شى جىنپىڭ ئەنگلىيە باش ۋەزىرى، ئاۋسترالىيە زۇڭلىسى بىلەن ئايرىم - ئايرىم كۆرۈشتىشىنخۇا ئاگېنتلىقى، رىئودې ژانېيرو، 11 - ئاينىڭ 18 - كۈنى تېلېگراممىسى (مۇخبىرلار سۈن خاۋ، جاۋ يەن) شۇ جاي ۋاقتى 11 - ئاينىڭ 18 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتنىشىش مەزگىلىدە ئەنگلىيە باش ۋەزىرى ستارمېر بىلەن كۆرۈشتى.
شى جىنپىڭ مۇنداق كۆرسەتتى: ھازىر دۇنيا يېڭى داۋالغۇش، ئۆزگىرىش مەزگىلىگە كىردى. جۇڭگو بىلەن ئەنگلىيە بىرلەشكەن دۆلەتلەر تەشكىلاتى خەۋپسىزلىك كېڭىشىگە دائىمىي ئەزا دۆلەت ۋە دۇنيادىكى ئاساسلىق ئىقتىسادىي گەۋدە بولۇش سۈپىتى بىلەن، ھەم ئۆز دۆلىتىنىڭ تەرەققىياتىغا تۈرتكە بولۇش مۇھىم ۋەزىپىسىنى زىممىسىگە ئالغان، ھەم يەرشارىۋى خىرىسقا تاقابىل تۇرۇش مەسئۇلىيىتىنى زىممىسىگە ئالغان. ئىككى تەرەپ ئىستراتېگىيەلىك ھەمراھلىق ئورۇن بېكىتمىسىگە ئەمەل قىلىپ، ئۆزئارا ھۆرمەت قىلىش، ئېچىۋېتىش - ھەمكارلىشىش، ئالماشتۇرۇش - ئۆزئارا ئۆرنەك ئېلىشتا چىڭ تۇرۇپ، ئۆزئارا مەنپەئەت يەتكۈزۈپ ئورتاق پايدا ئېلىشنى ئىشقا ئاشۇرۇپ، جۇڭگو - ئەنگلىيە مۇناسىۋىتىنىڭ ساغلام، مۇقىم تەرەققىياتىنىڭ كېيىنكى سەھىپىسىنى ئورتاق پۈتۈپ چىقىشى كېرەك.شى جىنپىڭ مۇنداق تەكىتلىدى: جۇڭگو بىلەن ئەنگلىيە ئىككى دۆلەتنىڭ تارىخىي مەدەنىيىتى، قىممەت قارىشى، جەمئىيەت تۈزۈمىدە پەرق بولسىمۇ، لېكىن كەڭ ئورتاق مەنپەئەتكە ئىگە، ئىككى تەرەپ قارشى تەرەپنىڭ تەرەققىياتىغا ئاقىلانە، ئوبيېكتىپ مۇئامىلە قىلىپ، ئىستراتېگىيەلىك ئالاقىنى كۈچەيتىپ، سىياسىي جەھەتتە ئۆزئارا ئىشىنىشنى ئىلگىرى سۈرۈپ، جۇڭگو - ئەنگلىيە مۇناسىۋىتىنىڭ مۇقىم داۋاملىشىشى، پۇختا داۋاملىشىشى، ئۇزاققىچە داۋاملىشىشىغا ھەقىقىي