گۈزەل ھايات 9-بۆلۈم 10-قىسىم _ئەپسۇس

10-قىسىم

ئەپسۇس...

رەشىدە ئۆزىنى دىلنارنىڭ ئەمدىلا قايتىپ كەلگەنلىكىگە، ئىنىسىگە ئانچە كۆڭۈل بۆلمەيدىغانلىقىغا قايىل قىلدى. ھەم مۇيەسسەر ھامىلىدار بولۇپ قالغان تەقدىردىمۇ، ئۇنىڭغا نىسبەتەن بۇ كۆڭۈل بۆلۈشكە ئەرزىگۈدەك ئىش ئەمەس. دەپ ئويلاپ ئۆزىگە تەسەللى بەردى.

لېكىن،شۇنچە قىلسىمۇ  كۆڭلىدىكى ئەنسىزلىك پەقەت توختىمىدى.

دىلنار ياسالمىلىق قىلغان تەقدىردىمۇ،  بۇنداق ئاددىيلا مۇئامىلە قىلسا بولمايدۇ - دە.

بەلكىم رەشىدەنىڭ دىققەت نەزىرىنى سېزىپ قالغان بولسا كېرەك، دىلنارنىڭ كۆزى  ئۇدۇل رەشىدەگە تىكىلدى.

تۇيۇقسىز پەيدا بولغان سوغۇق كۆزلەر  رەشىدەنى يېنىك ئەندىكتۈرۈپ، سوغۇق شامال، پېشانىسىگە ئۇرۇلدى.

ئۇ دەرھال نەزىرىنى باشقا يەرگە يۆتكىدى،  يۈرىكى توختىماي تېز سوقۇپ كەتتى.

دىلنارنىڭ  بىر قېتىم قاراپ قويۇش بىلەنلا  ھودۇقۇپ كاللىسى قالايمىقانلىشىپ كەتتى.

دىلنار يېنىك كۈلۈمسىرەپ قويدى، بىر جۈپ زېرەك كۆزلىرىدىن سۇس كىنايە چىقىپ تۇراتتى.

رەشىدە جىددىيلەشكىنىدىن شۆلگىيىنى يۇتۇپ،  :

- ئاپا، مۇيەسسەر ھەدىنىڭ ھامىلىدار بولۇپ قالغانلىقىنى بىلگەندىن كېيىن، بۇ ئىشنى ئەمدى كېچىكتۈرۈشكە بولمايدۇ، بولمىسا بىز ھازىرلا بېرىپ ئۇنى قايتۇرۇپ كېلەيلى... مېنىڭچە، ۋاقتى كەلگەندە داداممۇ چوقۇم خۇش بولىدۇ. - دېدى.

ئايرۇس بېشىنى كۆتۈرۈپ رەناغا قاراپ :

-  توغرا ، بالدۇرراق قايتۇرۇپ كېلىشىمىز كېرەك... ئاپا، سىزنىڭچە... - دېدى. 

رەنا ئەلۋەتتە بىرىنچى بولۇپ مۇيەسسەرنى قايتۇرۇپ كېلىشنى ئويلايدۇ.

نۇردۇنمۇ ئۇنىڭ ئالدىدا شۇنچە يىل مۇرەسسە قىلغاندىن كېيىن، ئۇمۇ  نۇردۇنغا قانائەتلىنەرلىك جاۋاب بېرىشى كېرەك.

بۇنىڭدىن كېيىن، ئۇ بۇ ئىش ئۈچۈن غەم قىلمىسىمۇ بولىدىغان بولدى.

ئۇنىڭ ئۈستىگە، ئۇلارنىڭ ئائىلىسىنىڭ ئەۋلادلىرى تەبىئىي ھالدا ئەڭ ياخشى مۇئامىلىگە ئېرىشىشى كېرەك.

رەنا بېشىنى لىڭشىتىپ ئورنىدىن تۇرۇپ:

- ئۇنى قايتۇرۇپ كېلىش ھەقىقەتەن زۆرۈر، بۇ قېتىم  ئۆزۈم باراي! - دېدى. 

