མཐུན་སྒྲིལ་སྡེ་ཁུལ་གྱི་མཛའ་མཐུན་བརྩེ་བ།
“སྦྱིན་བདག་ཁྲེང་ལགས། ཉེ་ལམ་ཚོང་ཅི་འདྲ་རེད། དགུན་ཁ་ཡིན་པས་ནམ་རྒྱུན་ཚོང་ཁང་དུ་སྡོད་སྐབས་ཆུ་གློག་དྲོད་གསུམ་ལ་ངེས་པར་དུ་མཉམ་འཇོག་བྱས་ཏེ། ཚོང་ཁང་དང་རང་གི་བདེ་འཇགས་ཁག་ཐེག་བྱེད་དགོས། ང་ཚོས་རོགས་རམ་བྱེད་དགོས་ས་འདྲ་ཡོད་ཚེ་བཤད་ཆོག”
“ནམ་ཟླ་ཇེ་འཁྱག་ཡིན་པས་རྒན་པ་རྣམས་ལ་དོན་དག་གལ་ཆེན་མེད་ན་སྒོར་མ་འགྲོ། དཀའ་ཁག་ཅི་ཞིག་ཡོད་ན་ང་ཚོར་འབྲེལ་བ་བྱོས་དང་གང་མྱུར་གྱིས་ཐོན་ཡོང་།”
ཟླ11པའི་ཚེས20ཉིན། ཡུས་ཧྲུའུ་བོད་རིགས་རང་སྐྱོང་ཁུལ་ཡུས་ཧྲུའུ་གྲོང་ཁྱེར་སྐྱེ་རྒུ་སྲང་ལམ་གྱི་འཐབ་ཕྱོགས་གཅིག་གྱུར་ཆེད་མངགས་ལས་བྱེད་པ་བསོད་དབང་ལྷ་མོ་སྔ་མོ་ནས་མཐུན་སྒྲིལ་སྡེ་ཁུལ་དུ་ཐོན་ཡོད་ཅིང་། སྡེ་ཁུལ་གྱི་ལས་བྱེད་མི་སྣ་དང་མཉམ་དུ་མང་ཚོགས་ཀྱི་འཚོ་བའི་གནས་ཚུལ་རྒྱུས་ལོན་བྱས་ཏེ། ཚང་མར་དགུན་དུས་ཀྱི་བདེ་འཇགས་བྱ་བར་མཉམ་འཇོག་བྱ་དགོས་པའི་དྲན་སྐུལ་བྱས།
“མཛུ་གུ་ལྔ་བཅིངས་ཁུ་ཚུར་ལྟར་ཉེ་བའི་ལོ་ཤས་རིང་ང་ཚོས་དྲིལ་སྒྲོག་སློབ་གསོར་ཤུགས་བསྣན་ཏེ། བྱ་འགུལ་སྣ་ཚོགས་སྤེལ་ནས་མི་རིགས་སོ་སོའི་མང་ཚོགས་ཀྱི‘གཅིག་མཐུན་ཚོགས་པ་བརྟན་པོར་འཛུགས་པ་དང་ཀྲུང་ཧྭ་ཁྱིམ་ཚང་གཅིག་ལྟར་བརྩེ་བའི’དུས་རབས་ཀྱི་སྙིང་སྟོབས་སྔོག་འདོན་དང་འགྲེམ་སྟོན་གང་ལེགས་བྱེད་པ་དང་། མི་རིགས་སོ་སོའི་མང་ཚོགས་བར་གྱི་བརྩེ་སེམས་ཟབ་མོ་མཚོན་པ། ཁོ་ཚོར་མི་རིགས་མཐུན་སྒྲིལ་ལ་ཐུན་མོང་གི་ངོས་འཛིན་ཟབ་མོ་ཡོང་བར་སྐུལ་སྤེལ་གཏོང་བ། ཚང་མའི་བར་གྱི་སྤེལ་རེས་ལ་སྐུལ་འདེད་གཏོང་བ་བཅས་བྱས་པས།ཁོངས་གཏོགས་ཁུལ་གྱི་སྡོད་དམངས་ཀྱིས་མི་རིགས་མཐུན་སྒྲིལ་ཡར་ཐོན་ལ་ངོས་འཛིན་ཐུབ་ཚད་དང་ཞུགས་ཚད་མངོན་གསལ་དོད་པོས་མཐོ་རུ་ཕྱིན་ཡོད། གཞན་ཡང་གོ་རིམ་ལྡན་པའི་སྒོ་ནས་སྡོད་དམངས་སྡེ་ཁུལ་བཅོས་སྐྱོང་ནང་ཞུགས་པར་ཁྲིད་སྟོན་དང་སྡོད་དམངས་ཀྱི་འཚོ་བའི་དགོས་མཁོ་སྐོང་བ། སྡོད་དམངས་ལ་དངོས་ཕན་བསྐྲུན་པ་བཅས་བྱས་ཏེ་མི་རིགས་སོ་སོའི་མང་ཚོགས་བར་བརྩེ་སེམས་ཟབ་མོ་ལྡན་པ་དང་ཕན་ཚུན་རོགས་རེས་བྱེད་པར་རྒྱུན་ཆད་མེད་པར་ཁྲིད་སྟོན་བྱས་པས། སྲང་ལམ་དེ་མི་རྣམས་འདུས་སྡོད་མང་བ་དང་། དམངས་ལ་ཞབས་འདེགས་ཞུ་བར་དྲོད་ཁོལ་ལྡན་པ། མི་རིགས་མཉམ་འདྲེས་གཏིང་ཟབ་པ། སྤྱི་ཚོགས་བཅོས་སྐྱོང་ལ་ཞིབ་ཚགས་ལྡན་པ། མཉམ་སྐྲུན་དང་མཉམ་བཅོས། མཉམ་སྤྱོད་བཅས་ཀྱི་བདེ་སྐྱིད་ལྡན་པའི‘སེ་འབྲུའི’ཁྱིམ་གཞིས་ཤིག་ཏུ་བསྐྲུན་ཡོད”ཅེས་སྐྱེ་རྒུ་སྲང་ལམ་ཏང་གི་ལས་དོན་ཨུ་ལྷན་གྱི་ཧྲུའུ་ཅི་འགྱུར་མེད་བསྟན་འཛིན་གྱིས་དེ་ལྟར་བཤད། །
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
