شۇ جاي ۋاقتى 11 - ئاينىڭ 14 - كۈنى چۈشتىن كېيىن، دۆلەت رەئىسى شى جىنپىڭ لىمادىكى زۇڭتۇڭ مەھكىمىسىدە پېرۇ زۇڭتۇڭى بورۇئارت بىلەن سۆھبەت ئۆتكۈزدى. بورۇئارت زۇڭتۇڭ مەھكىمىسى ئالدىدىكى مەيداندا شى جىنپىڭ ئۈچۈن داغدۇغىلىق، كاتتا قارشى ئېلىش مۇراسىمى ئۆتكۈزدى. شىنخۇا ئاگېنتلىقى مۇخبىرى شيې خۇەنچى فوتوسى

شىنخۇا ئاگېنتلىقى، لىما، 11 - ئاينىڭ 14 - كۈنى تېلېگراممىسى (مۇخبىرلار نى سىيى، خاۋ ۋېيۋېي) شۇ جاي ۋاقتى 11 - ئاينىڭ 14 - كۈنى چۈشتىن كېيىن، دۆلەت رەئىسى شى جىنپىڭ لىمادىكى زۇڭتۇڭ مەھكىمىسىدە پېرۇ زۇڭتۇڭى بورۇئارت بىلەن سۆھبەت ئۆتكۈزدى.

باش ياز پەسلىدىكى لىمادا قۇياش ئىللىق نۇر چېچىپ تۇراتتى، گۈللەر پورەكلەپ ئېچىلغانىدى.

پېرۇ مۇراسىم ئاتلىقلار ئەترىتىنىڭ مۇھاپىزىتىدە، شى جىنپىڭ ئاپتوموبىل بىلەن زۇڭتۇڭ مەھكىمىسىگە يېتىپ كەلگەندە، زۇڭتۇڭ بورۇئارتنىڭ قىزغىن كۈتۈۋېلىشىغا مۇيەسسەر بولدى.

بورۇئارت زۇڭتۇڭ مەھكىمىسى ئالدىدىكى مەيداندا شى جىنپىڭ ئۈچۈن داغدۇغىلىق، كاتتا قارشى ئېلىش مۇراسىمى ئۆتكۈزدى.

ئىككى دۆلەتنىڭ دۆلەت باشلىقلىرى ئايرىم - ئايرىم ھالدا قارشى تەرەپنىڭ ھەمراھ بولۇپ كەلگەن خادىملىرى بىلەن قول ئېلىشىپ كۆرۈشۈپ سالاملاشتى. شى جىنپىڭ بورۇئارتنىڭ ھەمراھلىقىدا ھۆرمەت قاراۋۇلى ئەترىتىنى كۆزدىن كەچۈردى، ھەربىي ئوركېستىر جۇڭگو - پېرۇ ئىككى دۆلەتنىڭ دۆلەت شېئىرلىرىنى ئورۇنلىدى.

قارشى ئېلىش مۇراسىمىدىن كېيىن، ئىككى دۆلەتنىڭ دۆلەت باشلىقلىرى سۆھبەت ئۆتكۈزدى.

