རྨ་ཆེན་རྫོང་གིས་ཕྱུགས་ཟོག་བཙོང་བར་རམ་འདེགས་བྱས་པ།

ཉེ་བའི་ལོ་འགའི་རིང་ལ། འབྲོག་པ་མང་ཚོགས་ཀྱི་ཡོང་སྒོ་འཕར་བའི་རང་སྟེང་གི་སྒུལ་ཤུགས་ལ་སྐུལ་མ་བཏང་ནས་ཕྱུགས་ལས་དཔལ་འབྱོར་གྱི་ཡོང་སྒོ་ཇེ་མཐོར་གཏོང་ཆེད། རྨ་ཆེན་རྫོང་གིས་ཕྱུགས་ཟོག་བཙོང་པ་དང་ཞིང་ཕྱུགས་ཐོན་རྫས་ཕྱིར་འཚོང་བྱེད་ཤུགས་ཆེ་རུ་གཏོང་རྒྱུ་དེ་སྲོལ་རྒྱུན་གྱི་ཕྱུགས་ལས་ཐོན་རྫས་ཀྱི་སྤུས་ཚད་མཐོ་རུ་གཏོང་བ་དང་མང་ཚོགས་ཀྱི་ཡོང་སྒོ་མང་དུ་གཏོང་བའི་བྱ་བ་གལ་ཆེན་ཞིག་ཏུ་བརྩིས་ནས་རྒྱུན་འཁྱོངས་བྱས་ཤིང་། དངོས་སྒྲུབ་ནུས་ལྡན་གྱི་བྱེད་ཐབས་སྤྱད་ནས་སྲིད་ཇུས་དོན་འཁྱོལ་བྱེད་པའི་མྱུར་ཚད་དང་ཤུགས་ཚད་མུ་མཐུད་དུ་ཆེ་རུ་བཏང་བ་དང་། ནོར་ལུག་ཕྱིར་ཚོང་བྱེད་པའི་ཐབས་ལམ་ཇེ་མང་དུ་བཏང་སྟེ། རྫོང་ཡོངས་ཀྱི་ཕྱུགས་ལས་ཀྱི་སྤུས་ཚད་ཇེ་མཐོ་དང་ཕན་འབྲས་ཇེ་ཆེར་གཏོང་བ་དང་རོང་འབྲོག་པའི་ཡོང་འཕར་ཕྱུག་འགྱུར་ལ་སྐུལ་འདེད་ཏན་ཏིག་བཏང་བ་རེད།

རྩ་འཛུགས་ཀྱི་སྣེ་ཁྲིད་གཏིང་ཟབ་ཏུ་བཏང་ནས་གཙོ་གནད་འབུར་དུ་ཐོན་པར་བྱེད་པ། རྫོང་ཡོངས་ཀྱི་ནོར་ལུག་བཤས་རར་གཏོང་བའི་བྱ་བའི་སྤུས་ཚད་ཇེ་མཐོ་དང་ཕན་འབྲས་ཇེ་ཆེར་འགྲོ་བར་སྐུལ་འདེད་གཏོང་ཆེད། རྨ་ཆེན་རྫོང་གིས་ས་གནས་དང་ཐོན་ཁུངས་ཀྱི་ལེགས་ཆར་རྐང་བཙུགས་ཏེ། རྫོང་སྲིད་གཞུང་གིས་སྣེ་ཁྲིད་པ་དང་ལས་རིགས་གཙོ་སྐྱོང་གི་འགོ་ཁྲིད་ཚན་གཙོ་བྱས་ཤིང་། རྫོང་ཞིང་ཕྱུགས་དང་ནོར་སྲིད་སོགས་སྡེ་ཁག་དང་ཞང་དང་གྲོང་རྡལ་ཁག་གིས་གྲུབ་པའི་ནོར་ལུག་བཤས་རར་གཏོང་བའི་བྱ་བའི་ཆེད་དམིགས་འཛིན་གྲྭ་བཙུགས་ཏེ།《2024ལོའི“ནོར3000མངགས་ཉོ་བྱས་ནས་བཤས་རར་གཏོང་བའི”ཚོད་ལྟའི་བྱ་བ་ཡག་པོ་སྒྲུབ་རྒྱུའི་སྐོར་གྱི་བརྡ་སྦྱོར》པར་དུ་བཏབ་ལ། རྫོང་ཡོངས་ཀྱི་ནོར་ལུག་བཤས་རར་གཏོང་བའི་བྱ་བ་ཞིབ་ཚགས་ཀྱིས་བཀོད་སྒྲིག་བྱས་ཏེ་འགན་ནུས་ལྟར་ལས་འགན་ཞིབ་ཚགས་སུ་བཏང་བ་དང་ལས་བགོས་ཁ་གསལ་བྱས།

