噚日，對天王嚟講，可能真係唔係咩好日子。
四大天王當中，就有兩位同一晚「仆街」。
一個跌落台，一個仆到台邊。
● 城醒意外墮台
郭富城噚晚（27日）喺台北小巨蛋舉行巡迴演唱會。
點知喺台上又唱又跳未夠半場，就發生意外。
當時佢唱完快歌《分享愛》，興致勃勃咁同觀眾比心心。
之後佢退後時，冇留意到升降台未升返上嚟，結果一腳踏空～
成個人直墮台底，嚇到全場觀眾尖叫，影片瞬間喺社交媒體瘋傳。
事後，城醒重新上台，繼續完成餘下表演，展現出佢一貫嘅敬業態度。
另外，噚晚城醒仲有另一單意外，佢唱《越愛越好》時，隨手除咗件外套。
然後被件衫嘅珠片刮傷手指，期間不斷流血，要工作人員急忙衝上台幫佢止血。
對於粉絲嘅擔心，經理人小美回應指：城醒冇事，只係隻咪，碰到台邊發出巨響，多謝大家關心。
而城醒事後亦發文報平安，仲幽默提到，呢隻特製新咪，因為碰撞台邊被刮花，令佢好心痛。
作為當年喺台灣因為拍廣告而爆紅嘅佢，更感慨表示：希望大家鍾意呢次充滿「回憶殺」嘅歌單，感受到大家嘅熱情，好感動！
● 劉華跪跌台邊
同一晚，喺香港紅館，另一位天王劉德華都發生咗「仆街」嘅驚險場面。
當時，劉華正喺三米高台上表演金曲《練習》。
唱得興起嘅佢，跑向台邊打算同觀眾互動，但就不慎仆倒。
雙膝跪地，頭部仲一度伸出台邊位置，畫面相當危險。
台下歌迷驚慌尖叫，大叫「華仔、華仔」。
有粉絲描述，劉華倒地後，停頓咗大約六秒，整理好情緒之後，仲可以坐喺台邊繼續唱歌。
完全冇中斷表演，敬業態度令人佩服。
不過，亦有粉絲忍唔住吐槽：呢個台嘅設計係咪真係要搞到咁危險？
事實上，劉華呢次巡迴演唱會，呢個升降台嘅設計，似乎一直都有啲問題。
之前佢喺深圳巡演時就試過因為升降台問題踩空，險些墮台。
好彩佢即時扶住台邊，只有手部擦傷。
● 仆街敵不過專業
同一晚，12月27日，兩大天王分別喺兩個地方嘅舞台「仆街」。
無論係意外，定係天王們一時唔留神，都足以令人提心吊膽。
睇嚟，舞台設計真係要再認真檢討一下。
唔好再考驗已屆花甲之年嘅天王們（劉華63/城醒59）嘅反應能力。
當然，無論係城醒繼續完成演唱會，定係劉華喺意外後坐喺台邊繼續唱歌。
兩位天王都展示咗非常專業嘅造詣與表現。
寫到最後，突然醒起佢哋兩個33年前曾經一齊拍過一齣好好睇嘅戲——
《五億探長雷洛傳II之父子情仇》
再查咗下，好彩當年電影上映時間係10月10號，唔係12月27號～
◂ END ▸