شى جىنپىڭ مۇنداق كۆرسەتتى: بۇ مېنىڭ پېرۇدا 3 - قېتىم زىيارەتتە بولۇشۇم، شۇنداقلا بىر يىل ئىچىدە زۇڭتۇڭ خانىم بىلەن 3 - قېتىم ئۇچرىشىش ئۆتكۈزۈشۈم. پېرۇدىكى نۇرغۇن خەلق ئاممىسى ئۆزلۈكىدىن يولنىڭ ئىككى تەرىپىگە يىغىلىپ، قول ئىشارىسى قىلىپ ئېھتىرام بىلدۈرۈپ قارشى ئېلىپ، ماڭا پېرۇ خەلقىنىڭ جۇڭگو خەلقىگە بولغان دوستلۇق مېھرىنى چوڭقۇر ھېس قىلدۇردى. جۇڭگو بىلەن پېرۇ ئوخشاشلا مەدەنىي قەدىمىي دۆلەتلەر. قەدىمىي مەدەنىيلىكنىڭ چوڭقۇر جۇغلانمىسى جۇڭگو - پېرۇ ئىككى دۆلەتكە ئەقىل - پاراسەت ۋە كەڭ قورساقلىق بېغىشلاپ، بىزنى تارىخنىڭ ئالغا ئىلگىرىلەش يۆنىلىشىنى ئېنىق كۆرۈپ، دەۋرنىڭ تەرەققىيات ئېقىمىغا ئۇيغۇنلىشىپ، باشتىن - ئاخىر باراۋەر مۇئامىلە قىلىش، ئۆزئارا ھۆرمەت قىلىش، ئۆزئارا ئىشىنىش، ئۆزئارا ئۆگىنىش، ئۆزئارا ئۆرنەك ئېلىشتا چىڭ تۇرۇپ، ئوخشاش بولمىغان گەۋدە، ئوخشاش بولمىغان تۈزۈم، ئوخشاش بولمىغان مەدەنىيەتتىكى دۆلەتلەرنىڭ ئىتتىپاقلىشىپ ھەمكارلىشىشىنىڭ ئۈلگىسىگە ئايلىنىش ئىمكانىيىتىگە ئىگە قىلدى. دىپلوماتىك مۇناسىۋەت ئورناتقان 53 يىلدىن بۇيان، بولۇپمۇ مەن 2016 - يىلى پېرۇدا تۇنجى قېتىم دۆلەت ئىشلىرى زىيارىتىدە بولغاندىن بۇيان، ئىككى تەرەپنىڭ ئورتاق تىرىشچانلىقىدا، جۇڭگو بىلەن پېرۇنىڭ سودىغا مەبلەغ سېلىش ھەمكارلىقى تېز ئېشىپ، ئىككى دۆلەت خەلقىگە ئەمەلىي نەپ ئېلىپ كەلدى. ئىككى تەرەپ تەجرىبىلەرنى يەكۈنلەپ، ئىككى دۆلەتنىڭ ئەمەلىي ھەمكارلىقىنىڭ سۈپىتىنى ئۆستۈرۈپ دەرىجىسىنى ئاشۇرۇشقا تۈرتكە بولۇپ، جۇڭگو - پېرۇ ئومۇميۈزلۈك ئىستراتېگىيەلىك ھەمراھلىق مۇناسىۋىتىنى ئۈزلۈكسىز يېڭى پەللىگە كۆتۈرۈپ، ئىككى دۆلەت خەلقىگە تېخىمۇ ياخشى بەخت يارىتىشى كېرەك.

