سۈرەتلەرنى بېسىپ كىنو كۆرۈشنى باشلىۋېتىڭ
بەيدۇ تورى خەۋىرى، نۇر تورى تەرجىمىسى:
يېقىندا تېسلانىڭ پاي باھاسىنىڭ زور دەرىجىدە ئۆرلىشىگە ئەگىشىپ، دۇنيادىكى بىرىنچى باي ئېلون ماسكنىڭ بايلىقى زور دەرىجىدە ئاشقان بولۇپ، خەۋەر قىلىنىشىچە، ئۇنىڭ شەخسىي ساپ مۈلكى تارىختىكى ئەڭ يۇقىرى رېكورتنى ياراتقان.
11-ئاينىڭ 22-كۈنى، تېسلانىڭ پاي باھاسى %3.8 ئۆسۈپ، ھەر بىر پاينىڭ باھاسى 352.56 ئامېرىكا دوللىرىغا يېتىپ، 2022-يىلى 4-ئايدىن بۇيانقى ئەڭ يۇقىرى سەۋىيە يارىتىلغان، ئومۇمىي بازار قىممىتى 1 تىرىليون 130 مىليارد دوللارغا يەتكەن. 11-ئاينىڭ 4-كۈنىدىن بۇيان، تېسلانىڭ پاي باھاسى جەمئىي %45 ئۆسكەن بولۇپ، بازار قىممىتى تەخمىنەن 350 مىليارد ئامېرىكا دوللىرى ئاشقان.
تېسلانىڭ خوجايىنى بولۇش سۈپىتى بىلەن، ماسك تەبىئىي ھالدا بۇ توكلۇق ئاپتوموبىل ماگناتىنىڭ پاي باھاسى شىددەت بىلەن ئۆرلىگەن ئەڭ چوڭ مەنپەئەتلەنگۈچىسى بولۇپ، ئۇنىڭ بايلىقى 2021-يىلى 11-ئاينىڭ بېشىدا ياراتقان رېكورتنى يېڭىلىغان، ئەينى چاغدا تېسلا پاي باھاسى تارىختىكى ئەڭ يۇقىرى سەۋىيىگە يەتكەن.
چۈشەندۈرۈپ ئۆتۈشكە تېگىشلىكى شۇكى، نۆۋەتتىكى ئاساسىي ئېقىمدىكى ئىككى خىل بايلىقنىڭ ئىستاتىستىكا سانلىق مەلۇماتىدا پەرق بار ئىكەن. بىلۇمبېرگ ئاگېنتلىقىنىڭ ئىستاتىستىكىسىغا ئاساسلانغاندا، ماسكنىڭ ھازىرقى شەخسىي ساپ مۈلكى 321 مىليارد 700 مىليون ئامېرىكا دوللىرىغا يەتكەن، فوربېس مىلياردېرلار كۆرسەتكۈچىدە بۇ سانلىق مەلۇمات 347 مىليارد 800 مىليون ئامېرىكا دوللىرى بولغان.
تېسلانىڭ پاي باھاسىنىڭ شىددەت بىلەن ئۆرلىشى ئاساسلىقى دونالد تىرامپنىڭ ئامېرىكا سايلىمىدا غەلىبە قىلغانلىقىدىن بولغان. ماسكنىڭ تىرامپنىڭ مۇھىم قوللىغۇچىسى ئىكەنلىكىنى كۆزدە تۇتۇپ، بازار تېسلاغا تىرامپنىڭ ئىككىنچى نۆۋەتلىك ۋەزىپە ئۆتەش مۇددىتىدىكى سىياسىتىدىن نەپ ئالىدىغانلىقىنى دەلىللىگەن.
بۇنىڭدىن ئىلگىرى ئاخبارات ۋاسىتىلىرىنىڭ خەۋەر قىلىشىچە، تىرامپنىڭ كوللېكتىپى توكلۇق ئاپتوموبىل ھەيدەش بەلگىلىمىسىنى بوشىتىشنى پىلانلىغان، بۇ تېسلا Robotaxi ئاپتوموبىلىغا پايدىلىق ئىكەن. باشقا خەۋەرلەردە ئېيتىلىشىچە، تىرامپ كوللېكتىپى بايدېن ھۆكۈمىتىنىڭ شەرتكە ئۇيغۇن كېلىدىغان توكلۇق ئاپتوموبىللارغا تەمىنلىگەن باج كەچۈرۈم قىلىشىنى ئەمەلدىن قالدۇرۇشنى ئويلىشىۋاتقان بولۇپ، بۇ ئوخشاشلا تېسلانى نەپكە ئېرىشتۈرىدىكەن، چۈنكى بۇ شىركەتنىڭ رىقابەتچىلىرى روشەن ھالدا بۇ سىياسەتكە تېخىمۇ تايىنىدۇ.
تېسلانىڭ پاي باھاسىنىڭ شىددەت بىلەن ئۆسۈشىدىن باشقا، ماسكنىڭ بايلىقىنىڭ ئېشىشى ئۇنىڭ قارمىقىدىكى باشقا ئىككى شىركەت بىلەن مۇناسىۋەتلىك ئىكەن.
دۇنيادىكى ئەڭ داڭلىق ئۈزۈكسىز ئىگىلىك تىكلىگۈچى بولۇش سۈپىتى بىلەن، ماسكنىڭ قارمىقىدا نۇرغۇن چولپان شىركەتلەر بار، تېسلادىن باشقا، يەنە ئالەم بوشلۇقى ئۈستىدە ئىزدىنىش تېخنىكا شىركىتى SpaceX، سۈنئىي ئىدراك شىركىتى xAI قاتارلىقلارنى ئۆز ئىچىگە ئالىدۇ.
ۋال سترېت كوچىسى گېزىتىنىڭ خەۋىرىگە قارىغاندا، xAI ئەڭ يېڭى بىر نۆۋەتلىك مەبلەغ يۈرۈشتۈرۈشتە 50 مىليارد دوللار مەبلەغ توپلىغان.
نۇرغۇن تاراتقۇلار SpaceXنىڭ ئىچكى قىسىمدىكى پاي چېكىنى سېتىشنى دەسلەپكى قەدەمدە مۇزاكىرە قىلىۋاتقانلىقىنى، ئۇنىڭ مۆلچەر قىممىتىنى 250 مىليارد دوللارغا يەتكۈزىدىغانلىقىنى خەۋەر قىلغان.
تىلغا ئېلىشقا ئەرزىيدىغىنى شۇكى، تېسلانىڭ پاي باھاسى يەنىلا 2021-يىلى 11-ئايدا يارىتىلغان تارىختىكى ئەڭ يۇقىرى نۇقتىدىن تەخمىنەن %14 تۆۋەن، بۇ ئېلون ماسكنىڭ بايلىقىنىڭ يەنە ئۆسۈش بوشلۇقى بارلىقىدىن دېرەك بېرىدىكەن.
