مانا بۇنى سۆيۈش 2-بۆلۈم 41-قىسىم_ تۆھمەت كۆتۈرىدىغان ئادەم بار

41-قىسىم 

 تۆھمەت كۆتۈرىدىغان ئادەم بار (1)

زىلالە ئىسكىرىپكىنى كۆتۈرۈپ ئارقا سەھنىگە قايتىپ، گىرىم ئۈستىلىنىڭ ئالدىدا ئولتۇرۇپ، ئىسكىرىپكىنى ئۈستەلگە قويدى ۋە ئىككى قولىنى يايدى،  ئالىقىنىدىن تەر چىقىپ ھۆل بولۇپ كەتكەنىدى.

ئەركىنگە ئوخشاش بۇنداق شەخسنىڭ ئالدىدا،  ئەڭ كۆپ بولغاندا يالغاندىن تەمكىن قىياپەتكە كىرىۋالالايدۇ، جىددىيلەشمەسلىك ئەسلا مۇمكىن ئەمەس.

 ئەزىز مېھمانلار ئۆيىگە بېرىپ كېلىشكە كۆپ ۋاقىت كەتكەچكە، مۇزىكا ئۆمىكىدىكىلەر نەرسە - كېرەكلىرىنى ئاساسەن دېگۈدەك يىغىشتۇرۇپ بولغانىدى.

 -  زىلالە؟ - دەپ چاقىردى ئۇنىڭ قايتىپ كەلگەنلىكىنى كۆرگەن ئايگۈل كۈلۈپ تۇرۇپ كەينىگە بۇرۇلۇپ،  -  جەسۇر دىرېكتور نېمىشقا سىز بىلەن بىللە قايتىپ كەلمىدى؟  -  دەپ سورىدى.

زىلالە ئەمدىلا چۈشەندۈرمەكچى بولغاندا، ئايگۈل كۈلۈپ تۇرۇپ  بىلىكىگە بىرنى نوقۇپ:

 -  كىمنىڭ گېپىنى قىلسام شۇ كېلىۋاتىدۇ! - دېدى.  

زىلالە ئۇنىڭ نەزىرىنى بويلاپ، جەسۇرنىڭ ئارام ئېلىش ئۆيىگە كىرىپ، ئۆزى تەرەپكە قاراپ كېلىۋاتقانلىقىنى كۆردى.

- ئۇنداقتا بىز لامپۇچكا بولمايلى! - دېدى ئايگۈل زىلالەگە كۆزىنى قىسىپ قويۇپ، - ماڭغاچ تۇرايلى، - دېدى.    

ئايگۈل باشقا مۇزىكانتلار بىلەن بىرلىكتە چالغۇلارنى كۆتۈرۈپ دەم ئېلىش ئۆيىدىن چىقتى.

جەسۇر كۆپچىلىككە قول پۇلاڭلىتىپ خوشلىشىپ، زىلالەنىڭ ئالدىغا كېلىپ:

  - ھېرىپ قالدىڭىزمۇ؟  -  دەپ سورىدى.

زىلالە بېشىنى يېنىك چايقاپ:

 -  نېمىشقا ئۆيدە ياخشى ئارام ئالمايسىز؟ - دەپ سورىدى.

 - خوتۇننى ئالغىلى كېلىش ئەر بولغۇچىنىڭ مەجبۇرىيىتى ئەمەسمۇ؟ - دېدى جەسۇر كۆزىنى چىمچىقلىتىپ، تەشەببۇسكارلىق بىلەن  ئۈستەلدىكى ئىسكىرىپكىنى يىغىشتۇرۇشقا ياردەملەشتى.

زىلالە  ئەركىننىڭ ئىشىنى چۈشەندۈرمەكچى بولدى، ئەمما گەپ تىلىنىڭ ئۇچىغا كەلگەندە يەنە ئىككىلىنىپ قالدى.

ئەگەر جەسۇر  دادىسىنىڭ ئۇنى ئىزدىگەنلىكىنى بىلسە چوقۇم كۆڭلى يېرىم بولىدۇ.

بۇ كۈنلەردە جەسۇر ئاكىسى ئۆمەرنىڭ ئىشى ۋە شىركەتنىڭ ئىشى بىلەن  كۈن بويى ئالدىراش بولدى.

تۈنۈگۈن ئاخشام دادىسى بىلەن كۆرۈشكەنلىكى ئۈچۈن،  ئىچىپ مەست بولۇپ ئاران ئۇخلىدى، زىلالە ئۇنىڭ كۆڭلىنى يەنە يېرىم قىلىشقا پەقەت چىدىمىدى.

گىرىملىرىنى سۈرتۈپ، كىيىم-كېچەكلىرىنى ئالماشتۇرغاندىن كېيىن، ئىككىيلەن بىرلىكتە نەرسە-كېرەكلىرىنى كۆتۈرۈپ زالدىن چىقىپ، جەسۇرنىڭ ماشىنىغا چىقتى.