ئۇنىڭ ئايال خوجايىنلىق سالاپىتىنى بىر يانغا قايرىپ قويۇپ، مۇيەسسەرگە ئىپادە بىلدۈرىدىغان ۋاقىتى بولدى.

شۇنچە يىللاردىن بېرى نۇردۇنغا ھېچقانداق نام-ئاتىقى يوق ئەگىشىپ، نۇرغۇن پىتنە-پاساتلارغا ئۇچراشتىن خالىي بولماي كەلدى.

ئايرۇس كۈلۈپ تۇرۇپ:

-  ھاۋا سوغۇق، مەن بارساملا بولدى.  - دېدى.

رەنا قولىنى كۆتۈرۈپ ئۇنىڭ گېپىنى توسۇپ:

- بۇ قېتىم يەنىلا ئۆزۈم باراي. بولمىسا خاتىرجەم بولالمايمەن!  - دېدى.

ئايرۇسمۇ باشقا گەپ قىلمىدى.

ئەمما خۇپىيانە ھالدا ئىككى قولىنى چىڭ سىقىمدىدى.

- دىلنار، بىللە بارامسىز؟ - دېدى رەنا.

دىلنار قەلەمنى ئاستا قويۇپ:

-  بۇ خۇشاللىق ئىش بولغاندىكىن، تەبىئىي ھالدا خۇشال بولۇشىمىز كېرەك، - دېدى. 

ئايرۇس بىلەن رەشىدە بىر-بىرىگە قارىشىپ قويدى، چىرايى  ئانچە چىرايلىق ئەمەس ئىدى.

رەنا ناھايىتى خۇش بولۇپ، بېشىنى بۇراپ زەرىفەگە ماشىنا ئورۇنلاشتۇرۇشنى تاپىلىدى.

زەرىفە كەينىگە بۇرۇلۇپ ماڭماقچى بولغاندا، رەنا زەرىفەنى چاقىرىپ:

- ھە راست، زەرىفە،  ئادەم ئورۇنلاشتۇرۇپ قەسىردىن بىر يۈرۈش ياتاق ئۆينى تازىلىتىپ قويۇڭ، مۇيەسسەرنى بىۋاسىتە مۇشۇ يەرگىلا ئېلىپ كېلەي. - دېدى. 

ئايرۇسنىڭ چىرايى سەل ئۆزگىرىپ:

- ئاپا، ئۇ نېمىسىگە...  بۇنداق قىلسىڭىز قائىدىگە ئۇيغۇن كەلمەيدۇ، مەن ئۇنىڭ ھالىدىن ياخشى خەۋەر ئالالايمەن... - دېدى. 

 گەپنىڭ سەتىنى قىلغاندا،  مۇيەسسەرنى سەھنىگە چىقالمايدىغان  ئاشنا ياكى توقال دەپ قاراشقا بولىدۇ، ئايرۇس ئەينى چاغدا ھامىلىدار بولغاندىمۇ، چوڭقورۇقتا كۆپ تۇرمىغان، مۇيەسسەر  نېمىسىگە قەسىردە تۇرىدۇ؟... 

رەنا ئۇنىڭغا گۇمان بىلەن تىكىلىپ:

- سىز ماڭا قائىدە سۆزلەۋاتامسىز؟  - دېدى.

ئايرۇس دەرھال قېتىپ قېلىپ:

- ياق... مەن - دېدى.

- ئاپا، چوڭ قورۇقتىكىلەر مۇيەسسەر ھەدىنىڭ ھالىدىن تېخىمۇ ياخشى خەۋەر ئالالايدۇ، سىزمۇ... بەك كۆپ كۈچ سەرپ قىلىپ كەتمەيسىز، ھەر ئىككى تەرەپ تەڭ مەنپەئەتلىنىدىغان ئىشقا قارشى تۇرۇشىڭىزنىڭ  ھاجىتى يوق.  - دېدى رەشىدە.

ئايرۇس غەزەپلىنىپ:

-  سىز نېمىنى بىلىسىز؟ بىر ھامىلىدار ئايالنىڭ قانچىلىك نازۇكلىشىپ كېتىدىغانلىقىنى بىلەمسىز؟ قەسىردە ئۇنىڭ ھېچقانداق ئىشى يوق، لېكىن ھېرىپ كېتىدىغىنى مومىڭىز بولىدۇ... - دېدى. 

