དགའ་བ་ལ། སྐྱིད་པ་ལ།
སློབ་དཔོན་མཆོག་གི་སྐུ་ཚེ་བརྟན་པར་ཤོག
སློབ་དཔོན་རི་རྒྱལ་ལྷུན་པོའི། །
འཁྲུངས་སྐར་བཅོ་ལྔའི་དུང་ཟླ། །
ཤར་རིའི་རྩེ་ནས་འཛུམ་བྱུང་། །
ཀུ་མུད་འདབ་མ་གྲོལ་སོང་། །
དགའ་བ་ལ། སྐྱིད་པ་ལ།
སློབ་དཔོན་མཆོག་གི་འཁྲུངས་སྐར་བསུ་རུ་འགྲོ།
མཁྱེན་དཔྱོད་ནམ་མཁའ་ཡངས་པོ། །
སློབ་འབངས་སྐར་ཚོགས་ཁྲ་མོ། །
ཉི་ཟླ་སྐར་གསུམ་འཛོམས་སོང་། །
ང་ཚོ་སེམས་པ་སྐྱིད་བྱུང་། །
དགའ་བ་ལ། སྐྱིད་པ་ལ།
སློབ་དཔོན་མཆོག་གི་མཛད་འཕྲིན་རྒྱས་པར་སྨོན།
ཕུ་བོའི་འཁྲུངས་སྐར་ལ་ཕུལ་བ།
གཞས་ཚིག ཁམས་སྨྱུག་དུང་།
གཞས་དབྱངས། ཆོས་ལྷ།
གཞས་མ། ཆོས་ལྷ།
འགྱུ༵ར་མེ༵ད་དད་དམ་བདུད་རྩིའི་ངོ་བོ། །
བསྟ༵ན་འཛི༵ན་དམ་པའི་བཅུད་དུ་ཡོངས་གཏམ། །
དོན་གྲུབ་སྨོན་འདུན་ཚིག་གི་མཆོད་པ། །
འཁྲུངས་སྐར་བསུ་བའི་ཆེད་དུ་བཀོད་ཡོད། །
ཕུ་བོ་ལགས། འཁྲུངས་སྐར་བསུ།
དགེ་བའི་ཁ་གཡང་འབོད་བཞིན་འཁྲུངས་སྐར་བསུ། །
དོན་གཉིས་འབད་མེད་ལྷུན་གྱིས་འགྲུབ་པར་ཤོག །
དོན་ལྡན་མི་ཚེ་གསེར་གྱི་ཕུང་པོ། །
ལོ་ཟླའི་བར་ལ་འོད་ཀྱིས་བརྩིགས་པ། །
བཀྲ་ཤིས་རྟགས་བརྒྱད་ཁ་གཡང་སྨོན་ཚིག །
འཁྲུངས་སྐར་བསུ་བའི་དཔལ་དུ་སྒྲོན་ཡོད། །
ཕུ་ལོ་ལགས། འཁྲུངས་སྐར་བསུ།
བདེ་ལེགས་ཚིག་གི་མཆོད་པས་འཁྲུངས་སྐར་བསུ། །
སྐུ་བདེ་ཐུགས་སྐྱིད་ཕུན་ཚོགས་དཔལ་འབར་ཤོག །
ཕྱི་ནང་གསང་བའི་བར་ཆད་ཀུན་སེལ། །
འདི་དང་ཕྱི་མའི་དོན་གཉིས་ཡོངས་འགྲུབ། །
རྒྱལ་སྲིད་སྣ་བདུན་ཡིད་ཀྱི་མཆོད་པ། །
འཁྲུངས་སྐར་བསུ་པའི་སླད་དུ་ཕུལ་ཡོད། །
ཕུ་བོ་ལགས། འཁྲུངས་སྐར་བསུ།
རྟེན་འབྲེལ་ཕུན་ཚོགས་འབུམ་གྱིས་འཁྲུངས་སྐར་བསུ། །
ཐུགས་ཀྱི་བཞེད་པ་གེགས་མེད་ལྷུན་འགྲུབ་ཤོག །
བརྩེ་བའི་ཕྲ་རྒྱན།
གཞས་ཚིག ཁམས་སྨྱུག་དུང་།
གཞས་གདངས། གྲ་བ་བསམ་འགྲུབ།
གཞས་པ། གྲུ་བ་བསམ་འགྲུབ། སྐལ་བཟང་ཆོས་མཚོ།
གོམ་གསུམ་གོམ་པ་སྤོས་ནས། །
ལ་གསུམ་ལ་མོ་བརྒྱབ་ཡོད། །
ཚིག་གསུམ་སྙིང་གི་དམ་བཅའ། །
སྙན་མོའི་གཞས་ལ་བཅོལ་ཡོད། །
དམའ་མོའི་གཞུང་ལ་བལྟས་ཚེ། །
