ཐུན་ཏེ་རྫོང་སྤྱི་བདེ་ཅུས་ཀྱིས་འབྲེལ་ཡོད་སྡེ་ཁག་དང་མཉམ་འབྲེལ་སྒོས་བདེ་འཇགས་ཐད་ཀྱི་མངོན་མེད་རྐྱེན་ངན་ལ་ཞིབ་བཤེར་བྱས།
འཕྲིན་གཏོང་པ། ཚེ་རིང་དོན་གྲུབ།
སྔར་ལས་ལྷག་པའི་སྒོ་ནས་ཁོངས་གཏོགས་ཁུལ་གྱི་སློབ་གྲྭ་དང་སྨན་ཁང་སོགས་མི་སྣ་འདུ་འཛོམས་ཆེ་བའི་ས་ཁུལ་གྱི་བདེ་འཇགས་སྔོན་འགོག་བྱ་བར་ཤུགས་སྣོན་པ་དང་མགོ་ཁུངས་ནས་བདེ་འཇགས་དོན་རྐྱེན་སྣ་ཚོགས་འབྱུང་བ་སྔོན་འགོག་བྱས་ཏེ། དུས་ལྟར་སྤྱི་ཚོགས་སྟེང་གི་མངོན་མེད་རྐྱེན་ངན་སེལ་ཆེད། ཉེ་སྔོན། ཐུན་ཏེ་རྫོང་སྤྱི་བདེ་ཅུས་བདེ་འཇགས་བཅོས་སྐྱོང་རུ་ཆེན་གྱིས་ནགས་ཚལ་ཉེན་རྟོག་པ་དང་རྫོང་སློབ་གསོ་ཅུས། རྫོང་ཕྱོགས་བསྡུས་ཁྲིམས་འཛིན་ཅུས་སོགས་སྡེ་ཁག་དང་མཉམ་འབྲེལ་སྒོས་སློབ་གྲྭ་དང་སྨན་ཁང་གི་བདེ་འཇགས་ཐད་ཀྱི་མངོན་མེད་རྐྱེན་ངན་ལ་ཞིབ་བཤེར་བྱས།
ཞིབ་བཤེར་ཁྲོད། དམངས་དམག་གིས་སློབ་གྲྭ་དང་སྨན་ཁང་གི་མི་སྣ་དང་དངོས་པོ། ལག་རྩལ་བཅས་ཀྱི་སྔོན་འགོག་སྒྲིག་ཆས་ཀྱི་འཁོར་སྐྱོད་གནས་ཚུལ་དང་བདེ་སྲུང་མི་སྣ་བཀོད་སྒྲིག ལས་རེས་ལྟ་སྲུང་། འབར་གས་སྔོན་འགོག་ཡོ་བྱད་དང་མེ་ཟོན་སྒྲིག་ཆས་བཀོད་སྒྲིག སྲུང་སྐྱོང་དོ་དམ་དང་བརྙན་ལམ་གྱི་ལྟ་སྐུལ་ཚོད་འཛིན་སྒྲིག་ཆས་འཁོར་སྐྱོད་སོགས་ཀྱི་གནས་ཚུལ་གཙོ་བོར་བཟུང་ནས་ཁྱོན་ཡོངས་ལ་ཞིབ་བཤེར་ནན་མོ་བྱས་པ་དང་། དཔྱད་གཞིའི་ཡིག་རིགས་ལ་ལྟ་ཀློག་བྱེད་པའི་བྱེད་ཐབས་བརྒྱུད་སློབ་གྲྭ་དང་སྨན་ཁང་གིས་བདེ་འཇགས་སྒྲིག་སྲོལ་ལམ་ལུགས་སོ་སོ་དོན་འཁྱོལ་བྱས་ཚུལ་ལ་ཡུལ་དངོས་སུ་མཛུབ་སྟོན་གནང་བ་མ་ཟད། སློབ་གྲྭ་དང་སྨན་ཁང་གི་འགན་འཁུར་མི་སྣས་བདེ་འཇགས་གཙོ་གནད་འགན་འཁྲི་གཟབ་ནན་གྱིས་ལག་བསྟར་བྱེད་པ་དང་རྒྱུན་རྣམ་རང་བཞིན་གྱིས་བདེ་འཇགས་ཐད་ཀྱི་མངོན་མེད་རྐྱེན་ངན་ལ་ཞིབ་བཤེར་བྱེད་པ། སྔོན་འགོག་བྱེད་ཐབས་སོ་སོ་གཟབ་ནན་གྱིས་ལག་བསྟར་བྱས་ཏེ། དངོས་གནས་བདེ་འཇགས་འགོག་སྲུང་བརྟན་པོར་འཛུགས་པ་དང་། སྨན་ཁང་དང་སློབ་གྲྭའི་བདེ་འཇགས་འགོག་སྲུང་སྒྲིག་གཞི་འཐུས་ཚང་དུ་གཏོང་བར་ལྟ་སྐུལ་བྱས་ཏེ། འཕྲལ་བསྟུན་ཐག་གཅོག་ལམ་སྲོལ་དང་བདེ་སྲུང་མི་སྣའི་གསོ་སྦྱོང་། དེ་མིན་ནང་ཁུལ་གྱི་སྐོར་ཞིབ་ལམ་ལུགས་དང་འགལ་རྩོད་སོགས་ཀྱི་མངོན་མེད་རྐྱེན་ངན་གྲལ་བཤེར་དང་མེད་པར་གཏོང་བའི་ལས་དོན་ཡག་པོར་སྒྲུབ་ནས། རིམ་པ་བཞིན་འགན་འཁྲི་ཏན་ཏིག་ངང་འཁུར་བ་དང་ལས་དོན་དོན་འཁྱོལ་ལ་ཤུགས་སྣོན་བཅས་བྱས་ཏེ། སྨན་ཁང་དང་སློབ་གྲྭའི་སྒྲིག་ལམ་སོགས་ཀྱི་བྱེད་ཐབས་ཁག་དོན་འཁྱོལ་བྱེད་པར་འགན་ལེན་བྱས།
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
