བསྟོད་ཚིག་དབྱངས་ཀྱི་མཆོད་པ།

​

མཁན་རིན་པོ་ཆེ་ཚེ་དབང་རྒྱ་མཚོར་ཕུལ་བའི་དད་གསུམ་འཛུམ་པའི་མེ་ཏོག​

རྟེན་གྱི་མཆོག་གྱུར་ལྷ་དང་མིའི།།​
སྤྱི་བོས་ཀྱང་ནི་རེག་འོས་པའི།།​
ཡང་དག་བླ་མའི་ཞབས་ཀྱི་རྡུལ།།​
བདག་གི་མཆོད་པའི་རྒྱན་དུ་བཀོད།།​

ཉིན་བཞིན་གཙུག་ལག་དུ་མའི་ཀླུང་།།​
གང་གི་ཐུགས་ཟབ་ཡངས་པའི་མཚོར།།​
ལེགས་པར་བབས་ཀྱང་མི་ངོམས་པའི།།​
སྡེ་སྣོད་གཏེར་གྱུར་སླར་ཡང་གུས།།​

རྨད་བྱུང་མདོ་རྒྱུད་གཞུང་བཟང་ལ།།​
ཕུལ་བྱུང་བློ་གྲོས་ཡངས་པ་ཁྱེད།།​
སྔོན་བྱོན་དམ་པ་ཇི་བཞིན་དུ།།​
མཁས་པའི་བྱ་བ་དག་གིས་བྲེལ།།​

ཤེས་རབ་རྒྱས་ཀྱང་ཁེངས་པ་བྲལ།།​
སློབ་བུ་རྗེས་བཟུང་ལ་མི་ངལ།།​
མཆོག་དམན་སུས་ཀྱང་བསྟེན་སླ་བ།།​
དགེ་བའི་བཤེས་ཁྱོད་འདྲ་བ་ཉུང་།།​

རྟག་ཏུ་ཞི་དུལ་སྤྱོད་པས་མཛེས།།​
ལེགས་བཤད་སྒྲ་བརྒྱ་སྒྲོག་ལ་དཔའ།།​
གདུལ་དཀའི་ཐབས་ཀྱིས་འདུལ་བ་སོགས།།​
ངེས་དོན་བཤེས་གཉེན་གཤིས་སུ་མཐོང་།།​​

སྐབས་བབས་ཆོས་མཐུན་གཏམ་དག་ལས།།​
གྲུབ་མཐའི་ཕྱོགས་འཛིན་སོགས་ཀྱི་ཚིག།​
ཞལ་ལས་འོངས་བ་བདག་མ་ཐོས།།​
འདིས་ཀྱང་དགེ་བའི་བཤེས་སུ་ཤེས།།​

སྲིད་པའི་འབྲོག་དགོན་ལམ་སྣེ་རུ།།
ལེ་ལོ་སོགས་ཀྱི་ཆོམ་རྐུན་གྱིས།།
ལམ་སྒུག་བུ་དག་རྗེས་བཟུང་བའི།།
བཤེས་གཉེན་ལ་ནི་དགའ་ཞིང་གུས།།

བརྩེ་ལྡན་པདྨར་ཉེར་སྦྲུམ་པའི།།
བཅུད་ལྡན་ལེཊ་བཤད་མངར་མོ་ནི།།
སྐལ་ལྡན་སློབ་བུ་ལ་གནང་ཚེ།།
དོན་ལྡན་དལ་འབྱོར་འདི་ཀོ་སྙམ།།

བསླབ་པའི་གཞི་ལ་ཤེས་རབ་མདའ།།
སྦྱར་ཏེ་མང་མང་སློབ་བུའི་ཚོགས།།
རྨོངས་པའི་རྩ་བ་ལ་རྒོལ་བའི།།
གང་གི་བཀའ་དྲིན་མཐའ་མ་རིག།

བདག་བློ་ལུས་ཕྲ་མ་ཡིས་ནི།།
བྱས་པའི་ཚིག་རོ་སྤུང་པ་འདི།།
མང་ཐོས་དགེ་བའི་བཤེས་ཀྱི་སར།།
གཟིགས་མོར་ཕུལ་བ་རེ་གནོངས་ཀྱང་།།

