گۈزەل ھايات 9-بۆلۈم 104-قىسىم _ كۈندەشلىك

104-قىسىم

كۈندەشلىك

زۇبەيدە مەۋلانغا غەلىتىلا  قاراپ قويدى، ئاندىن كۈلۈپ تۇرۇپ:

  - نېمە ئۈچۈن؟  كۈندەشلىك قىلىۋاتمايدىغانسىز؟ - دېدى.

مەۋلان كۆزىنى قىسىپ ئۇنىڭغا تىكىلىپ تۇرۇپ:

- بۇنداق دەپ،  ئۆزىڭىزنى بەك ياخشى ھېس قىلامسىز؟ - دېدى.

زۇبەيدەنىڭ تەبەسسۇمى بارا-بارا ئۆچۈپ، جىددىي، ئەستايىدىل بولۇپ:

-  مەن قانداقمۇ زەپەر بىلەن ئارىلاشمايمەن دېيەلەيمەن، ئۇ مەن تەكلىپ قىلغان ئوبراز ۋەكىلى، شىركەت ئۇنىڭغا مۇھتاج، ئۇنىڭ ئۈستىگە بىز دوست، ئەگەر ئۇ مېنى ئىزدەپ كەلسە، مەن ئۇنىڭدىن ئۆزۈمنى قاچۇرالمايمەن.  - دېدى.

  - زۇبەيدە. - مەۋلاننىڭ ئاۋازىمۇ سوۋۇپ كەتتى،-  سىز ماڭا زىيانكەشلىك قىلىۋاتىسىز!  - دېدى.

   -  مەن زەپەر بىلەن بېرىش-كېلىش قىلسام، نېمىشقا سىزگە زىيانكەشلىك قىلغان بولىمەن، - دېدى.

ئۇ مەۋلاننىڭ تۈنۈگۈن كەچتە دوختۇر بىلەن قىلىشقان پارىڭىنى ئاڭلاپ قالغانلىقىدىن قاتتىق گۇمان قىلىپ قالدى.

ئۆزىنى راستتىنلا ۋۇ دالاڭ دەپ قالدىمۇ؟

مەۋلان ئۇنىڭغا بىر ھازا قاراپ تۇرغاندىن كېيىن، تۇيۇقسىز قوشۇمىسى تۈرۈلۈپ، چىرايى ئازابقا تولدى.

زۇبەيدەنىڭ چىرايى سەل-پەل ئۆزگىرىپ، ئېڭىشىپ ئۇنىڭغا قاراپ:

   - سىزگە نېمە بولدى؟ ھېچ ئىش يوقتۇ؟  - دەپ سورىدى.

  - ئاشقازىنىم بەك ئاغرىۋاتىدۇ!  - دېدى مەۋلان.

 - ساقلاپ تۇرۇڭ، مەن دوختۇرنى چاقىرىپ كىرەي... - دېدى زۇبەيدە مەۋلانغا گەپ قىلىش پۇرسىتى بەرمەي، ئالاقزادىلىك ئىچىدە مەۋلاننىڭ قولىنى سىلكىپ، كېسەلخانىدىن يۈگۈرۈپ چىقىپ كەتتى.

 زۇبەيدە  دوختۇرنى ئىتتىرىپ دېگۈدەك ئېلىپ كىردى، دوختۇر بىر ھازا  ئۇنى - بۇنى  سوراپ، كۈزەتكەندىن كېيىن، گۇمانلانغاندەك مەۋلانغا قاراپ قويۇپ:

- چوڭ مەسىلە يوقكەن... - دېدى. 

