گۈزەل ھايات 9-بۆلۈم 76-قىسىم _ ئىتقىمۇ يەتمەيدۇ

76-قىسىم

ئىتقىمۇ يەتمەيدۇ

- گۆھەر،   ؟ 

زۇبەيدەنىڭ ئۆيگە قايتىپ كېلىپ تۇنجى بولۇپ قىلىدىغان ئىشى كۈچۈكنى ئىزدەش بولدى.

 چۈشتىن كېيىن بىر قېتىم كۆرۈشكەن، شۇ ۋاقىتتىن ھېسابلىسىمۇ كۆرۈشمىگىنىگە  بىر نەچچە سائەت بولدى، كۈچۈك ئۆزىنىڭ ئۆيدە بولۇپ، بىر چۈشتىن كېيىن شۇنچە چوڭ داچىنىڭ ھەممە يېرىدە ئايلىنىپ يۈردى.

ئىشىكتىن شەپە چىققان ھامان، ئۇنىڭدا ئىنكاس پەيدا بولدى، زۇبەيدە بۇنداق چاقىرغاندا، تېخىمۇ ھاياجانلىنىپ ھۇۋلاپ كەتتى.

زۇبەيدە ئايىغىنى ئالماشتۇرغۇچە بولغان ئازراق ۋاقىتتا، پەلەمپەيدە كۈچۈكنىڭ كىچىككىنە بەدىنى كۆتۈرۈپ،  شادلىق ئىچىدە يۈگۈرۈپ چۈشكەنلىكىنى كۆردى، ئۇنىڭ ۋارقىرىغان ئاۋازى ئادەتتىن تاشقىرى ئوماق ئىدى.

زۇبەيدە ئاياغ ئالماشتۇرۇۋاتقان ۋاقىتتا  ئاللىقاچان يېنىغا كېلىپ بولغان بولۇپ، خۇشال ھالدا ئۇنىڭ ئەتراپىدا ئايلىنىپ يۈردى.

ئادەتتە زۇبەيدە بۇ ئۆيگە قايتىشتىن بەك قورقىدۇ .

تويلۇق تەييارلانغان ئۆيىدە يالغۇز بىر ئادەم تۇرىدۇ.

ھەر قېتىم بۇ يەرگە قايتىپ كەلگەندە، ئىشىكنى ئېچىپ قارىغىنىدا، ھېچ  كىم يوق ئۆي چۆلدەرەپ قالغان كونا كەپىدەك تۇيۇلاتتى.

ھېچقانداق ئۈمىد يوق، ئالدىغا چىقىپ ئۇنى كۈتۈۋالغاندەك ئادىمى يوق.

لېكىن ھازىر ياخشى بولدى، كۈچۈك بولغاچقا، ئۆيدە يالغۇزسىراپ قالمايدىغان بولدى.

زۇبەيدە ئېڭىشىپ كۈچۈكنى كۆتۈرۈپ،  ئۆيگە كىرىپ، بالكونغا چىقىپ تاماق ۋە سۇ قاچىسىغا قاراپ، يەنە ئازراق ئېشىپ قالغانلىقىنى بايقىدى، قورسىقىنىڭ ئاچمىغانلىقىنى جەزىملەشتۈرگەندىن كېيىن ئاندىن خاتىرجەم بولدى.

مېھمانخانىنىڭ ئوتتۇرىسىدا كۈچۈك ئويناپ تاشلىۋەتكەن چىش چوتكىسى، يەنە ساپما كەشمۇ تۇراتتى، ئېنىق كۈچۈك تارتىپ مېھمانخانىغا چىقىپ قالغانىدى.

زۇبەيدە كۈچۈكنىڭ بېشىنى سىلاپ تۇرۇپ پەس ئاۋازدا:

-  ئۆيدە نېمە ئىش قىلدىڭ، ھە؟ ماڭا ئىش تېپىپ بەرمىگەنسەن؟  - دېدى.

- ھاۋ -ھاۋ...

زۇبەيدە كۈلۈپ قويۇپ، ئۇنى قويۇۋېتىپ،  يەنە ئازراق ئىت يېمى ۋە سۇ قويۇپ بەرگەندىن كېيىن، ئاندىن بۇرۇلۇپ كېتىپ قالدى.