དཀར་དམར་མེ་ཏོག་བཞད་འདུག །
ལས་ཀྱིས་བསྐོས་པའི་བྱམས་པ། །
མེ་ཏོག་ཁྲོད་ནས་རྙེད་བྱུང་། །
མི་འགྱུར་གཡུང་དྲུང་རི་མོ། །
སོ་སོའི་སེམས་ལ་བརྐོས་ཡོད། །
དམ་ཚིག་གསེར་གྱི་རྒྱུད་སྐུད། །
སོར་མོས་དབྱངས་ལ་བརྒྱུས་ཡོད། །
བརྩེ་བ་བྱུ་རུའི་ཕྲ་རྒྱན། །
མགུལ་དུ་སྒྲོན་པ་གནང་དང་། །
མཛའ་གཅུགས་ཡིད་ཀྱི་འཁྲི་ཤིང་། །
རང་རང་ས་ནས་གཉོར་ཆོག །
བརྩེ་བའི་བདག་མོ།
གཞས་དབྱངས། རྫོགས་ཆེན་བསྟན་འཛིན།
གཞས་མ། སྐལ་བཟང་ཆོས་མཚོ།
༡
འཇིག་རྟེན་འཁོར་བའི་ནང་ནས། །
དྲོད་འཇམ་ཉི་མས་དྲོས་བྱུང་། །
དྲོད་འཇམ་ཉི་མ་མ་རེད། །
བརྩེ་ཆེན་ཨ་མའི་དྲོད་རེད། །
སྦྲ་ནག་གྲུ་བཞིའི་ཁྱིམ་ཕུག་དེ་ན་བྱམས་ལྡན་ཨ་མའི་དྲོད་ཁོལ་འཁྱིལ།
གཡང་དཀར་ལུག་གི་འབའ་སྒྲའི་ཁྲོད་ན་བྱམས་ལྡན་ཨ་མ་འཛུམ་ཞིང་བཞེད།
ང་ཡི་བརྩེ་ཆེན་གྱི་ཨ་མ། ཁྱེད་ཀྱིས་འོ་བརྒྱལ་མྱོང་སོང་།
༢
འཚོ་བའི་གར་སྟེགས་སྟེང་ནས། །
དབྱངས་ཅན་པི་ཝང་སྙན་བྱུང་། །
དབྱངས་ཅན་པི་ཝང་མ་རེད། །
བརྩེ་ཆེན་ཨ་མའི་གསུང་རེད། །
ཐུལ་དཀར་འབྲི་མོའི་བཞོ་ཟོའི་འགྲམ་ནས་བྱམས་ལྡན་ཨ་མའི་བཞོ་དབྱངས་སྙན།
སྐལ་བཟང་མེ་ཏོག་བཀྲག་མདངས་ཁྲོད་ནས་བྱམས་ལྡན་མ་ལོའི་ལང་ཚོ་མཛེས།
ང་ཡི་བརྩེ་ཆེན་གྱི་ཨ་མ། ཁྱེད་ཀྱིས་འོ་བརྒྱལ་མྱོང་སོང་།
༣
སེམས་ཀྱི་ཞིང་ས་དེ་ན། །
སྙིང་རྗེའི་མྱུ་གུ་འཁྲུངས་བྱུང་། །
སྙིང་རྗེའི་མྱུ་གུ་མ་རེད། །
བརྩེ་ཆེན་ཨ་མའི་སེམས་རེད། །
ཁ་བ་དཀར་པོའི་མདུན་ལྗོངས་ངོས་སུ་བརྩེ་ལྡན་ཨ་མའི་ཞབས་རྗེས་གསལ། །
སྒང་པ་བོད་ཀྱི་ལོ་རྒྱུས་ཁྲོད་ན་བྱམས་ལྡན་མ་ལོའི་རྒྱབ་གཟུགས་མངོན། །
ང་ཡི་བརྩེ་ཆེན་གྱི་ཨ་མ། ཁྱེད་ཀྱིས་འོ་བརྒྱལ་མྱོང་སོང་།
དད་པའི་ཕོ་བྲོང་ནས་བཞུད་པའི་སྐྱེས་ཆེན།
གཞས་ཚིག ཁམས་སྨྱུག་དུང་།
གཞས་དབྱངས། བློ་གསལ།
ལེན་མཁན། ཤེས་མཚོ།
གསེར་ཉི་གཞོན་གནམ་མཐའི་སྤྲིན་གྱིས་གཡོག །
དུང་ཟླ་བ་སྒྲ་ཅན་ནག་པོས་སྒྲིབ། །
རྗེ་བཀའ་དྲིན་མཚུངས་མེད་བླ་མ་རྗེ། །
སྤྲུལ་སྦས་དགའ་རྡོ་རྗེ་གང་དུ་བཞུགས། །
བླ་མ། བླ་མ།
རྗེ་བླ་མ་སྙིང་གི་དཀྱིལ་ནས་དྲན། །
