مانا بۇنى سۆيۈش 2-بۆلۈم 64-قىسىم_ مەندىن قۇتۇلالمايسەن

64-قىسىم

كونتروللۇقىنى يوقىتىش (2)

 - مۇيەسسەر خانقىز.  - دېدى ئەر مۇھەررىر دەرھال سەن تاز دېگۈچە مەن تاز دەۋالاي دېگەندەك   -  بۈگۈن  سورىنىڭىزنى مالىمان قىلماقچى ئەمەسمەن، بۇ ئەبلەخنىڭ كۆزى يوقكەن، مەن بىلەن ئېيتىشىپ قالدى، -  دېدى.

 - مۇيەسسەر خانقىز، ئۇنداق ئەمەس. - دېدى زىلالە جەسۇرنىڭ ئورنىدا ئالدىراپ چۈشەندۈرۈپ،  - ئۇ ماڭا ئەدەپسىزلىك قىلماقچى بولغاچقا، جەسۇر قول كۆتۈرۈشكە مەجبۇر بولدى، -  دېدى.   

 -  قۇرۇق گەپنى ئاز قىلىڭ، ئۆزىڭىزنى كىم چاغلاپ قالدىڭىز،  تېخى مەن سىزگە ئەدەپسىزلىك قىلماقچى بولدۇممۇ؟ - دېدى ئەر مۇھەررىر تەبىئىي ھالدا ئۆزىنىڭ قىلغان ياخشى ئىشىنى ئېتىراپ قىلماي، ئەمەلىيەتنى ئاستىن - ئۈستۈن قىلىپ، - ئۆزىڭىزنىڭ ئاشۇ كىچىككىنە گۈزەللىكىڭىزگە تايىنىپ مېنى ئازدۇرماقچى بولدىڭىز، مەقسىتىڭىزگە يېتەلمەي، كەينىڭىزگە كۆرۈلۈپ ياخشى ئادەمگە تۆھمەت قىلماقچىمۇ؟ كۆپچىلىك ھەرگىز ئۇنىڭ ئالدام خالتىسىغا چۈشۈپ كەتمەڭلار، - دېدى.

جەسۇرنىڭ ئىككى يېنىدا ساڭگىلاپ تۇرغان قولى بىردىنلا چىڭ تۈگۈلدى.

ئالدىغا بىر قەدەم مېڭىپ،  ئەرنىڭ گېلىنى بوغۇپ:

 - يەنە بىر ئېغىز قالايمىقان گەپ قىلىپ باقە؟ !  -  دېدى.

ئەرنىڭ كۆزلىرى قىزىرىپ، غەزەپ يالقۇنجاپ ياناي دەپ قالغان بولسىمۇ، نەپەس ئالالماي كۈچەپ تىركىشىپ:

- قويۇۋەت، مەن ساڭا دەپ قوياي، ئەمدى مەندىن قۇتۇلالمايسەن...  مەن مەلۇم قىلىمەن... - دېدى.

 - بولىدۇ، ساقچىغا مەلۇم قىلايلى! - دېدى  جەسۇر دىمىقىنى قېقىپ،- مەن قاراپ باقاي،  ئايالىمغا پەسكەشلىك قىلغان ئادەمگە ئۇلار نېمە دەيدىكىن؟  -  دېدى.

  - جەسۇر!  - 

 - جەسۇر!  - 

مۇيەسسەر بىلەن زىلالە قاتتىق چۆچۈپ، ئالدىراپ-تېنەپ ئېتىلىپ كېلىپ ئۇنى توستى.

 - تېز قويۇۋېتىڭ!  - 

- جەسۇر، ھاياجانلانماڭ!  - 

جەسۇر ھېچنېمىگە پەرۋا قىلماي، ئەر مۇھەررىرنىڭ گېلىنى قاتتىق سىقىپ:

 - ھازىرنىڭ ئۆزىدە ئايالىمدىن كەچۈرۈم سورا!  -  دېدى.