يولنىڭ قارشى تەرىپىدىكى قارا رەڭلىك ماشىنىنىڭ ئارقا ئورۇندۇقىدا بىر جۈپ كۆزنىڭ ئىككىيلەنگە تىكىلگەنلىكىگە ھېچكىم دىققەت قىلمىدى.

جەسۇر بىلەن زىلالەنىڭ كېتىپ قالغانلىقىنى كۆرگەن ماشىنىنىڭ ئارقا ئورۇندۇقىدا ئولتۇرغان ئابلكىم قوشۇمىسىنى سەل تۈرۈپ:

 - ئۇ بۇ زىلالە دېگەن قىزغا ھەقىقەتەن كۆڭۈل بۆلىدىكەن.  - دېدى.  

- شۇنداق، - دېدى شوپۇرلۇق ئورنىدا ئولتۇرغان ياردەمچىسى خۇپىيانە كۈلۈپ قويۇپ، - بىراق، نەق گەپنى قىلغاندا، بۇ شەھەردىكى يۇقىرى قاتلىمىدىكى قىزلارنىڭ ئىچىدە  زىلالە يەنىلا ئەڭ ئېسىلى ھېسابلىنىدۇ، - دېدى .

ئابلكىم تەمكىن چىراي ئىپادىسىنى ئۆزگەرتمەي:

- چۈشكۈن سۇمۇرغ، پەقەت  گۈزەل چىرايغا ئىگە خالاس.  -  دېدى.

 - راست گەپنى قىلسام كاللامدىن پەقەت ئۆتمىدى، - دېدى ياردەمچى كۈلۈمسىرەپ تۇرۇپ،  - دادىڭىز زادى قانداق ئويلىدى؟ شۇنچە يىللاردىن بېرى، شىركەتتە ئەستايىدىل ئىشلەپ، تىرىشىپ ئالغا ئىلگىرىلەپ، ئۇنىڭ ئىز باسارىلىق ئورنىغا  تېخىچە چىقىپ بولالمايۋاتىسىز  ؟ -  دېدى.

 - ھىم! - دېدى ئابلكىم دىمىقىنى قېقىپ، -  ئۇنىڭ جەسۇرنى ياخشى كۆرۈشى  ئۇنىڭ ھېلىقى تۈلكە جىندىن تۇغۇلغانلىقىدىن ئەمەسمۇ؟  -  دېدى.

  ياردەمچى كەينىگە بۇرۇلۇپ:

-  ئەمدى قانداق قىلىمىز؟  -  دەپ سورىدى.

 - ناھايىتى ئاددىي!  - دېدى ئابلكىم ئورۇندۇقنىڭ يۆلەنچۈكىگە يۆلىنىپ، بىر جۈپ  قاپقارا كۆزىدىن سوغۇق نۇر چاقناپ، - بىزنىڭ ئائىلىمىزدە بىرلا ئوغۇل بار، شۇنداقلا بىرلا ئوغۇل بولۇشى كېرەك، - دېدى.

ياردەمچى سەل ئەنسىرەپ قېلىپ:

-   ھازىر قول سالساق، ئەركىن ئەپەندى گۇمانلىنىپ قالارمۇ؟ - دېدى.  

ئابلكىم سوغۇققىنە كۈلۈپ قويۇپ:

- سىزنىڭچە، مەن قەيسەرنى نېمىگە قالدۇرۇپ قويغاندىمەن؟ - دېدى.

ياردەمچى سەل داڭ قېتىپ تۇرۇپلا قالدى، ئەمما ناھايىتى تېزلا ئۇنىڭ مەقسىتىنى چۈشىنىپ:

 - ئابلىكىم دىرېكتور ھەقىقەتەن دانا ئىكەنسىز.  -  دېدى.

 قەيسەر بىلەن جەسۇر كونا دۈشمەنلەردىن.

 جەسۇردىن چاتاق چىقسا، قەيسەر ئەڭ ياخشى تۆھمەتكە ئۇچرىغۇچى بولىدۇ.

ئۈچ كۈندىن كېيىن.

زىلالە ۋە جەسۇر ئايرۇپىلانغا ئولتۇرۇپ يىراق شەھەرگە كەلدى.

ۋېنا مۇزىكا زالىدا سۇس كۆك رەڭلىك كۆڭلەك كىيىپ، ئۇزۇن چاچلىرىنى يېنىك تۈگۈۋالغان زىلالە ئىسكىرىپكىنى كۆتۈرۈپ سەھنىگە چىققاندا، سەھنە ئاستىدا گۈلدۈراس ئالقىش سادالىرى ياڭرىدى.