-بۇنداق ئىشقا مەن قانچە ھېرىپ كەتسەم شۇنچە ياخشى دەپ ئويلايمەن. بولدى، بۇ  مەسلىھەتلەشكۈدەك ئىشمۇ ئەمەس، زەرىفە سىز دەرھال ئورۇنلاشتۇرۇڭ.   - دېدى رەنا.

- بولىدۇ، - دېدى زەرىفە. 

ئايرۇسنىڭ چىرايى سەتلىشىپلا كەتتى.

لېكىن باشقا گەپ قىلمىدى.

رەنا گەپنى ئۈزۈگەندىن كېيىن، ئۇ ھەرقانچە كۆپ سۆزلىسىمۇ، ھېچنېمىنى ئۆزگەرتەلمەيلا قالماستىن، يەنە رەنانى ئۆزىدىن تېخىمۇ بىزار قىلىپ قويىدۇ.

رەنا ئالدى بىلەن كۇتۇپخانىدىن چىقتى، ئېنىقلا تاقەتسىزلىنىپ تۇراتتى.

رەشىدە ئارقىدىنلا مېڭىپ، كۆڭۈل قويۇپ مومىسىنى يۆلىدى.

دىلنار سەل تەسلىكتە ئورنىدىن تۇرۇپ، يېنىدىكى چاقلىق ئورۇندۇقتا ئولتۇردى.

توكلۇق چاقلىق ئورۇندۇق ئاستا ـ ئاستا ئىشىك سىرتىغا قاراپ سۈرۈلدى.

ئايرۇس ئۇنىڭ بىلەن يالغۇز قېلىشنى خالىماي، بالدۇرراق ماڭماقچى بولدى، لېكىن بىر نەچچە قەدەم ماڭمايلا، دىلنارنىڭ ئاۋازى ئاڭلاندى.

- قانداق؟ ئايرۇس، سىز مېنىڭ ئىككى پۇتۇمنىڭ قانداق مېيىپ بولۇپ قالغانلىقىنى بىلمەي قالمايسىزغۇ دەيمەن؟ - دېدى. 

ئايرۇس نېمە دېيىشىنى بىلەلمەي بۇرۇلۇپ ئۇنىڭغا قاراپ:

-  دىلنار، بۇ نېمە دېگىنىڭىز؟  - دېدى.

دىلنار   ئۇنىڭغا قارىدى،  كۆزلىرىدىن كىنايە چىقىپ تۇراتتى:

- ھازىر پەقەت ئىككىمىزلا قالدۇق، سىز يەنە  خۇپسەنلىك قىلماقچىمۇ؟- دېدى . 

ئايرۇسنىڭ بەدىنى تىترەشكە باشلىدى.

- سىز شان-شەرەپ ۋە بايلىقتىن بەھرىمەن بولسىڭىز بولىدۇ، مەن ئەينى يىلىدىكى  بىر جۈپ بىلەزۈكنى  چىن كۆڭلۈمدىن چىقىرىپ بەرگەن، لېكىن مەن ئۆيۈمگە بالدۇرراق قايتىپ كەلسەممۇ،  ئوخشاشلا سىزگە پەرۋا قىلماي ئولتۇرمايتتىم. سىز مەندىن يوشۇرۇن بو چوڭ ئائىلىگە  كىرىپ، بىر تەرەپتىن ماڭا تەۋە نەرسىلەردىن ھۇزۇرلانغاچ، يەنە بىر تەرەپتىن مېنى يوقاتماقچى بولدىڭىز ؟ - دېدى دىلنار. 

ئايرۇس كەينىگە ئىككى قەدەم داجىدى، چىرايى تاتىرىپ:

- مەن سىزنىڭ نېمە دەۋاتقانلىقىڭىزنى راستتىنلا بىلمىدىم... مەن قانداقسىگە ئۇنداق ئىشنى قىلاي... - دېدى. 