كاپالەتلىك قىلىشى كېرەك. ئىككى دۆلەت سودا - سېلىنما، پاكىز ئېنېرگىيە، پۇل مۇئامىلە مۇلازىمىتى، داۋالاش - خەلق تۇرمۇشى قاتارلىق ساھەلەردە كەڭ ھەمكارلىق بوشلۇقىغا ئىگە، بۇنى ئۈزلۈكسىز كېڭەيتىپ، ئىككى دۆلەت خەلقىگە تېخىمۇ ياخشى مەنپەئەت يەتكۈزۈش كېرەك. ئىككى تەرەپ قىزىق نۇقتا مەسىلىلىرىنى سىياسىي يول بىلەن ھەل قىلىشقا تۈرتكە بولۇپ، سۈنئىي ئەقلىي ئىقتىدار جەھەتتىكى يەرشارىۋى ئىدارە قىلىشنى كۈچەيتىپ، دۇنيا ئىقتىسادىنىڭ ئېشىشىنى ئىلگىرى سۈرۈش، ھەرقايسى دۆلەتلەرنىڭ ئورتاق تەرەققىياتىنى ئىشقا ئاشۇرۇش ئۈچۈن تۆھپە قوشۇشى كېرەك.ستارمېر مۇنداق بىلدۈردى: ئەنگلىيە بىلەن جۇڭگو ئارىسىدا كەڭ ئورتاق مەنپەئەت بار، يەرشارىۋى خىرىسلارنى ھەل قىلىش، دۇنيانىڭ تىنچلىقى ۋە تەرەققىياتىنى قوغداشتا مۇھىم مەسئۇلىيىتى بار. ئەنگلىيە بىلەن جۇڭگونىڭ ئۇزاقتىن بۇيان داۋاملىشىپ كېلىۋاتقان كۈچلۈك مۇناسىۋىتى ئىككى دۆلەت ۋە دۇنيا ئۈچۈن ئىنتايىن مۇھىم. ئەنگلىيە تەرەپ ئۆزئارا ھۆرمەت قىلىش ۋە باراۋەر - سەمىمىي بولۇش روھىغا ئەمەل قىلىپ، جۇڭگو تەرەپ بىلەن سۆھبەتلىشىشنى كۈچەيتىپ، ئۆزئارا چۈشىنىشنى ئىلگىرى سۈرۈپ، ئىقتىساد - سودا، پەن - تېخنىكا، مالىيە - پۇل مۇئامىلە، ساقلىق ساقلاش - داۋالاش، مائارىپ، كىلىمات ئۆزگىرىشىگە تاقابىل تۇرۇش قاتارلىق كەڭ ساھەلەردە ئالماشتۇرۇش، ھەمكارلىشىشنى قانات يايدۇرۇشنى ئۈمىد قىلىدۇ. ئەنگلىيە بىلەن جۇڭگو كۆپ تەرەپچىلىكتە چىڭ تۇرىدۇ، ئەنگلىيە تەرەپ جۇڭگو تەرەپ بىلەن كۆپ تەرەپلىك پىكىر ئالماشتۇرۇش، ماسلىشىشنى كۈچەيتىپ، رايون قىزىق نۇقتا مەسىلىلىرىنى سىياسىي يول بىلەن ھەل قىلىشقا تۈرتكە بولۇشنى خالايدۇ.سەي چى، ۋاڭ يى قاتارلىقلار كۆرۈشۈشكە قاتناشتى.
