རྐང་པའི་རྩ་རེངས་པ་ཀལ་གྱིས་མ་འདང་བས་མ་ཁྱབ།
རྩ་རྒྱུས་རེངས་ཤིང་འཁུམ་པ་ལ་རྒྱུ་རྐྱེན་དུ་མ་ཡོད།
ལུས་ཀྱི་གྲུབ་ཚུལ། རྐང་མཐིལ་སྙོམས་པ་དང་པུས་ཚིགས་ལྡོག་པ་སོགས་ལུས་ཀྱི་གྲུབ་ཚུལ་ལ་གནད་དོན་ཡོད་པའི་རིགས་ལའང་རྐང་པའི་རྩ་རྒྱུས་རེངས་འཁུམ་འབྱུང་སླ།
ལུས་ཆུ་མི་སྙོམས་པ། རྔུལ་ཆུ་མང་པོ་ཟགས་ཏེ་ཚྭ་མང་པོ་དོར་བ་དང་། ཁྲག་རྒྱུན་བཙག་བཅོས་སྐབས་སུ་ཆུ་མང་པོ་ཤོར་བ་དང་ཅཱ་ཉུང་ཁྲག་ནད་བྱུང་བ་སོགས་ལས་ཀྱང་། རྐང་པའི་རྩ་རྒྱུས་ལ་རེངས་འཁུམ་འབྱུང་།
མཱེ་ཉུང་ཁྲག་ནད། སྦྲུམ་མར་རྩ་འཁུམ་རྒྱུས་རེངས་བྱུང་བ་ནི་ཀལ་གྱིས་མ་འདང་བ་ལས་གཞན་དུ། ཁྲག་ལ་མཱེ་ཉུང་བས་བསྐྱེད་པའང་ཡོད།
ནད་ཀྱི་རྐྱེན། དབང་རྩ་མ་ལག་གི་ནད་ལ་རྐང་པའི་རྩ་རྒྱུས་རེངས་འཁུམ་གྱི་ནད་རྟགས་འབྱུང་ལ། གཅིན་སྙི་ཟ་ཁུའི་ནད་དང་ཁྲག་མངར་དམའ་བ། ཆང་དུག་ཕོག་པ། ཨོལ་གོང་རྨེན་བུའི་བྱེད་ནུས་ཉམས་པ། བརྗེ་ཚབ་རང་བཞིན་གྱི་ཤ་ནད་སོགས་ལས་ཀྱང་རྐང་པའི་རྩ་རྒྱུས་རེངས་འཁུམ་འབྱུང་།
སྨན་གྱི་རྐྱེན། གཅིན་འབེབ་བྱེད་ཀྱི་སྨན་དང་གཉིད་སྨན་སོགས་སྨན་རྫས་ཁ་ཤས་ཀྱིས་ཀྱང་རྐང་པའི་རྩ་རྒྱུས་རེངས་འཁུམ་བསྐྱེད་པ་ཡིན།
རྩ་རྒྱུས་རེངས་འཁུམ་སེལ་ཐབས་གསུམ།
བསྲིང་འཐེན། ཐང་ལ་ཙོག་སྟེ་རེངས་འཁུམ་བྱུང་བའི་རྐང་པ་དྲང་མོར་བསྲིངས་པ་དང་། བྱང་ཁོག་མདུན་ལ་སྒུར། ལག་པས་རྐང་མཐིལ་ནས་བཟུང་རྗེས། རེངས་འཁུམ་མ་སེལ་བར་དུ་རང་གི་ལུས་པོའི་ཕྱོགས་སུ་ཡུན་གྱིས་འཐེན་དགོས། གལ་ཏེ་ཙོག་པུར་སྡོད་པར་སྟབས་བདེ་བོ་མེད་ན། རྐང་པའི་མཐེབ་ཆེན་ཤུགས་ཀྱིས་ཀེར་ནས་བྱིན་པ་ཤུགས་ཀྱིས་བསྲིངས་ན་ཡང་རེངས་འཁུམ་མྱུར་བར་སེལ་ཐུབ།
ཕུར་མཉེད། རེངས་འཁུམ་འབྱུང་བའི་ཤ་གནད་ལ་ཕུར་མཉེད་དང་ཡང་མོར་རྡེག་ནའང་རེངས་འཁུམ་སེལ་ཐུབ།
དྲོད་དུགས་པ། ལག་ཕྱིས་ཚ་མོའམ་གློག་སྟན་སོགས་ཀྱིས་རེངས་འཁུམ་འབྱུང་སའི་ཤ་གནད་ཀྱི་སྟེང་དུ་དུགས་པ་དང་། ཆབས་ཅིག་ཏུ་ཕུར་མཉེད་བྱས་ན་རེངས་འཁུམ་སེལ་བར་ལྷག་ཏུ་ཕན། །
འདྲ་པར་མནན་ནས་མཚོ་སྔོན་བོད་ཡིག་གསར་འགྱུར་ཚགས་པར་ཀློགས།