دىلنار كۆزىنى قىسىپ، چاقلىق ئورۇندۇق بىلەن ئايرۇسنىڭ يېنىدىن ئاستا ئۆتۈپ كەتكەچ :

- ئۆزىڭىز قىلغان ئىشنى باشقىلار بىلمەيدۇ دەپ قالدىڭىزمۇ؟ بۇرۇنلا يوچۇق قالدۇرۇپ قويدىڭىز،  نېمىشقا مېنىڭ ئالدىمدا  يەنە ياسالمىلىق قىلىسىز؟ ئۇنداق بولسا ئۆزىڭىزنى تېخىمۇ كۈلكىلىك ئورۇنغا چۈشۈرۈپ قويمامسىز...  ئويلاپ بېقىڭ، شۇنچە يىللاردىن بېرى مېنى  كۆزدىن يوقىتىش ئۈچۈن، زادى قانچىلىك ئادەمنىڭ جېنىغا زامىن بولدىڭىز؟ ھېچ بولمىغاندا، كېرەم ئائىلىسىنىڭ چوڭ خانقىزى  ئۆز نەۋرە سىڭلىڭىزنىڭ قىزىغۇ، ئۇ نېمە ئۈچۈن مۇشۇنداقلا ياشلا كېتىپ قالىدۇ، ئويلىنىپ باقتىڭىزمۇ؟  - دېدى.

ئايرۇس    ۋەھىمىگە تولغان يۈرىكىنى مەجبۇرى  بېسىۋالماقچى بولۇپ:

- ئۇ  ئۇنىڭ جاھىللىقىدىن بولغان،  مەن بىلەن ئالاقىسى يوق. ئۇ... گەرچە ئۇنىڭ  بىلەن قانداشلىق مۇناسىۋىتىم  بولسىمۇ، لېكىن ئۇنىڭ قىلغان-ئەتكەنلىرىنىڭ مەن بىلەن مۇناسىۋىتى يوق، سىز ماڭا  ھەممىڭلارنىڭ تىلى بىر دېگەندەك گەپنى قىلماڭ... - دېدى.

دىلنار ئالدىغا ماڭغان چاقلىق ئورۇندۇقنى توختىتىپ، ئاندىن بۇرۇلۇپ ئۇنىڭغا قاراپ:

- ئەگەر سىز ئەينى يىلى شەخسىيەتچىلىك بىلەن بۇ قەدەمنى خاتا بېسىپ، مېنىڭ سالاھىيىتىمنى ئىگەللىۋېلىپ، ئاپام بىلەن 30 نەچچە يىل ئايرىلىپ، ئاران جەم بولۇشىمىزغا سەۋەبچى بولمىغان بولسىڭىز، بەلكىم مەن بىر چىشلەم گۆش يېسەم، سىزنىڭ نېسىۋىڭىزمۇ كەم بولماسلىقى مۇمكىن ئىدى. لېكىن ھازىر... - دېدى. 

ئۇ بىردەم تۇرۇۋالغاندىن كېيىن، ئايرۇسنىڭ چىرايىدىن سۈرلۈك قىياپەتنى كۆرۈپ،  كۈلۈپ كېتىپ:

- ئايرۇس، مەن ھازىر قايتىپ كەلگەندىكىن، سىزنىڭچە بۇ يەردە يەنە  سىزنىڭ ئورنىڭىز  بولامدۇ؟ - دېدى. 

ئايرۇسنىڭ كۆكرەك بوشلۇقى ئېگىز-پەس كۆتۈرۈلۈپ پەسىيىپ:

- قايتىپ كەلسىڭىز يەنە نېمە بولماقچىتى؟  خانقىز بولمىسام نېمە بوپتۇ؟ ! مېنىڭ خانقىزلىق سالاھىيىتىمدىن باشقا، مەن يەنىلا بۇ ئائىلىنىڭ كېلىنى.  ئاكىڭىزنىڭ ئايالى! - دېدى.

دىلنار سوغۇق كۈلۈپ تۇرۇپ:

- باشتىن-ئاخىر  ئىگە بولغىنىڭىز پەقەت بىر نام - ئاتاق خالاس.  - دېدى.

