ئىسلاھات ـ تەرەققىيات يېڭى مەنزىلىنى جاسارەت بىلەن ئېچىش كېرەك

时事 2024-12-13 18:58 新疆

«ئىسلاھات ـ تەرەققىيات يېڭى مەنزىلىنى جاسارەت بىلەن ئېچىش كېرەك»

− باش شۇجى جۇڭگو ئىقتىسادىنىڭ يۇقىرى سۈپەتلىك تەرەققىياتىنىڭ جاسارەت بىلەن ئالغا ئىلگىرىلىشىگە يېتەكچىلىك قىلدى

□خەلق گېزىتى مۇخبىرلىرى ۋاڭ شياۋدۇڭ، ۋۇ چيۇيۈ، ۋاڭ خاۋ

ئالغا ئىلگىرىلەش يولىدا، قاتمۇقات تاغ ـ چوققىلاردىن ھالقىپ ئۆتۈپ، ئويمان ـ دۆڭلەرنى تۈزلەپ داغدام يول ئاچتۇق.

2024 ـ يىلى «ئاچقۇچلۇق بىر يىل»، شۇنداقلا «مۇھىم يىل»، ئىسلاھات، تەرەققىيات، مۇقىملىق ۋەزىپىسى مۈشكۈل ۋە ئېغىر بولدى.

بۇ بىر يىلدا، خەلقئارا مۇھىتتا كۈچلۈك بوران ـ چاپقۇن بار، دۆلەت ئىچى تەرەققىياتىدا خەۋپ ـ خەتەر، خىرىس بار؛

بۇ بىر يىلدا، ئۆتكەلگە ھۇجۇم قىلىپ قىيىنچىلىقلارنى يېڭىشتە قەيسەرلىك بىلەن جان تىكىپ كۈرەش قىلىش بار، ئىسلاھات، يېڭىلىق يارىتىشتا ئىرادىدىن قايتماسلىق بار.

ۋاقىت ۋە ۋەزىيەتنى كۆزەتتى، خەۋپ ـ خەتەر ۋە پۇرسەتنى تەھلىل قىلدى.

يولداش شى جىنپىڭ يادرولۇقىدىكى پارتىيە مەركىزىي كومىتېتى پۈتۈن پارتىيە، پۈتۈن مەملىكەتتىكى ھەر مىللەت خەلقنى ئىتتىپاقلاشتۇرۇپ، يېتەكلەپ، بېسىمغا تاقابىل تۇرۇپ، قىيىنچىلىقلارنى يېڭىپ، سالماقلىق بىلەن ۋەزىيەتكە ماسلىشىپ، ئۇنىۋېرسال تەدبىر قوللاندى، دۆلىتىمىز ئىقتىسادىنىڭ ئايلىنىشى ئومۇمىي جەھەتتىن مۇقىم بولدى، مۇقىملىق ئاساسىدا ئىلگىرىلىدى، پۈتۈن يىللىق ئىقتىساد، جەمئىيەت تەرەققىياتىدىكى ئاساسلىق نىشان ـ ۋەزىپىلەر ئوڭۇشلۇق تاماملىنىدۇ، جۇڭگوچە زامانىۋىلاشتۇرۇشتا يېڭى، پۇختا قەدەم تاشلىنىدۇ، «ئىسلاھات ـ تەرەققىيات يېڭى مەنزىلىنى جاسارەت بىلەن ئېچىش كېرەك».

قىيىنچىلىق، خىرىسقا تاقابىل تۇرۇپ، پۈتۈن يىللىق ئىقتىساد، جەمئىيەت تەرەققىياتى نىشان ـ ۋەزىپىلىرىنى تىرىشىپ ئىشقا ئاشۇرۇش

«بۇ جاي بوران ـ چاپقۇنغا بەرداشلىق بېرەلەيدۇ، كەلگۈسى تېخىمۇ پارلاق.» 11 ـ ئايدا، كەچ كۈزدىكى جىڭچۇ تۇپرىقىغا قەدەم قويدى، باش شۇجى شى جىنپىڭنىڭ قەتئىي، كۈچلۈك سۆزلىرى سەمىمىي ئۈمىدكە تولغانىدى، شۇنداقلا ئۇنىڭدىن ئۆزىگە ئىشىنىدىغان تەمكىنلىك چىقىپ تۇراتتى.

ئىككى ئەگرى سىزىقتىن جۇڭگو ئىقتىسادىغا نەزەر سېلىش.

بىر ئەگرى سىزىق، ئالدىنقى ئۈچ پەسىلدىكى ئىقتىسادنىڭ ئېشىش سۈرئىتى بولۇپ، 1 ـ پەسىلدە %5.3، 2 ـ پەسىلدە %4.7، 3 ـ پەسىلدە %4.6 بولدى، گەرچە داۋالغۇش بولسىمۇ، ئومۇمىي يۈزلىنىش %5 ئەتراپىدىكى كۆزلىمە نىشاننى كۆرسىتىپ تۇراتتى.

يەنە بىر ئەگرى سىزىق، ياسىمىچىلىق كەسپىدىكى سېتىۋېلىش دىرېكتورى كۆرسەتكۈچى 8 ـ ئايدىكى تۆۋەن نۇقتىدىن ئۆرلەپ، 10 ـ ئايدا كېڭىيىش دائىرىسىگە قايتىپ كەلدى ھەم 11 ـ ئايدا داۋاملىق 0.2 پىرسەنت پوئېنت ئۆرلەپ %50.3كە يېتىپ، ئىقتىسادنىڭ ياخشىلىنىش ۋەزىيىتىنىڭ يەنىمۇ ئىلگىرىلىگەن ھالدا مۇقىملاشقانلىقىنى كۆرسىتىپ بەردى.

ئاساس مۇستەھكەملىنىپ مۇقىم بولدى، گۈللىنىش ۋەزىيىتى قايتا كۆرۈلدى، بۇ يىلقى قالتىس مۇساپىنى ئەسلىسەك، بۇنداق يۈزلىنىش تەستە قولغا كەلدى، نۇرغۇن خەلقئارا زاتلار: «بۇ، جۇڭگو ئىقتىسادىنىڭ كۈچلۈك ئەۋرىشىملىكى ۋە غايەت زور يوشۇرۇن كۈچىنى نامايان قىلدى» دەپ ئىجابىي باھا بەردى.

2024 ـ يىلىغا كەلگەندە، جۇڭگونىڭ ئىقتىساد پاراخوتى يېڭى شىددەتلىك ئېقىن ۋە خەتەرلىك ساھىلغا دۇچ كەلدى −

سودا قورۇقچىلىقى، يەككە تەرەپچىلىك ۋە جۇغراپىيەلىك سىياسىي توقۇنۇش گىرەلىشىپ، دۇنيا ئىقتىسادىنىڭ ئايلىنىشىنىڭ ئېنىقسىزلىقىنى ئاشۇرۇۋەتتى. «دۇنيا ئىقتىسادى ئىلگىرىلىمەي توختاپ قالدى» «يەرشارىۋى ئىقتىساد تۆۋەن ئېشىش، يۇقىرى قەرز يولى خەۋپ ـ خەتىرىگە دۇچ كەلدى»، خەلقئارا پۇل فوندى تەشكىلاتى ئارقا ـ ئارقىدىن ئاگاھلاندۇرۇش چىقاردى.

