ཉེ་ཆར། མཚོ་སྔོན་གཞོང་ཐང་ཧུའེ་རིགས་ཧོར་རིགས་རང་སྐྱོང་རྫོང་ཁྲོན་ཁོའུ་མངགས་གཏོང་ཁང་ལ་ཁོངས་གཏོགས་ཁུལ་གྱི་མང་ཚོགས་ཀྲའོ་ཆེ་གེ་མོས་གྱོད་དོན་སྙན་གསེང་ཞུས་ནས“ཝང་ཆེ་གེ་མོས་སློབ་གྲྭའི་འཛིན་གྲྭའི་ཚོགས་པའི་ནང་གཞན་ལ་དམའ་འབེབས་བཏང་བས་ཞིབ་བཤེར་ཐག་གཅོད་བྱ་རྒྱུའི་རེ་བ་ཞུས་པ་ཡིན”ཞེས་བཤད། ཉེན་རྟོག་ལས་ཁུངས་ལ་གྱོད་དོན་སྙན་གསེང་དེ་འབྱོར་རྗེས། ཉེན་རྟོག་པས་མྱུར་དུ་བརྟག་དཔྱད་བྱས། 

  ཞིབ་བཤེར་བྱས་པ་བརྒྱུད། 2024ལོའི་ཟླ10པའི་ཚེས12ཉིན་གྱི་ཆུ་ཚོད19སྟེང་། ཝང་ཆེ་གེ་མོས་ཆང་འཐུངས་རྗེས“འཛིན་གྲྭའི་ཁྱིམ་བདག་རྗེས་རེས་ཚོགས་པའི”ནང་སྐད་འཕྲིན་གྱི་མ་ལག་ཆུང་ངུ་བརྒྱུད་དེ་བྱིས་པའི་སྦྱངས་འབྲས་ལ་བལྟས་ནས། བྱིས་པའི་སྦྱངས་འབྲས་ལ་བློ་ཡིད་མ་ཚིམ་པར་སྐད་འཕྲིན་ཚོགས་པའི་ནང་སློབ་ཚན་ཁག་གི་སྐར་གྲངས་སྤྱི་འབོར་གྱི་གནས་ཚུལ་འདྲི་རྩད་བྱས། དགེ་རྒན་གྱིས་ལན་སྤྲད་པའི་སྐར་གྲངས་སྤྱི་འབོར་དེ་མཐོང་རྗེས། ཝང་ཆེ་གེ་མོས་དགེ་རྒན་གྱིས་སྤེལ་བའི་ཆ་འཕྲིན་དང་བྱིས་པའི་བཤད་པའི་སྐར་གྲངས་གཉིས་མི་འདྲ་ས་རྒྱུ་མཚན་དུ་བྱས་ནས། ཚོགས་པའི་ནང་དགེ་རྒན་ལ་དམའ་འབེབས་གཏོང་བའི་སྐད་མང་པོ་བཏང་ནས་ཤུགས་རྐྱེན་ངན་པ་བཟོས། རྩར་གཅོད་བརྒྱུད་ཁྲིམས་འགལ་གྱི་བྱ་སྤྱོད་སྤེལ་མཁན་གྱིས་གོང་གསལ་གྱི་དོན་དངོས་སྦ་གསང་མེད་པར་ངོས་ལེན་བྱས་པ་རེད།  རྗེས་སུ། ཝང་ཆེ་གེ་མོས་རང་ཉིད་ངར་ལངས་པར་འགྱོད་པ་ཚད་མེད་སྐྱེས། ཁྲོན་ཁོའུ་མངགས་གཏོང་ཁང་གིས་ཁྲིམས་ལྟར་ཝང་ཆེ་གེ་མོར་སྲིད་འཛིན་བཀག་ཉར་ཉིན4ཡི་ཆད་པ་བཅད།

  མི་དམངས་ཉེན་རྟོག་པའི་གསལ་འདེབས། དྲ་རྒྱ་ནི་བཅའ་ཁྲིམས་སྟེང་ཚུད་མེད་པའི་གནས་གཞན་ཞིག་མིན་པས། མི་སུ་ཞིག་ཡིན་རུང་དྲ་རྒྱའི་ཁྲོད་ཀྱི་བྱ་སྤྱོད་ལ་ངེས་པར་དུ་བཅའ་ཁྲིམས་ཀྱིས་ཚོད་འཛིན་བྱེད་དགོས་པ་དང་། དྲ་རྒྱའི་སྤྱི་ཚོགས་འབྲེལ་འདྲེས་མཉེན་ཆས་སྤྱོད་མཁན་གྱིས་དྲ་རྒྱའི་སྟེང་གཏམ་བཤད་སྤེལ་སྐབས། རྒྱལ་ཁབ་ཀྱི་འབྲེལ་ཡོད་བཅའ་ཁྲིམས་དང་ཁྲིམས་སྲོལ་གྱི་གཏན་འབེབས་ལ་བརྩི་སྲུང་བྱས་ནས། གནས་སྐབས་སུ་ངར་ལངས་བ་དང་ཁ་རྩོད་བྱས་ནས་བཅའ་ཁྲིམས་ཀྱི་ཆད་པ་མི་ཕོག་པ་བྱེད་དགོས།