ئايرۇس كۆزلىرىنى چەكچەيتىپ:

- سىز...  مېنى تەكشۈردىڭىزمۇ. - دېدى. 

دىلنار چاقلىق ئورۇندۇقنى ئىتتىرىپ سىرتقا قاراپ مېڭىپ:

- سىزنىڭ ئۇ ئىشلىرىڭىزنى يەنە تەكشۈرۈش كېتەمدۇ؟ سىز ھەقىقەتەن بۇ بىر نەچچە يىلدىن بۇيانقى ئەتىۋارلىق خانقىزلىق تۇرمۇشىڭىزدىن خۇشال بولۇشىڭىز كېرەك. بولمىسا ... باشقىلارنىڭ سىزگە قانداق مۇئامىلە قىلغۇسى كەلسە، بۇ بەك ئاسان ئىش.  

ئەپسۇس، سىزنىڭ خانقىزلىق سالاھىيىتىڭىز يوق بولدى، بۈگۈنكى كۈندە، ھەتتا    كېلىنىلىك سالاھىيىتىڭىزنىمۇ يوقىتىپ قويۇشىڭىز مۇمكىن ... - دېدى.

ئايرۇس بۇ گەپنى ئاڭلاپ ھاڭۋىقىپ قالدى-دە، تېز قەدەم بىلەن ئۇنىڭ ئالدىغا ئۆتۈپ، يولىنى توسۇپ:

- بۇ نېمە دېگىنىڭىز؟ مەن ھەتتا  بۇ ئائىلىنىڭ كېلىنىلىك ئورنىدىنمۇ ئايرىلىپ قالىمەنمۇ؟ بۇ نېمە دېگىنىڭىز؟ - دېدى. 

دىلنار ئۇنىڭغا سوغۇق نەزەردە قاراپ:

-  بۇلارنىڭ ھەممىسىنى ئۆزىڭىز جىم يۈرمەي تاپتىڭىز ئەمەسمۇ؟ - دېدى. 

ئايرۇسنىڭ قوشۇمىسى چىڭ  تۈرۈلۈپ ھۈررەك بولۇپ قالدى.

دىلنار سوغۇققىنە دىمىقىقى قېقىپ كۈلۈپ قويدى.

ئۇنىڭ كۈلكىسى بىلەن ئايرۇسنىڭ خاتىرجەمسىزلىكى بارغانسېرى چوڭقۇرلىشىپ  ئاۋازىنى پەسەيتىپ:

- سىز...  سىز زادى نېمىنى بىلىسىز؟ !  - دېدى ئاخىرى چىداپ تۇرالماي .

دىلنارنىڭ چىرايىدىكى كۈلكە بارغانسېرى كۈچىيىپ:

-  ئانا-بالا ئىككىڭلارنىڭ رول ئېلىش ماھارىتىڭلارنىڭ ياخشىلىقىنى بىلدىم، ناھايىتى ياخشى ماسلاشتىڭلار. شۇنچە يىللاردىن بېرى ئاپامنىڭ مىجەزىنى شۇنچە ئېنىق بىلىپ ھەم ئۇنىڭدىن ناھايىتى ياخشى پايدىلىنىپ كەپسىلەر،  مەنمۇ ئۇنىڭدىن ئاغرىنمايمەن. - دېدى. 

ئىككىيلەننىڭ مانا مۇشۇنداق ئۇچۇق - ئاشكار پاراڭلاشقانلىقىدىن دىلنار مەلۇم جەھەتتىن ئېيتقاندا ناھايىتى خۇش ئىدى.

چۈنكى ئايرۇس بىلەن ئىككىسى ئەزەلدىن بىر - بىرىنىڭ ئالدىدا ساختىپەزلىك قىلىدىغان ئادەملەر ئەمەس.

گەرچە ئوت بىلەن سۇدەك  بىر-بىرى بىلەن چىقىشالمىسىمۇ، ئىككى ئادەم ئوچۇق-يورۇق ھالدا تىغمۇتىغ قارشىلاشسا بولىدۇ.

دىلنارنىڭ سۆزى ئايرۇسنى قاتتىق قورقۇتىۋەتتى،   رەشىدە بىلەن ئويۇن قويغانلىقىنى بىلىۋاپتۇ...