دۆلىتىمىزنىڭ ئىقتىسادىي تەرەققىياتى تاشقى مۇھىت ئۆزگىرىشى ئېلىپ كەلگەن پايدىسىز تەسىرگە بىۋاسىتە يۈزلەنگەندىن سىرت، دۆلەت ئىچىدىمۇ ئاساسلىقى ئىچكى ئېھتىياج يېتەرلىك بولماسلىق، ئىقتىسادنىڭ ئايلىنىشىدا بۆلۈنۈش كۆرۈلۈش، نۇقتىلىق ساھەلەردە يوشۇرۇن خەۋپ ـ خەتەر يەنىلا بىرقەدەر كۆپ بولۇش، كونا ـ يېڭى قۇۋۋەتنىڭ ئالمىشىشىدا ۋاقىتلىق قىيىنچىلىق مەۋجۇت بولۇشتەك بەزى قىيىنچىلىق ۋە خىرىسلارغا دۇچ كەلدى.

ئاچقۇچلۇق پەيتتە، ئەڭ چوڭ ئەۋزەللىك قىيىنچىلىق، خىرىسقا تاقابىل تۇرۇشقا ئىشەنچ ۋە جاسارەت بېغىشلىدى.

«دۇنيادىكى ئىككىنچى چوڭ ئىقتىسادىي گەۋدىنى ياخشى باشقۇرۇش ـ باشقۇرالماسلىق، ئىقتىساد، جەمئىيەتنىڭ سىجىل ساغلام تەرەققىياتىنى ساقلاش ـ ساقلىيالماسلىق نېگىزىدىن ئېيتقاندا، پارتىيەنىڭ ئىقتىساد، جەمئىيەت تەرەققىياتىدىكى رەھبەرلىك يادروسىلىق رولىنى ياخشى جارى قىلدۇرۇش ـ قىلدۇرالماسلىقىغا باغلىق».

بۇلتۇر يىل ئاخىرىدىكى مەركەز ئىقتىساد خىزمىتى يىغىنىدا، باش شۇجى شى جىنپىڭ: «ئىشەنچ ۋە جاسارەتنى ئاشۇرۇش كېرەك» دەپ كۆرسەتتى، بۇ يىلقى مەملىكەتلىك ئىككى يىغىندا ئۆمەكلەرنىڭ گۇرۇپپا مۇزاكىرىسىگە قاتناشقاندا: «پۈتكۈل جەمئىيەتنىڭ تەرەققىيات ئىشەنچىنى ئۇرغۇتۇش كېرەك، پارتىيە ئەزالىرى، كادىرلار ئالدى بىلەن ئىشەنچنى چىڭىتىشى، ھەقىقىي تۇتۇپ ئەمەلىي ئىشلىشى كېرەك» دەپ تەكىتلىدى، خەلقئارا سورۇنلاردا:«جۇڭگونىڭ تەرەققىيات ئىستىقبالى پارلاق، بىزدە مۇشۇنداق جاسارەت ۋە ئىشەنچ بار» دەپ جاكارلىدى...

ھەم ئېنىق ئىدىيە يېتەكچىلىكى، ھەم سىستېمىلىق ئىستراتېگىيەلىك پىلانلاش بار.

يىراق كەلگۈسى كۆزلەندى، پارتىيە 20 ـ نۆۋەتلىك مەركىزىي كومىتېتى 3 ـ ئومۇمىي يىغىنىدا ئۇلۇغۋار پىلان تۈزۈپ چىقىلدى، «ئىقتىسادىي تۈزۈلمە ئىسلاھاتىنى يېتەكچى قىلىش» يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇش ئۈچۈن نۇقتىلىق ۋەزىپىلەرنى ئايدىڭلاشتۇردى، ئاساسىي ھۇجۇم يۆنىلىشىنى ئېنىق كۆرسىتىپ بەردى.

كەسكىن تەدبىر بەلگىلەندى، 9 ـ ئاينىڭ 26 ـ كۈنى جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسى يىغىنىدا ئورۇنلاشتۇرما قىلىنىپ، بىر قاتار ئاشۇرۇلما مىقدار سىياسىتى زىچ ئوتتۇرىغا قويۇلدى، ھازىرغا پايدىلىق بولغان، كەلگۈسىگە نەپ يەتكۈزىدىغان بۇ سىياسەتلەر «ماكرولۇق تەڭشەش ـ تىزگىنلەشتىكى بىر قېتىملىق ئابىدىلىك تەدبىر» دەپ تەرىپلەندى.

ئاچقۇچلۇق پەيتتە تەدبىر قوللىنىلىپ، مۇھىم نۇقتىغا كۈچ چىقىرىلدى. ساقلانما مىقدار سىياسىتىنىڭ ئۈنۈملۈك ئەمەلىيلەشتۈرۈلۈشى، ئاشۇرۇلما مىقدار سىياسىتىنىڭ تېز يولغا قويۇلۇشىغا ئەگىشىپ، ئىقتىسادنىڭ ئايلىنىشىدا پائال ئۆزگىرىش بولدى، %5 ئەتراپىدىكى كۆزلىمە نىشاننى ئىشقا ئاشۇرۇش ئىشەنچى كۈچەيدى.

ماكرولۇق تەدبىر بەلگىلەشتە ئىستراتېگىيەلىك پىلان تۈزۈلدى، ئورۇنلاشتۇرما قىلىش، ئەمەلىيلەشتۈرۈش ئىلمىي، كۈچلۈك بولدى. فۇجيەننىڭ تاغ ـ دەريالىرىنى ئارىلىغاندا، چاڭجياڭ ـ خۇەيخې رايونى تۇپرىقىغا بارغاندا، جياڭخەن تۈزلەڭلىكىگە قەدەم قويغاندا، «ئاچقۇچلۇق ئاز سانلىقلار»غا «ئاچقۇچلۇق دەرس»نى ياخشى ئۆتۈپ، باش شۇجى شى جىنپىڭ: «پۈتۈن يىللىق ئىقتىساد، جەمئىيەت تەرەققىياتى نىشان ـ ۋەزىپىلىرىنى تىرىشىپ ئىشقا ئاشۇرۇش كېرەك»دەپ قايتا ـ قايتا تاپىلىدى.

نىشان بوشاشماي چىڭ كۆزلىنىپ، ھەم خىزمەتلەر پۇختا ئىشلەندى، ھەم دادىل بۆسۈش ھاسىل قىلىندى. پارتىيە مەركىزىي كومىتېتىنىڭ كۈچلۈك رەھبەرلىكىدە، جۇڭگو ئىقتىسادى دولقۇن يېرىپ جاسارەت بىلەن ئالغا ئىلگىرىلەپ، «سۈپەتنىڭ ئۈنۈملۈك ئۆسۈشى ۋە مىقدارنىڭ مۇۋاپىق ئېشىشىنى ئىشقا ئاشۇردى».

بېسىمغا تاقابىل تۇردى، ئالدىنقى ئۈچ پەسىلدە ئىقتىسادنىڭ %4.8لىك ئېشىش سۈرئىتى يەرشارىدىكى ئاساسلىق ئىقتىسادىي گەۋدىلەر ئىچىدە يەنىلا ئالدىنقى قاتاردا تۇردى.

مۇقىملىق ئاساسىدا ئىلگىرىلىدى، ئالدىنقى ئۈچ پەسىلدە يۇقىرى تېخنىكىلىق كەسىپلەر سېلىنمىسى ۋە يۇقىرى تېخنىكىلىق ياسىمىچىلىق قوشۇلما قىممىتىنىڭ ئېشىش سۈرئىتى ئومۇمىي سەۋىيەدىن زور دەرىجىدە ئېشىپ ئالدىنقى ئورۇندا تۇردى. قانچىكى يۇقىرى پەن ـ تېخنىكا، يۇقىرى ئۈنۈم، يۇقىرى سۈپەت ئالاھىدىلىكىگە ئىگە ساھەلەرنىڭ تەرەققىياتى شۇنچە ياخشى بولدى.