སྲིད་ཇུས་ཀྱི་རོགས་སྐྱོར་ཇེ་ལེགས་སུ་བཏང་ནས་ཡོང་སྒོ་འཕར་བ་དམིགས་སུ་འཛིན་པ། ནོར་ལུག་ཤའི་ཉོ་སྒྲུབ་ཁྲོམ་ར་ཞན་པ་དང་འབྲོག་པས་ནོར་ལུག་བཤས་རར་གཏོང་བའི་བརྩོན་སེམས་ཆེན་པོ་མེད་པ། ཕྱིར་ཚོང་ཐབས་ལམ་ཡག་པོ་མེད་པ་སོགས་ཀྱི་གནད་དོན་ལ་དམིགས་ཏེ། རྨ་ཆེན་རྫོང་གིས་འཆར་འགོད་དང་སྤྱི་འདོམས་བཀོད་སྒྲིག་བྱས་ནས《རྨ་ཆེན་རྫོང་གི2024ལོའི་ནོར་གནག་དང་འབྲོག་ལུག་བཤས་རར་གཏོང་བའི་བྱ་དགའི་ཁ་གསབ་ལས་གཞིའི་ལག་བསྟར་ཇུས་གཞི》བཟོས་པ་དང་། ཁེ་ལས་ཀྱི་ཐོན་ཁུངས་སྤུས་ལེགས་དང་ལས་གཞིའི་མ་དངུལ་གྱི་ཁ་གསབ། མཚོ་སྔོན་རོགས་སྐྱོར་སོགས་བྱེད་ཐབས་སྣ་མང་ལ་བརྟེན་ནས་རོགས་སྐྱོར་བྱས་ཏེ་ཁག་དང་པོའི་མངགས་ཉོའི་ནོར་གྲངས3000ཚོད་ལྟའི་བཤས་རར་གཏོང་བའི་བྱ་བ་ལེགས་འགྲུབ་བྱུང་ཞིང་། ཕྱིར་ཚོང་ཡོང་འབབ་སྒོར་ཁྲི1251.9ཡོད་པ་དང་། བཤས་རར་བཏང་བའི་ཁ་གསབ་སྒོར་ཁྲི206.6སྤྲད་པས་དབུལ་ཐར་ཁྱིམ་ཚང་དང་རིགས་གསུམ་གྱི་ལྟ་ཞིབ་ཚད་ལེན་ཁྱིམ་ཚང411ཡོད་པ་ལ། ཁྱིམ་ཚང་རེ་ལ་ཆ་སྙོམས་ཀྱིས་སྒོར5028.95ཡི་ཁ་གསབ་ཐོབ་ཅིང་། ལོ་གོང་མའི་དུས་མཉམ་དང་བསྡུར་ན་ཡོང་འབབ་སྒོར་ཁྲི73.76འཕར་ཡོད་པ་རེད། དུས་མཚུངས་སུ་རྫོང་ཡོངས་ཀྱི་ནོར་ལུག་བཤས་རར་གཏོང་བའི་མཇུག་མཐའི་བྱ་བ་སྒྲུབ་ནས་ཕན་ཐོགས་པའི་འབྲོག་ཁྱིམ་ཇེ་མང་དུ་བཏང་སྟེ། སྔར་ལས་མང་བའི་འབྲོག་པ་མང་ཚོགས་ལ་ཕན་ཐོགས་པ་དང་རྫོང་ཡོངས་ཀྱི་རོང་འབྲོག་མང་ཚོགས་ཀྱི་ཡོང་འབབ་བརྟན་པོའི་ངང་འཕར་བར་ཁག་ཐེག་བྱ་ཆེད། ཁག་གཉིས་པའི་ནོར་ལུག་བཤས་རར་གཏོང་བའི་བྱ་དགའི་ཁ་གསབ་བྱ་བ་གོ་རིམ་ལྡན་པའི་ངང་སྤེལ་བ་དང་། ནོར་གནག་ཁྲི1.6ལ་ནོར་རེར་སྒོར300དང་ལུག་རེར་སྒོར75ཡི་ཁ་གསབ་སྤྲོད་རྩིས་ཡོད་པ་རེད། མིག་སྔའི་བར་དུ་རྫོང་ཡོངས་ཀྱིས་རིམ་རྩིས་བྱས་ན་ནོར་གྲངས42739བཤས་རར་བཏང་བ་དང་ལུག24474བཤས་རར་བཏང་ཡོད་པ་རེད།