འབྲོང་བྲེ་སེར་རྫ་མགོར་རི་མགོར་འགྲིམས། །
སེང་དཀར་མོ་གནས་ཡུལ་ངེས་མེད་འཁྱམས། །
ཐུགས་བྱམས་བརྩེས་སྐྱོང་བའི་བླ་མ་རྗེ། །
སྐུ་མ་བཞུགས་ཞིང་ཁམས་གང་དུ་ཕེབས། །
བླ་མ། བླ་མ།
རྗེ་བླ་མ་སྙིང་གི་དཀྱིལ་ནས་དྲན། །
རྗེ་ཁྱེད་ཀྱི་ཞལ་གདམས་ཡིད་ལ་དྲན། །
ངེད་སློབ་འབངས་མིག་ཀོང་མཆི་མས་བརླན། །
ཐུགས་གཡོ་མེད་ཏིང་འཛིན་ཟབ་གསལ་ངང་། །
རྒྱུད་བྱིན་རླབས་སྩོལ་ཅིག་བླ་མ་རྗེ། །
བླ་མ། བླ་མ།
རྗེ་བླ་མ་སྙིང་གི་དཀྱིལ་ནས་དྲན། །
སྐུ་རི་རྒྱལ་འདྲ་བའི་བླ་མ་དྲན། །
གསུང་འབྲུག་སྒྲ་འདྲ་བའི་གདམས་ངག་དྲན། །
ཐུགས་ཉི་ཟླ་འདྲ་བའི་དཀྱེལ་ཡངས་དྲན། །
ཡིད་གདུང་བས་གསོལ་འདེབས་ཁྱེད་ལ་བྱེད། །
བླ་མ། བླ་མ།
རྗེ་བླ་མ་སྙིང་གི་དཀྱིལ་ནས་དྲན། །
ལོ་སར་སྨོན་ཚིག
གཞས་ཚིག ཁམས་སྨྱུག་དུང་།
གཞས་གདངས། གསེར་གུར།
གཞས་པ། ཕུན་ཚོགས་མཆོག་ལྡན། རོལ་མོ།
ཤེར་བྷ། སྒྲ་ལེན་པ། གཡང་རོང་ཨ་དོན།
ལོ་སར་ཚེས་པ་དང་པོར། །
ལྷ་ལ་མཆོད་པ་ཕུལ་ཡོད། །
ལྷ་བསང་དགུང་ལ་གཏང་ཡོད། །
ཁ་ལས་དགེ་བར་ཤོག
རླུང་རྟ་དར་བར་ཤོག
ལོ་སར་ཚེས་པ་དང་པོར། །
ཕ་མ་གོང་དུ་བཞུགས་ཡོད། །
བུ་ཕྲུག་མཐའ་ནས་བསྐོར་ཡོད། །
ཚེ་ཐག་རིང་བར་ཤོག
དྲིན་ལན་སོད་པར་ཤོག
ལོ་སར་ཚེས་པ་དང་པོར། །
ཕུ་ནུ་ལྷན་འཛོམས་བྱུང་ཡོད། །
དགའ་སྐྱིད་དགོད་སྒྲས་ཁྱབ་ཡོད། །
བསམ་དོན་འགྲུབ་པར་ཤོག
བདེ་སྐྱིད་ལྡན་པར་ཤོག
ཨ་རོགས་ཡེ།
གཞས་ཚིག ཁམས་སྨྱུང་དུང་།
གཞས་གདངས། ཡེ་ཤེས་སེངྒེ།
གཞས་པ། ཡེ་ཤེས་སེངྒེ།
ཨ་རོགས་ལ་ཡེ།
སྟག་ཤར་མ་འདུག་ཡར་ལ་གཟིགས་དང་ཡུལ་ཞིག་མཐོང་རྒྱུ་གན།
བོད་ཁ་བ་ཅན་གྱི་ཞིང་ཁམས་རེད།
བྱམས་སྙིང་རྗེ་གཉིས་ཀྱི་འབྱུང་ཁུངས་རེད།
ཨ་རོགས་ལ་ཡེ།
བུ་མོ་མ་འགྲོ་ཚུར་ལ་ཕེབས་དང་སྤང་གི་སྦྲ་ནག་འདི།
ཕ་འབྲོག་པའི་གཡང་གི་རུ་མ་རེད།
ཞོ་འོ་མའི་རྒྱ་མཚོ་འཁྱིལ་ས་རེད།
ཨ་རོགས་ལ་ཡེ།
བུ་ཆུང་མ་གཡེང་སློབ་ལ་བརྩོན་དང་རིག་པའི་སྙིང་བཅུད་འདི།
དབྱངས་གསལ་བྱེད་ཡིད་བཞིན་ནོར་བུ་རེད།
ཆོས་གཙུག་ལག་མཛོད་ཀྱི་ལྡེ་མིག་རེད།
སྨོན་ལམ།
