خارۋارد داشۆسى: يۈرەك ساغلاملىقىنى ياخشىلاشتىكى 10 ئاددىي ئۇسۇل

خارۋارد داشۆسى: يۈرەك ساغلاملىقىنى ياخشىلاشتىكى 10 ئاددىي ئۇسۇل

يېقىنقى يىللاردىن بۇيان، يۈرەك كېسىلىنىڭ قوزغىلىش نىسبىتى بارغانسېرى يۇقىرىلاپ، بارغانسېرى ياشلىشىشقا قاراپ يۈزلەنمەكتە، بۇ كۆپىنچە ناچار تۇرمۇش، يېمەك-ئىچمەك ئۇسۇلى بىلەن مۇناسىۋەتلىك.

بەزى كىشىلەر ئۆزىنىڭ ھەرىكەت، يېمەك-ئىچمەك ئادىتىنى ئۆزگەرتىشكە ئۇرۇنىدۇ، لېكىن ھەمىشە مۇۋەپپەقىيەت قازىنالمايدۇ. يېقىندا خارۋارد داشۆسى تۇرمۇش ئ‍ادىتمىزدا بىر قاتار كىچىك ئۆزگەرتىشلەرنى ئېلىپ بېرىشىمىزنى تەۋسىيە قىلغان، بۇ ئ‍ارقىلىق قان بېسىمى، قان شېكىرى، قاندىكى ماي مىقدارىنىڭ ئۆرلەپ كېتىش خەۋپىنى تۆۋەنلىتىپ، يۈرەك ساغلاملىقىنى ئىلگىرى سۈرگىلى بولىدۇ.

يۈرەك ساغلاملىقىنى ياخشىلاشتىكى 10 كىچىك ئادەت:
1. ھەر كۈنى ئاز دېگەندە 15 مىنۇت پىيادە مېڭىش: قىسقا ۋاقىت پىيادە مېڭىش چېنىقىشنىڭ باشلىنىشى ھېسابلىنىدۇ. ھەر كۈنى پىيادە مېڭىشنى داۋاملاشتۇرۇپ تەدرىجىي چېنىقىش ئادىتىنى يېتىلدۈرۈش كېرەك.

2. پەلەمپەيدىن مېڭىپ، لىفىتقا ئاز چىقىش: ئۆي ۋە شىركەتنىڭ قەۋەت سانى بەك ئېگىز بولمىسا، پەلەمپەيدىن مېڭىپ بەرگەندە، يۈرەك ـ ئۆپكە ئىقتىدارى ۋە مۇسكۇل كۈچىنى ئاشۇرغىلى بولىدۇ.
3. ھەر كۈنى ئوخشاش بولمىغان مېۋە ۋە كۆكتاتلاردىن كۆپرەك يېيىش: مېۋە ۋە كۆكتاتنىڭ ئىسسىقلىق مىقدارى بىر قەدەر تۆۋەن، تالاسى يۇقىرى، ئۇنىڭ ئۈستىگە تەركىبىدە ئوكسىدلىنىشقا قارشى رېئاكتىپ مول بولۇپ، ئۈچ يۇقىرى كېسەللىكنىڭ ئالدىنى ئېلىشقا پايدىلىق بولۇپ، يۈرەك مېڭە قان تومۇر ساغلاملىقىنى ئىلگىرى سۈرىدۇ.

4. ھەر كۈنى ناشتا قىلىش: ئەتىگەندە مەيلى قانچىلىك ئالدىراش بولۇڭ، ناشتىنى چوقۇم قىلىڭ. ناشتىدا ئازراق مېۋە ـ چېۋە، سۇلۇ يارمىسى، بۇغداي يارمىسى ياكى بۇغداي بولكىسى، ياكى سۇدا پىشۇرۇلغان چۆپ، پىشۇرۇلغان تۇخۇم، كەرەپشە ئۇمىچىنى ئىستېمال قىلىش، مايدا پىشۇرۇلغان يېمەكلىك ۋە تۇزلانغان كۆكتاتلارنى ئاز يېيىشنى تەۋسىيە قىلىمىز.

5. تەركىبىدە شېكەر بولغان ئىچىملىكلەرنى ئىچىشتىن ساقلىنىش: شېكەر قوشۇلسا ئېنېرگىيە يۇقىرى بولغاندىن باشقا، ئۇنىڭ تەركىبىدە ھېچقانداق ئوزۇقلۇق ماددا (مەسىلەن: ۋىتامىن ۋە مىنېرال ماددىلار) بولمايدۇ، ئەكسىچە بەدەن ئېغىرلىقىنى ئاسانلا ئاشۇرۇپ، سېمىزلىك خەۋپىنى كەلتۈرۈپ چىقىرىدۇ، شۇڭا تەركىبىدە شېكەر بولغان ئىچىملىكلەرنى ئاز ئىچىش تەۋسىيە قىلىنىدۇ، مەسىلەن: مېۋە شەربىتى، شۆبى، كولا، ئەتكەن چاي قاتارلىقلار، قايناقسۇ، مىنېرال سۇ، ساپ سۇ ۋە سۇس چاي قاتارلىقلارنى كۆپرەك ئىچىش كېرەك.
6. ھەر كۈنى مۇۋاپىق مىقداردا قاتتىق پوستلىق مېۋىلەرنى يېيىش: قاتتىق پوستلىق مېۋىلەر ياڭاق، ئۆرۈك مېغىزى، قارىغاي ئۇرۇقى، مۇقاتىل، پىستە قاتارلىقلارنى ئۆز ئىچىگە ئالىدۇ، ئۇلارنىڭ تەركىبىدە تويۇنمىغان ياغ كىسلاتاسى ۋە تالا مول بولغاچقا يۈرەككە پايدىلىق.