ئۇ دىلنارغا يەنە بىر قەدەم يېقىنلىشىپ، كۆزلىرى تېخىمۇ قىزىرىپ:

- سىز زادى نېمىنى بىلىسىز؟ !   - دەپ سورىدى، تەلەپپۇزى تېخىمۇ  ئېغىرلاشتى، ئاڭلىماققا چوقۇم تېخىمۇ كونكرېت ئەھۋالنى بىلىشى كېرەكتەك قىلاتتى.

دىلنارنىڭ چىرايىدىن كۈلكە ئۈزۈلمەي:

- مېنىڭ بىلىدىغىنىم، سىلەرنىڭ بۈگۈنكى ئويۇنىڭلارنىڭ مەقسىتى ؟ سىلەرنىڭ نېمە قىلماقچى ئىكەنلىكىڭلارنى مەن ھەرقانچە ئېنىق بىلسەممۇ سىلەردىن ئېنىق بىلمەيمەن شۇنداق ئەمەسمۇ؟ مېنى مۇشۇنداق ھەيۋە بىلەن قىستاپ سوراۋەرگەندىن، نېمىشقا ئۆزىڭىزدىن زادى نېمە قىلماقچى ئىكەنلىكىڭىزنى سوراپ باقمايسىز؟  - دېدى.

ئايرۇسنىڭ لەۋلىرى تاتىرىپ، ئۆزىنى تۇتۇۋالالماي تىترەپ كەتتى.

ئۇ دىلنارغا تىكىلىپ قاراپ، چىرايىدىن بىرەر يىپ ئۇچىنى تاپماقچى بولدى، ئەمما ئۇنىڭ كۈلۈمسىرىگەن چىرايى تېخىمۇ جىلە قىلىۋەتتى.

ئۇ قانداقسىگە بىلىدۇ؟ چوقۇم  ئالداۋاتىدۇ!

ئالاقزەدە قىلىپ، پىكىر يولىنى  قالايمىقان قىلماقچى!

ئانا - بالا ئىككىسى نېمە قىلماقچى بولغانلىقىنى، دىلنار قانداقمۇ پەرەز قىلالايدۇ!

بىراق، ئايرۇس پەقەت خاتىرجەم بولالمىدى.

دىلنار ئۇنى  ئىچى - ئىچىدىن قاتتىق قورقتىۋەتتى.

- ئىككىڭلار نېمە توغرىلىق پاراڭلىشىۋاتىسىلەر؟  - رەنانىڭ ئاۋازى تۇيۇقسىز ئاڭلاندى، ئايرۇسنىڭ كۆزلىرى تۇيۇقسىز قىسىلىپ چاقناپ كەتتى.

كۆزلىرىدىكى يامان نىيەت ھەش-پەش دېگۈچە يوقاپ:

- ھېچ ئىش يوق، پەقەت دىلناردىن بەزى ئىشلارنى سوراپ جەزملەشتۈرىۋاتىمەن.  - دېدى.

ئايرۇس كۈلۈپ تۇرۇپ چۈشەندۈرگەن بولسىمۇ، رەنا دىلنارغا قارىدى.

دىلنار سۇس كۈلۈپ قويۇپ :

- ھەقىقەتەن مەن بىلەن  بەزى ئىشلارنى جەزملەشتۈردى. - دېدى. 

 گەپ قىلىۋاتقاندا، ئايرۇس دىلنارنىڭ كەينىگە كېلىپ، ئۇنىڭ چاقلىق ئورۇندۇقىنى تۇتۇپ، مۇناسىۋىتى ياخشى دوستلاردەك  ئىتتىرىپ ماڭدى.

دىلنار قوشۇمىسىنى تۈردى، نەزەر دائىرىسى رەنانىڭ يۈزىدە بىر ئاز تۇرۇپ قالدى، ئاخىرىدا چىرايى تاتارغان ھالدا بېشىنى بۇرىدى.

رەشىدە گۇمان ۋە خاتىرجەمسىزلىك بىلەن دىلنارغا قاراپ قويۇپ، رەنانى يۆلەپ ماشىنا تەرەپكە قاراپ ماڭدى.