شى جىنپىڭ مۇنداق كۆرسەتتى: ئىككى تەرەپ تەرەققىيات ئىستراتېگىيەلىرىنى ئۇدۇللاشتۇرۇپ، ھەمكارلىق يوشۇرۇن كۈچىنى چوڭقۇر قېزىپ، ئەمەلىي ھەمكارلىق يېڭى ئەندىزىسى بەرپا قىلىپ، سودا ۋە سېلىنمىدىن ئىبارەت «قوش چاق ئارقىلىق ھەرىكەتلىنىش»نى كۈچەيتىپ، ئەنئەنىۋى كەسىپ ۋە يېڭىدىن گۈللەنگەن كەسىپتىن ئىبارەت «ئىككى قانات ئارقىلىق ئۇچۇش»قا تۈرتكە بولۇپ، كەسىپ زەنجىرى ۋە تەمىنلەش زەنجىرىدىن ئىبارەت «ئىككى زەنجىر ئارقىلىق يۇغۇرۇلۇش»نى ئىلگىرى سۈرۈشى كېرەك. جۇڭگو تەرەپ پېرۇنىڭ خاس، ئەلا سۈپەتلىك يېزا ئىگىلىك مەھسۇلاتلىرىنى ئىمپورت قىلىشنى داۋاملىق كېڭەيتىشنى، ئەمەلىي كۈچى بار جۇڭگو كارخانىلىرىنى پېرۇغا بېرىپ مەبلەغ سېلىپ كەسىپنى گۈللەندۈرۈشكە ئىلھاملاندۇرۇپ، شۇ جاينىڭ تەرەققىياتى ئۈچۈن تېگىشلىك تۆھپە قوشۇشنى خالايدۇ. ئىككى تەرەپ قېزىلما بايلىق، ئېنېرگىيە، ئۇل ئەسلىھە، قاتناش، خەۋەرلىشىش قاتارلىق ئەنئەنىۋى ساھەلەردىكى ھەمكارلىقنى بىرتۇتاش پىلانلاپ ئالغا سىلجىتىپ، رەقەملىك ئىقتىساد، سۈنئىي ئەقلىي ئىقتىدار، يېشىل سۇ تىرانسپورتى، توكلۇق ئاپتوموبىل، يورۇقلۇق ۋولت كەسپى قاتارلىق يېڭىدىن گۈللەنگەن ساھەلەردىكى ھەمكارلىقنى كېڭەيتىشى كېرەك. جۇڭگو تەرەپ جۇڭگو كارخانىلىرىنى پېرۇنىڭ ئۇل ئەسلىھە قۇرۇلۇشىنى «قاتتىق تۇتاشتۇرۇش»قا قاتنىشىشقا ئىلھاملاندۇرۇپ، ئاقىل تاموژنىنى «يۇمشاق تۇتاشتۇرۇش»قا تۈرتكە بولۇشنى خالايدۇ. جۇڭگو كارخانىلىرىنىڭ قىيىنچىلىقلارنى يېڭىپ چيەنكەي پورتى تۈرىنىڭ 1 - باسقۇچلۇق قۇرۇلۇشىنى قەرەلىدە تاماملىغانلىقى جۇڭگو تەرەپنىڭ پېرۇ تەرەپ بىلەن ئۇزاق مەزگىللىك ئىستراتېگىيەلىك ھەمكارلىقنى قانات يايدۇرۇشتىكى ئىرادىسىنى تولۇق ئىپادىلەپ بەردى. جۇڭگو تەرەپ پېرۇ تەرەپ بىلەن بىرلىكتە، چيەنكەي پورتىنىڭ رايون ئورنى ئەۋزەللىكىنى تولۇق جارى قىلدۇرۇپ، چيەنكەي پورتىنى باشلىنىش نۇقتىسى قىلغان جۇڭگو - لاتىن ئامېرىكىسى قۇرۇقلۇق - دېڭىز يېڭى يولىنى بەرپا قىلىپ، دېڭىز بويىدىن ئىچكى قۇرۇقلۇققىچە، پېرۇدىن لاتىن ئامېرىكىسىدىكى باشقا دۆلەتلەرگىچە بولغان ئىستېرېئولۇق، كۆپ خىل، يۇقىرى ئۈنۈملۈك ئۆزئارا تۇتاشتۇرۇش، ئۆزئارا راۋانلاشتۇرۇش ئەندىزىسى بەرپا قىلىش ئۈستىدە ئىزدىنىپ، لاتىن ئامېرىكىسى ۋە كارب رايونىنىڭ ئومۇمىي تەرەققىياتى ۋە بىر گەۋدىلەشتۈرۈش قۇرۇلۇشىغا تۈرتكە بولۇشنى خالايدۇ. جۇڭگو تەرەپ سۇجوۋ شەھىرى بىلەن چيەنكەي شەھىرىنىڭ دوستانە شەھەر مۇناسىۋىتى ئورنىتىشىنى قوللايدۇ، پېرۇ تەرەپ بىلەن سانائەت باغچە رايونى قۇرۇلۇشى تەجرىبىلىرىنى ئالماشتۇرۇشنى قانات يايدۇرۇپ، چېگرا ھالقىغان مۇلازىمەت سودىسى، ئېلېكتىرونلۇق سودا قاتارلىق ساھەلەردىكى ھەمكارلىقنى كېڭەيتىپ، توپلىنىش ئۈنۈمى ۋە ھەمتۈرتكىلىك ئۈنۈمىنى جارى قىلدۇرۇپ، تېخىمۇ كۆپ ئەمەلىي نەتىجە ئارقىلىق جۇڭگو بىلەن پېرۇنىڭ ئۇزاق مەزگىل دوستانە ئۆتۈش، ئۆزئارا مەنپەئەت يەتكۈزۈپ ھەمكارلىشىش ئىشەنچىنى چىڭىتىشنى خالايدۇ. جۇڭگو تەرەپ يەنە پېرۇ تەرەپنىڭ تەرەققىيات ئېھتىياجىغا بىرلەشتۈرۈپ، يېقىن ئەتراپتا لۇبەن ھۈنەرخانىسى، جۇڭگو تىل - يېزىقى ھۈنەرخانىسى تەسىس قىلىپ، كەسپىي مائارىپ ھەمكارلىقىنى قانات يايدۇرۇپ، پېرۇ تەرەپنى يەرلىكلەشكەن ئىختىساسلىقلار ۋە ئەقلىي كۈچ، تېخنىكا تىرىكى بىلەن تەمىنلەشنى خالايدۇ.