-  بىرەر ئىشنى خاتا قىلمىسام، نېمە ... دەپ كەچۈرۈم سورايمەن؟  - دېدى ئەر مۇھەررىر  ئاغزى قاتتىقلىق قىلىپ.

گېلى بارغانسېرى بوغۇلۇپ ، نەپەس ئالالماي ،  يۈزىمۇ قىزىرىپ كەتتى.

  - جەسۇر! -  ئابلكىم چوڭ قەدەم بىلەن كىشىلەر توپىغا كىرىپ، كەسكىنلىك بىلەن، - دەرھال قولۇڭنى تارت!  -  دېدى.

جەسۇر بۇنىڭغىمۇ پەرۋا قىلمىدى، بىر جۈپ كۆزى ئەر مۇھەررىرنىڭ چىرايىغا تىكىلىپ:

 - كەچۈرۈم سورا!  -  دېدى.

ئەر مۇھەررىر ئۇنىڭدەك بۇنداق رەھىمسىز ئادەمگە ئۇچراپ قېلىشىنى ئەسلا ئويلىمىغاندەك، چىرايىدىن قورقۇنچۇچ چىقىپ:

- كەچۈرۈم ...سوراي،  كەچۈرۈڭ، مەن... ئەمدى ھەرگىز ... بۇنداق ئىش قىلمايمەن... -  دېدى.

جەسۇر دىمىقىنى قېقىپ ئەر مۇھەررىرنى يەرگە قارىتىپ ئىتتىرىدى.

ئابلكىم قارشى تەرەپنى يۆلەپ تۇرغۇزۇپ:

  - سىزگە ھېچ ئىش بولمىغاندۇ؟  -  دەپ سورىدى.

ئابلكىمنى تونۇغان ئەر مۇھەررىر ھاسىراپ-ھۆمۈدەپ بېشىنى چايقاپ:

- ئابلىكىم ئەپەندى، سىز ...  چوقۇم  مەن ئۈچۈن ئادالەتنى ياقلىمىسىڭىز بولمايدۇ، -  دېدى.

 - كەچۈرۈڭ! - دېدى ئابلكىم قولياغلىقىنى چىقىرىپ، قارشى تەرەپنىڭ يۈزىنى سۈرتۈپ،  - بىز ئادەتتە قاتتىق باشقۇرمىغاچقا، ئۇكام  مۇشۇنداق يامان ئۆگىنىپ قالدى، مەن ئائىلىمىزگە ۋاكالىتەن سىزدىن كەچۈرۈم سورايمەن.  -  دېدى.

ئۇكام؟

ئەر مۇھەررىر ھاڭ-تاڭ قالغان ھالدا بېشىنى كۆتۈرۈپ، ئابلكىمگە، ئاندىن مۇيەسسەرگە قارىدى،  ئاخىرىدا جەسۇرغا قاراپ:

- ئۇ ئەركىن ئائىلىسىنىڭ ئۈچىنچى ئوغلىمۇ؟  -  دېدى.

 - ھەقىقەتەن سەت بولدى.  - دېدى ئابلكىم ئۇنى  يۆلەپ تۇرغۇزۇپ، - يۈرۈڭ، مەن سىزنى دوختۇرخانىغا ئاپىراي.  -  دېدى.

ئەر مۇھەررىر جەسۇرنىڭ سالاھىيىتىنى بىلگەندىن كېيىن، تەلەپپۇزى دەرھال يۇمشاپ:

-   ھاجىتى يوق،  ماڭا ھېچ ئىش بولمىدى!  -  دېدى.

بۇ  شەھەردە <ئەركىن ئائىلىسىنىڭ كىچىك ئوغلىنىڭ سېپى ئۆزىدىن قارام لۈكچەك> ئىكەنلىكىنى كىم بىلمەيدۇ.