شىنخۇا ئاگېنتلىقى، رىئودې ژانېيرو، 11 - ئاينىڭ 18 - كۈنى تېلېگراممىسى (مۇخبىرلار جۇ چاۋ، ۋۇ خاۋ) شۇ جاي ۋاقتى 11 - ئاينىڭ 18 - كۈنى چۈشتىن بۇرۇن، دۆلەت رەئىسى شى جىنپىڭ رىئودې ژانېيرودا 20 دۆلەت گۇرۇھى رەھبەرلىرى باشلىقلار يىغىنىغا قاتنىشىش مەزگىلىدە ئاۋسترالىيە زۇڭلىسى ئالبانېس بىلەن كۆرۈشتى.شى جىنپىڭ مۇنداق كۆرسەتتى: بۇلتۇر 11 - ئايدا، بىز بېيجىڭدا جۇڭگو - ئاۋسترالىيە مۇناسىۋىتىنىڭ ئۇزاق مۇددەتلىك تەرەققىياتىغا مۇناسىۋەتلىك ئىستراتېگىيەلىك، ئومۇمىيلىق، يۆنىلىش خاراكتېرلىك مەسىلىلەر توغرىسىدا چوڭقۇر پىكىر ئالماشتۇرغانىدۇق. بىر يىلدىن كۆپرەك ۋاقىتتىن بۇيان، ئىككى دۆلەتنىڭ ھەرقايسى قاتلام - دەرىجىدىكىلىرى قويۇق پىكىر ئالماشتۇرۇش، ئالاقىلىشىشنى ساقلاپ، بىز ھاسىل قىلغان مۇھىم ئورتاق تونۇشنى ئەمەلىيلەشتۈرۈشنى پائال ئالغا سىلجىتىپ، پائال ئىلگىرىلەشنى قولغا كەلتۈردى. جۇڭگو بىلەن ئاۋسترالىيە ئوتتۇرىسىدا تۈپ مەنپەئەت توقۇنۇشى يوق، پەقەت ئىككى تەرەپ ئۆزئارا ھۆرمەت قىلىش، بىر - بىرىگە باراۋەر مۇئامىلە قىلىش، ئوخشاشلىقلاردا بىرلىككە كېلىپ پەرقلەرنى ساقلاپ قېلىشتا چىڭ تۇرسىلا، جۇڭگو - ئاۋسترالىيە مۇناسىۋىتىنى چوقۇم ياخشى تەرەققىي قىلدۇرغىلى بولىدۇ. جۇڭگو تەرەپ ئاۋسترالىيە تەرەپ بىلەن بىرلىكتە تېخىمۇ پىشىپ يېتىلگەن، مۇقىم، تېخىمۇ مول نەتىجىلىك بولغان جۇڭگو - ئاۋسترالىيە ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورنىتىشقا تۈرتكە بولۇپ، رايون ۋە دۇنياغا تېخىمۇ كۆپ مۇقىملىق ۋە ئېنىقلىق قوشۇشنى خالايدۇ.شى جىنپىڭ مۇنداق كۆرسەتتى: ئاۋسترالىيەنىڭ 250تىن ئارتۇق كارخانىسى بۇ يىللىق جۇڭگو خەلقئارا ئىمپورت كۆرگەزمىسىگە قاتنىشىپ، تارىختىكى يېڭى يۇقىرى سەۋىيەنى ياراتتى، بۇ ئاۋسترالىيە تەرەپ كارخانىلىرىنىڭ جۇڭگو ئىقتىسادى ۋە ئىككى دۆلەت ھەمكارلىقىغا تاشلىغان «ئىشەنچ بېلىتى». ئىككى تەرەپ ئۆزئارا مەنپەئەت يەتكۈزۈپ ئورتاق پايدا ئېلىش ھەمكارلىق ئەندىزىسىنى كېڭەيتىشتە چىڭ تۇرۇشى كېرەك. جۇڭگو تەرەپ ئاۋسترالىيەنىڭ تېخىمۇ كۆپ ئەلا سۈپەتلىك مەھسۇلاتلىرىنى ئىمپورت قىلىشنى خالايدۇ، جۇڭگو كارخانىلىرىنىڭ ئاۋسترالىيەگە بېرىپ مەبلەغ سېلىپ كەسىپنى گۈللەندۈرۈشىگە ئىلھام