كۈچۈك تاماق قاچىسىنى چۆرىدەپ ئايلىنىپ، يەنىلا زۇبەيدەنىڭ كەينىدىن يۈگۈرۈپ ئۈستۈنكى قەۋەتكە چىقتى.

كۈچۈك زۇبەيدەنىڭ ئارقىسىدىن ئەگىشىپ ماڭدى، ئەڭ ئاخىرىدا ھەتتا ئۇنىڭغا ئەگىشىپ مۇنچىغا كىرمەكچى بولدى.

زۇبەيدە ئۇنى نەچچە قېتىم توسقان بولسىمۇ، ھېچقانداق نەتىجىسى بولمىدى، زۇبەيدە كۈلۈپ كېتىپ، ئىككى قولىنى قوۋۇشتۇرۇپ:

- مەن بىلەن كىرمەكچى بولساڭ، بىردەمدىن كېيىن پۇشايمان قىلما، - دېدى. 

كۈچۈك ئەلۋەتتە ئۇنىڭ زادى نېمە دېمەكچى ئىكەنلىكىنى بىلمەيدۇ.

ئۇزاق ئۆتمەي، تازىلىق ئۆيىدىن كۈچۈكنىڭ ھاۋشىغان ئاۋازى ئاڭلاندى.

يەنە بىر قېتىم چىققاندا، زۇبەيدە ئۇچىسىغا ئاق رەڭلىك مۇنچا كىيىمى كىيىۋالغان بولۇپ، قۇچىقىدا سۇغا چىلىنىپ ھۆل بولۇپ كەتكەن كۈچۈك، دىر-دىر تىترەپ تۇراتتى.

كۈچۈكنى مۇنچىنىڭ سىرتتىكى قول يۇيۇش سۇپىسىغا قويۇپ،  تىترىگەن ھالىتىگە قاراپ، خۇشاللىق كۈلكىسى جىلۋىلەندى، لېكىن يەنىلا چىداپ تۇرالماي، بىردەم ئويلانغاندىن كېيىن،  تارتمىنى ئېچىپ، مەۋلانغا تەييارلىغان لۆڭگىنى ئېلىپ، تۈكلىرى سۈرتتى.

- ھاۋ -ھاۋ...

- بولدى، بولدى، تۈگدى، بىردەمدىلا تۈگەيدۇ، ئوماقلىقىنى... - دېدى زۇبەيدە.

سۈرتۈپ بولغاندىن كېيىن لۆڭگىنى لۆڭگە جازىسىغا ئېسىپ قويدى،  چاچ قۇرۇتقۇچنى ئېلىپ، يەنە بىر كىچىك تارغاقنى چىقاردى، ئاندىن ئىسسىق شامالنى ئېچىپ،  تۈكىنى پۈۋلىتىشكە باشلىدى.

ئىللىق شامالنىڭ ئۇرۇلىشىغا ئەگىشىپ، كۈچۈك راھەت ھېس قىلىپ، قول يۇيۇش سۇپىسىدا مىدىرلىماي يېتىۋالدى.

ھەممە ئىشلارنى قىلىپ بولغاندىن كېيىن، زۇبەيدە ئاندىن ئۇنى تازىلىق ئۆيىنىڭ سىرتىغا قويۇپ قويدى، ئۆزىنىڭ چېچىنى ئۆزى قۇرۇتۇپ سىرتقا چىققاندا، كۈچۈك  كارىۋاتقا چىقىپ راھەت يېتىپ، تۈكىنى يالىغىلى تۇرۇپتۇ.

زۇبەيدە قېشىنى ئېتىپ ئۇخلاش كىيىمىنى ئالماشتۇرۇپ، يوتقانغا كىرىپ ياتتى.

كۈچۈك تۈكلىرىنى يالاشتىن توختاپ، ئۇنىڭ بىلىكىگە يېقىن كېلىپ ياتتى.

زۇبەيدەنىڭ يۈرىكى ئىختىيارسىز ئىللىپ، قولىنى سۇزۇپ كۈچۈكنىڭ چىرايلىق، يۇمران تۈكلىرىنى سىيلاپ، لەۋلىرىنى پۈرۈشتۈرۈپ كۈلۈپ تۇرۇپ:

-  بۈگۈن كەچتە يەنە مەن بىلەن بىللە ئۇخلامسەن؟ - دېدى.