بولۇپمۇ 9 ـ ئايدىن بۇيان، ئىقتىسادنىڭ ئايلىنىشىدا كۆرۈلگەن پائال ئۆزگىرىش بارغانسېرى كۆپىيىپ، بازار ئىشەنچى كۈچىيىپ، جەمئىيەت كۆزلىمىسى ياخشىلاندى.

بارغانسېرى كۆپ مۇتەخەسسىس، ئالىم مۇنداق قارىدى: دۆلىتىمىزدە 4 ـ پەسىلدە ئىقتىسادنىڭ ئايلىنىشىدا ئومۇمىي جەھەتتىن ئەسلىگە كېلىپ ياخشىلىنىش ۋەزىيىتى نامايان بولدى، پۈتۈن يىللىق ئىقتىساد، جەمئىيەت تەرەققىياتىدىكى ئاساسلىق نىشان ـ ۋەزىپىلەر ئوڭۇشلۇق تاماملىنىدۇ. «سىياسەت ئۈنۈمىنىڭ ئۈزلۈكسىز روشەنلىشىشىگە ئەگىشىپ، پۈتۈن يىللىق ئىقتىسادتا ئالدىنقى مەزگىلدە يۇقىرى بولۇش، ئوتتۇرا مەزگىلدە تۆۋەن بولۇش، ئاخىرقى مەزگىلدە ئۆرلەش ۋەزىيىتى نامايان بولىدۇ» دېدى جۇڭگو ماكرولۇق ئىقتىساد تەتقىقات ئورنىنىڭ باشلىقى خۇاڭ خەنچۇەن.

«جۇڭگوچە زامانىۋىلاشتۇرۇشتا خەلق تۇرمۇشى ھەممىدىن مۇھىم.» بۇ بىر يىلدا، تاغ ـ داۋانلاردىن ھالقىپ، دەريا ـ ئېقىنلارنى كەزدى، كەنتلەرگە بېرىپ ئائىلىلەرنى ئارىلاپ، ئاھالىلەرنىڭ ئۆيلىرىگە كىردى، خەلقنىڭ گۈزەل تۇرمۇشقا بولغان ئىنتىلىشى باشتىن ـ ئاخىر باش شۇجى ئەڭ كۆڭۈل بۆلگەن ئىش بولۇپ كەلدى.

«پۇقرالارنىڭ ئىشى ئەڭ مۇھىم ئىش»، بۇ يىل باھار بايرىمى ھارپىسىدا، باش شۇجى شى جىنپىڭ تيەنجىنگە بېرىپ، ئاساسىي قاتلامدىكى كادىرلار، ئاممىنى يوقلىدى ۋە ئۇلاردىن ھال سورىدى.

دىليۇبۇ كەنتىنىڭ كەنت ئاھالىسى دۇ خۇڭگاڭنىڭ ئۆيىگە كىرگەندە، باش شۇجى ياشانغانلارنىڭ داۋالىنىش سۇغۇرتىسى، بالىلارنىڭ ئوقۇشى، ياشلارنىڭ ئىشقا ئورۇنلىشىشىغا دائىر ئەھۋاللارنى ئىنچىكە سورىدى. سوئال ـ جاۋابلار ئارىسىدا ئىللىقلىق ئىپادىلىنىپ تۇراتتى.

ئىقتىسادىي تەرەققىيات بېسىمغا قانچە دۇچ كەلگەنسېرى، خەلقنىڭ تۇرمۇشى، ھال ـ ئەھۋالىغا شۇنچە يۈكسەك ئەھمىيەت بېرىش كېرەك. ئادەمنى ئاساس قىلىش، خەلقنى ھەممىدىن ئەلا بىلىشتە چىڭ تۇرۇپ، دۆلىتىمىز بىر قاتار ئاشۇرۇلما مىقدار سىياسىتىنىڭ مۇھىم نۇقتىسىنى خەلق تۇرمۇشى ساھەسىگە قارىتىپ، ئىسلاھاتنى تەڭشەش ـ تىزگىنلەش جەريانىغا سىڭدۈرۈپ، تىرىشىپ بارلىق خەلقنى ئورتاق كۈرەش قىلىش داۋامىدا ئىسلاھات ـ تەرەققىيات نەتىجىلىرىدىن ئورتاق بەھرىلەندۈردى.

يېڭى دەۋردىن بۇيان تۇنجى قېتىم مەركەز قاتلىمىدىن چىقىرىلغان ئىشقا ئورۇنلاشتۇرۇشنى ئىلگىرى سۈرۈشكە دائىر يېتەكچى خاراكتېرلىك ھۆججەت ئېلان قىلىنىپ، «ئىككى مۇھىم» قۇرۇلۇشى ئارقىلىق شەھەر يېڭىلاش قاتارلىق خەلق تۇرمۇشى تۈرلىرىگە كۈچەپ مەدەت بېرىلدى، خەلق تۇرمۇشى ساھەسى سېلىنمىسى مۇقىم ئاشۇرۇلدى، «ئىككىنى يېڭىلاش» ئاھالىلەرنىڭ ئىستېمالىنى جانلاندۇرۇپ، خەلقنىڭ يۇقىرى سۈپەتلىك تۇرمۇش ئېھتىياجىنى تېخىمۇ ياخشى قاندۇردى... ئالدىنقى ئۈچ پەسىلدە، مەملىكەت بويىچە شەھەر ـ بازارلاردا يېڭىدىن كۆپەيگەن ئىشقا ئورۇنلاشقانلار 10 مىليون 490 مىڭغا يېتىپ، ئاھالىلەر كىرىمىنىڭ ئەمەلىي ئېشىش سۈرئىتى GDPنىڭ ئېشىش سۈرئىتىدىن سەل يۇقىرى بولدى، كىشى بېشىغا توغرا كېلىدىغان ئىجتىمائىي قۇتقۇزۇش ۋە ياردەم پۇل كىرىمى، كىشى بېشىغا توغرا كېلىدىغان ياشانغاندا كۈتۈنۈش پۇلى ياكى دەم ئېلىش، پېنسىيە پۇلى ئايرىم ـ ئايرىم ھالدا %11.5، %8.1 ئاشتى، خەلق تۇرمۇشى كاپالىتى كۈچلۈك، ئۈنۈملۈك بولۇپ، يۇقىرى سۈپەتلىك تەرەققىياتنى تېخىمۇ ھارارەتكە ئىگە قىلدى.

ئىلگىرى بىزنى مۇۋەپپەقىيەت قازىنىشقا يېتەكلىدى، مۇقەررەر ھالدا بىزنى داۋاملىق مۇۋەپپەقىيەت قازىنىشقا يېتەكلەيدۇ. پۇرسەت ئالدىدا تەشەببۇسكارلىق بىلەن تەدبىر قوللىنىپ، قىيىنچىلىق ئالدىدا قىيىنچىلىققا قارشى ئالغا ئىلگىرىلەپ، خەۋپ ـ خەتەر ئالدىدا پائال تاقابىل تۇرۇپ، پارتىيە باشتىن ـ ئاخىر «بىزنىڭ ئۇلۇغ ئىشلارنى ۋۇجۇدقا چىقىرىشىمىزدىكى ئەڭ ئىشەنچلىك تايانچىمىز» بولدى.