گەپنىڭ يېرىمىغا كەلگەندە، مەۋلاننىڭ سوغۇق نەزىرى ئۇنىڭغا تىكىلدى، شۇنىڭ بىلەن دوختۇر گېپىنى ئۆزگەرتىپ:

  - ئاشقازان كېسىلى دوختۇرخانىدىكى داۋالاش ئەڭ قىيىن بولغان كېسەللىكلەرنىڭ بىرى، كېسەللىك مەنبەسى ناھايىتى كۆپ، تۈنەش، ھاراق ئىچىش، سوغۇق ۋە ئاچچىق يېمەكلىكلەرنى يېيىشمۇ كېسەللىكنىڭ قوزغىلىشىنى كەلتۈرۈپ چىقىرىدۇ ھەتتا كەيپىياتى ياخشى بولمىسىمۇ كېسەللىكنىڭ ياخشىلىنىشىغا تەسىر يەتكۈزىدۇ. بۇ كېسەللىك پۈتۈنلەي بىمارنىڭ ماسلىشىشى ۋە ئۆزىنى چەكلەش ئىقتىدارىنى تەلەپ قىلىدۇ، ئەگەر بىمار ماسلاشمىسا، دوختۇرخانىمۇ ئامالسىز قالىدۇ. شۇڭا مەن يەنىلا ياخشى كۈتۈنۈشنى كۈچلۈك تەۋسىيە قىلىمەن، ھەر قايسى تەرەپلەرگە دىققەت قىلىش كېرەك، بولمىسا ھەر قانداق ئامىل كېسەللىك ئەھۋالىنىڭ يامانلىشىپ كېتىشىنى كەلتۈرۈپ چىقىرىپ، ئورنىنى تولدۇرغىلى بولمايدىغان نەتىجە چىقىپ قېلىشى مۇمكىن  ... - دېدى.

 گېپىنى تۈگىتىپلا مەۋلانغا بىر قاراپ قويدى، مەۋلان بېشىنى لىڭشىتىپ، قوشۇلىدىغانلىقىنى بىلدۈردى :

 - شۇنداق، مېنىڭ بايا ئاچچىقىم كەلگەچكە تۇيۇقسىز ئاشقازىنىم ئاغرىپ كەتتى.  - دېدى.

دوختۇر يېنىك يۆتىلىپ قويۇپ، زۇبەيدەگە قارىدى، ئاندىن  جىددىي، ئەستايىدىل قىياپەتتە:

   - خانىم، يەنىلا  بىمارنىڭ كەيپىياتىنى كۆپرەك ئويلىشىڭىزنى ئۈمىد قىلىمەن، بىمار ئادەتتە ناھايىتى سەزگۈر، ھېچ بولمىغاندا ئۇ ئاغرىپ دوختۇرخانىدا يېتىپ قالغان مەزگىلدە، ئۇنىڭغا تەسىر قىلىدىغان ئىشلار بولمىسۇن... - دېدى.

 مەۋلان يېنىدا ئىككى قېتىم  ئاجىز يۆتىلىپ، قوشۇمىسىنى تۈرۈپ،  ئازابلانغان ھالدا چىرايىنى پۈرۈشتۈردى.

كىم ئۇنىڭغا تەسىر قىلدى؟

زۇبەيدەنىڭ كۆڭلى ئەسلىدىمۇ پاراكەندە ئىدى، لېكىن دوختۇرنىڭ بايىقى گېپىنى ئاڭلاپ ئۇمۇ قورقۇپ كەتتى.

بولۇپمۇ ئاشقازان كېسىلىنى ياخشى كونترول قىلىنمىسا، ئاسانلا ئېغىرلىشىپ كېتىدىغانلىقىنى ئاڭلاپ، قورققىنىدىن سوغۇق تەرلەپ كەتتى.

مەۋلاننىڭ ھازىرقى  قىيلىنىپ، ئازاپ-ئوقۇبەتكە تولغان ھالىتىگە قاراپ، تېخىمۇ ئەنسىزلىككە چۆكۈپ:

-  بىلدىم... بۇندىن كىيىن دىققەت قىلاي  ... - دېدى.

دوختۇر بېشىنى لىڭشىتىپ، كېسەل كارىۋىتىدىكى پېيى تارتىشىپ قالغاندەك تۈگۈلۈپ قالغان ئەرگە قاراپ بىلىنەر-بىلىنمەس كۈلۈپ قويدى.

تازىمۇبىر... چوپچوڭ ئەرنىڭ گۆدەكلىك قىلغىنى قارا.

