མཚོ་སྔོན་གྱིས་བྱེད་ཐབས་སྣ་མང་སྤྱད་ནས་མི་རིགས་ས་ཁུལ་གྱི་མང་ཚོགས་ཀྱི་སྨན་སྤྱོད་བདེ་འཇགས་ལ་འགན་སྲུང་བྱས།

ཟླ10པའི་ཚེས20ཉིན་མཚོ་སྔོན་ཞིང་ཆེན་སྨན་རྫས་ལྟ་སྐུལ་དོ་དམ་ཅུའུ་ཡིས་གནས་ཚུལ་ཡོངས་བསྒྲགས་བྱས་ནས་མི་རིགས་ས་ཁུལ་གྱི་མང་ཚོགས་ཀྱི་སྨན་སྤྱོད་བདེ་འཇགས་ཀྱི་མ་མཐའི་མཚམས་ཐིག་སྲ་བརྟན་དུ་གཏོང་ཆེད། ཞིང་ཆེན་སྨན་རྫས་ལྟ་སྐུལ་དོ་དམ་ཅུའུ་ཡིས་མི་རིགས་སྨན་རྫས་ཀྱི་སྤུས་ཚད་ཚད་ལྡན་ཅན་གྱི་མ་ལག་འཛུགས་སྐྱོང་འཐུས་ཚང་དུ་གཏོང་བ་དང་། མི་རིགས་སྨན་རྫས་ཀྱི་ཁྱོན་ཡོངས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། ལས་ཁུངས་ཀྱིས་མཉམ་དུ་སྐུལ་འདེད་གཏོང་བ་སོགས་ཀྱི་བྱེད་ཐབས་བརྒྱུད། མི་རིགས་སྨན་རྫས་ཀྱི་ལྟ་སྐུལ་དོ་དམ་ལ་ཤུགས་སྣོན་བརྒྱབ་ནས་མི་རིགས་ས་ཁུལ་གྱི་མང་ཚོགས་ཀྱི་སྨན་སྤྱོད་བདེ་འཇགས་འགན་སྲུང་ཏན་ཏིག་བྱས།

《མཚོ་སྔོན་ཞིང་ཆེན་གྱི་ས་གནས་སྨན་རྫས་ཚད་གཞིའི་ལམ་ལུགས་དང་བཟོ་བཅོས་ལས་ཀའི་གོ་རིམ》བཟོས་ནས་བཏོན་པ་དང་། བོད་སྨན་སྨན་རྩྭ་སྣ་ཁ67དང་སྨན་རྩྭ་སྣ་ཁ104ཡི་སྤུས་ཚད་ཚད་གཞི་བཟོ་བ་དང་བཟོ་བཅོས་རྒྱག་རྒྱུ་སྒྲིག་འཛུགས་བྱས་ནས་ཁྱབ་བསྒྲགས་བྱས་པ། 《མཚོ་སྔོན་ཞིང་ཆེན་གྱི་བོད་སྨན་སྨན་རྒྱུའི་ཚད་གཞི》དང《མཚོ་སྔོན་ཞིང་ཆེན་གྱི་སྨན་བཅོས་སྒྲིག་གཞིའི་སྨན་སྦྱོར་སྤུས་ཚད་ཚད་གཞི》པར་སྐྲུན་བྱས་པ། སྨན་བཅོས་སྒྲིག་གཞིའི་སྨན་སྦྱོར་བོད་སྨན་སྣ་ཁ415དང་། སོག་པོའི་སྨན་རྩྭ་སྣ་ཁ404བཟོ་ཐབས་ཀྱི་ཕྱོགས་སྟོན་ཞིབ་འཇུག་དང་རིགས་པས་ཁུངས་སྐྱེལ་བྱས་པ་མ་ཟད་ད་དུང་རྩོམ་སྒྲིག་ཀྱང་བྱས། ཞིང་ཆེན་གྱི་ཚན་རྩལ་ཆེད་དོན་རྣམ་གྲངས་གལ་ཆེན་ལ་བརྟེན་ནས་རྩ་ཆེའི་བོད་སྨན“བཙོ་ཐལ”གྱི་ཟུར་སྦྱོར་རྒྱུ་ཆའི་འབྱུང་ཁུངས་དང་། འདུལ་སྦྱོང་བཟོ་རྩལ། སྤུས་ཚད་ཀྱི་ཚད་གཞི་བཅས་ལ་བརྒྱུད་རིམ་ལྡན་པའི་སྒོ་ནས་ཞིབ་འཇུག་བྱས་པ་མ་ཟད། མཚོ་སྔོན་ཞིང་ཆེན་གྱི“བཙོ་ཐལ”དང་དེའི་ཟུར་སྦྱོར་རྒྱུ་ཆའི་སྤུས་ཚད་ཚད་གཞི་དང་འདུལ་སྦྱོང་ཚད་ལྡན་ཁྱབ་བསྒྲགས་བྱས་ནས་ལག་བསྟར་བྱས་པས་བོད་ལུགས་གསོ་རིག་དང་བོད་སྨན་རྒྱུན་འཛིན་དང་། གསར་གཏོད། འཕེལ་རྒྱས་བཅས་ལ་དངོས་ཡོད་ཀྱི་དོན་སྙིང་ལྡན།

