པདྨ་རྒྱ་མཚོས་བརྩམས།
ཚང་མ་བདེ་མོ། ང་པདྨ་རྒྱ་མཚོ་ཡིན། འབྲོག་པའི་འཚོ་བ་དང་ཁ་མ་བྲལ་བའི་མི་ལོ་ལྔ་ལྷག་གི་རིང་ལ། ངས་ཁོམ་སྐབས་ཙག་ཙིག་དང་བསྟུན་ཏེ་བྲིས་པའི་ང་རང་ཉིད་ཀྱི་མི་ཚེ་འདིའི་ཆེས་ཐོག་མའི་སྒེར་དེབ་གསར་བ་ཕོ་ལོ་ཉི་ཤུའི་གཏམ་རྒྱུད་ཅེས་པའི་དཔེ་ཆ་འདི་ངོ་སྤྲོད་ཅིག་བྱེད།
དཔེ་ཆ་འདིའི་ནང་དུ་ང་རང་ཉིད་ཀྱི་ཕོ་ལོ་ཉི་ཤུའི་འདས་མ་ད་གསུམ་གྱི་གཏམ་རྒྱུད་དང་། ཡང་ན་གཏམ་རྒྱུད་དེ་དང་འབྲེལ་བའི་དགའ་སྐྱོ་ཆགས་སྡང་གི་ཚོར་བ་མང་པོ་ཞིག་བྲིས་ཡོད། བྲིས་པ་དེ་ཡང་། ང་ཁོ་ནའི་མི་ཚེའི་ལོ་རྒྱུས་ཤིག་དཔེ་ཆར་འབྲི་འདོད་པ་ཙམ་མ་ཡིན་པར། ང་དང་ང་འདྲ་བའི་ན་གཞོན་གང་མང་ཞིག་གི་མི་ཚེའི་གནས་སྟངས་དང་། སྤྱི་ཚོགས་ཁ་ཤས་ཤིག་གི་འཚོ་བའི་རྙོག་གྲ་མཚོན་བྱེད་ཅིག་གི་ཚབ་ཏུ། ས་གཞི་ལྟ་བུའི་མི་ཚོགས་ཀྱི་སེམས་ངོགས་སུ། རྡོ་རིང་ལྟ་བུའི་བོད་ཡིག་གི་དྲན་རྟེན་ཞིག་འཇོག་ཆེད་ཡིན།
རྒྱུ་མཚན་དེའི་དབང་གིས། ང་རང་གི་འདས་སོང་གི་གཏམ་རྒྱུད་དབྱངས་གསལ་གྱི་གཟུགས་བརྙན་དུ་ཕབ་པ་ནི། རྩོམ་རིག་འདི་ངའི་མི་ཚེའི་ཆེད་སྦྱོང་ཞིག་ཡིན་པའི་ངོས་ནས་མ་ཡིན་པར། རྩོམ་རིག་འདི་ངའི་མི་ཚེའི་གྲུབ་ཆ་གལ་ཆེན་ཞིག་ཡིན་པའི་རྒྱུ་མཚན་གྱིས་ཡིན།
མཚམས་འདིར་ཐོན་དུས་ངས་བཀའ་དྲིན་ཞུ་བ་ལས་གཞན་མེད་དེ། དེབ་འདི་ལ་ལྟ་ཚུལ་འདྲ་མིན་འཛིན་མཁན་གྱི་ཀློག་པ་པོ་རྣམས་དང་། དངོས་ཤུགས་བརྒྱུད་གསུམ་ནས་རྒྱབ་སྐྱོར་གནང་མཁན་ཚང་མ་ལ་ཐུགས་རྗེ་ཆེ་ཞུ་བ་ཡིན། མདོར་ན། དུས་མཐའི་བོད་སྐད་ཡིག་འདི་ལ་གདུང་ཤུགས་དྲག་པོས་འཐམ་འཁྱུད་ཐེངས་གཅིག་གི་ཆེད་དུ། ང་ཚོས་མཉམ་དུ་བོད་ཡིག་འབྲི།
2025/1/18 མཚན་མོར།
