سۈرەتنى بېسىپ كىنو كۆرۈشنى باشلىۋېتىڭ
ئايرىلىپ كەتكەن يىگىت ئەتىسىلا خاتىرىسىنى يوقىتىپ قايتىدىن قىز دوستىغا چاپلىشىۋالدى
ئۈندىدار سالونى خەۋىرى، نۇر تورى تەرجىمىسى:
2020-يىلى 9-ئاينىڭ 4-كۈنى جىئەننا بىلەن مىچېل ئامېرىكىنىڭ يۇتا ئىشتاتىنىڭ درېيپېر شەھىرىدە توي قىلغان.
(جىئەننا بىلەن مىچېل)
ئەمەلىيەتتە ئىككىسىنىڭ ھېسسىياتىمۇ ئانچە ئوڭۇشلۇق ئەمەس، ئۇلار ئىلگىرى ئايرىلىپ كەتكەن، لېكىن يىگىت مىچېل پۈتۈنلەي ئېسىنى يوقاتقان. مىچېل بىلەن جىئەننا ئىككىسى 2019-يىلى تونۇشقان بولۇپ، ئەينى چاغدا مىچېل جىئەننانىڭ بىر دوستى بىلەن ئۇچرىشىشقا چىقاۋاتاتتى. كېيىن مىچېل ئايرىلىپ كەتكەن، ئىككىيلەن يەنە بىر مەزگىل دوست بولۇپ بىللە تۇرغان، ئاخىرىدا ئۇلار ئىككىسى ئاشىق مەشۇققا ئايلانغان. لېكىن ئۇزاق ئۆتمەي، جېننېر بۇ ھېسسىياتتىن يەنە خاتىرجەمسىزلەنگەن، شۇنىڭ بىلەن 2020-يىلى 2-ئايدا ئۇ «تۇرمۇش ئادەمنى بەكلا گاڭگىرىتىپ قويىدىكەن» دېگەن باھانە بىلەن مىچېل بىلەن ئايرىلىپ كەتكەن.
(ئايرىلىپ كەتكەندىن كېيىنكى جىئەننا)
ئايرىلىپ كەتكەندىن كېيىن ئىچ پۇشۇقىنى چىقىرىش ئۈچۈن 22 ياشلىق مىچېل ئەتىسى يۇتا ئىشتاتىدىكى بىۋېر تېغىغا چىققان، ئۇ ئېگىز تاغدا قار تېيىلىش ئارقىلىق ئازابنى ئۇنتۇپ كەتمەكچى بولغان. ئويلىمىغان يەردىن كۈتۈلمىگەن ئىش يەنە يۈز بەرگەن.
قار تېيىلىۋاتقاندا، مىچېل ئېغىر ھادىسىگە ئۇچراپ، مېڭىسى ئېغىر دەرىجىدە سىلكىنىپ كەتكەن. جىئەننا كېيىن مۇنداق دېگەن: «ئەينى چاغدا مىچېل يىقىلىشتىن بۇرۇن مۇز يۈزى بەك تېيىلغاق بولغاچقا، ئۇنىڭ ئىككى پۇتى ئالدىغا تېيىلىپ كېتىپ، ئارقا مېڭىسى مۇزغا قاتتىق ئۇرۇلدى.»
مىچېل شۇ چاغدا ھوشىدىن كەتكەن، داۋالاش خادىملىرى ئۇنى تاغدىن چۈشۈرۈپ داۋالىغاندىن كېيىن، مىچېل ئاندىن ھوشىغا كەلگەن.
(دوختۇرخانىدىكى مىچېل)
جىئەننانىڭ دېيىشىچە، ئۇ قېتىملىق مېڭە سىلكىنىش بەك ئېغىر ئىكەن. مىچېلنىڭ كېيىنكى ئەھۋالى ئۇنچە بەك يامانمۇ ئەمەس ئىكەن، لېكىن شۇ مەۋسۇمدا ئۇنىڭ ھەممە دەرسلىرى دېگۈدەك لاياقەتسىز بولۇپ قالغان، شۇڭا ئۇ بىر مەزگىل ئوقۇشتىن توختاپ، كاللىسىنى ئارام ئالدۇرۇشقا مەجبۇر بولغان. نەتىجىسىنىڭ تۆۋەنلەپ كېتىشى يەنىلا ئىككىنچى ئورۇندا تۇرىدۇ، تېخىمۇ قورقۇنچلۇقى شۇكى، مىچېل خاتىرىسىنى يوقاتقان.