དྲན་པ་ནང་དུ་བཀུག་པ་ན།།
ཡིད་དུ་འཐད་པའི་ཡོན་ཏན་དག།
མ་བཅོས་ཤུགས་ཀྱིས་རྡོལ་བ་འགའ།།
གྲོགས་དག་དགྱེས་ཕྱིར་གཟུགས་སུ་བྱས།།

ལེགས་པར་སྟོན་ཞིང་ཉེས་པ་བཟློག།
མུན་པ་སེལ་ལ་སོགས་པ་ཡི།།
ཡོན་ཏན་བཤེས་གཉེན་ལ་ལྡན་ཕྱིར།།
ཕ་མ་དག་དང་མཚུངས་པར་གསུངས།།

དེ་ཕྱིར་ཐབས་ཚུལ་སྣ་ཚོགས་ཀྱིས།།
བློ་ཁ་ལམ་དུ་སྒྱུར་བྱེད་པའི།།
བཀའ་བསྩལ་རྗེས་གནང་ཅི་བྱུང་ཡང་།།
དད་པའི་བུ་གར་ཤོང་གྱུར་ཅིག།

ཐོས་ཆུང་བདག་བློའི་རྫིང་བུ་ནས།།
བསྟོད་ཚིག་ངང་མོ་གཤོག་འགྱུར་ཅན།།
དྭངས་གསལ་བློ་གྲོས་རབ་ཡངས་པའི།།
བཤེས་གཉེན་མཚོ་མོའི་ཕྱོགས་སུ་སོང་།།

ངོ་བསྟོད་སོགས་ཀྱི་སྡིག་པ་མེད།།
སེམས་བསྐྱེད་ཀྱིས་བྱས་དགེ་བ་མེད།།
འོན་ཏེ་འདི་བྱས་རྣམ་དཀར་ཆ།།
བདོག་ན་རྣམ་ཀུན་མགོན་བཅས་ཤོག།

ཅེས་ཚིག་དོན་ཉིས་ཆར་བཀླག་རི་བ་ཞིག་མི་འབྱོན་ཡང་ལོ་འཁོར་མོ་གཅིག་གི་བཤེས་གཉེན་གྱི་སྐལ་བར་ཐོབ་པ་གང་གི་སློབ་བུ་རྒྱ་གྲོལ་ལམ་པདྨ་ཚུལ་ཁྲིམས་ཀྱིས་ཕུལ།

​

࿐དགེ་རྒན་ལ་ཕུལ་བའི་དྲན་ཁོལ་སྙིང་གི་ཟླ་འོད།

ཕོ་བྲང་ལྷ་ཡི་གཟི་བརྗིད་དམ་པའི་སྐུ་ལ་རྒྱན་ཞིང་།།​
བདེན་བཞིའི་ཆོས་བདུད་ཟབ་དབྱངས་བླ་མའི་ངག་ལ་གྱེར་བཞིན།།​
དྲི་མེད་འོད་གསལ་གཡང་ལ་ཕེབས་པའི་མངའ་བདག་མགོན་པོ།།​
རྒྱལ་བ་མི་ཡི་དེད་དཔོན་སྤྱི་བོའི་ནོར་ལ་ཞབས་འདུད།།​

བརྩེ་བ་རི་རྒྱལ་ཟབ་མོ་ཕྲག་སྟེང་སྒང་ལ་འཁྱེར་ཞིང་།།​
དཀའ་བ་སྡུག་གི་རྒྱ་མཚོ་ལན་བུན་འབུམ་ཕྲག་བརྒལ་ཏེ།།​
གསེར་སྲང་རིན་ཆེན་ནོར་བུ་བསྟན་པའི་གཟི་འོད་རྙེད་པར།།​
གཅིག་ལྷག་གཉིས་སུ་མ་ཆད་སློབ་བུ་ངེད་ཅག་གནང་བྱུང་།།​

འཁོར་བ་གྲུ་བཞིའི་མགྲོན་པོ་ཐ་ཤལ་སློབ་བུ་ང་རང་།།​
ཚོར་བའི་མདུན་ལམ་རྙེད་ཅིང་མི་ལུས་ཉི་འོད་དྲོན་པོ།།​
ཨ་སྔོན་དམ་པ་ཁྱེད་ཀྱི་ལྷད་མེད་བཀའ་དྲིན་སྒང་ལས།།​
འཆར་བའི་ལྔ་རིག་སྡེ་ཁག་གཅིག་པུ་དོན་གཞན་མ་རྙེད།།​