باش ۋەزىپىنى چىڭ كۆزلەپ، شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش

يۇقىرى سۈپەتلىك تەرەققىياتنىڭ يېڭى جاۋاب قەغىزىنى ياخشى پۈتۈپ چىقىشتا توغرا ئىدىيە ۋە سىياسەت بولۇشى، توغرا خىزمەت تەدبىرى ۋە ئۇسۇلى بولۇشى كېرەك. باش شۇجى شى جىنپىڭ يىراقنى كۆزلەپ پۇختا پىلان تۈزدى، يېڭى سۈپەتلىك ئىشلەپچىقىرىش كۈچى مۇھىم نۇقتا بولدى.

1 ـ ئاينىڭ 31 ـ كۈنى، جۇڭگو كوممۇنىستىك پارتىيەسى مەركىزىي كومىتېتى سىياسىي بىيۇروسىنىڭ بۇ يىلقى تۇنجى قېتىملىق كوللېكتىپ ئۆگىنىشىدە دىققەت «يۇقىرى سۈپەتلىك تەرەققىياتنى پۇختا ئالغا سىلجىتىش»قا مەركەزلەشتۈرۈلدى. «يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش يۇقىرى سۈپەتلىك تەرەققىياتقا تۈرتكە بولۇشتىكى ئىچكى تەلەپ ۋە مۇھىم كۈچەش نۇقتىسى، جەزمەن يېڭىلىق يارىتىشتىن ئىبارەت بۇ چوڭ ئىشنى داۋاملىق ياخشى قىلىپ، يېڭى سۈپەتلىك ئىشلەپچىقىرىش كۈچلىرىنى تېز راۋاجلاندۇرۇشقا تۈرتكە بولۇش كېرەك.» ئۆگىنىشكە رىياسەتچىلىك قىلغاندا، باش شۇجى شى جىنپىڭ ئېنىق تەلەپنى ئوتتۇرىغا قويدى.

«يۇقىرى سۈپەتلىك تەرەققىياتتىن ئىبارەت بۇ باش ۋەزىپىنى مەھكەم ئىگىلەپ، شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش كېرەك.» دۆلەت ئىشلىرىنى ئورتاق كېڭەشكەندە، باش شۇجى شى جىنپىڭ بۇنى ھەر ۋاقىت قەلبىگە پۈكتى.

ئەمەلىيەتتىن ئۆتكۈزۈش، بىلىش، يەنە ئەمەلىيەتتىن ئۆتكۈزۈش، يەنە بىلىش، قەدەم توختاپ قالمىدى، ئىزدىنىشمۇ توختاپ قالمىدى.

2 ـ ئايدا، تيەنجىندە «يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشتا باتۇرلۇق بىلەن ئالدىدا مېڭىش، ماھىرلىق بىلەن نەتىجە يارىتىش كېرەك» دەپ ئىلھاملاندۇردى؛ 3 ـ ئايدا، يېڭى دەۋردە ئوتتۇرا قىسىم رايونلارنىڭ قەد كۆتۈرۈشىگە تۈرتكە بولۇش سۆھبەت يىغىنىدا: «يېڭى سۈپەتلىك ئىشلەپچىقىرىش كۈچلىرىنى يېتىلدۈرۈش ۋە راۋاجلاندۇرۇش ئوتتۇرا قىسىم رايونلارنىڭ تېز قەد كۆتۈرۈشىگە تۈرتكە بولۇشتىكى يېڭى قۇۋۋەت» دەپ تەكىتلىدى؛ 4 ـ ئايدا، يېڭى دەۋردە غەربىي قىسىمنى كەڭ ئېچىشقا تۈرتكە بولۇش سۆھبەت يىغىنىدا: «شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇپ، زامانىۋى ياسىمىچىلىق ۋە ئىستراتېگىيەلىك يېڭىدىن گۈللەنگەن كەسىپلەرنى تەرەققىي قىلدۇرۇش ئۈستىدە ئىزدىنىش كېرەك» دەپ ئورۇنلاشتۇرما قىلدى... ھەربىر مەيدان مۇھىم يىغىندا، ھەر قېتىم مۇھىم تەكشۈرۈشتە بولغاندا، باش شۇجى شى جىنپىڭ بىر قاتار يېڭى ھۆكۈم، يېڭى تەلەپلەرنى ئوتتۇرىغا قويۇپ، شى جىنپىڭ ئىقتىساد ئىدىيەسىنى يەنىمۇ بېيىتىپ، يېڭى سۈپەتلىك ئىشلەپچىقىرىش كۈچلىرىنى تېز راۋاجلاندۇرۇش ئۈچۈن يۆنىلىشنى ئېنىق كۆرسىتىپ بەردى.

بۇ، ماركسىزملىق ئىشلەپچىقىرىش كۈچلىرى نەزەرىيەسىدە يېڭىلىق ياراتقانلىق ۋە ئۇنى راۋاجلاندۇرغانلىق. «ئىشلەپچىقىرىش كۈچلىرى ئىنسانىيەت جەمئىيىتى تەرەققىياتىنىڭ تۈپ ھەرىكەتلەندۈرگۈچ كۈچى، شۇنداقلا بارلىق جەمئىيەت ئۆزگىرىشى ۋە سىياسىي ئۆزگىرىشنىڭ ئاخىرقى سەۋەبى».

بۇ، ئىچكى ـ تاشقى ۋەزىيەتنىڭ تەرەققىياتى، ئۆزگىرىشىنى چوڭقۇر كۆزەتكەنلىك. دۇنيادا 100 يىلدىمۇ بولۇپ باقمىغان چوڭ ئۆزگىرىش ۋەزىيىتى ھەر تەرەپلىمە، چوڭقۇر قاتلاملىق تېز ئۆزگەردى، «ئىلمەكتىن ئاجرىتىپ زەنجىرنى ئۈزۈش» «كىچىك ھويلىغا ئېگىز تام قوپۇرۇش» ئەۋج ئالدى. ئۆزىمىزگە قارايدىغان بولساق، دۆلىتىمىز ئىقتىسادى يۇقىرى سۈرئەتتە ئېشىش باسقۇچىدىن يۇقىرى سۈپەتتە تەرەققىي قىلىش باسقۇچىغا ئۆتتى، «يېڭىلىق يارىتىش ئىقتىدارى يۇقىرى سۈپەتلىك تەرەققىياتنىڭ تەلىپىگە ئۇيغۇنلىشالمايۋاتىدۇ»، «يېڭىلىق يارىتىش يېتەكچى رول ئوينايدىغان» يېڭى سۈپەتلىك ئىشلەپچىقىرىش كۈچلىرىنى راۋاجلاندۇرغاندىلا، ئاندىن ئىشلەپچىقىرىش كۈچلىرى سەۋىيەسىدە تېخىمۇ زور بۆسۈشنى ئىشقا ئاشۇرغىلى بولىدۇ.

بۇ، جۇڭگوچە زامانىۋىلاشتۇرۇشنى ئالغا سىلجىتىش ئەمەلىيەت تەلىپىنى دەل جايىدا ئىگىلىگەنلىك. «جۇڭگوچە زامانىۋىلاشتۇرۇشنىڭ ئاچقۇچى پەن ـ تېخنىكىنى زامانىۋىلاشتۇرۇشتا»، بۇ بىزنىڭ پەن ـ تېخنىكىدا يېڭىلىق يارىتىش، بولۇپمۇ ئىجادىي خاراكتېرلىك، ئاغدۇرما خاراكتېرلىك پەن ـ تېخنىكىدا يېڭىلىق يارىتىشنى كۈچەيتىپ، يۇقىرى سەۋىيەلىك پەن ـ تېخنىكىدا ئۆزىمىزگە تايىنىش، ئۆزىمىزنى قۇدرەت تاپتۇرۇشنى تېز ئىشقا ئاشۇرۇشىمىزنى تەلەپ قىلىدۇ.