སློབ་གསོའི་ཁྲིད་སྟོན་བྱེད་ཤུགས་ཆེ་རུ་བཏང་ནས་དྲིལ་བསྒྲགས་རྒྱ་ཆེར་བྱེད་པ། “དགུན་ཁའི་ཕྱུགས་ཟོག”གི་གྲངས་འབོར་ཉུང་དུ་གཏོང་བ་དང་དགུན་ཁ་དང་དཔྱིད་ཀར་རྩྭ་ཡིས་མི་འདང་བའི་གནོན་ཤུགས་ཆུང་དུ་གཏོང་བ། གཟན་ཆག་ཉོ་བའི་མ་རྩ་ཇེ་དམར་གཏོང་བ་བཅས་བྱ་ཆེད“དགུན་སྐྱེལ་བའི་རྩིས”དང“དཔལ་འབྱོར་གྱི་རྩིས” “སྐྱེ་ཁམས་ཀྱི་རྩིས”བཅས་ཡག་པོ་བརྒྱབ། རྨ་ཆེན་རྫོང་གིས་རོང་འབྲོག་པའི་ཏང་ཡོན་དང་གསོ་ཚགས་ཁྱིམ་ཚང་ཆེན་པོའི་སྣེ་ཁྲིད་དཔེ་སྟོན་ནུས་པ་འདོན་སྤེལ་གང་ལེགས་བྱས་ནས་ཞང་དང་གྲོང་རྡལ་ཁག་གི་རོང་འབྲོག་པའི་ལག་རྩལ་མི་སྣ་དང་སྡེ་སྡོད་བྱ་བའི་རུ་ཁག་ལ་ཧུར་ཐག་གིས་སྐུལ་སློང་བྱས་ཏེ། ནོར་ལུག་བཤས་རར་བཏང་བའི་བྱ་དགའི་སྲིད་ཇུས་དང་ཕྱུགས་ཟོག་བཤས་རར་གཏོང་བའི་བྱ་བའི་གལ་ཆེའི་རང་བཞིན་དང་དགོས་ངེས་རང་བཞིན་སྒྲོག་འགྲེལ་ཤུགས་ཆེན་བྱས། འབྲོག་པ་མང་ཚོགས་ལ་ཕྱུགས་ཟོག་བཤས་རར་གཏོང་ཤུགས་ཆེ་རུ་གཏོང་རྒྱུར་ཁྲིད་སྟོན་བྱས་ཏེ། “མི་བཙོང་མི་བཤའ་བའི”སྲོལ་རྒྱུན་གྱི་འདུ་ཤེས་ལ་འགྱུར་ལྡོག་བཏང་ནས་ཉོ་སྒྲུབ་རིན་གོང་བཟང་བ་དང་སྲིད་ཇུས་ཀྱི་རྒྱབ་སྐྱོར་ཡོད་པའི་གོ་སྐབས་དམ་འཛིན་བྱས་ཏེ། བཤའ་འོས་པ་བཤའ་རྒྱུ་དང་འཚོང་དགོས་པ་བཙོང་ནས་རིན་གོང་གི་དབང་གིས་བྱུང་བའི་གནད་དོན་སྣ་ཚོགས་མི་ཐོན་པ་བྱས་པ་དང་། བཙོང་ཟོག་བཙོང་ནས་འབྲོག་པ་མང་ཚོགས་ཀྱི་ཡོང་སྒོ་འཕར་བར་བྱས། ད་ལོའི་ཚུན་ལ་དྲིལ་བསྒྲགས་སློབ་གསོ་ཐེངས22སྤེལ་བ་དང་མང་ཚོགས9800ལྷག་ལ་ཕན་ཐོགས།  