ئاشقازىنى ئاغرىپ بىئارام بولىۋاتقان بىلەن، لېكىن ئۇ ... تۈنۈگۈن ئاشقازىنىنى تازىلاپ، ئاغرىق توختىتىش دورىسى بەردى، تەكشۈرگەندە يەنە ناركوز قىلدى، قائىدە بويىچە ئېيتقاندا، دورىنىڭ ئۈنۈمى تېخى تۈگمىدى،  نەدىمۇ ئۇنداق  بىئارام بولسۇن؟

  - ھىم، كۆپرەك دىققەت قىلىڭ، بىمار ئۆزىنى باشقۇرمىسا، ئەتراپىدىكى كىشىلەرنىڭ دائىم نازارەت قىلىشىغا توغرا كېلىدۇ... جاپا چەكتىدىغان بولدىڭىز! - دېدى دوختۇر.

- سىزنى ئاۋارە قىلدىم. - دېدى زۇبەيدە.

دوختۇر يېنىك ھە دەپ جاۋاب بېرىپ، كېسەلخانىدىن چىقىپ كەتتى.

  - ئاڭلىدىڭىزمۇ؟ زۇبەيدە، ماڭا سىز زىيانكەشلىك قىلدىڭىز... - دېدى مەۋلان. 

- ئاڭلىدىم، كەچۈرۈڭ ... - دېدى زۇبەيدە.

-  كەچۈرۈم سورىغاننىڭ نېمىگە پايدىسى بار؟ سىز گەپ ئاڭلىشىڭىز كېرەك، بىلدىڭىزمۇ؟  - دېدى مەۋلان.

- ھە؟ - دېدى زۇبەيدە چۈشەنمەي.

 زۇبەيدەگە ھەرقانچە قىلىپمۇ چۈشەندۈرەلمىگەن مەۋلاننىڭ ئاشقازىنى راستىنلا ئىككى قېتىم مۇجىلىپ ئاغرىدى.

 - سىز... زەپەر! بىلەمسىز، ھازىر زەپەرنى كۆرسەملا ئاشقازىنىم ئاغرىيدۇ، ئۇنىڭدىن يىراقراق تۇرۇڭ.  - دېدى مەۋلان.

زۇبەيدە قوشۇمىسىنى تۈرۈپ:

-  ھە...   بولىدۇ،  ئامال بار سىزنىڭ ئۇنى ئۇچرىتىپ قالماسلىقىڭىزغا دىققەت قىلاي! - دېدى.  

مەۋلاننىڭ چىرايى سەل ئېچىلىپ:

   - ئۇنىڭدىن يىراقراق تۇرۇڭ!  - دېدى.

زۇبەيدە مەۋلاننىڭ  ئاغرىپ قالغانلىقىغا تايىنىپ يولسىزلىق قىلىۋاتقانلىقىنى غۇۋا ھېس قىلدى، ئۇنىڭ بىلەن داۋاملىق تالاشسىمۇ، ئىشىنىڭ ئاخىرى چىقمايدىغانلىقىنى بىلىپ،  بېشىنى لىڭشىتىپ:

- ھە، ھە بىلدىم، بىلدىم ...ئۇنداقتا، مەن ھازىر قايتىپ بېرىپ سىزگە تاماق ئېتىپ بەرسەم بولامدۇ؟  - دەپ سورىدى.

مەۋلان بىردەم تۇرۇۋالغاندىن كېيىن، تۇيۇقسىز يوتقاننى ئېچىپ كارىۋاتتىن تۇرۇپ كەتتى.

زۇبەيدە ھاڭۋېقىپ تۇرۇپ قېلىپ:

   - نېمە قىلىۋاتىسىز؟ !   - دېدى.

مەۋلان گەپ قىلماي، كېسەل كىيىمىنى سېلىۋېتىپ، كىيىم ئاسقۇچتىن ئۆزىنىڭ كىيىمىنى تېپىپ كىيدى.

  - مەۋلان!  - زۇبەيدە غەزەپلەنگەن ھالدا ۋارقىرىدى.

- مەن سىز بىلەن بىللە قايتىمەن!  - دېدى مەۋلان.