ئىدىيە ئۇلۇغ كۈچى ئەمەلىيەتنىڭ تۈرلۈك ـ تۈمەن ئۆزگىرىشىدە ئەكس ئېتىدۇ.

باش شۇجى شى جىنپىڭ 2013 ـ يىلى، 2018 ـ يىلى، 2022 ـ يىلى ئۈچ قېتىم خۇبېيغا بېرىپ تەكشۈرۈشتە بولغاندا، بىردەك پەن ـ تېخنىكىدا يېڭىلىق يارىتىش ۋە كەسىپتە يېڭىلىق يارىتىشقا يۈكسەك كۆڭۈل بۆلدى. بۇ يىلقى خۇبېي سەپىرىدە، باش شۇجى ۋۇخەن كەسىپتە يېڭىلىق يارىتىش تەرەققىيات تەتقىقات ئورنىغا كىرىپ، پەن ـ تېخنىكىدا يېڭىلىق يارىتىش تەمىنلەش زەنجىرى سۇپىسىنىڭ مۇۋەپپەقىيەتلىك مىساللىرى كۆرگەزمىسى ۋە پەن ـ تېخنىكىدا يېڭىلىق يارىتىش نەتىجىلىرىنى كۆردى.

«سىلەر قانچىلىك ۋاقىتتا يېتىشتۈردىڭلار؟» «تەننەرخنى قانچىلىك ئازايتتىڭلار؟» «خەلقئارا نۇقتىدىن قارىغاندا قانداق ئەۋزەللىكىڭلار بار؟» «كارخانىلار بىلەن تۇتاشتۇرۇشنىڭ ئىلگىرىلەش ئەھۋالى ئوڭۇشلۇق بولۇۋاتامدۇ؟» باش شۇجى شى جىنپىڭنىڭ كۆيۈنۈشىگە يېڭىلىق يارىتىشقا بولغان ئويلىنىشى مۇجەسسەملەنگەنىدى: «يۇقىرى سەۋىيەلىك پەن ـ تېخنىكىدا ئۆزىگە تايىنىش، ئۆزىنى قۇدرەت تاپتۇرۇشنى، يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشنى ئىشقا ئاشۇرۇش پەن ـ تېخنىكىدا يېڭىلىق يارىتىش بىلەن كەسىپتە يېڭىلىق يارىتىشنىڭ يۇغۇرۇلۇشىغا قارىتا تېخىمۇ تەخىرسىز تەلەپلەرنى ئوتتۇرىغا قويدى».

پەن ـ تېخنىكىدا يېڭىلىق يارىتىش دۇنيانىڭ 100 يىللىق ئۆزگىرىش ۋەزىيىتىدىكى «ئاچقۇچلۇق ئۆزگەرگۈچى مىقدار»، يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشتىكى يادرولۇق ئامىل. تارىخقا نەزەر سالساق، ئىشلەپچىقىرىش كۈچلىرى جەھەتتىكى ھەر قېتىملىق ھالقىشنىڭ ھەممىسىگە پەن ـ تېخنىكا ئىنقىلابى يېتەكچىلىك قىلغان، ھەممىسىنى ئاغدۇرما خاراكتېرلىك يېڭىلىق يارىتىش بارلىققا كەلتۈرگەن.

ۋەزىيەت كىشىنى ئالدىراتماقتا، خىرىس كىشىنى ئالدىراتماقتا، بۇرچ كىشىنى ئالدىراتماقتا.

گەنسۇدا «شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇپ، مەملىكەت بويىچە مۇھىم يېڭى ئېنېرگىيە ھەم يېڭى ئېنېرگىيە جابدۇق ياسىمىچىلىقى بازىسى بەرپا قىلىش»نى تاپىلىدى؛ نىڭشيادا «ئەنئەنىۋى كەسىپلەرنىڭ تىپىنى ئۆزگەرتىش، دەرىجىسىنى ئۆستۈرۈشنى ئىلگىرى سۈرۈپ، ئىستراتېگىيەلىك يېڭىدىن گۈللەنگەن كەسىپلەرنى يېتىلدۈرۈپ، شارائىتقا قاراپ ئىش كۆرۈپ يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش»قا ئىلھاملاندۇردى؛ خۇنەندە «كەسىپلەرنى يۇقىرى دەرىجىلىكلەشتۈرۈش، ئەقلىي ئىقتىدارلاشتۇرۇش، يېشىللاشتۇرۇش بويىچە تەرەققىي قىلدۇرۇشقا تۈرتكە بولۇپ، دۆلەت دەرىجىلىك كەسىپلەر توپىنى بەرپا قىلىش» توغرىسىدا ئۈمىدىنى ئوتتۇرىغا قويدى... باش شۇجى شى جىنپىڭ دەل جايىدا تومۇر تۇتۇپ، «يېڭى سۈپەتلىك ئىشلەپچىقىرىش كۈچلىرى دېگەن نېمە، يېڭى سۈپەتلىك ئىشلەپچىقىرىش كۈچلىرىنى قانداق راۋاجلاندۇرۇش كېرەك» دېگەن دەۋر تېمىسىغا چوڭقۇر جاۋاب بەردى.

نۇقتا بىلەن دائىرە، نەزەرىيە بىلەن رېئاللىق ئۆزئارا گىرەلىشىپ مەۋج ئۇردى، كەڭ زېمىندا راۋاج تېپىپ، يۇقىرى سۈپەتلىك تەرەققىيات مەسىلىسىنى ھەل قىلدى.

شيۇڭئەن يېڭى رايونىدا يېڭى بىر ئەۋلاد ئۇچۇر تېخنىكىسى، زامانىۋى ھاياتلىق ئىلمى ۋە بىيو ـ تېخنىكا، يېڭى ماتېرىيالدىن ئىبارەت ئۈچ چوڭ يېتەكچى كەسىپ نۇقتىلىق چۆرىدىلىپ، بىرىنچى قاتاردىكى يېڭىلىق يارىتىش سۇپىسى قۇرۇلۇپ، پۈتۈن جەريانلىق يېڭىلىق يارىتىش ئېكولوگىيە زەنجىرى دەسلەپكى قەدەمدە بەرپا قىلىندى ۋە شەكىللەندۈرۈلدى؛

گۇاڭدۇڭ ـ شياڭگاڭ ـ ئاۋمېن چوڭ قولتۇق رايونىدا، شېنجېن يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇشنى بىرتۇتاش پىلانلاپ ئالغا سىلجىتىدىغان مەخسۇس ھۆكۈمەت ئاپپاراتى − لۇڭگاڭ رايونى يېڭى سۈپەتلىك ئىشلەپچىقىرىش كۈچلىرىنى ئىلگىرى سۈرۈش مەركىزى قۇرۇپ، نۇقتىلىق ھالدا دىققەتنى پەن ـ تېخنىكىدا يېڭىلىق يارىتىش، سانلىق مەلۇمات ئارقىلىق مەدەت بېرىش ۋە مەيدان بەرپا قىلىشقا مەركەزلەشتۈرۈپ، يېڭى سۈپەتلىك ئىشلەپچىقىرىش كۈچلىرى كەسىپ ھالىتىنى كۈچەپ بەرپا قىلدى؛

...