- ھاۋ -ھاۋ...

 ـ بولىدۇ، ئىشقىلىپ بىز تۈنۈگۈن ئاخشام بىر قېتىم ئۇخلىدۇق.  ئىككى قېتىم ئۇخلىساقمۇ بولۇۋېرىدۇ شۇنداقمۇ؟ - دېدى. 

كۈچۈكنىڭ ھۇرۇنلۇق قىلغان ھالىتى بىردىنلا ئۆزگىرىپ زېرەكلىشىپ، بوينىنى سوزۇپ  ئىشىك تەرەپكە قاراپ ئىككى قېتىم ھاۋشىدى.

زۇبەيدە ئۇنى چىڭ قۇچاقلاپ، يوتقاننى قايرىپ، ئۇنى يېپىپ قويۇپ:

- بولدى، جېدەل قىلما، يۇۋاشلىق بىلەن ئۇخلا.  - دېدى.

كۈچۈك ئىككى قېتىم موللاق ئېتىپ قىمىرلاپ باقتى. لېكىن زۇبەيدەنىڭ قولىدىن چىقالماي ھاۋشىدى، ئەمما زۇبەيدە بۇنىڭغا دىققەت قىلىپ كەتمىدى.

ئەمدى بىز گەپنى مەۋلاندىن ئاڭلايلى

زۇبەيدەنىڭ ئاۋۋال كېتىپ قېلىشى مەۋلاننىڭ كۆڭلىنى غەش قىلىپ قويدى.

ماشىنىنى ھەيدەپ موماينىڭ داچىسىدىن چىقىپ، يېرىم يولدا توختىتىپ، بىر تال تاماكا تۇتاشتۇرۇپ، يالغۇز جىمجىت ئولتۇردى.

ئۇنىڭ قاپقارا كۆزلىرى قىسىلىپ، ئىس-تۈتەكلەر ئۇنىڭ ھېچقانداق چىراي ئىپادىسى يوق كېلىشكەن چىرايىنى تۇتۇقلاشتۇرىۋەتتى.

زۇبەيدەنىڭ... بۇ ئۆمرۈمدە ئۇنىڭ بىلەن ھېچقانداق ئالاقىسى بولماسلىقى كېرەك ئىدى، لېكىن تۇيۇقسىز ئۇنىڭ ئايالى بولۇپ قالدى.

ئۇنىڭدەك ھاكاۋۇر ئايال، ئويلىمىغان يەردىن بالىدىن پايدىلىنىپ ئۇنىڭغا ياتلىق بولدى.

- ھى... -ماشىنىدا پەس مەسخىرىلىك كۈلكە ئاۋازى ئاڭلاندى، ئارقىدىن دېرىزە ئېچىلىپ، تاماكا قالدۇقىنى  يولنىڭ قىرىغا تاشلاپ، ماشىنىنى قايتىدىن قوزغاتتى.

بۈگۈن كەچ، ئۇ زۇبەيدەنىڭ مەجبۇرىي توي قىلغاندىن كېيىن زادى قانداق تۇرمۇش كەچۈرۈۋاتقانلىقىنى كۆرۈپ باقماقچى بولدى.

پۇشايمان قىلىدىغان ۋاقىتىمۇ بولغاندۇ.

ماشىنا بىنانىڭ ئاستىدا توختىدى، ماشىنىنىڭ نەرسە ساقلاش ساندۇقىدىن تاشلاپ قويۇلغان ئاچقۇچنى تېپىپ، ماشىنىدىن چۈشۈپ، ئىككىلەنمەستىن ئىشىكنى ئاچتى.

مېھمانخانىدىكى چىرىغى يۇرۇق ئىدى.

ئۇ ئادىتى بويىچە ئاياغ ئالماشتۇرماقچى بولدى، نەتىجىدە كارىدۇردىن ئۆزىگە تەۋە ساپما كەشنى تاپالمىدى، ھەتتا ئېگىلىپ ئاياغ ئىشكاپىنى خېلى ئۇزۇن ئىزدىگەن بولسىمۇ تاپالمىدى.

