سۈرەتنى بېسىپ كىنو كۆرۈشنى باشلىۋېتىڭ
يەر شارى تورى خەۋىرى، نۇر تورى تەرجىمىسى
شۇ جاي ۋاقتى 11-نويابىر، غەربىي بېنگال ئىشتاتىدىكى بىر سوت مەھكىمىسى ئىلگىرى ھىندىستان جەمئىيىتىنىڭ كۈچلۈك غەزىپىنى قوزغىغان ئايال پىراكتىكانت دوختۇرنىڭ جىنسىي زوراۋانلىققا ئۇچراپ ئۆلۈپ كېتىش ۋەقەسىنى سوتلاشقا باشلىغان. بۇ دېلودىكى بىردىنبىر جىنايەت گۇماندارى كالكۇتتا RG Kar تېببىي شۆيۈەنى قارمىقىدىكى دوختۇرخانىنىڭ ساقچى پىدائىيسى سانجاي روي ئۆزىنى «پۈتۈنلەي جىنايەتسىز» دېگەن. ھىندىستان ھۆكۈمىتى كىشىلەرنىڭ دىققىتىنى تارتقان بۇ دېلونى سوتلاش سۈرئىتىنى تېزلىتىشنى ئۈمىد قىلغاچقا، سوت ھەر كۈنى ئېچىلغان، ئەمما ئاممىغا ئېچىۋېتىلمىگەن.
تاراتقۇلارنىڭ خەۋىرىگە قارىغاندا، زىيانكەشلىككە ئۇچرىغان ئايال پىراكتىكانت دوختۇر 8-ئاينىڭ 9-كۈنى ھىندىستاننىڭ شەرقىي قىسمىدىكى كالكۇتتا شەھىرىدىكى بىر ھۆكۈمەت دوختۇرخانىسىدا باسقۇنچىلىققا ئۇچراپ ئۆلتۈرۈلگەن، بۇ دېلو كىشىلەرنىڭ ھىندىستاندا ئاياللارنىڭ بىخەتەرلىك كاپالىتىنىڭ كۈچلۈك ئەمەسلىكىگە بولغان ئىنكاسىنى قوزغىغان. كېيىن ساقچىلار دوختۇرخانىدا ئۆچرەتتە تۇرۇش تەرتىپىنى ساقلاشقا ياردەملىشىۋاتقان دېلوغا چېتىشلىق ئەر روينى قولغا ئالغان، سەۋەبى بۇ ئەر باسقۇنچىلىق قىلىپ ئۆلتۈرۈش جىنايىتى ئۆتكۈزگەن.
خەۋەرلەرگە قارىغاندا، بۇ دېلو ئالدىنقى ھەپتە رەسمىي ئەرز قىلىنغان، ئەمما جاۋابكار روي ئۆزىنىڭ «زىيانكەشلىككە ئۇچرىغانلىقى»نى ئېيتقان. شۇ جايدىكى ئاخبارات ۋاسىتىلىرىنىڭ خەۋەر قىلىشىچە، روي ئالدىنقى ھەپتە سوتتىن تۈرمىگە ئېلىپ كېلىنگەندە، ساقچى ئاپتوموبىلى ئىچىدە ئۆزىنى «پۈتۈنلەي جىنايەتسىز» دەپ ۋارقىرىغان.
8-ئاينىڭ 10-كۈنى روينى ھىندىستان مەركىزىي تەكشۈرۈش ئىدارىسى قولغا ئالغان ھەمدە كالكۇتتا سوت مەھكىمىسىدە تۇتۇپ تۇرۇلۇش جازاسىغا ھۆكۈم قىلىنغان. 10-ئاينىڭ 7-كۈنى ھىندىستان مەركىزىي تەكشۈرۈش ئىدارىسى سوت مەھكىمىسىگە روينى رەسمىي ئەيىبلىگەن. روي بۇ دېلودا قولغا ئېلىنغان بىردىنبىر گۇماندار، ھىندىستان تاراتقۇلىرىنىڭ ئېيتىشىچە، ساقچىلار نەق مەيداندىن تېپىلغان كۆكچىشلىق تىڭشىغۇچ ئارقىلىق ئۇنى نىشانلىغان.