زۇبەيدە كېسەل كارىۋىتىدىن ئايلىنىپ ئۆتۈپ، ئۇنىڭ يېنىغا كېلىپ:

   - بولمايدۇ! سىزنىڭ بۈگۈن يەنە ئاسما ئوكۇلىڭىز بار! - دېدى . 

  - ئۇكۇل ئۇرغۇزمايمەن!  - دېدى مەۋلان. ئەمما  گېپىگە جاۋاب كەلمىدى،  بېشىنى كۆتۈرۈپ قارىغىنىدا، زۇبەيدەنىڭ غەزەپ بىلەن تىكىلىپ قاراۋتقانلىقىنى كۆرۈپ  لەۋلىرىنى چىڭ يۇمۇۋالدى، ئاۋازىمۇ سەل يۇمشاپ، ‐ ئۆزۈم يالغۇز دوختۇرخانىدا تۇرغۇم يوق... ئائىلە دوختۇرىنى تەكلىپ قىلسام بولىدۇ ... - دېدى.

زۇبەيدە كۆزىنى يېنىك چىمچىقلىتىپ، گەپ قىلمىدى، لېكىن چىراي ئىپادىسى خېلىلا ياخشىلىنىپ قالدى.

مەۋلان كىيىملىرىنى كىيىپ، ئالدىغا ئىككى قەدەم ئېلىپ ئۇنىڭ قولىنى تۇتۇپ:

   -  قايتىپ بېرىپلا ئائىلە دوختۇرىغا تېلېفون قىلىمەن، بۇنداق بولغاندا مەنمۇ دوختۇرخانىدا تۇرمايمەن، سىزمۇ كېلىپ - كېتىپ يۈرمەيسىز ... - دېدى. 

-  بىراق  ھازىرقى سالامەتلىك ئەھۋالىڭىزدا... - دېدى زۇبەيدە.

 - ھازىرچە مەن تېخى ساق، ھايات، ماڭايلى،- دېدى مەۋلان. 

زۇبەيدە ئۇنى زادىلا گەپكە كىرگۈزەلمىدى، باشتىن ئاخىرى مەۋلان ئۇنى تارتىپ ئېلىپ ماڭدى.

مەۋلان دوختۇرخانىنىڭ رەسمىيەتلىرىنى بېجىرىش ئىشلىرىنى بىر تېلېفون بىلەن ياردەمچىسىگە تاپشۇردى.

ئۆيگە قايتقاندىن كېيىن، ئاشخانا تۈنۈگۈن تاشلىنىپ قالغان پېتى قالايمىقان تۇراتتى. 

بىر كېچە يۇيۇنمىغاچقا، مەۋلان ئۇدۇل ئىككىنچى قەۋەتكە  چىقتى.

زۇبەيدە بىرىنچى قەۋەتنى بىر قۇر تازىلاپ، ئاشخانىغا كىرىپ شۈۋىگۈرۈچ ئېتىپ، ئاندىن ئۈستەلدىكى  تاماق قالدۇقلارنى يىغىشتۇردى.

تۈنۈگۈن كەچتە ئەتكەن تاماق ھەقىقەتەن ئاز ئەمەس، ئون نەچچە خىل قورۇما ئىدى.

مەۋلاننىڭ ئورنىدىكى قۇرۇما تەخسىنىڭ كۆپىنچىسىنىڭ قۇرۇقدىلىپ قالغانلىقىنى كۆردى.

زۇبەيدەنىڭ چىرايى يەنە سوۋۇپ كەتتى، ئۇ زەپەرنىڭ ئالدىدا باش ئېگىشنى خالىمىسىمۇ، بۇ نەرسىلەرنىڭ ھەممىسىنى يەپ تۈگىتىشىنىڭ  ھاجىتى يوق ئىدىغۇ؟