ئۇ قوشۇمىسىنى تۈرۈپ،  زۇبەيدەنىڭ زاپاس ساپما كەشىنى تېپىپ كىيدى.

پۇتىنى ئاران تەستە كىرگۈزۈپ، ئاياغنىڭ شەكلىنىمۇ ئۆزگەرتىۋەتتى.

 مېھمانخانا ئۆيگە يېقىن كەلگەندە، مېھمانخانىنىڭ ئوتتۇرىسىدا تۈكى چۈشۈپ كەتكەن  چىش چوتكىسى ۋە بىر مەينەت ئەرەنچە ساپما كەشنىڭ تاشلىنىپ ياتقانلىقىنى كۆردى.

بۇ ئىككى نەرسە تونۇشتەك كۆرۈندى.

ئۇ بۇ ئۆيگە  كېلىپ باقمىغان ئەمەس، توي قىلغان كۈنى كەلگەن.

ئۇ بۇ ئۆيدە بار بولغان ئەرلەر ساپما كەشى، ئۇنىڭدىن باشقا يەنە كىمنىڭ  بولاتتى؟

بىراق، نېمە ئۈچۈن بۇنداق  ئاۋارە ھالەتكە چۈشۈپ  قالىدۇ؟

ئۇ بولمىسا،  زۇبەيدە ئۇنىڭ نەرسىسىگە مۇشۇنداق مۇئامىلە قىلامدۇ؟

قاپاقلىرى تۈرۈلۈپ، ئۇدۇل ئۈستىنكى قەۋەتكە چىقىپ، ياتاق ئۆينى توغرا تېپىپ،  ئىشىكنى ئاچتى.

تۇيۇقسىز كەلگەن شەپىدىن چۆچۈپ كەتكەن زۇبەيدە قورقۇپ كارىۋاتتىن قاڭقىپ تۇرۇپ كەتتى.

 قورققىنىدىن  يۈزى قەغەزدەك تاتىرىپ كەتتى.

كەلگەن ئادەمنى ئېنىق كۆرۈپمۇ چىرايى ياخشىلانمىدى، ئەكىسچە ئازراق غەزەپكە كەلدى.

-  كېسىلىڭىز بارمۇ؟ كەچتە قايتىپ كېلىدىغان ئادەم گەپ قىلىپ قويمامسىز؟  - دېدى زۇبەيدە.

ئۇنىڭ قايتىپ كېلىشى زۇبەيدەنىڭ ئويلىمىغان يېرىدىن چىقتى، لېكىن ئۆزىنى بېسىۋالماي تېخىمۇ غەزەپلەندى.

قورقۇنچاق ئادەمنى مۇشۇنداقمۇ قورقۇتقان بارمۇ؟!

مەۋلان قاپاقلىرىنى سۈزۈپ:

-  ئۆز ئۆيۈمگە قايتقاندىمۇ، سىزگە ئالدىن دوكلات قىلىشىم كېرەكمۇ؟  - دېدى.

زۇبەيدە قاتتىق چۆچۈپ، ئۇنىڭ كەچۈرۈم سورىماي، ئەكسىچە مەسخىرىلىك سوئال سوراۋاتقانلىقىنى كۆرۈپ،  سوغۇق كۈلۈپ قويۇپ:

- ئۆيىڭىز ئىكەنلىكىنى ئەمدى ئېسىڭىزگە كەلدىمۇ، - دېدى. 

مەۋلان كۆزىنى قىسىپ قويدى.

زۇبەيدە چوڭقۇر نەپەس ئېلىۋېلىپ:

- بىرەر ئىشىڭىز بارمىدى؟  - دەپ سورىدى.

- دېمەكچى بولغىنىڭىز، بۇ يەرگە كېلىشىم ئۈچۈن چوقۇم بىرەر ئىشىم بولۇشى كېرەكمۇ؟ - دېدى مەۋلان. 

زۇبەيدەنىڭ يۈرىكى سەل-پەل تېز سوقۇپ،  كۆزىنى يوغان ئېچىپ ئۇنىڭغا قارىدى، ئاندىن يەنە يېتىپ يوتقانغا كىرىپ، قۇچىقىدىكى  قورقۇپ كەتكەن كۈچۈكنى چىڭ قۇچاقلاپ:

- ئەمسە ئىختىيارىڭىز. - دېدى. 

