مەردان مەمتىمىن ئەنئەنىۋى ئاشپەزلىككە بولغان چوڭقۇر چۈشەنچىسى ۋە يېڭىلىق يارىتىشچانلىقىغا تايىنىپ تەييارلاپ مۇسابىقىگە قاتناشتۇرغان يېمەكلىك «شىنجاڭنىڭ ئۈچ گۆھىرىنىڭ بىرى بىھى»، «شىنجاڭنىڭ يۇلغۇن زىخىدا پىشۇرۇلغان بېلىق كاۋىپى» باھالىغۇچىلارنىڭ ئېتىراپ قىلىشىغا ئېرىشتى. خوتەن ناھىيەلىك ئالىي تېخنىك ئىشچىلار مەكتىپىنىڭ ۋەكىلى بولۇش سۈپىتى بىلەن، ئۇنىڭ مۇۋەپپەقىيىتى ئۆزىگە شان - شەرەپ ئېلىپ كېلىپلا قالماي، تېخىمۇ مۇھىمى مەكتەپكە شان - شەرەپ ئېلىپ كەلدى، شۇنىڭ بىلەن بىللە، يەنە شىنجاڭ قورۇمىلىرىنىڭ پۈتۈن مەملىكەت بويىچە تونۇلۇش دەرىجىسىنى ئۆستۈردى.
مەردان مەمتىمىن مۇنداق دېدى: «بۇ قېتىمقى مۇسابىقە مەن ئۈچۈن بىر قېتىملىق قىممەتلىك پۇرسەت بولدى، مەن كۆپ يىلدىن بۇيانقى ئۆگەنگەنلىرىم ۋە ئەمەلىي ماھارىتىمنى مۇسابىقە مەيدانىدا نامايان قىلدىم. بۇنىڭدىن كېيىن مۇسابىقە جەريانىدىكى ھېس قىلغانلىرىم ۋە ئۆگەنگەنلىرىمنى ئوقۇتۇش جەريانىغا سىڭدۈرۈپ، ئوقۇغۇچىلارنىڭ يېڭىلىق يارىتىش ئىقتىدارى ۋە ئەمەلىي ماھارىتىنى يېتىلدۈرۈپ، يېمەك - ئىچمەك كەسپىنىڭ تەرەققىياتى ئۈچۈن تېخىمۇ كۆپ كۈچ قوشىمەن».
ئىگىلىنىشىچە، مەملىكەتلىك ئاشپەزلىك ماھارىتى مۇسابىقىسى 1983 - يىلى باشلانغاندىن بۇيان، ھەر بەش يىلدا بىر نۆۋەت ئۆتكۈزۈلگەن بولۇپ، يېمەك - ئىچمەك كەسپى بويىچە كۆلىمى ئەڭ چوڭ، ئەڭ نوپۇزلۇق، قاپلاش دائىرىسى ئەڭ كەڭ كەسپىي مۇسابىقىلەرنىڭ بىرى ھېسابلىنىدىكەن. بۇ قېتىم جۇڭگو ئاشپەزلىك جەمئىيىتى، جۇڭگو ئىشقا ئورۇنلىشىش بويىچە تەربىيەلەش تېخنىكا يېتەكچىلىك مەركىزى، جۇڭگو مالىيە - سودا، يېنىك سانائەت، توقۇمىچىلىق، تاماكا ئىشچىلار ئۇيۇشمىسى مەملىكەتلىك كومىتېتى، جۇڭگو سودا بىرلەشمىسى قاتارلىق ئورۇنلار بىرلىكتە باش بولۇپ ئۇيۇشتۇرغان«ليەنخې لىخۇا يېمەك - ئىچمەك تەييارلاش لوڭقىسى» 9 - نۆۋەتلىك مەملىكەتلىك ئاشپەزلىك ماھارىتى مۇسابىقىسى پۈتۈن مەملىكەتتىكى 2700دىن ئارتۇق ماھىرنى مۇسابىقىگە قاتنىشىشقا جەلپ قىلدى.
(تەرجىمە قىلغۇچى: سۇلتانمۇرات ئابلەت)