མགོན་པོ་རྒྱུ་སྐར་ཚོགས་ནས་ང་ཡི་སྙིང་གི་ཟླ་འོད།།​
བཀའ་དྲིན་བརྗོད་པ་དཀའ་བས་སྲིད་འདིར་དཔེ་ཞིག་ཟད་མ།།​
ལྷད་མེད་ཐུགས་རྗེའི་འོད་ཁྱིམ་ནམ་ཡང་བྲལ་མེད་ཚུབ་རོགས།།​
དྲན་པ་དད་པའི་མེ་ཏོག་འགྲིམ་དབྱངས་ཕྱོགས་སུ་གཡོ་ཐལ།།​

ཅེས་སྤྱི་ལོ ༢༠༢༢_༡༡_༢༦_སྟེ་བོད་རབ་རྒྱན་ཆུ་སྟག་ལོའི་བོད་ཟླ་བཅུ་པའི་ཚེས་གསུམ་ཉིན་བྲིས་ནས་སྔ་འགྱུར་གདན་ས་ཆེན་པོ་ཤར་རྒྱལ་བ་ཀ༔ ཐོག་དགོན་བཅུ་ཕྲག་རིག་པའི་སློབ་གླིང་དུ་སློབ་གཉེར་བ་མིང་ཙམ་འཛིན་པ་ཉག་བཀྲ་ཤིས་རྡོ་རྗེ་ནས་བྲིས་པ་དགེའོ།།

​

«བསྟོད་ཚིག་ངག་གི་མེ་ཏོག» 

རྩོམ་པ་པོ་བུར་ཤིང་།

 ༡

སྟོན་པའི་དམ་ཆོས་རྣམ་གཉིས་ཁོ་ན་རུ།།
སྐུ་ཚེ་གང་བོར་ཐོས་བསམ་ལས་ལ་གཞོལ།།
བསླབ་གསུམ་གཙང་མས་རང་རྒྱུད་ཆོས་ལ་སྦྱོར།།
མཁས་བཙུན་བཟང་གསུམ་ལྡན་པའི་བཤེས་གཉེན་བསྟོ༷ད།།

 ༢

རྣམ་དཔྱོད་རིགས་ལམ་ཐོས་པས་མཐའ་རྒྱ་བཅད།།
མདོ་སྔགས་བཅུ་ཕྲག་རིག་གཞུང་མཐར་སོན་པས།
ལྟ་ངན་ཕས་གྱི་རྒོལ་བ་ཚར་གཅོད་པ།།
དགེ་བའི་བཤེས་གཉེན་མཆོག་ལ་གུས་པས་བསྟོ༷ད།།

 ༣

འཆད་རྩོད་རྩོམ་པའི་གཏེར་ལ་དབང་འབྱོར་བ།།
གྲུབ་མཐའ་ཁག་ལ་དག་སྣང་ཁོ་ན་ལས།།
མ་དག་ཕྱོགས་རེར་འཛིན་པ་རྒྱང་དུ་དོར།།
ལུགས་གཉིས་ཀུན་རྫོགས་མཁས་པ་ཁྱེད་ལ་བསྟོ༷ད།།

༤

སྤང་བྱ་དུག་ལྔའི་མགོ་བོ་ཟིལ་གྱིས་མནན།།
བླང་བྱ་ཡང་དག་གནས་ལ་ངང་གིས་ཆས།།
ལྷོད་མེད་བརྩོན་པ་དྲག་པོའི་ལྕགས་ཀྱིས་བསྐུལ།།
ཤེས་རབ་ཐང་ཆེན་ཉུལ་བ་ཁྱེད་ལ་བསྟོ༷ད།།

༥

དཀའ་བ་ཁྱད་བསད་ངལ་བ་ཁུར་བཞེས་ནས།།
སློབ་བུ་བརྒྱ་ཕྲག་དུ་མའི་ཤེས་རབ་མིག།
འབྱེད་པའི་ཐབས་ལམ་སྐྱོང་མཁས་ངག་གི་གཏེར།།
ཟླ་བྲལ་མཚུངས་མེད་ཁྱེད་ལ་ཡང་ཡང་བསྟོ༷ད།།