مەۋلان گەپ قىلالماي تۇرۇپ قالدى.

ئۇ كۆزىنى قىسىپ، ئاغزىنى يۇمۇپ، ئۇدۇللا ئۆيدىكى مۇنچىغا كىردى.

ئىشىك يېپىلغاندا، زۇبەيدە كۆزىنى ئاچتى، كۈچۈكنى تۇتقان قولى سەل چىڭىدى.

ئۇ ئويلىمىغان يەردىن ... قايتىپ كەپتۇ.

يەنە كېلىپ   تۇيۇقسىزلا   كەپتۇ.

مۇنچىغا كىرىپ كەتتى، شۇڭا ئۇ بۈگۈن كەچتە مۇشۇ يەردە قۇنۇپ قالماقچىمۇ؟

كارىۋاتنىڭ يەنە بىر تەرەپتىكى بوش قالغان ئورۇنغا قارىۋەتكەندىن كېيىن، لېۋىنى چىشلەپ، تۇيۇقسىز ئۆزىنى مەسخىرە قىلغان ھالدا كۈلۈپ قويدى.

 كۆپ ئويلاپ كەتتىمۇ قانداق؟

كىم مەۋلان قايتىپ كەلسىلا، چوقۇم ئۇنىڭ بىلەن بىللە ئۇخلايدۇ دەپ بەلگىلەپ قويۇپتىمۇ.

چوڭقۇر نەپەس ئېلىپ، يەنە ئۇزۇن ئۇھ تارتتى.

سەل يانچە بولۇپ يېتىپ، بېشىنى دېرىزە تەرەپكە بۇرىدى.

 ئۇزۇن ئۆتمەيلا مۇنچىدىن يۇيۇنغان ئاۋاز ئاڭلاندى، گەرچە زۇبەيدەنىڭ بۇنىڭغا پەرۋا قىلغۇسى بولمىسىمۇ، لېكىن ئۇ يەنىلا جىددىيلەشمەي تۇرالمىدى.

ئۇ شىركەتتە ئومۇمىي ۋەزىيەتنى كونترول قىلالايدۇ،  ھەر قانداق تاسادىپىي ئەھۋالغا سالماقلىق بىلەن يۈزلىنەلەيدۇ، ئەمما  مەۋلانغا قانداق يۈزلىنىشنى بىلمەيدۇ، زادى قانداق يۈزلەنگەندە خاتالىق كۆرۈلمەيدىغانلىقىنى تېخىمۇ  بىلمەيدۇ.

ئون نەچچە مىنۇتتىن كېيىن مۇنچىدىكى سۇنىڭ ئاۋازى توختاپ، بىر نەچچە مىنۇتتىن كېيىن مۇنچىنىڭ ئىشىكى ئېچىلدى.

زۇبەيدە يەنە بىر قېتىم كۈچۈكنى چىڭ قۇچاقلىۋالدى، يۈرىكى قاتتىق سوقۇپ كەتتى.

ئۇ مەۋلانغا دۈمبىسىنى قىلىپ، ئۇنىڭ ئاياغ تىۋىشىنى ئاڭلاپ، يېنىدا تۇرغانلىقىنى سەزدى.

يەنە ئازراق سۈركەلگەن ئاۋازنىمۇ ئاڭلىدى.

زۇبەيدە بىر نەرسىنى ئويلىغاندەك بولۇپ، تۇيۇقسىز كۆزىنى ئاچتى، مەۋلاننىڭ سۆزىمۇ شۇ چاغدا  جاراڭلاشقا باشلىدى.

- مېنىڭ مۇنچا لۆڭگىم ۋە باشقا تازىلىق بۇيۇملىرىم قەيەردە؟ - دەپ سورىدى. 

زۇبەيدە گەپ قىلمىدى، ئەكسىچە بىرىنچى بولۇپ بېشىنى بۇرىدى.

بۇرۇلۇپلا مەۋلاننىڭ بېلىنىڭ  مۇنچا لۆڭگىسى بىلەن ئورالغانلىقىنى، ئورۇق بېلىدە ئازراقمۇ گۆش يوقلىقىنى، بىر نەچچە پارچە قورساق مۇسكۇلىنىڭ  بۆرتۈپ چىققانلىقىنى كۆردى.