གཞས་ཚིག ཁམས་སྨྱུག་དུང་།
སེར་ཆིལ་ལེ་ཉི་མ་དགུང་ནས་ཤར་དུས། །
ས་ཐག་རིང་ཡུལ་གྱི་བླ་མ་དྲན་བྱུང་། །
རྗེ་བླ་མའི་དགྱེས་ཞལ་ཡིད་ལ་འཁོར་དུས། །
ཞལ་ཡང་ཡང་མཇལ་བའི་སྨོན་ལམ་བཏབས་ཡོད། །
ཚེས་བཅོ་ལྔའི་དུང་ཟླ་ཐད་ནས་ཚེས་དུས། །
ཁྱིམ་གྲུ་བཞིའི་ནང་གི་ཕ་མ་དྲན་བྱུང་། །
དྲིན་ཕ་མའི་ཞལ་རས་སེམས་ལ་འཁོར་དུས། །
སྐུ་ཚེ་ཐག་རིང་བའི་སྨོན་ལམ་བཏབས་ཡོད། །
ཁྲ་ཆིལ་ལེ་སྐར་ཚོགས་དགུང་ནས་བཀྲ་དུས། །
སྡེ་ཁྲ་བོའི་དཀྱིལ་གྱི་བྱམས་པ་དྲན་བྱུང་། །
ཆུང་བྱམས་པའི་བརྩེ་བ་སེམས་ལ་འབྲི་དུས། །
གཞོན་བརྩེ་དུང་མི་འགྱུར་སྨོན་ལམ་བཏབས་ཡོད། །
སྤྲིན་མཚམས་སུ་གནས་པའི་ཆུ་དམར་ལེབ།
གཞས་ཚིག ཁམས་སྨྱུག་དུང་།
མཐོན་མཐིང་སྤྲིན་དཀར་འཕྱུར་བའི་གནས་མཆོག །
བརྗིད་ལྡན་གངས་དཀར་རི་བོའི་ལྕགས་རི། །
མཛེས་ལྡན་དཀར་དམར་མེ་ཏོག་འཁྲུངས་ས། །
ཕ་ཡུལ་ཆུ་དམར་རྩྭ་ཐང་མཛེས་སོ། །
བྱིན་ཆགས་རྩེ་ལྷ་བཅུ་གསུམ་བཞུགས་གནས། །
འཛམ་གླིང་གེ་སར་རྒྱལ་པོའི་ཕ་ས། །
མར་འབབ་རྨ་ཆུ་སྔོན་མོའི་མགོ་ཁུངས། །
ས་སྟེང་སྐྱེ་རྒུའི་ཡིད་ཀྱིས་སྨོན་ས། །
གླིང་དཀར་ཕ་ཟོག་ནོར་བུ་ཆ་བདུན། །
མགྱོགས་པ་འདོ་བའི་རྒྱན་དུ་འཇོག་ས། །
གུ་ར་རྫ་སྐྱ་ཞེས་པའི་མཚན་སྙན། །
མཐོ་སྒང་ཉི་ཟེར་ལྷན་དུ་ཤར་ས། །
བབས་ཆགས་འབྲོག་པའི་འཚོ་བ་སྐྱིད་ས། །
གཡང་ཆགས་རྟ་ནོར་ལུག་གསུམ་འཕེལ་ས། །
སྤྲིན་དཀར་སྟེང་དུ་གནས་པའི་ཆུ་དམར། །
ངོ་མཚར་སྙན་ཚིག་འབུམ་གྱིས་བསྟོད་དོ། །
འབྲོག་མོའི་སེམས་པ།
གཞས་ཚིག ཁམས་སྨྱུག་དུང་།
འུར་ཁྲ་རིང་ལག་ལ་ཐོགས་ནས། །
རྟ་ནོར་ལུག་རྐང་རྗེས་བསྙེགས་དུས། །
ང་བུ་མོའི་སེམས་པ་དབྱར་ཡིན། །
དབྱར་མེ་ཏོག་བཞད་སའི་སྤང་ཡིན། །
རྟ་འདོ་ལུའི་སྲབ་མདའ་བཟུང་ནས། །
སྒ་སྔ་རུའི་གོང་བ་མནན་དུས། །
ང་བུ་མོའི་སེམས་པ་དགུང་ཡིན། །
དགུང་འབྲུག་ཆུང་གྲགས་སའི་གཞི་ཡིན། །
ལུག་གཡང་དཀར་ལྷས་ལ་བསྐོར་ནས། །
འབྲི་མ་བུའི་ངུར་སྒྲ་ལྡིར་དུས། །
ང་བུ་མོའི་སེམས་པ་གངས་ཡིན། །
མ་གངས་དཀར་ལྷ་མོའི་མདངས་ཡིན། །
ཕ་ཨ་མྱེའི་གནའ་གཏམ་ཉན་བཞིན། །