ئۇنىڭ ئالدىنقى قېتىملىق ۋېنا سارىيىدە ئۆتكۈزۈلگەن مۇسابىقىدىكى قالتىس ئىپادىسى   ھەرقايسى جايلارىدىكى ئىسكىرىپكا ھەۋەسكارلىرىنى بويسۇندۇرغان ئىدى.

بۇ قېتىم ئۇنىڭ ئورۇندىغان مۇزىكىسىنى نەق مەيداندا ئاڭلىغانلىقتىن تاماشىبىنلارمۇ ناھايىتى ھاياجانلاندى.

ئالدىنقى رەتتە ئولتۇرغان جەسۇرمۇ ھەيرانلىقتىن كۆزىنى ئېچىپلا تۇرۇپ قالدى.

بۇ ئۇنىڭ زىلالەنىڭ تۇنجى قېتىم ئۇزۇن كۆڭلەك كىيگەنلىكىنى كۆرۈشى بولۇپ، يىپەك  قىزنىڭ زىلۋا، نەپىس قامىتىنى تولۇق نامايان قىلىپ بەرگەنىدى.

سۇس كۆك رەڭ ئۇنىڭ تېرىسىنى خۇددى فارفۇر قاچىدەك ئاپئاق كۆرسەتكەن بولۇپ، توي قىلغىلى شۇنچە ئۇزۇن بولغان جەسۇرنىڭ يۈرىكىمۇ تېز سوقۇپ كەتتى.

سەھنىنىڭ ئوتتۇرىسىغا كەلگەن  زىلالە بىر قولىدا ئىسكىرۇپكىنى،  بىر قولىدا مەيدىسىنى تۇتۇپ، سەھنە ئاستىدىكىلەرگە ئىگىلىپ سالام بەردى.

ئارقىدىن،  سول قولىنى كۆتۈرۈپ ئىسكىرىپكىنى مۈرىسىگە ئېلىپ، نەق مەيداندىكى ئوركېستىر بىلەن بىللە چېلىشقا باشلىدى.

كامالەتكە يەتكەن ماھارەت ۋە تالانت،  كىشىنى مەپتۇن قىلىدىغان نەپىس قىياپىتى بىلەن سەھنىدە تۇرغان زىلالە بۈگۈن كەچتىكى مۇتلەق باش قەھرىمانغا ئايلاندى.

شۇ كۈنى كەچتە ئويۇن قويۇش نەق مەيدانىدىكى ئالقىش سادا مىسلىسىز قىزغىن بولدى.

ئەسلىدە، زىلالە پەقەت بىر مەيدان ئويۇن قويۇشقا تەييارلىق قىلغان.

ئويلىمىغان يەردىن، تاماشىبىنلار  قىزغىن ئىنكاس قايتۇرۇپ، يەنە بىر مۇزىكا چېلىپ بېرىشىنى  تەلەپ قىلىپ تۇرۇۋالدى.

 ئىلاجىسىز ئىككىنچى قېتىم شەرق ئۇسلۇبىدىكى مۇزىكىدىن بىرنى ئورۇنلاپ، بىردىنلا زور ئالقىشقا ئېرىشتى.

 - كۆپچىلىككە كۆپ رەھمەت، بىزنىڭ يەنە كۆرۈشۈش پۇرسىتىمىز بولۇشىنى ئۈمىد قىلىمەن.  -  دېدى زىلالە  ئېگىلىپ رەھمەت ئېيتقاندىن كېيىن، يەنە بىر قېتىم ئارقا سەھنىگە قايتىپ كەلدى.

 - زىلالە! -  ئارقا سەھنىدە ساقلاپ تۇرغان مۇسابىقە ئۇيۇشتۇرغۇچى تەرەپنىڭ مۇئاۋىن باشلىقى، پىروفېسسور داۋۇت، دەرھال چوڭ قەدەم بىلەن ئالدىغا كېلىپ، -  مۇبارەك بولسۇن، بۈگۈن كەچتىكى ئويۇن بەك قالتىس بولدى.  ئىشىنىمەنكى، ئەتە ئەتىگەندە،  گېزىت ۋە توردا مۇنازىرە قىلىدىغان قىزىق نۇقتىغا ئايلىنىسىز.  -  دېدى.

 - بەك ماختىۋەتتىڭىز. - دېدى زىلالە كۈلۈپ تۇرۇپ. ئەمما قىلچىمۇ كۆرەڭلىمىدى.

 -  گېپىمىزگە كەلسەك، - دېدى داۋۇت كۈلۈپ تۇرۇپ، -  ئىلگىرى سىزگە دېگەن ئىشنى،  قانداق ئويلىدىڭىز؟  -  دەپ سورىدى.