ཞབས་ཞུའི་བྱེད་ཐབས་ཞིབ་ཕྲར་བཏང་ནས་ནོར་ལུག་ཕྱིར་འཚོར་བྱ་བར་ཁག་ཐེག་བྱེད་པ། རྨ་ཆེན་རྫོང་གིས་ཕྱུགས་ཟོག་བཤས་རར་གཏོང་རྒྱུ་དེ་ད་ལྟའི་ཕྱུགས་ལས་ཐོན་སྐྱེད་ཀྱི་དོན་དག་གལ་ཆེན་དང་འགངས་ཆེན་དུ་བརྩིས་ནས་ཕྱུགས་ཟོག་བཤས་རར་གཏོང་བའི་ལས་རིམ་གཙོ་བོ་ཁག་ལ་དམིགས་པ་སྟེ། ལྷག་པར་དུ་སྟོན་ཀར་ཕྱུགས་ཟོག་གི་རིམས་ནད་སྔོན་འགོག་དང་ཚོད་འཛིན་བྱེད་པའི་རིམ་པ་གཙོ་བོ་འདིའི་ཐད་ནས“གཙང་འཁྲུད་ཆེན་པོ་དང་དུག་སེལ་ཆེན་པོའི”ཆེད་དོན་དུག་སེལ་བྱ་འགུལ་རྒྱུན་མཐུད་ངང་སྤེལ་ནས་ཞིང་ཆེན་ནང་ཁུལ་དང་ཞིང་ཆེན་ལས་བརྒལ་བའི་ཕྱུགས་ཟོག་དང་ཕྱུགས་ལས་ཐོན་རྫས་གཏོང་འདྲེན་བྱེད་པ། ཐོན་ཡུལ་གྱི་ནད་ཡམས་ཞིབ་བཤེར་ལག་ཁྱེར་སྤྲོད་པ། འབྲེལ་ཡོད་ཀྱི་ནད་ཡམས་ཞིབ་བཤེར་འགྲོ་ལུགས་དོན་འཁྱོལ་བྱེད་པ་བཅས་ཀྱི་ཐོག་ནས་ཕྱུགས་ཟོག་དུས་ཐོག་ཏུ་ཕྱིར་གཏོང་ཐུབ་པར་ཁག་ཐེག་བྱས་ཏེ། ཕྱུགས་ལས་ཐོན་རྫས“བརྟན་འཇགས་ངང་ཐོན་སྐྱེད་དང་འདོན་སྤྲོད”ཐུབ་རྒྱུར་སྐུལ་འདེད་ཤུགས་ཆེན་བཏང་ཡོད་པ་རེད། དེའི་རྨང་གཞིའི་ཐོག“ཐོན་སྐྱེད་བྱེད་པ”དང“དོ་དམ་བྱེད་པའི”ཕྱོགས་གཉིས་ནས་ཤུགས་རྒྱག་རྒྱུ་རྒྱུན་འཁྱོངས་ཀྱིས་ཕྱུགས་ཟོག་བཤས་རར་གཏོང་བའི་སྐབས་ཀྱི་བདེ་འཇགས་གཉེར་སྐྱོང་གི་ལྟ་སྐུལ་དོ་དམ་རྒྱུན་ཆད་མེད་པར་ཚད་ལྡན་དུ་བཏང་བ་དང་། ལྐོག་འབྲེལ་བྱས་ནས་རིན་གོང་གཅོག་པ་དང་ཁྲོམ་རར་ཚོད་འཛིན་བྱེད་པ་སོགས་ཀྱི་ཁྲིམས་འགལ་བྱ་སྤྱོད་ལ་རྡུང་རྡེག་ནན་པོ་བཏང་ཞིང་། མིག་སྔའི་བར་ཆེད་དོན་ལྟ་སྐུལ་ཁྲིམས་བསྟར་བྱ་འགུལ་ཐེངས12སྤེལ་བ་དང་། རིགས་སྣ་ཚོགས་ཀྱི་ཞིང་ཕྱུགས་ཐོན་རྫས་གཉེར་སྐྱོང་ས་ཚིགས200ལྷག་ལ་ཞིབ་བཤེར་བྱས་ཤིང་། ཁྲིམས་འགལ་ངང་ཕྱུགས་ཟོག་སྐྱེལ་འདྲེན་བྱེད་པའི་རླངས་འཁོར176ཕྱིར་མངགས་ཏེ་རྫོང་ཡོངས་ཀྱི་ཕྱུགས་ལས་ཐོན་རྫས་ཀྱི་སྤུས་ཚད་བདེ་འཇགས་ལ་འགན་ལེན་བརྟན་པོ་བྱས་ཡོད་པ་རེད། །

ཡོང་ཁུངས། རྨ་ཆེན་རྫོང་མི་དམངས་སྲིད་གཞུང་གཞུང་སྒྲུབ་ཁང་།