མ་དྲིན་ཆེན་རྩིབ་ན་ཡོད་དུས། །
ང་བུ་མོའི་སེམས་པ་དྲོད་ཡིན། །
དྲིན་ཕ་མའི་སེམས་ཀྱི་དྲོད་ཡིན། །
རེ་ཆད།
གཞས་ཚིག ཁམས་སྨྱུག་དུང་།
གངས་དཀར་པོ་སྨུག་པས་མ་བཟུང་གོང་། །
སེང་དཀར་མོ་ཕེབས་ན་ཨ་རེ་བསམ། །
སེང་དཀར་མོས་གཡུ་རལ་མ་ངོམས་ན། །
གངས་སྨུག་པས་བཟུང་དང་མ་བཟུང་མེད། །
ནགས་རྒྱ་རྫོང་ལྡོང་ལོ་མ་འཐོར་གོང་། །
བྱ་ཁུ་བྱུག་ལྷོ་ནས་ཨེ་ཕེབས་བསམ། །
བྱ་ཁུ་བྱུག་ལྷོ་ནས་མ་ཕེབས་ན། །
ཤིང་ཡལ་ག་ཆག་དང་མ་ཆག་མེད། །
སྐད་ཡི་གེའི་ཟུངས་ཁྲག་མ་ཟད་གོང། །
དོན་དམ་པའི་རིན་ཐང་ཨེ་རྟོགས་བསམ། །
དོན་དམ་པའི་རིན་ཐང་མ་རྟོགས་ན། །
བོད་མི་རིགས་འགྱུར་དང་མ་འགྱུར་མེད། །
དེས་ཆོག
གཞས་ཚིག ཁམས་སྨྱུག་དུང་།
ཉི་མ་ཕེབས་ན་ཕེབས་ཆུག །
ཟླ་བ་བཞུད་ན་བཞུད་ཆུག །
ཕ་སྐད་གསེར་གྱི་སྐར་ཚོམས། །
མ་འཐོར་བྱུང་ན་དེའི་ཆོག །
ཆུ་བོ་སྐམ་ན་སྐམ་ཆུག །
འགྲམ་དར་ཆགས་ན་ཆགས་ཆུག །
དབྱངས་གསལ་དངུལ་དཀར་ཕྲེང་བ། །
ཕྲེང་ཐག་མ་ཆད་དེའི་ཆོག །
འཛུམ་མདང་ཡལ་ན་ཡལ་ཆུག །
ཟུངས་ཁྲག་བཞུར་ན་བཞུར་ཆུག །
ཡུལ་སྲོལ་འཚོ་བའི་རི་མོ། །
ཡལ་བ་མེད་ན་དེའི་ཆོག །
གླུ་རུ་ལོངས།
གཞས་ཚིག ཁམས་སྨྱུག་དུང་།
དབྱར་དྲུག་པ་གཡུ་ཡི་དག་ཞིང་རེད། །
སྦྲ་རོག་རོག་དྲན་པའི་ས་བོན་རེད། །
བྱ་ཁུ་བྱུག་མགྲིན་པ་སྙན་མོ་ཅན། །
སྦྲ་སྨུག་ཆུང་བདེ་སྡུག་གླུ་རུ་ལོངས། །
གངས་དཀར་པོ་དངུལ་གྱི་མཆོད་རྟེན་རེད། །
ཆོས་འབྲུ་དྲུག་ཕ་མའི་དད་འདུན་རེད། །
སེང་དཀར་མོ་གཡུ་རལ་ལྗང་ཁུ་ཅན། །
གངས་དཀར་པོའི་བདེ་སྡུག་གླུ་རུ་ལོངས། །
བོད་ཆོལ་གསུམ་ཆོས་ཀྱི་ཕ་ས་རེད། །
བྱམས་སྙིང་རྗེ་བསམ་བློའི་ཡང་སྙིང་རེད། །
སྐད་སེང་སེང་འབྲུག་ཆུང་གྲགས་ནི་ཚོ། །
བོད་ཁ་བའི་བདེ་སྡུག་གླུ་རུ་ལོངས། །
མི་སྒེར་རྩོམ་ཆོས་ཀྱི་བདག་དབང་།
གཞས་ཚིག་འདི་དག་ལ་བདག་པོ་ཡོད་པས། རྩོམ་པ་པོས་ཆོག་མཆན་མེད་པར་གང་འདོད་དུ་འཁྱེར་མི་ཆོག
༼མྱུ་གུའི་སྟོབས༽ཚང་གི་སྙན་ངག་སྤེལ་ཐེངས་ལེའུ།