بېرىدۇ، ئاۋسترالىيە تەرەپنىڭ جۇڭگو كارخانىلىرىنى ئادىل، ئاشكارا، كەمسىتىش بولمىغان تىجارەت - سودا مۇھىتى بىلەن تەمىنلىشىنى ئۈمىد قىلىدۇ. جۇڭگو بىلەن ئاۋسترالىيەنىڭ ھەر ئىككىسى ئىقتىسادنىڭ دۇنياۋىلىشىشىنى ۋە ئەركىن سودىنى قوللىغۇچىلار، قوغدىغۇچىلار، ئىككى تەرەپ ماسلىشىش ۋە ھەمكارلىشىشنى كۈچەيتىپ، قورۇقچىلىققا قارشى تۇرۇپ، ھەرقايسى دۆلەتلەرنىڭ ئېچىۋېتىش داۋامىدا پۇرسەت ۋە مەنپەئەتتىن بەھرىلىنىشىگە تۈرتكە بولۇپ، ئورتاق تەرەققىياتنى ئىشقا ئاشۇرۇشى كېرەك.ئالبانېس مۇنداق بىلدۈردى: ئاۋسترالىيە - جۇڭگو ئومۇميۈزلۈك ئىستراتېگىيەلىك ھەمراھلىق مۇناسىۋىتى ئورنىتىلغانلىقىنىڭ ئون يىللىقى پەيتىدە، رەئىس شى جىنپىڭ بىلەن يەنە بىر قېتىم كۆرۈشكەنلىكىمدىن ئىنتايىن خۇشالمەن. مەن بۇلتۇر جۇڭگودا زىيارەتتە بولغاندىن بۇيان، ئاۋسترالىيە - جۇڭگو مۇناسىۋىتى سودىنى ئۆز ئىچىگە ئالغان ھەرقايسى ساھەلەردە كىشىنى ئىلھاملاندۇرىدىغان ئىلگىرىلەشلەرنى قولغا كەلتۈرۈپ، ئىككى دۆلەت خەلقىگە ئەمەلىي نەپ يەتكۈزدى. ئاۋسترالىيە تەرەپ بىر جۇڭگو سىياسىتىگە ئەمەل قىلىشتا چىڭ تۇرىدۇ، «ئىلمەكتىن ئاجرىتىش»قا قارشى تۇرىدۇ، ئىقتىسادنىڭ دۇنياۋىلىشىشىنى ئالغا سىلجىتىشنى تەشەببۇس قىلىدۇ، جۇڭگو تەرەپ بىلەن ئېنېرگىيە تىپىنى ئۆزگەرتىش، كىلىمات ئۆزگىرىشى قاتارلىق جەھەتلەردىكى ھەمكارلىقنى كۈچەيتىشنى ئۈمىد قىلىدۇ. جۇڭگونىڭ تەرەققىياتى ئاسىيا - تىنچ ئوكيان رايونىنىڭ ئۇزاققىچە مۇقىم بولۇشىغا ۋە ئېشىشنى ساقلىشىغا مۇھىم تۆھپە قوشتى، ئاۋسترالىيە تەرەپ جۇڭگونىڭ ئاسىيا - تىنچ ئوكيان ئىقتىسادىي ھەمكارلىق تەشكىلاتى قاتارلىق كۆپ تەرەپلىك مېخانىزمدا جارى قىلدۇرغان مۇھىم رولىنى تەرىپلەيدۇ، جۇڭگونىڭ 2026 - يىللىق ئاسىيا - تىنچ ئوكيان ئىقتىسادىي ھەمكارلىق تەشكىلاتىنىڭ ساھىبخانى بولۇشىنى قوللايدۇ، جۇڭگو تەرەپ بىلەن كۆپ تەرەپلىك پىكىر ئالماشتۇرۇشنى كۈچەيتىپ، رايوننىڭ تىنچلىقى، مۇقىملىقى ۋە گۈللىنىپ تەرەققىي قىلىشىنى ئىلگىرى سۈرۈشنى خالايدۇ.سەي چى، ۋاڭ يى قاتارلىقلار كۆرۈشۈشكە قاتناشتى.تەكشۈرۈپ بېكىتكۈچى: مەمەت ياسىن
مەسئۇل مۇھەررىر: ئادىل غاپپار
مۇھەررىر:خاتىمە پەتتار
审核：买买提·牙生
责编：阿地力·阿帕尔
编辑：哈提曼·帕塔尔
![]()
![]()
![]()
![]()