بۇنداق ئادەمگە كىممۇ تەڭ كېلەلەيدۇ؟

 - كەچۈرۈڭ، ئۈچىنچى  بايۋەچچە! - دېدى ئەر مۇھەررىر تەشەببۇسكارلىق بىلەن جەسۇرغا قاراپ كۈلۈمسىرەپ ،  - ھەممىسى مېنىڭ  ئادەم تونىمىغانلىقىمدىن بولدى،   ھەرگىز  كۆڭلىڭىزگە ئالماڭ، يەنە بۇ خانقىزدىنمۇ كەچۈرۈم سورايمەن... - دېدى.

جەسۇر بىلەن زىلالەدىن ئەپۇ سوراپ بولغاندىن كېيىن، ئەر مۇھەررىر كەينىگە بۇرۇلۇپ، ئالاقزادىلىك ئىچىدە كىشىلەر توپىدىن قېچىپ چىقتى.

مۇيەسسەر ئىككى قولىنى كۆتۈرۈپ چاۋاك چېلىپ:

 - بولدى، باشقا ئىش يوق، كۆپچىلىك تارقىلىپ كەتتىڭلار!  - دېدى.

ئولىشىپ قالغان ئامما ئەتراپقا تارالدى، مۇيەسسەر قاپىقىنى تۈرۈپ جەسۇر بىلەن زىلالەگە قاراپ:

- يۈرۈڭلار، ئىشخانامغا كىرىپ پاراڭلىشايلى.  -  دېدى.

- كەچۈرۈڭ، مۇيەسسەر خانقىز، سىزگە ئاۋارىچىلىك تېپىپ بەردىم. ئەگەر باشقا ئىش بولمىسا، ماڭغاچ تۇراي، - دېدى ۋە  يەرگە چۈشۈپ كەتكەن سومكىسىنى ئېلىپ، مۇيەسسەردىن ئايلىنىپ ئۆتۈپ، كەينىگە بۇرۇلۇپ چىقىش ئېغىزىغا قاراپ ماڭدى.

- توختاڭ!  - 

يېقىنلا يەردە تۇرغان سانىيە  يۇقىرى ئاۋازدا چاقىردى.

بىر نەچچە ئادەمنىڭ ئالدىغا كەلگەن سانىيەنىڭ كۆزى زىلالەدىن ئۆتۈپ، جەسۇرغا چۈشۈپ:

 - ئائىلىمىزنىڭ يۈزىنى تۆكۈپ بولدىڭىز، - دېدى.  

 -  ئاپا! - دېدى مۇيەسسەر سانىيەنىڭ بىلىكىنى تۇتۇپ،  - ئىككى ئېغىز گەپنى ئاز قىلىڭ.  -  دېدى.

 -   خاتا گەپ قىلدىممۇ؟ - دېدى سانىيە سوغۇققىنە دىمىقىنى قېقىپ،  - بىر ئايالنى دەپ ئاممىۋى سورۇندا قاتتىق ئۇرۇشىدىغان بۇنداق ئىشنى قايسى  تەربىيە كۆرگەن بالا  قىلىدۇ؟ - دېدى.

زىلالە سانىيەنى تونۇمايتتى، مۇيەسسەرنىڭ ئاپا دېگەن سۆزىدىن ئۇنىڭ سالاھىيىتىنى بىلدى.

 جەسۇرنى ئەيىبلىگەنلىكىگە قاراپ،  سەل خىجىل بولدى.

نېمىلا دېگەن بىلەن، بايا جەسۇر ئۇنى قوغداش ئۈچۈن باش كۆتۈرۈپ ئوتتۇرىغا چىقتى.

 - سانىيە خانىم، كەچۈرۈڭ، بايىقى ئىشلارنىڭ ھەممىسى مېنىڭ سەۋەبىمدىن بولغان، ئەگەر  ئاغرىنماقچى بولسىڭىز مەندىن ئاغرىنىڭ،  جەسۇرنى ئەيىبلىمەڭ.  -  دېدى زىلالە.

 - جەسۇرنى ئەيىبلىمەڭ؟ - دېدى سانىيە مەسخىرىلىك كۈلۈپ ، -  ئەگەر ئۇ سىزدەك ئايالغا يۇلۇقمىغان بولسا، مۇشۇنداق ئىش بولامتى؟  -  دېدى.