شى جىنپىڭ مۇنداق تەكىتلىدى: ئىككى تەرەپ دۆلەتنى ئىدارە قىلىش تەجرىبىلىرىنى ئالماشتۇرۇشنى كۈچەيتىپ، ئىستراتېگىيەلىك ئۆزئارا ئىشىنىشنى ئىلگىرى سۈرۈپ، بىر - بىرىنىڭ يادرولۇق مەنپەئىتى ۋە كۆڭۈل بۆلىدىغان مۇھىم مەسىلىلەردە ئۆزئارا قەتئىي قوللاپ، چىرىكلىككە قارشى تۇرۇش، قانۇنسىز بېلىق تۇتۇشقا زەربە بېرىش قاتارلىق ساھەلەردىكى ھەمكارلىقنى كۈچەيتىشى كېرەك. مەدەنىيلىك جەھەتتە ئۆزئارا ئۆرنەك ئېلىش دەۋر مەسئۇلىيىتىنى زىممىسىگە ئېلىپ، خەلقئارا مەدەنىيلىك سۆھبىتىنى كۈچەيتىشنى تەشەببۇس قىلىپ، يەرشارىۋى مەدەنىيلىك سۆھبىتى ھەمكارلىق تورى بەرپا قىلىش ئۈستىدە ئىزدىنىشى كېرەك. مەدەنىيەت سىياسىتىنى ئۇدۇللاشتۇرۇشنى كۈچەيتىپ، مەدەنىيەت - سەنئەت، مائارىپ، مەدەنىيەت مىراسلىرىنى قوغداش قاتارلىق ساھەلەردىكى ئالماشتۇرۇش ۋە ھەمكارلىشىشنى چوڭقۇرلاشتۇرۇشى كېرەك. جۇڭگو تەرەپ پېرۇغا قارىتىلغان ئوقۇش مۇكاپاتى پۇلى بېرىش سانىنى كۆپەيتىشنى خالايدۇ. ئىككى دۆلەت ياش - ئۆسمۈرلىرىنىڭ ئۆزئارا چۈشىنىپ، ئۆزئارا ئىناق ئۆتۈپ، جۇڭگو - پېرۇ دوستلۇقىغا ئەۋلادمۇئەۋلاد ۋارىسلىق قىلىشىنى ئۈمىد قىلىدۇ.

شى جىنپىڭ مۇنداق كۆرسەتتى: ئاسىيا - تىنچ ئوكيان رايونىدىكى دۆلەتلەرنىڭ ئىقتىسادى چوڭقۇر يۇغۇرۇلغان بولۇپ، ئىتتىپاقلىق، ھەمكارلىقنى كۈچەيتىش، رايوننىڭ مۇقىملىقى، گۈللىنىشىنى قوغداش ئاسىيا - تىنچ ئوكيان چوڭ ئائىلىسى ۋە يەرشارىنىڭ جەنۇبىنىڭ ئورتاق مەنپەئىتىگە ئۇيغۇن. جۇڭگو بىلەن پېرۇ ئوخشاشلا كۆپ تەرەپچىلىكنى تەشەببۇس قىلىپ، قورۇقچىلىققا قارشى تۇرىدۇ. جۇڭگو تەرەپ پېرۇنىڭ ساھىبخانىلىق خىزمىتىنى پۈتۈن كۈچى بىلەن قوللايدۇ، ھەرقايسى تەرەپلەر بىلەن ئورتاق تىرىشىپ، بۇ قېتىمقى ئاسىيا - تىنچ ئوكيان ئىقتىسادىي ھەمكارلىق تەشكىلاتى رەھبەرلىرىنىڭ بىرەسمىي يىغىنىنىڭ مۇۋەپپەقىيەتلىك بولۇشىغا تۈرتكە بولۇپ، ئاسىيا - تىنچ ئوكيان رايونى تەقدىر ئورتاق گەۋدىسى بەرپا قىلىشنى ئالغا سىلجىتىشنى خالايدۇ. جۇڭگو تەرەپ يەنە پېرۇ تەرەپ بىلەن جۇڭگو - لاتىن ئامېرىكىسى مۇنبىرى رامكىسىدىكى پىكىر ئالماشتۇرۇش ۋە ھەمكارلىشىشنى داۋاملىق كۈچەيتىپ، جۇڭگو - لاتىن ئامېرىكىسى مۇناسىۋىتىنىڭ تەرەققىياتىنى ئىلگىرى سۈرۈشكە پائال تۆھپە قوشۇشنى خالايدۇ.