ئۇ ئەمدىلا قۇتقۇزۇۋېلىنغاندىن كېيىن ئۆزىنىڭ قانداق يارىلانغانلىقىنى ئۇنتۇپ قالغان، تاغدىن چۈشكەندىن كېيىن ئۇ تۇنجى كۈنى جىئەننانىڭ ئۆزى بىلەن ئايرىلىپ كەتكەنلىكىنى پۈتۈنلەي ئۇنتۇپ قالغان. شۇنىڭ بىلەن تاغ باغرىدىكى دوختۇرخانىدا ئارام ئېلىۋاتقان مەزگىلدە، ئۇ يەنە قىز دوستى دەپ ئويلىغان جىئەنناغا تېلېفون قىلىپ، ماشىنا ھەيدىيەلمىگەچكە ماشىنا ھەيدەپ ئۆزىنى ئالغىلى كېلىشنى ئېيتقان. قىسقا ئۇچۇرنى تاپشۇرۇۋالغان جىئەننامۇ گاڭگىراپ قالغان، ئۇ مۇنداق دېگەن: «مەن ئەينى ۋاقىتتا بەك ھەيران قالدىم، ئۇ نېمىشقا ماڭا بۇنداق قىسقا ئۇچۇر ئەۋەتىدۇ؟ مەن ئۇنىڭ بىلەن ئايرىلىپ كەتكەن ئەمەسمىدىم.»
شۇنىڭدىن كېيىن مىچېل ئىزچىل جىئەننا بىلەن ئالاقىلىشىپ تۇرغان، لېكىن جىئەننا مىچېلنىڭ خاتىرىسىنى يوقاتقانلىقىنى بىلمەيتتى (ئەمەلىيەتتە، مىچېلنىڭ ئۆزىمۇ بىلمەيتتى)، شۇڭا ئۇ يەنىلا ئازراق ئوڭايسىزلىق ھېس قىلغان، ئۇ مۇنداق دېگەن: «مىچ (مىچېلنىڭ ئەركىلەتمە ئىسمى) مېڭىسى سىلكىنىپ كەتكەندىن كېيىن ماڭا توختىماي ئۇچۇر يوللاپ تۇردى، ئۇنىڭ مەن بىلەن بىللە سىرتقا چىقىپ ئوينىغۇسى باركەن، بىر قېتىم مەن ئۇنىڭغا ياتاقدىشىم بىلەن ئىككىمىزنىڭ شۇ كۈنى ئىنتايىن زېرىككەنلىكىمىزنى ئېيتتىم، ئۇ بىزگە ئۇششاق يەيدىغانلارنى ئەكىلىپ بەردى. شۇ چاغدا مەن ئۇنىڭ نېمىشقا ماڭا ئۇچۇر يوللايدىغانلىقىنى چۈشەنمىدىم، نېمىلا دېگەن بىلەن بىز ئايرىلىپ كەتتۇق. مەن شۇ چاغدا ئۇنى <ئايرىلىپ كەتسەكمۇ بىز يەنىلا ياخشى دوست> دېگەن گەپنى راست دەپ قالغان ئوخشايدۇ دەپتىمەن.»
مىچېلنىڭ بۇ خىل ئىپادىسى ئالدىدا جىئەننامۇ پۇشايمان قىلغان. مىچېل ئاق كۆڭۈل ھەم كۆيۈمچان، ئۇنىڭ ھېسسىياتىنى چۈشىنىشنى بىلىدۇ، ئەزەلدىن تەنە گەپلەرنى قىلمايدۇ، ئۇنىڭ تۇرمۇشتىكى قىيىنچىلىقلاردىن ئۆتۈۋېلىشىغا ياردەم بېرىدۇ، شۇڭا جىئەننا دەسلەپتە نېمىشقا ئۇنىڭدىن ئايرىلىپ كەتكەندىمەن دەپمۇ ئويلاپ قالغان.
(مىچېل ۋە جىئەننا)
شۇنىڭ بىلەن 2020-يىلى 3-ئايدا يەنى ئىككىيلەن ئايرىلىپ كېتىپ بىر ئايدىن كۆپرەك ۋاقىتتىن كېيىن جىئەننا ئۆزىنىڭ يۈزىنى قايرىپ قويۇپ مىچېلدىن مۇھەببىتىنى قايتا باشلاشنى تەلەپ قىلغان. ئۇنىڭ ئېيتىشىچە، شۇ كۈنى ئۇ دوستى بىلەن بىر كۈن ئوينىغىلى چىققان، ئۆيگە قايتقاندىن كېيىن ئۇ مىچېلنىڭ قىسقا ئۇچۇرىنى تاپشۇرۇۋالغان، كەچتە ئىككىيلەن پاراڭلاشقاندا، ئۇ ئۇنىڭ بىلەن يارىشىپ قېلىشنى تەلەپ قىلغان.