༦

མི་མཐུན་སྐྱོན་དག་ཀུན་གསལ་སྤྲིན་བྲལ་བཞིན།།
མཐུན་པའི་ཡོན་ཏན་ལྡན་པ་གཏེར་གྱི་མཛོད།།
ཕྱི་གསལ་ནང་གཙང་པད་མའི་སྦུབས་འདྲ་བར།།
ནག་ནོག་དྲི་མ་དང་བྲལ་ཁྱེད་ལ་བསྟོ༷ད།།

 ༧

ཁྱེད་ཀྱི་སྐུ་གསུང་ཐུགས་ཀྱི་ཡོན་ཏན་དག།
གང་ཟག་སུ་དག་གིས་ནི་མཐོང་ཐོས་དང་།།
དྲན་རེག་ཐམས་ཅད་རྫོགས་སྨིན་མཐར་ཕྱིན་ནས།།
བདེ་ལྡན་དག་པའི་ཞིང་དུ་འདྲེན་ནུས་ཤོག།

༨

མགོན་པོ་ཁྱེད་ཀྱི་ཡོན་ཏན་མཁས་བཙུན་དག།
ཤེས་དམན་བླུན་རྨོངས་བདག་འདྲས་བརྗོད་དཀའ་བས།།
རེ་ཞིག་ཉག་ཉོག་ཚིག་གིས་མ་བསྒྲིབས་པར།།
བསྟོད་པའི་ཚིག་འགའ་མཆོད་པའི་རྒྱན་དུ་གྱུར།། 


—ཛམ་ཐང་ཤེས་དམན་པ་གྲྭ་དོན་རབ་ཏུ་འབོད་པས་སློབ་གྲོགས་ཤིག་གིས་བསྐུལ་ངོར་བཀའ་དྲིན་མཚུངས་ཟླ་དང་བྲལ་བ་མཁན་ཚེ་དབང་རྒྱ་མཚོ་ལ་མཆོད་པའི་ཚབ་ཏུ་
ཀཿ ཐོག་བཅུ་ཕྲག་སློབ་གླིང་གི་རང་ཤག་ནས་གང་ཤར་བྲིས་པའོ།།    
༢༠༢༢/ བོད་ཟླ་/༡༠་/ཚེས་/༣་ཉིན།  བཀྲིས་པར་གྱུར་ཅིག་གུ།།

​

དགེན་དྲིན་པོ་ཆེ་ལ་བསྟོད་པ་དྲི་ཟའི་བུ་མོ་དགྱེས་པའི་གླིང་བུ།

མཚོན་མེད་དཔའ་མཛངས་གསུམ་ལྡན་དྲིན་ཅན་ཏེ། །
ངུར་སྨྲིག་མདངས་ལྡན་ཆོས་གོས་སྐུར་གསོལ་བའི། །
སྙིང་རྗེའི་རང་གཟུགས་འདྲ་བའི་བཤེས་གཉེན་ལགས། །
ཁྱེད་དང་ཕྲད་པ་སློབ་བུའི་བསོད་ནམས་ཡིན། །


བཤེས་གཉེན་དམ་པ་བཀའ་དྲིན་ཆེ་བ་ལགས། །
རྣམ་ཤེས་ཕྲ་མོ་ཁྱོད་ཀྱིས་མ་གནང་ཡང་། །
བདག་གི་སྒོ་གསུམ་སྐྱོན་གྱིས་ཁེབས་པ་ལ། །
ཡིད་འོང་འདབ་གཤོག་གནང་མཁན་ཁྱེད་ཉིད་ཡིན། །


རྩོད་པའི་སྤོབས་དང་རྩོམ་པའི་ངག་གི་དཔལ། །
འཆད་པའི་རྣམ་དཔྱོད་རིག་པའི་གནས་ཀུན་ལ། །
དབྱར་དུས་རྔ་བོ་ཆེ་ལྟར་ཕྱོགས་ཀུན་ཁྱབ། །
སྔོན་བྱོན་དམ་པའི་རྗེས་འབྲངས་ཚུལ་མཐུན་པ། །


ཚུལ་ཁྲིམས་འདམ་གྱིས་མ་གོས་ཤེལ་དཀར་བཞིན། །
ཁ་ཞེ་མཐུན་ཞིང་དམན་པའི་ཡུལ་ལ་བྱམས། །
གཡོ་སྒྱུ་མེད་པ་དྲང་པོའི་ལས་ལ་བརྩོན། །
ཉི་མའི་གཉེན་གྱུར་རྗེས་འབྲངས་ཚུལ་མཐུན་པ། །