زۇبەيدەنىڭ يۈزى قىزىرىپ كەتتى، لېكىن ئۇنىڭ بۇ چاغدىكى نەزىرى مەۋلاننىڭ بېشىغا چۈشتى.

مەۋلان تەبىئىي ھالدا بىر تەرەپتىن چېچىنى سۈرتكەچ، بىر تەرەپتىن ئۇنىڭغا ئېگىزدىن قاراپ تۇراتتى.

زۇبەيدە ئۇنىڭ قولىدىكى لۆڭگىگە بىر ھازا قاراپ تۇرغاندىن كېيىن، ئاخىرى ئۆزىنى تۇتۇۋالالماي كۈلۈپ كەتتى.

مەۋلان ھەرىكىتىنى توختىتپ، ئۇنىڭ چۈشەنگىلى بولمايدىغان كۈلكىسىگە قاراپ، قوشۇمىسى سەل تۈرۈلۈپ:

- كېسىلىڭىز بارمۇ؟  - دېدى.

زۇبەيدەنىڭ چىرايىدىكى كۈلكە ئۇنىڭ گېپى بىلەن تەڭ توختىماي:

- يوق... - دېدى. 

-مەن مۇنچا لۆڭگىسى ۋە يۇيۇش بۇيۇملىرىنى سورىدىم! - دېدى مەۋلان.

- يوق، - دېدى زۇبەيدە.

مەۋلان چېچىنى سۈرتۈشنى توختىتىپ:

- يوق دېگىنىڭىزنىڭ نېمە مەنىسى بار؟ - دېدى.

زۇبەيدەنىڭ كۆزلىرى چاقناپ كەتتى، ئۇ   يوشۇرالماي، سەل-پەل يانچە ئولتۇرۇپ، بېشىنى يەنە بۇراپ:

 -  ۋاقتى ئۆتۈپ كېتىپتۇ،  قايتىدىن  تەييارلاپ قويمىغان... - دېدى. 

مەۋلان قولىدىكى لۆڭگىنى كارىۋاتقا تاشلاپ، ئۇنىڭغا سوغۇق نەزەردە قاراپ:

- مۇنچا كىيىمىنىڭمۇ ۋاقتى ئۆتۈپ كېتەمدۇ؟ مېنىڭكىسىنىڭ ۋاقتى ئۆتۈپ كەتسە، سىزنىڭ كىيىمىڭىزنىڭ ۋاقتى ئۆتۈپ كەتمەمدۇ؟ - دېدى.

زۇبەيدە گەپتە تۇتۇلۇپ قېلىپ:

- مەن بەزىدە مۇنچا كىيىمىنى كىيىمەن...  كىرئالغۇغا سېلىپ يۇغاندا ئېھتىياتسىزلىقتىن بويىلىپ كېتىپتۇ، - دېدى. 

مەۋلان ئەمدى گەپ قىلماي، ئىشكاپنى ئېچىپ، كىيىدىغان كىيىم تېپىشقا تەييارلىق قىلدى، ئىشكاپنىڭ ئىچى ئاياللارنىڭ كىيىملىرى بىلەن تولغانىدى.

قوشۇمىسى تۈرۈلدى، ئەڭ بۇلۇڭ-پۇچقاقلاردىن ئىككى كاستىيۇم-بۇرۇلكىسىدىن باشقا ھېچنېمە يوق  .

ئۇنىڭ چىرايى تېخىمۇ تۇتۇلۇپ كەتتى، مۇنچىغا كىرىپ يانچۇقىدىن تېلېفوننى ئالدى، زۇبەيدە ئۇنىڭ ياردەمچىسىگە  كىيىم تەييارلاپ بېرىشنى بۇيرۇۋاتقانلىقىنى ئاڭلىدى.

 تېلېفوننى قويۇپ بولغاندىن كېيىن، قايتىپ چىقتى.

بۇ قېتىم ئۇدۇل كارىۋاتنىڭ يەنە بىر تەرىپىگە باردى. قارىماققىلا زۈبەيدەنىڭ يېنىدىكى بوش ئورۇنغا چىقىپ ئۇخلىماقچى بولغاندەك قىلاتتى.