خەۋەرلەرگە قارىغاندا، سوت مەزگىلىدە تەخمىنەن 128 نەپەر گۇۋاھچى سوتقا چىقىدىكەن. ئىسمىنى ئاشكارىلاشنى خالىمىغان بىر خەۋەردار كىشىنىڭ ئېيتىشىچە، زىيانكەشلىككە ئۇچرىغۇچىنىڭ دادىسى 11-نويابىر سوتتا ئىسپات بىلەن تەمىنلىگەن. ئەگەر روينىڭ جىنايىتى بېكىتىلسە، ئۇ ئۆمۈرلۈك قاماق جازاسىغا ھۆكۈم قىلىنىشى ياكى ئۆلۈم جازاسىغا ھۆكۈم قىلىنىشى مۇمكىن.
جاۋابكار رويدىن باشقا، ھىندىستان مەركىزىي تەكشۈرۈش ئىدارىسى يەنە شۇ جايدىكى ساقچى ئىدارىسىنىڭ باشلىقى ۋە بىر دوختۇرخانا باشلىقىنى قولغا ئالغان، ئۇلار دەلىل-ئىسپاتنى ئۆزگەرتىش ۋە مالىيەگە خىلاپلىق قىلىش جىنايىتى بىلەن ئەيىبلەنگەن.
8-ئايدا ھىندىستاندا جەمئىيەتنىڭ كۈچلۈك غەزىپىنى قوزغىغان بۇ جىنسىي زوراۋانلىق ۋەقەسى سەۋەبىدىن كەڭ كۆلەملىك قارشىلىق بىلدۈرۈش پائالىيىتى يۈز بەرگەن، ھەتتا دوختۇرلارنىڭ ئىش تاشلىغان. تاراتقۇلارنىڭ ئېيتىشىچە، بۇ ۋەقە ھىندىستاندىكى دوختۇرخانىلارنىڭ ئۇل ئەسلىھەلىرى كەمچىل بولۇش ۋە بىخەتەرلىك ئەھۋالى ئاجىز بولۇش مەسىلىسىنى ئاشكارىلىغان، نۇرغۇن دوختۇرخانىلارغا يېتەرلىك يېپىق يوللۇق تېلېۋىزىيە ۋە ئامانلىق ساقلاش خادىملىرى سەپلەنمىگەن. 10-ئايدا غەربىي بېنگال ئىشتاتىنىڭ باش مىنىستىرى قارشىلىق بىلدۈرگۈچىلەر بىلەن كۆرۈشۈپ، ئۇلارنىڭ كۆپ قىسىم تەلەپلىرىنى مۇئەييەنلەشتۈرگەن.
ھىندىستان ھۆكۈمىتى 2013-يىلى جىنسىي زوراۋانلىق ۋە جىنسىي تاجاۋۇزچىلىق جىنايىتىگە بېرىلىدىغان جازانى ئېغىرلىتىدىغان قانۇن چىقارغان. يېڭى قانۇنغا ئاساسەن، تەكرار جىنايەت ئۆتكۈزگەن ياكى باسقۇنچىلىق قىلىپ ئېغىر يارىلىنىپ ھوشىدىن كەتكەنلەرگە ئۆلۈم جازاسى بېرىلىدۇ. لېكىن، بۇ دۆلەتتە يەنىلا ئاياللارغا قارىتىلغان جىنسىي زوراۋانلىق جىنايىتى كۆپ يۈز بېرىدىغان بولۇپ، 2022-يىلى ھەر كۈنى ئوتتۇرا ھېساب بىلەن 90 قېتىمغا يېقىن باسقۇنچىلىق دېلوسى يۈز بەرگەن.