بورۇئارت رەئىس شى جىنپىڭنىڭ زىيارەتكە كەلگەنلىكىنى قىزغىن قارشى ئېلىپ مۇنداق بىلدۈردى: پېرۇ بىلەن جۇڭگو ئىككى چوڭ مەدەنىي قەدىمىي دۆلەت، تارىختا نۇرغۇن خۇارېن پېرۇنىڭ دۆلەت قۇرۇلۇشى ئۈچۈن پائال تۆھپە قوشقان، ئىككى دۆلەت خەلقى چوڭقۇر دوستلۇق رىشتىگە ئىگە بولۇپ، دوستانە قېرىنداش ۋە دوست. جۇڭگو ئۇزاقتىن بۇيان پېرۇنىڭ ئەڭ مۇھىم سودا ھەمراھى بولۇپ كەلدى، بولۇپمۇ ئىككى تەرەپ «بىر بەلباغ، بىر يول»نى ئورتاق بەرپا قىلىش ھەمكارلىقىنى قانات يايدۇرغاندىن بۇيان، ھەرقايسى ساھەلەردىكى ھەمكارلىقتا مول نەتىجىلەرنى قولغا كەلتۈرۈپ، ئىككى دۆلەتنىڭ ئۆزئارا مەنپەئەت يەتكۈزۈپ ھەمكارلىشىش ۋە ئورتاق تەرەققىي قىلىشقا ئىنتىلىشتىكى قەتئىي ۋەدىسىنى تولۇق نامايان قىلدى. رەئىس شى جىنپىڭ زىيارەت مەزگىلىدە، ئىككى تەرەپ ئەركىن سودا كېلىشىمىنىڭ دەرىجىسىنى ئۆستۈرۈش كېلىشىمنامىسى قاتارلىقلارنى ئۆز ئىچىگە ئالغان كۆپ تۈرلۈك مۇھىم ھەمكارلىق كېلىشىمى ئىمزالىدى، بۇ، ئىككى تەرەپنىڭ ئىقتىساد - سودا مۇناسىۋىتى ۋە ھەرقايسى ساھەلەردىكى ھەمكارلىقىنىڭ يەنىمۇ راۋاجلىنىشىنى كۈچلۈك ئىلگىرى سۈرىدۇ. بولۇپمۇ چيەنكەي پورتى ئېچىلىپ، «چيەنكەيدىن شاڭخەيگە بېرىش» ئىشقا ئاشۇرۇلۇپ، لاتىن ئامېرىكىسى بىلەن ئاسىيا ئارىسىدىكى مۇھىم كۆۋرۈك ۋە پېرۇ ئىقتىسادىنىڭ ئېشىشىدىكى مۇھىم موتورغا ئايلاندى، بۇ، پېرۇنىڭ لاتىن ئامېرىكىسى رايونىدىكى باشقا دۆلەتلەر، شۇنداقلا جۇڭگو ھەتتا ئاسىيا ئارىسىدىكى تېخىمۇ يۇقىرى ئۈنۈملۈك، تېخىمۇ قولاي بولغان ئالاقە ۋە سودىنى كۈچلۈك ئىلگىرى سۈرۈپ، ئىككى دۆلەت ۋە رايون دۆلەتلىرىنىڭ ئىمكانىيەتلىك سىجىل تەرەققىياتىغا كۈچ قوشىدۇ. پېرۇ تەرەپ جۇڭگو كارخانىلىرىنىڭ پېرۇغا كېلىپ مەبلەغ سېلىپ كەسىپلەرنى گۈللەندۈرۈپ، ئۇل ئەسلىھە، بايلىق، ئېنېرگىيە، قاتناش قاتارلىق مۇھىم ساھەلەردىكى ھەمكارلىق تۈرلىرىگە قاتنىشىشىنى قارشى ئالىدۇ. مەن شۇنى قايتا تەكىتلەشنى خالايمەنكى، پېرۇ تەرەپ بىر جۇڭگو پىرىنسىپىغا قەتئىي ئەمەل قىلىدۇ. پېرۇ تەرەپ جۇڭگو تەرەپ بىلەن مەدەنىيلىك جەھەتتىكى ئالماشتۇرۇش، ئۆزئارا ئۆرنەك ئېلىش ۋە ئادىمىيەت جەھەتتىكى ئالماشتۇرۇش، ھەمكارلىشىشنى كۈچەيتىپ، ياشلار ۋە خادىملارنىڭ بېرىش - كېلىشىنى قويۇقلاشتۇرۇشنى خالايدۇ. جۇڭگو تەرەپنىڭ پېرۇنىڭ بۇ قېتىمقى ئاسىيا - تىنچ ئوكيان ئىقتىسادىي ھەمكارلىق تەشكىلاتى رەھبەرلىرىنىڭ بىرەسمىي يىغىنىنى مەسئۇل بولۇپ ئۆتكۈزۈشىنى مۇھىم، قىممەتلىك مەدەت بىلەن تەمىنلىگەنلىكىگە رەھمەت ئېيتىمەن. پېرۇ تەرەپ كۆپ تەرەپچىلىكتە چىڭ تۇرۇپ، جۇڭگو تەرەپ بىلەن ئاسىيا - تىنچ ئوكيان ئىقتىسادىي ھەمكارلىق تەشكىلاتى قاتارلىق رامكىلار ئىچىدە پىكىر ئالماشتۇرۇش، ماسلىشىشنى كۈچەيتىپ، ئاسىيا - تىنچ ئوكيان رايونىنىڭ ئۇزاق مەزگىللىك تىنچلىق، مۇقىملىق ۋە تەرەققىيات، گۈللىنىشنى ئىشقا ئاشۇرۇشىغا تۈرتكە بولۇش ئۈچۈن تۆھپە قوشۇشنى ئۈمىد قىلىدۇ. رەئىس شى جىنپىڭنىڭ بۇ قېتىمقى زىيارىتى جەزمەن ئىككى دۆلەت مۇناسىۋىتىدىكى مۇھىم ئابىدىگە ئايلىنىپ، پېرۇ - جۇڭگو ئومۇميۈزلۈك ئىستراتېگىيەلىك ھەمراھلىق مۇناسىۋىتىنىڭ يېڭى سەھىپىسىنى ئېچىپ، ئىككى دۆلەت خەلقىنى تېخىمۇ ئۇزاق داۋاملىشىدىغان ۋە گۈللەنگەن كەلگۈسىنى بەرپا قىلىش ۋە ئۇنىڭدىن ئورتاق بەھرىلىنىش ئىمكانىيىتىگە ئىگە قىلىپ، پېرۇ - جۇڭگو تەقدىر ئورتاق گەۋدىسى بەرپا قىلىشقا تۈرتكە بولىدۇ.

