ང་ཚོས་མཉམ་དུ《དམངས་དོན་ཁྲིམས་གཞུང》སློབ།
དོན་ཚན་བརྒྱ་དང་རེ་གཅིག་པ། དམངས་དོན་བྱེད་པོས་ལས་ཚབ་པ་བརྒྱུད་ནས་དམངས་དོན་བཅའ་ཁྲིམས་བྱ་སྤྱོད་སྤེལ་ཆོག
བཅའ་ཁྲིམས་ཀྱི་གཏན་འབེབས་དང་དོ་བདག་བར་བཞག་པའི་གྲོས་དན་ནམ་དམངས་དོན་བཅའ་ཁྲིམས་བྱ་སྤྱོད་ཀྱི་ངོ་བོ་ལྟར་ན། དོ་བདག་རང་ཉིད་ཀྱིས་དངོས་སུ་སྤེལ་དགོས་པའི་དམངས་དོན་བཅའ་ཁྲིམས་བྱ་སྤྱོད་ཡིན་ན་ལས་ཚབ་བྱས་མི་ཆོག
དོན་ཚན་བརྒྱ་དང་རེ་གཉིས་པ། ལས་ཚབ་པས་ལས་ཚབ་ཀྱི་དབང་མཚམས་ནང་ཁོངས་སུ་ལས་ཚབ་བྱ་ཡུལ་གྱི་མིའི་མིང་ཐོག་ནས་དམངས་དོན་བཅའ་ཁྲིམས་བྱ་སྤྱོད་སྤེལ་བ་ཡིན་ན། ལས་ཚབ་བྱ་ཡུལ་གྱི་མི་ལ་ནུས་པ་ཐོན་པ་ཡིན།
དོན་ཚན་བརྒྱ་དང་རེ་གསུམ་པ། ལས་ཚབ་ལ་མངག་བཅོལ་ལས་ཚབ་དང་ཁྲིམས་བཀོད་ལས་ཚབ་གཉིས་ཡོད།
མངག་བཅོལ་ལས་ཚབ་པས་ལས་ཚབ་བྱ་ཡུལ་གྱི་མིའི་མངག་བཅོལ་ལྟར་ལས་ཚབ་དབང་ཆ་སྤྱོད་དགོས། ཁྲིམས་བཀོད་ལས་ཚབ་པས་བཅའ་ཁྲིམས་ཀྱི་གཏན་འབེབས་ལྟར་ལས་ཚབ་དབང་ཆ་སྤྱོད་དགོས།
དོན་ཚན་བརྒྱ་དང་རེ་བཞི་པ། ལས་ཚབ་པས་ལས་ཚབ་འགན་འཁྲི་མ་ཁུར་པའམ་ལས་ཚབ་འགན་འཁྲི་ཆ་ཚང་མ་ཁུར་པའི་རྐྱེན་གྱིས་ལས་ཚབ་བྱ་ཡུལ་གྱི་མི་ལ་གནོད་རྐྱེན་བཟོས་པ་ཡིན་ན། དམངས་དོན་འགན་འཁྲི་འཁུར་དགོས།
ལས་ཚབ་པ་དང་བལྟོས་བཅས་མིའི་བར་མ་རུང་ལྐོག་འབྲེལ་བྱས་ནས་ལས་ཚབ་བྱ་ཡུལ་གྱི་མིའི་ཁྲིམས་མཐུན་ཁེ་དབང་ལ་གནོད་རྐྱེན་བཟོས་པ་ཡིན་ན། ལས་ཚབ་པ་དང་བལྟོས་བཅས་མིས་ཞོར་འདྲུད་འགན་འཁྲི་འཁུར་དགོས།
དོན་ཚན་བརྒྱ་དང་རེ་ལྔ་པ། ཡིག་ཐོག་ནས་མངག་བཅོལ་ལས་ཚབ་ཀྱི་དབང་སྐུར་བའི་ཚེ། དབང་བསྐྱུར་བའི་མངག་བཅོལ་ཡི་གེའི་ནང་དུ་ལས་ཚབ་པའི་རུས་མིང་ངམ་མིང་། ལས་ཚབ་དོན་ཚན། དབང་མཚམས། དུས་བཅད་བཅས་གསལ་པོར་འགོད་དགོས་པར་མ་ཟད། ད་དུང་ལས་ཚབ་བྱ་ཡུལ་གྱི་མིས་མིང་འགོད་པའམ་ཐེལ་ཙེ་རྒྱག་དགོས།
དོན་ཚན་བརྒྱ་དང་རེ་དྲུག་པ། ལས་ཚབ་དོན་ཚན་གཅིག་ལ་ལས་ཚབ་པ་དུ་མ་ཡོད་ན། ཐུན་མོང་ཐོག་ལས་ཚབ་དབང་ཆ་སྤྱོད་དགོས། ཡིན་ན་ཡང་དོ་བདག་བར་དུ་ལོགས་སུ་གྲོས་དན་བཞག་ཡོད་པ་འདིའི་ཁོངས་སུ་མི་ཚུད།
དོན་ཚན་བརྒྱ་དང་རེ་བདུན་པ། ལས་ཚབ་པས་ལས་ཚབ་དོན་ཚན་དེ་ཁྲིམས་འགལ་ཡིན་ཚུལ་ཤེས་པའམ་ཤེས་དགོས་བཞིན་དུ་ལས་ཚབ་བྱ་སྤྱོད་སྤེལ་བ་དང་། ཡང་ན་ལས་ཚབ་བྱ་ཡུལ་གྱི་མིས་ལས་ཚབ་པའི་ལས་ཚབ་བྱ་སྤྱོད་དེ་ཁྲིམས་འགལ་ཡིན་ཚུལ་ཤེས་པའམ་ཤེས་དགོས་ཀྱང་ངོ་རྒོལ་གྱི་འདོད་བློ་མ་བསྟན་ན། ལས་ཚབ་བྱ་ཡུལ་གྱི་མི་དང་ལས་ཚབ་པ་གཉིས་ཀས་ཞོར་འདྲུད་འགན་འཁྲི་འཁུར་དགོས།
དོན་ཚན་བརྒྱ་དང་རེ་བརྒྱད་པ། ལས་ཚབ་པས་ལས་ཚབ་བྱ་ཡུལ་གྱི་མིའི་མིང་ཐོག་ནས་རང་ཉིད་དང་ལྷན་དུ་དམངས་དོན་བཅའ་ཁྲིམས་བྱ་སྤྱོད་སྤེལ་མི་ཆོག ཡིན་ན་ཡང་ལས་ཚབ་བྱ་ཡུལ་གྱི་མི་མོས་མཐུན་བྱུང་བའམ་རྗེས་བྱུང་ཁས་ལེན་བྱས་པ་འདིའི་ཁོངས་སུ་མི་ཚུད།
ལས་ཚབ་པས་ལས་ཚབ་བྱ་ཡུལ་གྱི་མིའི་མིང་ཐོག་ནས་རང་ཉིད་དང་དུས་གཅིག་ཏུ་ལས་ཚབ་བྱེད་པའི་མི་གཞན་དག་དང་ལྷན་དུ་དམངས་དོན་བཅའ་ཁྲིམས་བྱ་སྤྱོད་སྤེལ་མི་ཆོག ཡིན་ན་ཡང་ལས་ཚབ་བྱ་ཡུལ་ཕྱོགས་གཉིས་ཀ་མོས་མཐུན་བྱུང་བའམ་རྗེས་བྱུང་ཁས་ལེན་ཐོབ་པ་འདིའི་ཁོངས་སུ་མི་ཚུད།
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