قورۇققا بېرىش يولىدا، ئايرۇس بىلەن رەشىدە ئانا - بالا ئىككىسىنىڭ كۆڭلى جايىدا بولمىدى.

يەنە بىر تەرەپتە رەنا بىلەن دىلنار يول بويى پاراڭلاشتى، ئەڭ كۆپ سۆزلەشكىنى يول بويىدىكى تەرەققىيات ۋە ئۆزگىرىشلەر بولدى، ئىلگىرى قانداقتى، ھازىر قانداق بولدى، كېيىن قانداق بولىدۇ دېگەنلەرنى سۆزلەشتى.

يېرىم يولدا، رەنا تۇيۇقسىز:

- قارىغاندا بىز دىلارەگە يېتىشەلمەيدىغان ئوخشايمىز. ئۇ مۇيەسسەر بىلەن نۇردۇننى كۆرسە تونۇيالارمۇ؟ - دېدى.

- موما، قورۇققا بارىدىغان يېقىن يولىمىز بارلىقىنى ئۇنتۇپ قالدىڭىزمۇ؟ بولمىسا بىز يېقىن يول بىلەن بارايلى، بەلكىم دىلارە ئاچامغا يېتىشەلىشىمىز مۇمكىن.  - دېدى رەشىدە .

رەنا بېشىنى چايقاپ:

- يېقىن يولنىڭ بىر بۆلىكى ئوڭغۇل-دوڭغۇل، ھاممىڭىزنىڭ پۇتى بىئارام بولۇپ قالىدۇ، يەنىلا چوڭ يولدا ماڭايلى، قورۇقتا كۆرۈشسەكمۇ بولىدۇ. بۇنچىلىك ۋاقىتقا پەرۋا قىلمىساقمۇ بولىدۇ، - دېدى.

ئايرۇس رەشىدەگە بىر قاراپ قويدى، رەنا بىلەن دىلنارنىڭ پاراڭلىشىۋاتقانلىقىنى جەزملەشتۈرگەندىن كېيىن،  پەس ئاۋازدا:

-نېمە قالايمىقان گەپ قىلىپ يۈرىسىز؟! دادىڭىز دائىم يېقىن يولدىن مېڭىشقا ئادەتلەنگەن، ئەگەر ۋاقتى كەلگەندە ئۇنىڭ بىلەن ئۇچرىشىپ قالساق قانداق قىلىسىز؟ !   - دېدى.

- ھېچقىسى يوق، مومام ئۇ يولدا ماڭمايدۇ، - دېدى رەشىدە كۈلۈپ تۇرۇپ. 

ئايرۇس يەنىلا ئۇنىڭغا چەكچىيىپ:

-  بىكاردىن بىكار  بۇنى تىلغا ئېلىپ نېمە قىلىسىز؟  - دېدى.

- ئەگەر ۋاقتى كەلگەندە مومام بۇ نۇقتىنى ئويلاپ قالسىمۇ، بىزدىن گۇمانلانمايدۇ، - دېدى رەشىدە . 

ئايرۇس باشقا گەپ قىلمىدى.

رەشىدە يەنە سۆزىنى داۋاملاشتۇرۇپ:

- قورۇقتىكى ئادەملەرنىڭ ھەممىسىنى ئورۇنلاشتۇرۇپ بولدىڭىزمۇ؟ ۋاقتى كەلگەندە بىرەر تاسادىپىيلىق بولۇپ قالماس؟ - دېدى. 

ئايرۇس ئۇنىڭغا ئالىيىپ قاراپ قويۇپ، گەپ قىلمىدى، لېكىن جاۋابى تېخىمۇ ئېنىق بولدى.

رەشىدە كۈلۈپ قويۇپ، ئايرۇسنىڭ قولىنى تۇتتى.

ئايرۇسمۇ كۈلۈپ قويدى.

ئۇلارنىڭ نېمىلەرنى پىلانلاپ، نېمىلەرنى ئويلاۋاتقانلىقىنى بىر ئۆزى بىلىدۇ.