མིག་ཟུར་ཤེས་ཡོན་ཕྱུག་བའི་བཤེས་གཉེན་ལགས། །
ཐུགས་སེམས་གངས་དཀར་འདྲ་བའི་བཤེས་གཉེན་ལགས། །
དཔག་བསམ་ལྗོན་བཟང་འདྲ་བའི་བཤེས་གཉེན་ལགས། །
སྐུ་ཚེ་བརྟན་ཞིང་མཛད་ཕྲིན་རྒྱས་པར་སྨོན།

ལྷ་མཆོག་ཚེ༵་དཔག་མེད་ཀྱི་བྱིན་རླབས་དང་། །
འཇིག་རྟེན་དབ༵ང་ཕྱུག་ཉིད་ཀྱི་སྙིང་རྗེ་དང་། །
གེ་སར་ཐུགས་རྒྱ༵་ཆེ་བའི་ནུས་མཐུ་ཡིས། །
མི་མཐུན་བར་ཆད་མཚོ༵་ལས་བསྒྲལ་བར་མཛོད། །

༢༠༢༢ལོར་དགེན་ཁྱེད་ཀྱི་སློབ་མའི་མིང་ཙམ་འཛིན་པ་དབྱངས་གསལ་ལམ་དཀོན་མཆོག་སྐྱབས་ཀྱིས་ཕུལ་ལོ།

​

ངུར་སྨྲིག་མཛེས་རྒྱན། 

     དྷཱི་བློ་མིག་ནས།

འཆད་པའི་སྒྲ་བརྒྱ་འབུམ་ལྡིར་ཞིང་།།  

རྩོད་པའི་རིགས་ལམ་ཐོག་ལས་བཙན།། 
རྩོམ་པའི་ཀུ་མུད་ཕྱོགས་མཐར་བཞད།། 
འཆད་རྩོད་རྩོམ་པས་ཁྱེད་ཅག་དགེ།། 

སོ་ཐར་ཁྲིམས་ཀྱིས་ལེགས་མཛེས་ཤིང་།།
བྱང་ཆུབ་སེམས་ཀྱི་རྩ་བ་བརྟན།། 
དམ་ཚིག་གཙང་མ་གོས་སུ་བཀླུབས།། 
སྡོམ་པ་གསུམ་གྱིས་ཁྱེད་ཅག་མཛེས།། 

ཚུལ་ཁྲིམས་འོད་ཀྱི་གཟི་བྱིན་འབར།། 
ཏིང་འཛིན་ནང་གི་ཉམས་རྟོགས་འབར།། 
ཤེས་རབ་རྣོ་དབལ་ཡོངས་སུ་རྫོགས།།

བསླབ་པ་གསུམ་གྱིས་ཁྱེད་ཅག་མཛེས།།                             

བསླབ་པ་གསུམ་ལ་སློབ་སྦྱོངས་བྱེད།། 

ཁ་དོག་ངུར་སྨྲིག་ཅན་གྱིས་ཁྱེད་ཅག་མཛེས།།

མི་ལུས་ཐོབ་ཀྱང་དོན་ལྡན་ཐོབ།།

འདི་འདྲ་ཡིན་པ་ཁྱེད་ཅག་བསོད་ནམས་རེད།།

ཀྭ་ཡེ་སློབ་གྲོགས།

རྩོམ་པ་པོ་གནག་རྫི།

ཆུ་འཛིན་གྱི་ཕུང་པོ་ཕྱོགས་གཞན་ཞིག་ནས་
མཉམ་དུ་འགྲོགས་ནས་དཀྱུས་གཅིག་ཏུ་སླེབ་ཡོང་
ས་སྲོད་ནི་གྱེས་བྲལ་གྱི་ནང་ནས་བྲལ་བའི་དུས་ཚིགས་ཤིག་སྟེ་
ཡང་ན་ དེའི་རྗེས་ཀྱི་ཕྱིར་དྲན་ཁོ་ན་དེ་ཡིན་