 چىرايىنى پۈرۈشتۈرۈپ ئۈستەلنى رەتلەشكە باشلىدى، كۆز ئالدىدىكى قورۇمىلارنىڭ ناھايىتى كۆپ ئىكەنلىكىنى كۆرۈپ، ئىلگىرى ئۆيدە گاڭپەن  بىلەن قورۇمىلارنى قۇشۇپ قۇرۇما گاڭپەن قىلىپ، بىر ۋاخ تاماق ئورنىدا يېگەنلىكىنى ئېسىگە ئالدى.  بىر ئاز ئويلىنىۋالغاندىن كېيىن يەنىلا پاكىز تەخسىنى تەييارلىدى، ئۇ تۈنۈگۈن كەچتە ئېشىپ قالغان قورۇمىلاردىن ئۆزى ياخشى كۆرىدىغان قورۇمىلارنى تاللاپ بىر يەرگە دۆۋىلەپ قويدى، مەۋلاننىڭ تەخسىسىدىكى ئېشىپ قالغان قورۇمىلارنى كۆرۈپ، كۆپ ئويلانمايلا بىر چەتكە قويدى.

ھەممىنى يىغىشتۇرۇپ كەلگەندە بىر تەخسە لىق توشتى، تۈنۈگۈن كەچتە گاڭپەنمۇ ئېشىپ قالغان،  مەۋلانغا شوۋىگۈرۈچ قاينىتىپ بەرسە، ئۆزى  قۇرۇما گاڭپەن قىلىپ يېسە بولىدىغان بولدى.

مەۋلاننىڭ شۈۋىگۈرۈچىنى خېلى ئۇزۇن قاينىتاتتى، بۇ جەرياندا  گۈرۈچنى قوشۇق بىلەن ئېزىپ،  گۈرۈچ ئۇمىچىغا ئايلانغاندىن كېيىن ئاندىن ئۇسۇپ، مەۋلان ئولتۇرىدىغان ئورۇنغا سوۋۇشى ئۈچۈن قويدى.

ئاندىن ئۇ ئۆزىگە قۇرۇما گاڭپەن تەييار قىلىپ ئەپچىقماقچى بولدى.

ھەممە نەرسە تەييار بولغاچقا، بەش مىنۇتتىلا تەييار بولدى.

ئۇ يەنە ئىككى خىل سوغۇق سەي تەييارلاپ،  شوۋىگۈرۈچنى مەۋلانغا ئەپچىقىپ بەرمەكچى بولغاندا، مەۋلان ئاشخانىدا پەيدا بولدى.

زۇبەيدە ئۇنىڭغا بىر پەس سەپسېلىپ قاراپ:

  - ئائىلە دوختۇرىغا تېلېفون قىلدىڭىزمۇ؟ - دەپ سورىدى.

- قىلدىم،  سائەت 9 دا كېلىدۇ، - دېدى مەۋلان. 

- ھە، بوپتۇ، ئەمىسە تاماق يەيلى.  - دېدى زۇبەيدە.

مەۋلان ئۇدۇلىدا ئولتۇردى، زۇبەيدەنىڭ تەخسىدىكى قورۇما گاڭپەنمۇ ئاز ئەمەس ئىدى.

قارىغاندا ئۇ قانداق سەمىرىشىنى ئۇنتۇپ قالمىغان ئوخشايدۇ.

ئۇ كۆپ ئويلانمايلا قوشۇقنى ئېلىپ، ئالدىدا بىر تال گۈرۈچنىمۇ كۆرگىلى بولمايدىغان گۈرۈچ ئۇمىچىغا قاراپ، ئاغزىنى ئۇچلاپ:

- ئاغرىپ قالغانلىقىمنى بىلمەيدىغانلار كۆرسە، مېنى خورلىنىپ قاپتۇ دەپ ئويلاپ قالىدىكەن! - دېدى . 

زۇبەيدە ئۇنىڭغا بىر قارىۋېتىپ:

   - ئىلگىرى پۇرسەت يوق ئىدى، ھازىر ئۆچ ئېلىش ئىمكانىيىتى بار بولدى.  - دېدى.

مەۋلان بىر يۇتۇم شوۋىگۈرۈچ ئىچىپ:

- قارىغاندا سىزنىڭ ماڭا پىكىرىڭىز خېلى بار ئوخشايدۇ. - دېدى. 

-  بۇرۇنقى ئۆزىڭىزنى بەك ياخشى دەپ قارايدىغان ئوخشىمامسىز؟ - دېدى زۇبەيدە. 

مەۋلان گەپمۇ قىلالمىدى.   