سۆھبەتتىن كېيىن، ئىككى دۆلەتنىڭ دۆلەت باشلىقلىرى «جۇڭخۇا خەلق جۇمھۇرىيىتى ھۆكۈمىتى بىلەن پېرۇ جۇمھۇرىيىتى ھۆكۈمىتىنىڭ <بىر بەلباغ، بىر يول>نى ئورتاق بەرپا قىلىش توغرىسىدىكى ھەمكارلىق يىرىك پىلانى» «جۇڭخۇا خەلق جۇمھۇرىيىتى ھۆكۈمىتى بىلەن پېرۇ جۇمھۇرىيىتى ھۆكۈمىتىنىڭ ئەركىن سودا كېلىشىمىنىڭ دەرىجىسىنى ئۆستۈرۈش كېلىشىمنامىسى»نى ئىمزالاشقا بىرلىكتە گۇۋاھ بولدى، ھەم ئىقتىساد - سودا، كەسىپكە مەبلەغ سېلىش، سانائەت باغچە رايونى، مائارىپ، يېشىل تەرەققىيات قاتارلىق ساھەلەردىكى كۆپ تۈرلۈك ئىككى تەرەپ ھەمكارلىق ھۆججەتلىرىنى ئالماشتۇرۇشقا گۇۋاھ بولدى.

ئىككى تەرەپ «جۇڭخۇا خەلق جۇمھۇرىيىتى بىلەن پېرۇ جۇمھۇرىيىتىنىڭ ئومۇميۈزلۈك ئىستراتېگىيەلىك ھەمراھلىق مۇناسىۋىتىنى چوڭقۇرلاشتۇرۇش توغرىسىدىكى قوشما باياناتى»نى ئېلان قىلدى.

شۇ كۈنى كەچتە، شى جىنپىڭ زۇڭتۇڭ بورۇئارت ئۆتكۈزگەن قارشى ئېلىش زىياپىتىگە قاتناشتى.

سەي چى، ۋاڭ يى قاتارلىقلار يۇقىرىقى پائالىيەتلەرگە قاتناشتى.