ئالدىنقى قېتىم، مۇسابىقىدە چېمپىيون بولغاندىن كېيىن، داۋۇت زىلالە بىلەن سۆزلىشىپ، ئۇنى پاگانىنى سىمفونىيە ئوركېستىرىغا كېلىپ، مۇشۇ  يەردە تەرەققىي قىلىشقا تەكلىپ قىلىش ئويى بارلىقىنى ئېيتقان.

زىلالەنىڭ يۇرتىغا سېلىشتۇرغاندا، سىمفونىيە  بۇ يەردە تېخىمۇ بازارلىق.

ئەگەر بۇ يەرگە كېلىپ تەرەققىي قىلسا، تېخىمۇ كۆپ ئويۇن قويۇش پۇرسىتىگە ئېرىشىپ، كىشىلەرنىڭ دىققىتىنى تارتىدىغانلىقىدىن دېرەك بېرىدۇ، زىلالەمۇ بۇ يەردە ئالىي مەكتەپكە بېرىپ داۋاملىق بىلىم ئاشۇرالايدۇ.

بۇ ھازىرقى زىلالە ئۈچۈن ئېيتقاندا، تېپىلغۇسىز پۇرسەت.

- سىزنىڭ  قەدرىمنى قىلغانلىقىڭىزدىن ئىنتايىن مىننەتدارمەن، ئەمما ھازىرقى شارائىتىم بۇنىڭغا يول قويمايدۇ، ئالدىڭىزدا خىجىلمەن.  -  دېدى زىلالە.

دادىسى تېخى دوختۇرخانىدىن چىقمىدى، ئاكىسىنىڭ دېلوسىمۇ تېخىچە پاش بولمىدى، ئۇنىڭ ئۈستىگە جەسۇرنىڭ  ئىشلىرىمۇ ئاشۇ شەھەردە بولغاچقا، زىلالە ھەر قانچە قىلىپمۇ ئۇلارنىڭ ھەممىسىنى تاشلاپ قويۇپ، ئۆزىنىڭ كەسپىي تەرەققىيات غېمىنى قىلالمايدۇ.

داۋۇت زىبارەنىڭ ئۇستازى بولغاچقا، ئۇنىڭ زىلالەگە توغرىسىدا  ئېيتقانلىرىنى ئاز-تولا ئاڭلىغان.

 - مەنمۇ بىلىمەن، دادىڭىز  ئاغرىپ قاپتۇ، ھەقىقەتەن باشقىلارنىڭ ھالىدىن خەۋەر ئېلىشىغا موھتاج. - دېدى داۋۇت ئويلىنىپ تۇرۇپ قېلىپ، -  بولمىسا مۇنداق قىلايلى، سىز يەنە ئەستايىدىل ئويلىنىپ بېقىڭ، ئەگەر  راستتىنلا مۇشۇ يەردە تەرەققىي قىلىشنى ئويلىسىڭىز، مەن سىزگە ياردەم قىلىپ دوختۇرخانا بىلەن ئالاقىلىشىپ بېرەي، دادىڭىزنىمۇ بۇ يەردە داۋالىتىڭ، مۇشۇنداق قىلساق بولامدۇ؟  -  دېدى.

زىلالە ئامالسىز ئىچىدە:

- داۋۇت ئەپەندى،  مەن ھەقىقەتەن ... - دېدى .

 - ماڭا ۋەدە بېرىڭ!    ئاۋۋال رەت قىلماي، يەنە ياخشىراق ئويلىنىپ بېقىڭ، - دېدى داۋۇت ئۇنىڭ كۆزىگە قاراپ.  

بۇنداق كۆزگە كۆرۈنگەن مۇزىكانتنى ھەقىقەتەن قولدىن كەتكۈزۈپ قويغۇسى يوق ئىدى.

قارشى تەرەپ  گەپنى مۇشۇ دەرىجىگە يەتكۈزدى، زىلالە ئەزەلدىن قەتئىي رەت قىلىشقا ماھىر ئەمەس، شۇڭا چېكىنىش ئارقىلىق ئالغا ئىلگىرىلەشكە مەجبۇر بولۇپ:

ـ  بولىدۇ، ئەمىسە مەن يەنە ئويلىشىپ باقاي.  -  دېدى.

- ماقۇل، خەۋىرىڭىزنى كۈتىمەن، چوقۇم ئەستايىدىل ئويلىنىڭ.  -  دېدى داۋۇت ئۇنىڭغا بىر نەچچە ئېغىز تاپىلاپ كېتىپ قالدى.

زىلالە بېشىنى چايقاپ، ئىسكىرىپكىنى كۆتۈرۈپ كەينىگە بۇرۇلدى.

كارىدورغا ئانچە يىراق بولمىغان جايدا، بىر بوتۇلكا شامپان، بىر دەستە ئەتىرگۈلىنى كۆتۈرۈپ، كىلاسسىك ئۇسلۇبتىكى ئويما تۈۋرۈككە يۆلىنىپ تۇرغان جەسۇرنى كۆردى.