يېڭىلىق يارىتىشنى تۇتۇپ، يېڭىلىق يارىتىشنى پىلانلاپ، ھەرقايسى جايلار، ھەرقايسى تارماقلار تاپشۇرۇقنى ئەستە چىڭ ساقلاپ، پۇرسەتنى چىڭ تۇتۇپ، پائال ئىزدىنىپ، جاسارەت بىلەن يۇقىرى پەللىگە ئۆرلىدى.

يېڭى ئېنېرگىيەلىك ئاپتوموبىل ئىشلەپچىقىرىش مىقدارى تۇنجى قېتىم يىلدا 10 مىليون دانىدىن ئاشتى، ئالدىنقى ئۈچ پەسىلدە ئۇچۇر يەتكۈزۈش، يۇمشاق ماتېرىيال ۋە ئۇچۇر تېخنىكا مۇلازىمىتى كەسپىنىڭ قوشۇلما قىممىتى بۇلتۇرقى ئوخشاش مەزگىلدىكىدىن %11.3 ئاشتى... جۇڭگو ئىقتىسادىنىڭ «نەتىجە قەغىزى»نى ۋاراقلاپ كۆرسەك، ھەرىكەتچان سانلىق مەلۇماتلار ئۇلىنىپ «يېڭى»لىققا يۈزلىنىش ۋەزىيىتىنى شەكىللەندۈردى، مىقدارنىڭ توپلىنىشى «سۈپەت»نىڭ پوتېنسىيال ئېنېرگىيەسىنى بارلىققا كەلتۈردى.

يېڭىلىق يارىتىش يولىدا ياخشى مېڭىشتا قەتئىي ھەم سەگەك بولۇش كېرەك. «يېڭى سۈپەتلىك ئىشلەپچىقىرىش كۈچلىرىنى راۋاجلاندۇرۇش ئەنئەنىۋى كەسىپلەرگە سەل قاراش ياكى ئۇنىڭدىن ۋاز كېچىش دېگەنلىك ئەمەس، پىلانسىز ئىش كۆرۈشنىڭ، كۆپۈكلەشتۈرۈۋېتىشنىڭ ئالدىنى ئېلىش، شۇنداقلا بىر خىللا ئەندىزىگە ئېسىلىۋالماسلىق كېرەك. ھەرقايسى جايلار ئەمەلىيەتنى چىقىش قىلىشتا چىڭ تۇرۇپ، ئاۋۋال ئورنىتىپ ئاندىن بىكار قىلىپ، شارائىتقا قاراپ ئىش كۆرۈپ، تۈرگە ئايرىپ يېتەكچىلىك قىلىشى كېرەك».

باش شۇجى شى جىنپىڭنىڭ بۇ سۆزىگە دىيالېكتىكىلىق تەپەككۇر مۇجەسسەملەنگەن، چوڭقۇر ئويلىنىش سىڭگەن. ھەرقايسىسى ئۆزىنىڭ ئومۇمىيەت ئىچىدىكى ئەۋزەللىكى، پۇرسەت جەھەتتىكى ئەۋزەللىكى، سېلىشتۇرۇش داۋامىدىكى ئەۋزەللىكىنى ياخشى جارى قىلدۇرۇپ، ئەنئەنىۋى كەسىپلەرنىڭ دەرىجىسىنى ئۆستۈرۈپ، ئۆزگەرتىپ، ئىستراتېگىيەلىك يېڭىدىن گۈللەنگەن كەسىپلەرنى زورايتىپ، كەلگۈسى كەسىپلەرنى ئالدىن ئورۇنلاشتۇردى، يېڭى سۈپەتلىك ئىشلەپچىقىرىش كۈچلىرىنىڭ قىزغىن دولقۇنى مەۋج ئۇرۇپ، جۇڭگو ئىقتىسادى «يېڭى بولۇش»قا قاراپ ئىلگىرىلىدى.

يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇپ، جۇڭگوچە زامانىۋىلاشتۇرۇشقا سىجىل كۈچلۈك ھەرىكەتلەندۈرگۈچى كۈچ قوشۇش

«جۇڭگوچە زامانىۋىلاشتۇرۇش ئىسلاھات ـ ئېچىۋېتىش داۋامىدا ئۈزلۈكسىز ئالغا سىلجىتىلدى، شۇنداقلا مۇقەررەر ئىسلاھات ـ ئېچىۋېتىش داۋامىدا كەڭ ئىستىقبال ئاچىدۇ.» پارتىيە 20 ـ نۆۋەتلىك مەركىزىي كومىتېتى 3 ـ ئومۇمىي يىغىنىدا، باش شۇجى شى جىنپىڭ: «ئىسلاھاتنى ئاڭلىق ھالدا تېخىمۇ گەۋدىلىك ئورۇنغا قويۇش شەرت» دەپ تەكىتلىدى.

بۇ پەيتتە، «دەۋر بۆلگۈچ» ئەھمىيەتكە ئىگە پارتىيە 11 ـ نۆۋەتلىك مەركىزىي كومىتېتى 3 ـ ئومۇمىي يىغىنىغا 46 يىل بولدى؛ «دەۋر بۆلگۈچ» ئەھمىيەتكە ئىگە پارتىيە 18 ـ نۆۋەتلىك مەركىزىي كومىتېتى 3 ـ ئومۇمىي يىغىنىغىمۇ ئون يىلدىن كۆپرەك ۋاقىت بولغانىدى.

46 يىلدىن بۇيان، بىر ئاددىي ھەم چوڭقۇر داۋلى قەلبلەردىن چوڭقۇر ئورۇن ئالدى: ئىسلاھات ـ ئېچىۋېتىش پارتىيە ۋە خەلق ئىشلىرىنىڭ چوڭ قەدەم بىلەن دەۋرگە يېتىشىپ مېڭىشىدىكى مۇھىم ئەڭگۈشتەر.

ئون يىلدىن كۆپرەك ۋاقىتتىن بۇيان، بىر مۇستەھكەم ھەم قەتئىي ئېتىقاد ئەزەلدىن تەۋرىنىپ باقمىدى: ئىسلاھات پەقەت داۋاملىشىدۇ، ئاخىرلاشمايدۇ.

تەرەققىيات تېما چىقاردى، ئىسلاھات كۈچ سەرپ قىلدى. يۇقىرى سۈپەتلىك تەرەققىيات جاسارەت بىلەن ئالغا ئىلگىرىلىدى، ئىسلاھاتنى ئومۇميۈزلۈك چوڭقۇرلاشتۇرۇش ئۈزۈلمەي داۋاملاشتى.

ئىسلاھات ئىجتىمائىي ئىشلەپچىقىرىش كۈچلىرىنى ئازاد قىلىش ۋە راۋاجلاندۇرۇشنىڭ ئاچقۇچى، دۆلەت تەرەققىياتىغا تۈرتكە بولىدىغان تۈپ ھەرىكەتلەندۈرگۈچى كۈچ. نېمە ئۈچۈن ئىسلاھ قىلىمىز؟ توسۇقلارنى بۇزۇپ تاشلاپ، مېخانىزمنى ئەلالاشتۇرۇپ، ھاياتىي كۈچنى ئۇرغۇتۇپ، ھەرىكەتلەندۈرگۈچى كۈچ قوشۇپ، دادىل سىناق قىلىپ، باتۇرلۇق بىلەن بۆسۈپ ئۆتۈپ، «جۇڭخۇا مىللىتى توپلىغان ئېنېرگىيە»نى تېز ئۇرغۇتۇش ئۈچۈن.