زۇبەيدە كۈلۈپ قويۇپ، قۇرۇما گاڭپەندىن بىر قوشۇق ئېلىپ ئاغزىغا سالدى.

ئىككىلا چايناپ،  تۇيۇقسىز قېتىپ قالدى، چىرايىدىكى ئىپادىسى ئاستا قېتىپ، بارغانسېرى قورۇلۇشقا باشلىدى.

ئاخىرىدا ئوبرازغىمۇ قارىماي قەغەزنى تارتىپ ئاغزىدىكى تاماقنى تۈكۈردى.

مەۋلان چىرايىنى پۈرۈشتۈرۈپ ئۇنىڭغا قاراپ:

   - نېمە بولدى؟  - دەپ سورىدى.

زۇبەيدە سۇنى ئېلىپ ئىككى يۇتۇم ئىچكەندىن كېيىن، تەخسىدىكى تاماقنى كۆرسىتىپ تۇرۇپ:

   - بۇ مەن تۈنۈگۈن كەچتە قورۇغان قورۇمىمۇ؟    تەمى قانداق قىلىپ بۇنداق بولۇپ قالىدۇ؟ !  - دېدى.

مەۋلان ئۇنىڭ تەخسىسىگە قارىدى، چىرايى بىردىنلا سەتلىشىپ:

-  ئاخشامقى ئاشقان تاماقنى يىدىڭىزمۇ؟ !  - دەپ سورىدى.

غەزەپلىنىپ چىققان سوغۇق ئاۋازىنىڭ ھەيۋىسى سەل قورقۇنچلۇق ئىدى.

زۇبەيدە بىردەم ھاڭۋېقىپ تۇرۇپ قېلىپ:

   -  نېمە... بولدى؟  - دەپ سورىدى.

مەۋلان قولىدىكى قوشۇقنى  دىرىڭ قىلغان ئاۋاز بىلەن تەڭ قاچىغا تاشلاپ:

   - نامراتلىقتا قازان ئاسالمايدىغان ھالەتكە چۈشۈپ قالدىڭىزمۇ؟  نېمىشقا بىر كېچە  تۇرۇپ قالغان تاماقنى يەيسىز؟ !  - دېدى.

زۇبەيدەنىڭ چىرايى سوۋۇپ:

   - نېمىشقا بىر كېچە تۇرۇپ قالغان تاماقنى يېسەم بولمامدۇ؟  بۇرۇنمۇ مۇشۇنداق يەيتتىم!  - دېدى.

- سىز... - مەۋلاننىڭ يۈزىدىكى گۆشلىرى تىترەپ، يۈرىكى يېرىلىپ كېتەيلا دەپ قالدى.

ھەقىقەتەن ياخشى ياماننى بىلمەيدىكەن.

بۇرۇن ...

بۇرۇنقى ئىشلىرىنى ئۇ نەدىن بىلىدۇ... 

زۇبەيدە ئالدىدىكى تەخسىنى تېخىمۇ يىراققا ئىتتىرىپ:

   - نېمانچە تەمسىز؟ ئاچچىق، تاتلىق، تۇزلۇق - تۇزسىز... ئىشقىلىپ ھەممە تەم بار... - دېدى. 

ئۇ گېپىنى تۈگەتمەي تۇرۇپلا، تۇيۇقسىز بىر ئىشنى ئويلاپ، بىردەم تۇرۇۋالغاندىن كېيىن، تۇيۇقسىز مەۋلانغا قاراپ:

- ئاخشام سىز  ... - دېدى.

مەۋلان قورۇغان تاماققا بىر قارىۋەتكەندىن كېيىن، كۆزلىرىنى ناھايىتى تېزلا ئېلىپ قېچىپ:

  - زۇبەيدە.   - دېدى.

 - نېمە بولدى؟ - دېدى زۇبەيدە. 

مەۋلان تۇيۇقسىز ئورنىدىن تۇرۇپ، ئۈستەلنىڭ ئۇدۇلىدىكى زۇبەيدەنىڭ بىلىكىنى تۇتۇۋېلىپ:

-  ھەقىقەتەن تايىقىڭىز كەمكەن! - دېدى.