由黃子華、許冠文及衛詩雅主演嘅電影《破·地獄》，截至日前港澳累積票房已經超過1.5億，繼續刷新紀錄。
衛詩雅此前已經憑該片先後奪得3個影后殊榮（華鼎、亞太影展、金揚花）。前晚（30號）第16屆澳門國際電影節上，衛詩雅再下一城再度封后。黃子華繼2023年憑《毒舌大狀》榮獲香港電影編劇家協會影帝後，澳門國際電影節第二次奪得影帝。而導演陳茂賢獲最佳導演，即係《破·地獄》成為3獎大贏家。由「票房毒藥」變「票房靈藥」嘅子華神，領獎時就多謝導演陳茂賢有勇氣拍呢種題材電影。又多謝比導演更有勇氣嘅老闆楊受成博士投資一部咁冷門題材嘅戲。「跟住我要多謝自己咁有勇氣嚟澳門，因為我嚟澳門係未贏過，由細到大，終於贏一次，多謝大家。」不過大獎細獎，都係對演員嘅一個肯定與鼓勵，恭喜子華神。而且最重要嘅係，可以為嚟緊4月第43屆香港電影金像獎提名，甚至獲獎增添信心。考慮到《破·地獄》喺票房與口碑上嘅成功，加上子華神喺片中表現。佢的確有望成為第43屆香港電影金像獎影帝嘅有力競爭者。雖然大會仲未最後提名，但初步分析一下對手，個個都好勁。作為《破·地獄》三大主演之一，Hello文演出令人眼前一亮。加上演技實力、經驗資歷，冚唪唥都有，機會同樣好大，甚至有略勝子華神一籌之可能。子華神老友，今年佢有兩部主演電影《談判專家》同《爸爸》。而兩部電影，均獲得觀眾同業界高度評價，尤其係近期嘅《爸爸》。自己個仔懟冧咗自己老婆同個女，自己要獨自面對囚犯阿仔——呢個世上唯一嘅親人。劉青雲嘅精湛演技，唔使舞刀舞槍，一個眼神就足以——石化全世界。轉跑道成功嘅峯少，主演《九龍城寨》演技備受肯定，票房成績又好，好可能係其中提名競爭者。刻意哨牙扮醜嘅城醒，喺《臨時劫案》飾演一位因冇咗個仔，而行上犯罪道路嘅父親，表現同樣引人矚目。另一匹黑馬，就係差一票，輸咗今屆金馬獎影帝嘅游學修。佢為咗喺電影《看我今天怎麼說》飾演好聾啞人士，跟聾人手語老師密集式學咗一年。雖然今年仲有《飯戲攻心2》《盜月者》《但願人長久》《紮職3》《焚城》等電影。最終邊個可以獲得提名，邊個可以跑出，仲有3個幾月時間。不過《破·地獄》勢頭咁猛，票房、口碑同埋細獎都有。