ཆུ་དམར•མྱུ་གུ་སྟོབས་ཚང་གི་སྙན་ངག་སྤེལ་ཐེངས། ༼ ༡ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༢ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༣ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༤ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༥ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༦ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༧ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༨ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༩ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༠ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༡ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས།༼ ༡༢ ༽
ཆུ་དམར•མྱུ་གུའི་སྟོབསཚང་གི་སྙན་ངག་སྤེལ་ཐེངས། ༼༡༣༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༤༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༥༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༡༦ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼ ༡༧ ༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༨༽
ཆུ་དམར•མྱུ་གུའི་སྟོབས་ཚང་གི་སྙན་ངག་སྤེལ་ཐེངས། ༼༡༩༽
ཆུ་དམར་རྩོམ་རིག་འཕྲིན་སྟེགས།
ཡིག་སྒམ། 1659774550@qq.com
小说 ▏散文 ▏诗歌 ▏文学翻译 ▏文学评论
སྙན་ངག •ལོ་རྒྱུས། •ཆོས་ལུགས། •དཔྱད་རྩོམ། •བསྒྱུར་རྩོམ། •སློབ་གསོ། •གླུ་གཞས།
ཡིག་སྒམ། 1659774550@qq.com
扫码关注
能看到很多生活乐趣
▼ 点击下面语音，播放歌
འཕྲིན་སྟེགས་སུ་མི་སྒེར་རམ་ཚོགས་པ་གང་གི་ཁེ་དབང་ལ་གནོད་པའི་ནང་དོན་ཡོད་ཚེ་མྱུར་དུ་ང་ཚོར་འབྲེལ་གཏུག་བྱོས་དང་དྲ་ངོས་ནས་བསུབ་ངེས་ཡིན།
དེ་ནང་བཞིན་སྐུ་ཉིད་ཀྱི་སྙན་རྩོམ་དང་གླུ་གཞས་གསར་པ། པར་རིས་དང་རྩོམ་རིག་བརྩམས་ཆོས་སྤེལ་འདོད་ཚེ་རྩ་བའི་ཆ་རྐྱེན་ཆབ་སྲིད་དང་མི་འགལ་བའི་ཐོག་འོག་གི་འབྲེལ་ལམ་རྒྱུད་དེ་འབྲེལ་བ་བྱོས་དང་ཁྱེད་ཀྱི་འདོད་བློ་ལྟར་གང་ཐུབ་བྱ་ངེས།