ئۇششاق-چۈششەك يېمەكلىكلەرنى يېيىشكە توغرا كەلگەندە، بەرەڭگە قەلەمچىسى، پېچىنە-پىرەنىك، قەنت ـ گېزەك تۈرىدىكى يېمەكلىكلەرنى ئەمەس، بەلكى قاتتىق پوستلۇق مېۋىلەردىن سەي ياكى سالات قىلىپ يېيىش، ئۇن تامىقى ۋە باشقا قورۇمىلاردا قاتتىق پوستلۇق مېۋىلەرنى گۆشنىڭ ئورنىغا دەسسىتىشكە بولىدۇ. لېكىن قاتتىق پوستلۇق مېۋىلەرنىمۇ بەك كۆپ يېيىشكە بولمايدۇ، ھەر كۈنى 30 گىرام ئىچىدە، مەسىلەن: ياڭاقتىن 3 ـ 4 تال، قارىغاي ئۇرۇقىدىن ئىككى سىقىم يېيىشنى تەۋسىيە قىلىمىز.

7. بېلىقنى كۆپ يېيىش: قارا گۆش (كالا، قوي گۆشى) ئەمەس، بەلكى ھەر ھەپتىدە 3 ـ 4 بېلىق ياكى باشقا تۈردىكى دېڭىز مەھسۇلاتلىرىنى يېيىشنى تەۋسىيە قىلىمىز، بېلىق تۈرىدىكىلەرنىڭ تەركىبىدە ئ‍ومېگا ـ 3 ياغ كىسلاتاسى مول بولۇپ، يۈرەك، چوڭ مېڭە ۋە بەدەن ئېغىرلىقىغا پايدىلىق.

8. چوڭقۇر نەپەس ئېلىش: ھەر كۈنى بىر نەچچە مىنۇت ئاستا ھەم چوڭقۇر نەپەس ئېلىشنى ئ‍ادەت قىلغاندا ئ‍ۆزىنى ئەركىن قويۇپ بېرىشىڭىزگە ياردەم بېرىپ، كەيپىياتىڭىزنى ياخشىلايدۇ، قان بېسىمىنى تۆۋەنلىتىپ، يۈرەك رىتىمىنى تۇراقلاشتۇرۇشقا پايدىلىق.

9. قولنى پات ـ پات يۇيۇپ تۇرۇش: يېڭى تىپلىق تاجسىمان ئۆپكە ياللۇغى ۋىرۇسى يۇقۇم ئەھۋالى كۆرۈلگەن ئەھۋالدا، دائىم سوپۇن، ئىسپىرت، قول يۇيۇش سۇيۇقلۇقى بىلەن قول يۇيۇپ، تارقىلىشچان زۇكام، ئۆپكە ياللۇغى ۋە باشقا يۇقۇملىنىشتىن ساقلىنىش تەكلىپىنى بېرىمىز، بۇلارنىڭ ھەممىسى يۈرەك ساغلاملىقىنى قوغداشقا پايدىلىق.
10. بەخت تۇيغۇسىنى يۇقىرى كۆتۈرۈش: ھەر كۈنى ئازراق ۋاقىت سەرپ قىلىپ خۇشاللىق ئىزدەش، ئىجابىي ئاكتىپ كەيپىياتنى ساقلاش، ئۆزىنىڭ بەخت تۇيغۇسىنى يۇقىرى كۆتۈرۈش تەن ساغلاملىق، ئۇزۇن ئۆمۈر كۆرۈش بىلەن زىچ مۇناسىۋەتلىك. سەلبىي كەيپىياتتىن ساقلىنىش كېرەك، مەسىلەن: تىت-تىت بولۇش، غەزەپلىنىش، ئەندىشە قىلىش، قايغۇرۇش قاتارلىقلارنىڭ ھەممىسى يۇقىرى قان بېسىمى ۋە يۈرەك كېسىلىگە گىرىپتار بولۇش خەۋپىنى ئۆرلىتىۋېتىدۇ.

ئەمەلىيەتتە، بۇ 10 ئ‍اددىي ئۇسۇل ئازراقمۇ تەس ئەمەس، ئەمما ئۇزۇنغا بەرداشلىق بېرىش ئۈچۈن بەلگىلىك ئىرادە بولۇشى كېرەك، كۆپچىلىك بۇ كىچىك ئۆزگىرىشلەرنى تۇرمۇشىمىزغا سىڭدۈرۈپ، سالامەتلىكىمىز ئۈچۈن غەيرەت قىلايلى.

قوللاش شۇنچىلىك ئاددى ئەڭ ئاستىدىكى   بەلگىسىنى بېسىپ قويارسىز، رەھمەت!