ئىسلاھات ئۇلۇغۋار پىلانى قانچە كەڭ بولغانسېرى، ئىسلاھاتچىلارنىڭ شۇنچە باتۇر ۋە مەسئۇلىيەتچان بولۇشىغا توغرا كېلىدۇ. 10 ـ ئاينىڭ 16 ـ كۈنى، باش شۇجى شى جىنپىڭ شيامېنغا كېلىپ تەكشۈرۈشتە بولدى، «1985 ـ يىلىدىن 2000 ـ يىلىغىچە بولغان شيامېننىڭ ئىقتىساد، جەمئىيەت تەرەققىيات ئىستراتېگىيەسى» ناملىق كۆك مۇقاۋىلىق كىتاب باش شۇجىنى چەكسىز ئويغا چۆمدۈردى. شۇ چاغدا نۇرغۇن ئېنىقسىزلىق بار ئىدى، «بىلمىگەندە بېرىپ ئىزدىنىپ، ئاۋۋال نۇقتىدا سىناق قىلىپ، تاشنى سىيلاپ دەريادىن ئۆتۈش كېرەك».

بۈگۈنكى كۈندە، يەنە دەۋرنىڭ ئالدىدا ماڭدى. فۇجيەن ئۆلكىلىك پارتىيە كومىتېتى ۋە ئۆلكىلىك ھۆكۈمەتنىڭ خىزمەت دوكلاتىنى ئاڭلىغاندا، باش شۇجى شى جىنپىڭ مۇنداق دېدى: «فۇجيەن ئەزەلدىن ئىسلاھ قىلىش، يېڭىلىق يارىتىش روھىغا باي، نۇرغۇن ئىسلاھاتتا پۈتۈن مەملىكەت بويىچە ئالدىدا ماڭدى».

بىر ساھەدىن ئومۇملۇققا نەزەر سېلىپ، يەنىمۇ ئىلگىرىلىگەن ھالدا ئىسلاھاتنى ئومۇميۈزلۈك چوڭقۇرلاشتۇرۇشتا، دادىللىق بىلەن چوڭقۇر سۇ رايونىغا يۈرۈش قىلىپ، دادىللىق بىلەن قىيىن مەسىلىلەرنى ھەل قىلىپ، دادىللىق بىلەن خەتەرلىك ساھىللارنى كېچىپ ئۆتۈش كېرەك.

ئون نەچچە كۈندىن كېيىن، مەركىزىي كومىتېت پارتىيە مەكتىپى (دۆلەت مەمۇرىيەت شۆيۈەنى)نىڭ دەرسخانىسىدا، باش شۇجى شى جىنپىڭ مۇنداق سەمىمىي تاپشۇرۇق بەردى: «سىياسىي مەسئۇلىيەت تۇيغۇسى، تارىخىي بۇرچ تۇيغۇسىنى كۈچەيتىپ، ئۆتكەلگە ھۇجۇم قىلىپ قىيىنچىلىقلارنى يېڭىدىغان، قىيىنچىلىققا قارشى ئالغا ئىلگىرىلەيدىغان سىياسىي جاسارەت بىلەن زىددىيەت ۋە مەسىلىلەرگە ئۆزىمىزنى قاچۇرماي بىۋاسىتە يۈزلىنىپ، جاھىل ئىللەتلەرنى تۈگىتىشتە بىپەرۋالىق قىلماي، خەۋپ ـ خەتەر ۋە خىرىسلارغا تاقابىل تۇرۇشتا چېكىنمەي، ئىسلاھات ـ تەرەققىيات يېڭى مەنزىلىنى جاسارەت بىلەن ئېچىشىمىز كېرەك».

تاغقا يولۇققاندا يول ئېچىپ، سۇغا يولۇققاندا كۆۋرۈك سېلىندى. بۇ يېڭى مەنزىلدە مىسلى كۆرۈلمىگەن يېڭى كەيپىيات نامايان بولماقتا.

مەركىزىي كومىتېت بەنگۇڭتىڭى، گوۋۇيۈەن بەنگۇڭتىڭى «بازار ئىجازىتى تۈزۈمىنى مۇكەممەللەشتۈرۈش توغرىسىدىكى پىكىر»نى بېسىپ تارقىتىپ، ئوچۇق ـ ئاشكارا بولغان، قېلىپلاشقان ـ تەرتىپلىك بولغان، باراۋەر رىقابەتلىشىدىغان، ھوقۇق ـ مەسئۇلىيەت ئېنىق بولغان، نازارەت قىلىش ـ باشقۇرۇش كۈچلۈك بولغان بازار ئىجازىتى تۈزۈم سىستېمىسىنىڭ بەرپا قىلىنىشىغا تۈرتكە بولدى؛ 10 ـ ئاينىڭ 10 ـ كۈنىدىن باشلاپ، پۇقراۋى ئىگىلىكنى ئىلگىرى سۈرۈش قانۇن لايىھەسىگە جەمئىيەتتىن ئاشكارا پىكىر ئېلىندى... بىر قاتار ئەمەلىي ئىسلاھات تەدبىرلىرى تەرەققىياتقا ھەرىكەتلەندۈرگۈچى كۈچ قوشۇپ، پايدا قوشۇپ، جۇڭگو ئىقتىسادىنىڭ قۇدرەتلىك ھاياتىي كۈچى ۋە غايەت زور يوشۇرۇن كۈچىنى ئۈزلۈكسىز ئۇرغۇتتى.

ۋاقىت شىكالىسىغا ئۆسۈپ يېتىلىشنىڭ كۈچى يوشۇرۇنغان بولىدۇ.

لاتىن ئامېرىكىسى سەپىرى ئاخىرلىشىپ يېرىم ئاي بولمايلا، 4 ـ قېتىملىق «بىر بەلباغ، بىر يول» قۇرۇلۇشى خىزمىتى سۆھبەت يىغىنى ئۆتكۈزۈلدى.

G20 باشلىقلار يىغىنىدا، باش شۇجى «ئورتاق تەرەققىي قىلىدىغان ئادىل دۇنيا قۇرۇش» تەشەببۇسىنى ئوتتۇرىغا قويۇپ، يېڭى مەنزىرىنى سۈرەتلەپ بەردى.

سۆھبەت يىغىنىدا، باش شۇجى «<بىر بەلباغ، بىر يول>نى يۇقىرى سۈپەتتە ئورتاق بەرپا قىلىشنى ئالغا سىلجىتىش مېخانىزمىنى مۇكەممەللەشتۈرۈش»نى ئورۇنلاشتۇرما قىلىپ، «نەپىس سىزما»نى سىزىپ بەردى.

«پەقەت ئېچىۋېتىلگەن جۇڭگولا زامانىۋىلاشقان جۇڭگو بولالايدۇ»، ئېچىۋېتىش بىلەن ئىسلاھات بىر ـ بىرىگە ھەمراھ بولۇپ بارلىققا كەلگەن، بىر ـ بىرىنى ئىلگىرى سۈرىدۇ.

11 ـ ئاينىڭ 15 ـ كۈنى، تاغلىق شەھەر چۇڭچىڭدىن گۈدۈك چېلىپ يولغا چىققان يۈز مىڭىنجى قېتىملىق جۇڭگو − ياۋروپا نۆۋەتچى پويىزى ئاسىيا ـ ياۋروپا چوڭ قۇرۇقلۇقىنى كېسىپ ئۆتۈپ، رېيىن دەرياسى بويىدىكى گېرمانىيە دۇيىسبۇرگقا قاراپ يۈرۈپ، «ئىسلاھات ـ ئېچىۋېتىشنىڭ جۇڭگو بىلەن دۇنيانىڭ ئورتاق تەرەققىي قىلىپ ئىلگىرىلىشىنىڭ تارىخىي مۇساپىسى ئىكەنلىكى»گە گۇۋاھ بولدى.