ཀྭ་ཡེ་སློབ་གྲོགས་
ཁྱོད་རང་གླུ་དབྱངས་ཁོ་ན་ལ་དགའ་མི་སྲིད་དེ་
ཁོ་ཡང་བརྙན་འཕྲིན་གཅིག་པུ་ལ་མི་དུང་
ང་ཡང་དེ་བཞིན་རྩེད་རིག་རྐྱང་བ་ལ་ཞེན་པ་མེད་
བདེན་དེ་ ང་ཚོ་ནི་སྣང་བ་བན་བུན་གྱི་ཁྲོད་ནས་
དམིགས་ཡུལ་མེད་པའི་བར་སྣང་གི་བྱ་ཁྱུ་དག་དང་མཚུངས་ཨང་

སྤྲིན་པ་ལ་བློ་གཏད་མེད་པ་འུ་ཚོས་ཤེས་ཀྱང་
ང་ཚོ་ནི་སྤྲིན་པ་ལ་དུང་    རྒྱུ་མཚན་
མཚམས་སྤྲིན་ཁོ་ནས་ང་ཚོའི་གྱེས་བྲལ་དང་
དེ་ཡི་ནང་སེམས་ཀྱི་དགའ་སྐྱོ་རྟོགས་ངེས།
2022’11’24’

འདས་ཟིན་པའི་ལོ་ཟླའི་སྣང་བརྙན།   འཛམ་ཐང་རས་པ། ​

ང་ནི་ཅི་ཡང་མེད་པའི་བླུན་པོ་ཞིག། ​
ང་ནི་མིན་ནག་ནང་གི་ལོང་པ་ཞིག། ​
ང་ནི་ཁང་པ་སྒོ་མེད་ཞིག་གི་ནང་དཀྱིལ་དུ། ། ​
རྟ་བདུན་འོད་ལ་སྙེགས་པའི་མི་བུ་ཞིག།​

ང་ཚོས་ནི་དགེ་རྒན་གཅིག་ལ་བསྟེན་ནས་ལོ་འཁོར་གཅིག་བཞུད་ཟིན།  ལོ་ཟླ་དེ་དག་གི་ཁྲོད་ན་དགའ་སྐྱོ་གང་མང་ཞིག་གིས་བསྐྱེལ་ཡོད་པར་ཤེས་དགོས། དགེ་རྒན་གྱིས་ང་ཚོའི་ཆེད་དུ་ཉིན་མཚན་གྱི་དབྱེ་བ་མེད་པར་དཔེ་ཀློག་དང་སེམས་ཁུར་གནོན་ཤུགས་ཆེན་པོས་དཀའ་ངལ་ཅི་ཙམ་བརྒྱབ་ཡོད་པར་ཤེས་དགོས། མ་ཟད་ང་ཚོའི་རྒྱུད་ལ་མི་གཞི་བཟང་པོ་ཞིག་འབྱོར་ཐབས་དང་ཤེས་ཡོན་རིག་གནས་གང་མང་ཞིག་འཕེལ་ཐབས་ལ་སེམས་ཁུར་ག་ཚོད་བྱས་ཡོད་པར་ཤེས་དགོས། དགེ་རྒན་ནི་དཔེར་ན་མཚན་མོའི་མུན་ནག་གི་ཁྲོད་དུ་སྒྲོན་མེ་སྦར་བ་ལྟ་བུར་འོད་ཆེ་ལ་གཟི་བརྗིད་ཆེ། སློབ་དཔོན་ནི་མདུན་ལམ་འོད་སྟོང་ལྡན་པ་ཞིག་སྐྲུན་མཁན་དེ་ཡིན་ལ། རྨོངས་པའི་འཇིག་རྟེན་མེད་པར་གཏོང་མཁན་དེ་ཡང་དགེ་རྒན་ཡིན།​

དགེ་སློབ་ཚང་མའི་ཚེ་ཆོས་མཐའ་རུ་ཕྱིན། ། ​
འཆད་རྩོད་རྩོམ་པའི་བྱ་བ་གེགས་མེད་འགྲུབ། ། ​
མྱུར་དུ་ཀཿཐོག་བསྟན་ལ་བྱ་བྱེད་པས། །
ཚེ་གཅིག་འཇའ་ལུས་འགྲུབ་ལ་མངོན་པར་བསྟོད། ། ​

.. ཅེས་ཐ་ཤལ་བ་དཀོན་མཆོག་དགའ་བ་ནས་ཀཿཐོག་བཅུ་ཕྲག་རིག་པའི་སློབ་གླིང་དུ་ཤར་མར་བྲིས་སོ་དགེའོ།།​