ئۇ ئۇچۇردا مۇنداق دېگەن: «بىز يارىشىپ قالايلى؟»
مىچېل: «نېمە؟ بىز قاچان ئايرىلىپ كەتكەن؟»
بۇ چاغدا جىئەننا ئاندىن چۈشەنگەن، مىچېل خاتىرىسىنى يوقاتقانىدى. شۇنىڭ بىلەن جىئەننا مىچېل بىلەن ئايرىلىپ كەتكەن چاغدىكى ئەھۋالنى قايتا ئورتاقلاشقان، ئۇ مۇنداق دېگەن: «مەن ئۇنىڭغا ماشىنىدا نېمە ئىش بولغانلىقىنى، نېمە دېگەنلىكىمنى، ئۇنىڭ قانداق جاۋاب بەرگەنلىكىنى ئېيتتىم. نەتىجىدە ئۇ ماڭا بىزنىڭ نېمە توغرىلىق پاراڭلاشقانلىقىمىزنى ئەسلىيەلمەيدىغانلىقىنى ئېيتتى. ئۇ بىزنىڭ نېمىلەرنى پاراڭلاشقانلىقىمىزنى ئەسلىيەلمىدى، ئۇ بۇنى بەك قىزىقارلىق ھېس قىلدى، مەنمۇ خاتىرجەم بولدۇم، شۇڭا بىز ناھايىتى تېزلا يارىشىپ قالدۇق، چۈنكى ئۇنىڭغا نىسبەتەن، بىز ئەزەلدىن ئايرىلىپ باقمىغان!»
بەش ئايدىن كېيىن يەنى 2020-يىلى 8-ئايدا مىچېل جىئەنناغا توي تەكلىپى قويغان. ئۈچ ھەپتىگە يەتمىگەن ۋاقىت ئىچىدە ئۇ ئىككىسى 2020-يىلى 9-ئايدا يۇتا ئىشتاتىدا توي قىلغان.
(مىچېل بىلەن جىئەننانىڭ توي نەق مەيدانى)
يۇقىرىدا مىچېل سۆز قىلغاندا بۇ قېتىمقى خاتىرىسىنى يوقىتىشنى تىلغا ئالغان. ئۇ ئايرىلىپ كەتكەن ئىشنى ئۇنتۇپ قالغانلىقىنى ئېيتقان، لېكىن ئۇ ھەممە ئىشنىڭ ھەل بولغانلىقىدىن ناھايىتى خۇشال بولغان. ھازىر يەنە تۆت يىل ئۆتۈپ كەتتى، بۇ بىر جۈپ ئەر-خوتۇن ئوتتۇرىسىدىكى ھېسسىيات يەنىلا ناھايىتى ياخشى، ئۇلارمۇ ئۆزىنىڭ ئۆزگىچە ھېسسىيات كەچۈرمىشىنى باشقىلار بىلەن ئورتاقلىشىشنى ياخشى كۆرىدۇ. جىئەننا بۇ ھېكايىنى ئالاقە تورىدا ھەمبەھىرلىگەندە تورداشلار ئۇلار ئۈچۈن ئىنتايىن خۇشال بولغان. تورداشلار مۇنداق دېيىشكەن:
«ھا، ھا، ھا... كۈلەي دېسەم تېخى، ئۇلارنىڭ بىر يەرگە كەلگەنلىكىدىن خۇشال بولدۇم!»
«ئەگەر ئۇ ئاراڭلاردىكى ھېسسىياتتىن ۋاز كەچمەي، خاتىرىسىنى يوقاتقان قىياپەتكە كىرىۋالسىچۇ؟»
«ۋەقەلىك ئۆزگەردى! ئۇ ئەمەلىيەتتە ھەممىنى ئېسىدە ساقلايدۇ، لېكىن سىز ئۈچۈن، ئۇ يالغاندىن ھېچنېمىنى ئېسىدە تۇتالمىغان قىياپەتكە كىرىۋالدى!»
«ئاھ! ! ! بۇ بەك تاتلىق مۇھەببەت! ھېچقىسى يوق، سىلەر ئەزەلدىن ئايرىلىپ باقمىغان!»
«مانا بۇ كۆپچىلىك ئېيتىۋاتقان مۇھەببەت، پەقەت ئادەم توغرا بولسىلا، مەيلى قايسى ۋاقىت بولسۇن، ھامان سىزگە چىقىش يولى تېپىپ بېرىدۇ!»
«بۇنى كىنو قىلىپ ئىشلەش كېرەك!»
تورداشلار بۇ ھېكايىدىكى ئىشلارنى ئىنتايىن تاتلىق ۋە شېرىن ھېس قىلغان، لېكىن يەنە بىر نۇقتىدىن ئويلاپ باقايلى، خاتىرىسى ئەسلىگە كەلسە مىچېل راستتىنلا ھەممە ئىشنى قايتىدىن باشلاشنى خالامدۇ؟