མི་རིགས་སྨན་དེ་ལྟ་སྐུལ་དོ་དམ་ཁྱབ་ཁོངས་གཙོ་བོ་ནང་བཅུག་ནས་སྨན་རྫས་ཐོན་སྐྱེད་ཁེ་ལས་དང་སྨན་བཅོས་སྒྲིག་གཞིའི་སྨན་སྦྱོར་ལས་ཁུངས་ཀྱི་ལྟ་སྐུལ་དང་ཞིབ་བཤེར་གཉིས་ཀར་ཁྱབ་རྒྱུ་མཐའ་འཁྱོངས་དང་། སྨན་རྫས་ཐོན་སྐྱེད་ཁེ་ལས་ཀྱིས་ཐོ་འགོད་སྙན་སེང་གསར་པ་དང་ནད་ཐོག་སྨན་བཅོས་ཀྱི་སྤྱོད་ཚད་ཆེ་བའི་སྨན་བཅོས་སྒྲིག་གཞིའི་སྨན་རྫས་རིགས་ལ་ལོར་འཐེན་བཤེར་བྱེད་ཚད100%ཁྱོན་ཡོངས་ལ་ཁྱབ་རྒྱུ་མཐའ་འཁྱོངས་བྱ་རྒྱུ་རེད། ད་ལོ་ནས་བཟུང་ལོ་ལྟར་ཀྲུང་བོད་ལུགས་སྨན་རྫས་སྣ་ཁ3བཀོད་སྒྲིག་བྱས་ཏེ་ཞིང་ཆེན་རིམ་པའི་འཚོལ་ཞིབ་རང་བཞིན་གྱི་ཞིབ་འཇུག་བྱས་ནས་ཉེན་ཁ་དང་མངོན་མེད་རྐྱེན་ངན་ཤེས་རྟོགས་དང་ལྟ་སྐུལ་དོ་དམ་གྱི་སྐྱོན་ཆ་བཀག་འགོག་བྱས།

ཞིང་ཆེན་འཕྲོད་བསྟེན་བདེ་ཐང་ཨུ་ལྷན་དང་ཞིང་ཆེན་སྨན་བཅོས་འགན་སྲུང་ཅུའུ་སོགས་ལས་ཁུངས་དང་མཉམ་དུ་བོད་དང་འབྲེལ་བ་ཡོད་པའི་ས་ཁུལ་གྱི་སྨན་ཁང་ནང་གི་སྨན་སྦྱོར་སྨན་གྱི་མིང་དང་། ལག་རྩལ་གྱི་ཐ་སྙད། བོད་སྐད་དུ་བསྒྱུར་བའི་ལག་རྩལ་གྱི་ལག་དེབ《མཚོ་སྔོན་ཞིང་ཆེན་གྱི་བོད་སྨན་སྨན་སྦྱོར་གྱི་ཀུན་འཕྲོད་མིང་གི་ཡིག་སྒྱུར་མཛུབ་ཁྲིད་རྩ་དོན(ཚོད་ལྟའི་ལག་བསྟར)》ཐོག་མར་བཏོན་ནས་ཡིག་སྒྱུར་གྱི་ཚད་གཞི་གཅིག་གྱུར་དང་སྨན་སྦྱོར་གྱི་མིང་ཚད་ལྡན་དུ་བཏང་། ཞིང་ཆེན་ནགས་ལས་དང་རྩྭ་ཐང་ཅུའུ་སོགས་ལས་ཁུངས་དང་མཉམ་དུ་མཚོ་སྔོན་ཞིང་ཆེན་གྱི་སྤུས་ལེགས་ཀྱི་ཀྲུང་བོད་ལུགས་སྨན་རྒྱུ(མཚོ་སྔོན་གྱི་ཀྲུང་བོད་ལུགས་ཀྱི་སྨན་རྒྱུ་སྣ་ཁ་བཅོ་བརྒྱད། )ཐུན་མོང་ཐོག་གཏན་འཁེལ་དང་ཁྱབ་བསྒྲགས་བྱས་ནས། སྤུས་ལེགས་སྨན་རྒྱུའི་ཐོན་ཁུངས་རྒྱུན་མཐུད་བེད་སྤྱོད་ཐུབ་པའི་འགན་སྲུང་བྱས་པ་དང《མཚོ་སྔོན་གྱི་སྤུས་ལེགས་སྨན་རྒྱུའི་དཀར་ཆག》པར་སྐྲུན་བྱས།《མཚོ་སྔོན་ཞིང་ཆེན་གྱི་སྨན་བཅོས་སྒྲིག་གཞིའི་སྨན་རྫས་ལྟ་སྐུལ་དོ་དམ་ལག་དེབ》དང《མཚོ་སྔོན་ཞིང་ཆེན་གྱི་སྨན་བཅོས་སྒྲིག་གཞིའི་སྨན་རྫས་ཕྱོགས་བསྒྲིགས》(དེབ་དང་པོ་དང་གཉིས་པ)རྩོམ་སྒྲིག་བྱས་ནས་གཞི་རིམ་གྱི་ལྟ་སྐུལ་དོ་དམ་ལ་ཡོ་བྱད་ལག་དེབ་མཁོ་འདོན་བྱས་ཏེ་གཞི་རིམ་གྱི་ལྟ་སྐུལ་དོ་དམ་གྱི་ཕན་ནུས་རྒྱུན་ཆད་མེད་པར་ཆེ་རུ་ཕྱིན་ཡོད།

ཡོང་ཁུངས། མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།

ལོ་ཙཱ་བ། གཡང་སྐྱིད།

རྩོམ་སྒྲིག་པ། གཡང་སྐྱིད།