جۇڭگو − ياۋروپا نۆۋەتچى پويىزى ئېچىۋېتىش سەۋەبلىك بارلىققا كەلدى. 2013 ـ يىلى، باش شۇجى شى جىنپىڭ «بىر بەلباغ، بىر يول»نى ئورتاق بەرپا قىلىش تەشەببۇسىنى ئوتتۇرىغا قويدى، جۇڭگو − ياۋروپا نۆۋەتچى پويىزى ۋەزىيەت ئېھتىياجى بىلەن بارلىققا كەلدى.

جۇڭگو − ياۋروپا نۆۋەتچى پويىزى ئىسلاھات سەۋەبلىك گۈللەندى. «رەقەملىك پورت» سىستېمىسى تەتقىق قىلىنىپ ئىشقا كىرىشتۈرۈلۈپ، تۆمۈريولدا تاموژنىدىن تېز ئۆتكۈزۈش كەسىپ ئەندىزىسى كېڭەيتىلىپ، تاموژنىدىن ئۆتكۈزۈش ئۈنۈمى ۋە قولايلاشتۇرۇش سەۋىيەسى زور دەرىجىدە ئۆستۈرۈلدى.

قىش كېتىپ ياز كەلدى، مول مۇۋەپپەقىيەتلەر قولغا كەلتۈرۈلدى. يىرىك پىلاندىكى كۆۋرۈك، تۇرۇبا تورى، پورتلار بارغانسېرى تېخىمۇ كۆپ دۆلەتلەرنىڭ تاغ ـ دەريا ئېقىنلىرىغا نەقىشلەندى، ھەممە ئائىلىنى يورۇتقان توك، ئاپتوموبىللار توختىماي ئۆتۈشۈپ تۇرغان يول كۈندىلىك تۇرمۇشنىڭ قاينام ـ تاشقىنلىق مەنزىرىسىگە سىڭىپ كىردى، «بىر بەلباغ، بىر يول»نى ئورتاق بەرپا قىلىش يەرشارى بويىچە كۆلىمى ئەڭ چوڭ، دائىرىسى ئەڭ كەڭ، تەسىرى ئەڭ چوڭقۇر بولغان خەلقئارا ئىقتىسادىي ھەمكارلىق سۇپىسىغا ئايلاندى.

12 ـ ئاينىڭ 1 ـ كۈنىدىن باشلاپ، جۇڭگو بىلەن دىپلوماتىك مۇناسىۋەت ئورناتقان بارلىق ئەڭ تەرەققىي تاپمىغان دۆلەتلەرگە %100 باج تۈرىدىكى مەھسۇلاتتىن تاموژنا بېجى ئالماسلىق ئىمتىيازى بېرىلدى؛ 11 ـ ئاينىڭ 1 ـ كۈنىدىن باشلاپ، يېڭى نۇسخىدىكى مەملىكەت بويىچە تاشقى مەبلەغ ئىجازىتى پاسسىپ تىزىملىكى رەسمىي يولغا قويۇلدى؛ بېيجىڭ قاتارلىق توققۇز ئۆلكە، بىۋاسىتە قاراشلىق شەھەر چەت ئەل سودىگەرلىرى مۇستەقىل مەبلەغ سالغان دوختۇرخانا قۇرۇشقا رۇخسەت قىلدى... سىرتقا ئېچىۋېتىش دەرۋازىسى بارغانسېرى كەڭ ئېچىۋېتىلىپ، جۇڭگوچە زامانىۋىلاشتۇرۇشنىڭ تەرەققىيات بوشلۇقى كېڭەيتىلدى، شۇنداقلا دۇنيانى تېخىمۇ كۆپ ئورتاق تەرەققىيات پۇرسىتى بىلەن تەمىنلىدى، بۇلار نېمە ئۈچۈن «كەلگۈسىدىكى <جۇڭگو>نىڭ يەنىلا جۇڭگو بولىدىغانلىقى»نى جانلىق چۈشەندۈرۈپ بەردى.

«دۇنيانى تۇتاشتۇرۇپ، كەلگۈسىنى ئورتاق يارىتىش». «11 ـ ئاينىڭ 26 ـ كۈنىدىن 30 ـ كۈنىگىچە، 2 ـ نۆۋەتلىك جۇڭگو خەلقئارا تەمىنلەش زەنجىرىنى ئىلگىرى سۈرۈش كۆرگەزمىسى بېيجىڭدا مۇۋەپپەقىيەتلىك ئۆتكۈزۈلدى. رەئىس شى جىنپىڭ مۇنداق تەكىتلىدى: «ئىقتىساد يەرشارىۋىلىشىۋاتقان دەۋردە، پەقەت يەرشارىۋى كەسىپ زەنجىرى، تەمىنلەش زەنجىرى جەھەتتىكى ئوچۇق ھەمكارلىقتا چىڭ تۇرۇشلا تەڭ مەنپەئەتلىنىدىغان تەرەققىياتنى ئېلىپ كېلىدۇ.» پارتىيە 20 ـ نۆۋەتلىك مەركىزىي كومىتېتى 3 ـ ئومۇمىي يىغىنىنىڭ «قارارى»دا: «كەسىپ زەنجىرى، تەمىنلەش زەنجىرى جەھەتتىكى خەلقئارا ھەمكارلىقىغا تۈرتكە بولۇش» ئوتتۇرىغا قويۇلدى.

«تەمىنلەش زەنجىرىنى ئىلگىرى سۈرۈش كۆرگەزمىسىگە قاتنىشىش ئارقىلىق، جۇڭگو چەت ئەل كارخانىلىرى ۋە ئاپپاراتلىرى ئۆزئارا ئاتلىنىپ، بىر ـ بىرىنى مۇۋەپپەقىيەتكە ئېرىشتۈرۈپ، ھەمكارلىشىپ تەڭ مەنپەئەتلىنىدىغان تەرەققىيات يېڭى بوشلۇقىنى كېڭەيتتى» دېدى جۇڭگو خەلقئارا سودىنى ئىلگىرى سۈرۈش كومىتېتىنىڭ مۇئاۋىن باشلىقى جاڭ شاۋگاڭ.

تارىخنىڭ چوڭقۇر قاتلاملىرىدىن ئۇرغۇپ چىقىپ، مىللەتنىڭ گۈللىنىشىگە قاراپ مەۋج ئۇرماقتا. «بۇنىڭدىن بىز مۇنداق بىر ئېتىقادنى چىڭىتىشىمىز كېرەك − جۇڭگونىڭ ئىسلاھات ـ ئېچىۋېتىش يولى چوقۇم مۇۋەپپەقىيەت قازىنىدۇ».

پۇرسەت ۋە ۋەزىيەت بىز تەرەپتە. جەزمەن تولۇق غەيرەتكە كېلىپ، ئېغىر ۋەزىپىنى باتۇرلۇق بىلەن زىممىمىزگە ئېلىشىمىز كېرەك.

(شىنخۇا ئاگېنتلىقى، بېيجىڭ، 12 ـ ئاينىڭ 11 ـ كۈنى تېلېگراممىسى)

مەنبە: شىنجاڭ گېزىتى

مۇھەررىر: نۇرئېلىي مەتقۇربان

بېكىتكۈچى: ئەرئەلى شىرئەلى

和田零距离维吾尔语平台

《和田日报》是中共新疆和田地委的机关报，于1950年2月1日创刊。由和田地委主管，和田地区唯一一份公开出版的报纸，为和田地区覆盖面最广、最有影响的党报，是促进和田地区改革开放、经济发展和社会稳定的重要舆论宣传阵地。