 - بولدى بەس! - دېدى جەسۇر ئالدىغا بىر قەدەم مېڭىپ، زىلالەنىڭ بىلىكىنى تۇتۇپ تارتىپ،  -  مېنى ھاقارەتلىمەكچى بولسىڭىز ئۇدۇللا دېسىڭىز بولىدۇ، زىلالەنى قوشۇۋالماڭ، ئۇ ھېچقانداق ئىشنى خاتا قىلمىدى، سىلەردىن كەچۈرۈم سورىشىنىڭ  قىلچە ھاجىتى يوق!! ماڭايلى!  -  دېدى - دە زىلالەنى  تارتىپ، بۇرۇلۇپ كېتىپ قالدى.

سانىيە سومكىسىنى سىقىمداپ، ئاچچىقىدا چىرايى كۆكىرىپ:

- ھىم، قالماشمىغان، مېنى ئۆزىنىڭ ئىشىغا ئارىلىشىشنى خالايدۇ دەپ ئويلىغان ئوخشىمامدۇ، ئەگەر ئۇنىڭ فامىلىسى ئەركىن بولمىغان بولسا، سىرتتا جېنى چىقىپ، يېتىپ قالغان بولسىمۇ قاراپمۇ قويمايتتىم.  -  دېدى.

 -  ئاپا!  - مۇيەسسەر ئامالسىز قېلىپ، - سىزمۇ... سەل ئاشۇرۇۋەتتىڭىز.  -  دېدى.

 -   ئاشۇرۇۋەتتىممۇ تېخى؟ - دېدى سانىيە بارمىقىنى كۆتۈرۈپ جەسۇرنىڭ ئارقىسىدىن كۆرسىتىپ،  -  سىزنىڭ ئاخبارات ئېلان قىلىش يىغىنىڭىزدا قاتتىق ئۇرۇشقان ئادەم  جەسۇر، مانا مەن  ئوتتۇرىغا چىقىپ سىزگە ياردەم قىلىۋاتىمەن!  -  دېدى.

 - بۇنداق قىلسىڭىز ھەممە ئادەمنى ئوڭايسىزلاندۇرۇپ قويىسىز، زىلالە بىلەن جەسۇر   توي قىلىپ بولدى، باشقىلارنى بۇنداق دېسىڭىز قانداق بولىدۇ؟  -  دېدى مۇيەسسەر.

 -  مەن خاتا گەپ قىلدىممۇ؟ - دېدى سانىيە قىزىنىڭ پىكىرىگە قوشۇلماي، -  بىر جىنايەتچىنىڭ سىڭلىسى ئائىلىمىزگە ياتلىق بولۇشقا ئەسلا لايىق ئەمەس، - دېدى.  

 مۇيەسسەرنىڭ چىرايى تاتىرىپ:

  - سىز... پەقەت گەپ ئۇقمايدىكەنسىز!!  - دەپلا بۇرۇلۇپلا يىراقلاپ كەتتى.

 -  قارا، قارا ! - دېدى سانىيە ئاچچىقىدا سومكىسىنى تۇتۇۋالغان ئوڭ قولىنى كۆتۈرۈپ، مۇيەسسەر كەتكەن تەرەپنى كۆرسىتىپ، - كىمنىڭ قىزى، ئۆز ئاپىسىغا مۇشۇنداق گەپ قىلىدۇ؟  مەن ياخشى نىيىتىم بىلەن ئۇنى قوللاپ بۇ يەرگە كەلسەم،  مانا ئەمدى مېنىڭ خاتالىقىم بولۇپ قالدى. ئۆزۈمگىمۇ ئاز،  قانداقسىگە بۇنداق قىز بالىنى تۇغۇپ قالدىمەن؟  - دېدى.

 -  ئاپا! - دېدى ئابلكىم ئۇنىڭ بىلىكىنى تۇتۇۋېلىپ،  - بولدى، ماڭايلى،  ئاۋۋال سىزنى ئۆيگە ئاپىرىپ قوياي.  -  دېدى.